Yesaya 29 - Ma Jou ai Demo-demo o Totobelohoka

29:13-16 ko atailakouahi Ko idadiua o nyawa yomahipongono manga dorou Unangino

¹³ De ahao nanga Baluhu Ma Jou wohihingahu ai demo moi ma titi ai nyawa abe yomanoa o Yerusaleeme ma kotaka wato, “O nyawa naa ona yomahingahu ato yagou-goungu to Ngohi ahi nyawa, de o higiriiri ma demo Ngohino ipaata manga uruoka de aino. Masara abe igoungu gea manga hiningaka de yomatingakika duru ma gurutika. De ma oraha ato yomahuba-huba Ngohino de gea yanii-niiki dika o nyawa manga hiaturu.”

¹⁴ “Ho mangale ma titi manga hininga hokogea ho Ngohi ahao todiaioli o heheranga manga hidogoronaino. De ma heheranga gea duru o fara moi abe yahitodokana onangika. De genangino ahao tahimatoko abe o nyawa manga sosawaro gea ko kia-kiaua, de ngaro o nyawa abe duru de manga tobahiorikoka masara manga hininga ko aboaikaua genangika!”

¹⁵ “De o nyawa onagona dika abe yahitaili yagogono manga hidee la ato ufa Ma Jou o Yawe wohioriki, ona gea ahao wabinaaha onangika. Abe utu yoigo yomatohiki yokarajaanga manga hidee moi de yomagorakiye ato, ‘Ko moiua inahioriki nanga datoro, de ko ma iwa abe ka idadi inamake!’

¹⁶ Ho naa to Ngohi ahi demo onangika tato, ‘Masara ti ngini nia hiningaka de duru nihikawalimi ma gou-goungu la idadioka o ngeluku dika!’ Angamoi Ngohi totobatulaada mata-mataika masara nia hiningaka de nimagorakiye ngini ma hirete hiadono niafikiri Ngohi ko kia-kiaua tadaene. Abeika tonahiketero ngone abe Ngohi naa hoka o nyawa yotobadiai o rube o tonaka atau-taulino, de ngini nimaketero ma rube abe todiaioka. Ho sarakia, itiai nako ma kiahonanga abe idadioka itemo unangika abe watulaadauku ato, ‘Ou, una gea ko wohihidadiua ngohi!’? De irahai nako ma rube ena gea itemo ma titi una ato, ‘Una gea ko kia-kiaua wohioriki!’? Koua! Duru ko itiaiua nako gea abe wohidadioka itemo ma dorou Unangika abe watulaadauku!” Hokogea nanga Baluhu ai demo ngohi o Yesayaino ma titi o Yehuda ma nyawa.