Yeremia 31 - Ma Jou ai Demo-demo o Totobelohoka

31:2-3, 10-14, 16-20 ko atailakouahi Ahao o Isiraele ma nyawa manga gogao Ma Jouika itiaiokali

² Ma Jou o Yawe wotemo wato, “O Isiraele ma nyawa abe ko yoboditoua ma oraha manga musu yaparangi onangika, ona gea ahao yamake ma rorahai o tonaka ma kakaahaka. De nagali ahao yamake o hiaini manga dodagino.

³ De ma tonaka ma guru-gurutika gea de ahao Ngohi o Yawe tomahimatoko onangika. De gea tomahimatoko de totemo onangika tato, ‘Ngohi naa tinidora nginika, de ahi dora gea itongohono ka hiado-adonika. De gea ma titi hiadono Ngohi ka ihikaika tatobagou-goungu nginika.’” Hokogea Ma Jou o Yawe ai demo ai nyawaika.

¹⁰ De naa o dunia ma nyawa ma dutu mata-mata kiani yotoihene Ma Jou o Yawe ai demoino, ho ai demo gea kiani yahingahu-ngahu o tona-tonakoka abe duru kohagurutika de abe o gahi ma date-datekoka. De hokonaa to Una ai demo, wato, “Una abe ma dihira de wahikabarihoka ai nyawa o Isiraele ma nyawa o tonaka utuika, Una gea ahao watoomuinokali ai nyawa gea Unangino. De ahao Una wagoana irahai abe imaketero hoka o domba ma gogoana ai duduono wopaliara.”

¹¹ De Ma Jou o Yawe ai demo gea ma titi abe Una ahao waduhunu o Yakubu ai totoforauku. Ho ngaro onagona dika ma nyawa abe yahipareta onangika masara gea Ma Jou ahao wahihupu to ona gea manga giamoka de aino.

¹² De o Isiraele ma nyawa gea ahao yodoa o Siono ma lokuiye de yopoa-poaka de manga garago. Angamoi ma oraha gea de ona mata-mata duru yogogarago ma titi Ma Jou o Yawe ai hidailako onangika, abe hoka o pine, de o angguru ma gohaka ma teongo ma hungi, de o saitunu ma minya. De nagali Una wahidailako to ona manga domba ma ngofaka de o hapi ma ngofaka. Ho ona ma oraha gea ngade-ngade hoka o redi moi abe to ena ma akere duru awedonoka ho mata-mata iwango irahai, angamoi onangoka duru ko iwaka manga hininga ma huha.

¹³ De Ma Jou o Yawe Una wotemo wato, “Ma oraha gea de o momoholehe ona yoselo ma titi manga morene ma amoko. De ngaro o goo-goduuru de ngaro o nau-nauru abe yaperekioka, masara ona mata-mata duru yogogarago. Abe Ngohi ahao tagoraka manga huha onangino de taturuuru de o gogarago. De onagona dika abe manga hininga ko isanangiua, ona gea talaru de tahigaro hiadono onangoo yogarago.

¹⁴ De abe ona ihileleani Ngohi ho yodadi ahi hidemo ma nyawa, Ngohi ahao duru tahidailako irahai onangika. De ahi nyawa mata-mata ahao yamake o hidoaka duru ma rorahai ahi giamino hiadono ko iwaka manga perelu onangoka.” O hingahu ma himatoko abe ma titi ahao naga ma oraha o Beteleheeme ma nyawa duru yohuha ma oraha manga koano o Herodese watoma manga ngofa-ngofaka o nauru abe naa ma duru yomaboa ka hiadono ona abe manga ngumuru o taongo hinooto. Hokogea o koano o Herodese wohiaturu done ahao idadi naga o nauru abe ko to unangua ai ngofaka abe ahao wodadi o Yehuda ma nyawa manga koano. De ma ade-ade gea hamake o Matiusu 2:18.

Ma Jou ai himatoko ma demo ma titi o Yehuda ma nyawa manga koano O Hitararono ma hidogo

¹⁵ Hokonaa Ma Jou o Yawe wonahingahu wato, “Ona o Rama ma kapongoka manga huha ihigari, Ona o ngo Rahele ami totoforauku manga huha ma gari. De manga gari gea duru kohaamokiye, Angamoi gea manga ngofa-ngofaka yagari, De ngaro o nyawa yalaru ma ko yomatogumua yoari, Angamoi manga ngofa-ngofaka gea ko yaiwaka.”

¹⁶ Masara ipahaino de Ma Jou o Yawe watemo onangika wato, “Ibootohi niari! De ngaro ufa dika nia koongo ka ihikaika itifauku! Angamoi ti ngini nia toduba ma gou-goungu gea tamakeoka ho tinihibalaha de ma rorahai nginika. Abe ti ngini nia ngofa-ngofaka ahao yolio nginino abe nia musu manga tonakoka de aino yoboa. De gea ahao kiani idadi angamoi Ngohi naa Ma Jou o Yawe abe tinihibehehongoka!

¹⁷ De naa tinihingahu nginika abe ahao nia totoforauku yamake ma rorahai manga wowangoka. Abe nia ngofa-ngofaka ahao yokokilio to ona homoi-homoi manga tonakino.

¹⁸ De Ngohi naa toihenoka ngini o Isiraele ma nyawa nia daiana ma demo abe niato, ‘Ngomi naa mimaketero hoka o hapi ma ngofaka abe ko iwa ma hingounu to ena ma dutuika. De ahao Ngona nomidotoko hiadono ngomi mimahioriki mia hininga. Ho naa ngomi mimagahoko la ka idadi minigilio Ngonaika la ka ihikaika mininiiki, angamoi ka Ngona dika to ngomi mia Jou o Yawe.

¹⁹ De igoungu miniporetoka masara ipahaino de naga mia toduba ho mia hininga miaturuuruoka. De abe mia hininga mimahiorikoka de ahao mimapoha-poha mia aluiha ma titi mia hininga ma toduba gea. De igoungu mia hiningaka de duru imimaleke ma titi mia datoro ma pese-peseke abe ko mibaluhuahi de midiaioka.’ Hokogea ngini nimahingahu nia howo-howono Ngohino.

²⁰ De ahao Ngohioli tomahingahu ahi hininga ma titi ngini o Isiraele ma nyawa. Abe ngini naa nidadioka to Ngohi ahi ngofa-ngofaka abe duru tinidora de duru tomorene nginika. De ngaro ma ngoe Ngohi kiani tinitaere nginika masara ahi hininga ma dora ka itagiohi ngini ahi ngofa-ngofakika. De mangale ma titi to Ngohi ahi hininga ma dora ma hiokoo duru itagi nginika, ho kiani tiniao de ahi dora ma hiokoo ma amoko. De hokogea ahao idadi nginika angamoi Ngohi naa Ma Jou o Yawe tinihibehehongoka!”