Yesaya 11 - Ma Jou ai Demo-demo o Totobelohoka

Ma Jou ai Womaha ai karajaanga o Mesia ai wowangoka O Hitararono ma hidogo

¹ Nanga koano ma dihiraino o Dautu de ai ngofa-ngofakuku de ai totoforauku ona yomaketeturuuru yodadi to ngone nanga koano, masara ahao naga ma oraha abe ko hokogenangokaua. De abe ma oraha o koano ma kuaha agoraka o Dautu manga tauoka de aino, gea imaketero hoka o gota ma amoko atolangoka de ma hou to ena ma agere dika. Masara dokenangikali de ahao naga ma oraha abe manga agere gea itorioli. De gea ma titi abe o Dautu ai totoforaukuino de naga womatengo woboa de unangoli wodadi wokoano.

² De Ma Jou o Yawe ai Womaha ahao womanoa unangoka de wihihira-hira, la una gea ahao duru wososawaro. Abe Ma Jou ai Womaha ahao wihiakunu unangika la to una ai hidee ka idadi wodiai de idadi irahai, de unangoo ahao ka idadi duru wihioriki itararono Ma Jou o Yawe ai hininga, de duru wihoromati Unangika de ai hawana ma horomati.

³ De una gea o Dautu ai totoforaukuino ahao wogarago dika abe wihingounu Ma Jouika. De abe ma oraha una waurusu o nyawa manga howono de ai putuhu ko ihititiua ai lakoino dika abe ka idadi wamake, de ko ihititiua ai ngaukino dika abe o nyawa manga ade-ade ma demoino. Masara gea ai putuhu ahao ihititi o totiaiino angamoi una duru wososawaro Ma Jou ai totiaiika.

11:3b-12 ko atailakouahi

⁴ De ngaro o hu-huha ma nyawa masara una waurusu de ai hininga ma totiaiino, de nako ona abe hatoli ko kia-kiaua adaene o duniaka, onangoo waurusu itiai la ufa o nyawa yao ko itiaiua. Masara nagali ona abe yotobadiai itorou, de to una ai putuhu onangika gea o hohowono ma dodubuho imaketero hoka o boboha ai uruoka de aino adaene onangika. Ho ma titi ai uruino dika de o dorou ma nyawa wahohonenge.

⁵ Ho mangale ma titi una waurusu de waputuhu itiai abe imakiniiki de Ma Jou o Yawe ai dodotoko, de una watobagou-goungu ai demoino mata-mataika, ho una gea womahidiaioka la wonahihira-hira ngone ai gogianongoru.

⁶ De ma oraha gea ahao o domba ma ngofaka de o fuhuku ma kaho ka idadi yomahingimoi / yomahitonakamoi de barikua ma kaho ko aolomua ma dombaika, ibiaha dika. De hokogenangoo de o fuhuku ma boki de o kabingi abe ngaro ma dodagi imakitigino masara ko kia-kiaua idadi. De o hapi ma ngofaka, ngaro o singa ma boki iboaino ma ko aruwaeua enangika abe ma dihiraino de kiani idadi ma boki ma inomo. De hongoli o ngofaka dika ka idadi wahihira-hira ma aewani mata-mata gea de ko kia-kiaua idadi unangika.

⁷ De o hapi de o fuhuku ma aewani ma amo-amoko o beruanga ka idadi imasapurino la ma inomo imalingiri o ngi moioka de ma hininga iborisosanangi dika. De ngaro to ena ma ngofa-ngofaka ma ka idadi imaidu imakadateke de gea ko adodoaua. De ma fuhuku ma boki o singa, ena gea ko aolomokaua o aewani ma roehe masara ka aolomo o ruruubu dika imaketero hoka o hapioli ma inomo.

⁸ De hongoli o ngofaka ma gilau ma oraha gea ka idadi wogogule o dodiha ma biha ma ngioka, de ngaro womahidoakika ai giama duru o dodiha gea ma ngi ma goronaika masara ko iwitudukua.

⁹ Ho igoungu, abe ma oraha gea de duru ko iwaka abe yahiodiri utuika to Ngohi ahi loku ma debi-debinoka de hiadono ahi tonaka ma amokika. Angamoi gea o dunia naa aomanga de o nyawa abe naga manga hingounu Ngohi Ma Jou o Yaweino, abe imaketero hoka ma ngooto aomangiye de o gahi.

¹⁰ De dokenangika ma oraha adonoka de o Dautu ai toforauku gea womaokoino de womahimatoko o dunia ma nyawa mata-mataika. Abe una wodadi hoka o dodunguu moi o dunia ma amokika la o nyawa yokokiboaino de yomatoomuino unangoka. De o dunia ma dutu mata-mata yomahitigino unangino la wahihira-hira, de to una ai gogere duru ma hohailoa.

¹¹ De ma oraha gea de nanga Baluhu idodutu ahao watoomuinoli ai nyawa manga hou, abe naa ma hinooto ibooto ai nyawa watoomuino. De gea ai nyawa wale de wahigilio o tonaka iwoe-woeino. Abe utu o Asuroka de nagali o Mesiiri ma tonakoka, de utu o Patorosoka, o Etiopia ma tonakoka, o Elamoka, o Babeloka, o Hamatoka, de o nuuhu utuino abe imanoa kohagurutika.

¹² De ma oraha gea una wohidutuboiye ai dodunguu la o dunia ma nyawa mata-mata ka idadi yamake. De genangoka watoomuinoli o Isiraele ma nyawa abe ma dihiraino de yaduhuika manga tonakoka de aika ma homoaika. De hokogenangoo o Yehuda ma nyawa abe yahikabarihoka o dunia ma amokika watoomuinoli unangino.