Yeremia 6 - Ma Jou ai Demo-demo o Totobelohoka

O Isiraele ma nyawa manga lawana ko itogu-togumua Ma Jouika

⁶ Hokonaa Ma Jou o Yawe Wokokurutiye ai hingahu ai uru ma dodofangika o Yeremiaika abe ma titi ai hohowono o Yehuda ma nyawaika. De Una ai hohowono wapake manga musu la ona gea yahikangela ai nyawaika. Abe Ma Jou wotemoka wato, “Ngohi Ma Jou o Yawe tahuloko o Yerusaleeme ma kota ma nyawa manga musuika. De ahi hingahu manga musuika hokonaa, tato, ‘Ngini kiani o gota ma ngoe nimadolangino la ka idadi niapake ma oraha niaparangi o Yerusaleeme ma kotaika. Abe ngini kiani o kota ma dadaduhu ma poretoka o tonaka de o hakaru duru niafafo la idadi o ngute hidutu adono o Yerusaleeme ma kota ma dadaduhu ma bareniye la niangohama. De hokogea tinihuloko angamoi o kota naa tahohowono ma titi yaoluoka de ma dorou mata-mataika.

⁷ Abe o Yerusaleeme ma kota ma nyawa manga dualono ma dorou ibubungiye imaketero hoka o akere abe ka ihikaika ibubungiye o tonakino. O kota ma ngekomo yogetongo naga o hikangela de o hibinaaha ma boa-boaka abe ka ihikaika ihabaka aika-aino. Ho Ngohi Ma Jou tohiromanga, “o kota naa de ma panyakeoka,” de ma panyake gea de ma naboka abe iwaraka ka ihikaika ahi himangoka.’” Hokogea Ma Jou womahingahu ai hininga ma dohata o Yerusaleeme ma nyawa manga howonika hiadono wapake manga musu la wahohowono.

⁸ Masara Ma Jou ai hohowono ko wohidagiuahi de Una wato ai hitiari ma demo ma baha kiani o Yeremia wadofangohi onangika, wato, “Ngini abe nigogere o Yerusaleeme ma kotaka nitotoihene! Abe de ahi hohowono ma demo naa tinihidoaka ahi hitiari ma baha nginika! De nako ngini ko nihihigihenua de ahao ti ngini nia tonaka mata-mataika tohihomoa.

⁹ Abe Ngohi Ma Jou o Yawe de ahi kuaha naga mata-mataika de naa ahi hitiari nginika, o bobinaaha ahao inidiodaka ngini mata-matauku! De imaketero hoka o angguru ma redi ma dutu ai angguru ma hofoko ai nyawa duru yatofi ibootino. Masara ipahaino de wahuloko la yogilio genangika yotailakoli la ma hofoko abe naga ma hou kiani yototuruino yahou ena gea abe ko yamataua ma oraha yohira-hiraika yatofi. De duru imaketero hokogenangoli abe nia musu initoma de inihihupu nia ngoe de ahao inigilio ngini o Isiraele ma nyawaika de inihou inihihupu nia kotaino.” Hokogea Ma Jou ai hohowono ma demo abe kiani ai uru ma dodofanga o Yeremia wadotaka o Yerusaleeme ma nyawaika de wadofanga onangika.

¹⁰ De Ma Jou ai demo wohigila-gilahi abe o Yeremia kiani wadofanga onangika, wato, “Masara onagonaika naga o Yehuda ma nyawaka abe Ngohi Ma Jou ka idadi tahitiari de ona ihihigihene? Ko moiua! Abeika ona o Yerusaleeme ma kotaka manga ngauku imaketero hoka ajumu-jumuoka hiadono imakadaene de yatopongonoka ho ko idadiokaua yomahigihene. Ona imaketero hoka yaemono to Ngohi Ma Jou ahi demo-demoika!

¹¹ Ho naa to Ngohi ahi ngamo duru ifae onangika! Igoungu ko idadiokaua tomatongohono ahi ngamo tatumungu la ufa itagi manga dorouika.” “Ho tagopoa ahi ngamo ma hohowono onanguku o Yerusaleeme ma kotauku. Ngaro yadaene o ngofa-ngofaka abe yogogule o ngeko-ngekomoka, de ngaro o goo-goduuru manga doomu homoi-homoiika, de ngaro o balu-baluhu o rokata de manga feka-fekata, de ngaro o be-be de o ete-ete abe yaperekioka, masara ahi ngamo ma hohowono yadaene ona mata-mataika.

¹² Ho ma kokangela abe ahao yadaene onangika ilago-agomo hiadono manga boritau ahao naga o homoa ma nyawa yomahitoona la onangoli yokokigogere manga tauoka. De hokogenangoli de manga redi mata-mataika ahao idadi to nyawa manga redi. De manga feka-fekatoo manga musu yahidadi to onangoli manga fekata. Hokogea manga kiahonanga de manga ngo-ngofeka manga musu ahao yomahitoonangoka. De hokogea idadi ma titi Ngohi Ma Jou o Yawe tomaputuhoka tato kiani tahohowono ona abe ma dihiraino Ngohi tahigogere o tonakoka naa.” Hokogea Ma Jou o Yawe ai demo de ma buturungoka.

¹³ De Ma Jou wotemohi wato, “Abe to Ngohi ahi nyawa o Yerusaleeme ma kotaka naa ngaro o nyawa biaha de ka hiadono ona yokokurutiye masara mata-mataika yomalingiri manga utumu abe ka ihikaika yatobaelu-eluku de yatobarusi-rusi o nyawaika. De ahi uru ma dodofanga de ona abe o nyawa yahidemo Ngohino onangoo yotobaelu-eluku!

¹⁴ De ngaro Ngohi tahingahuoka abe ahi nyawa yatobahowono ho idadioka o panyake abe yao o hone-honengika, masara manga hihira ato, ‘O panyake gea ko kia-kiaua idadi, iti nia hininga iriidi de o dame ma garagoka.’ Hokogea manga hihira yalaru masara ko yagou-goungua ato mata-mataika irorahai dika de ko iwa ma bodito! De angamoi manga hihira gea ona yakokieluku ato o dame naga manga nyawa manga hidogoronaka masara o dame gea ko iwa de manga bodito duru itigioka.”

¹⁵ “De abeika ahi nyawa naa, sarakia ona yamaleke ma oraha yodiai abe Ngohi Ma Jou duru tadohata enangika? Koua, ona ngaro ka o nyawa yamake ma oraha yodiai duru itorou masara ko yomamaoua manga maleke hiadono manga himangoka ko iwa manga maleke ma huha ma dodunguu. Ho ma oraha manga musu yangika de ona ko yomatogu-togumua ahi nyawa yatoma hiadono manga honenge iruba manga gogianongoru manga honenge ma hidogoronauku abe yohiraino yatomaka. Hokogea de o hohowono ahi dohatino ahao ahi nyawa tahitipokouku ahi himangoka. De hokogea Ngohi Ma Jou o Yawe ahi hininga tomahingahuoka.”