Yeremia 3 - Ma Jou ai Demo-demo o Totobelohoka

3:12-14, 19-22 ko atailakouahi

¹² De ahao Ma Jou wohihuloko wato, “Ngona kiani noiki de nadofanga ahi demo naa o Isiraele ma nyawaika, de gea kiani de ani ilingi ma amokiye notemo. Nahingahu nato, ‘Ngini o Isiraele ma nyawa abe nirehenoka Ngohino ma homoaika, duru toigo la nitotoihene ahi demoino naa. Ngohi Ma Jou o Yawe tiniahoko la ngini mata-mata nihigilio Ngohino. Angamoi ahi ngamo nginika ko iwaka ma titi ahi dora ma hiokoo ilaku ahi hininga ma goronaka.

¹³ Ho gea ka idadi nilio Ngohino, masara naga moi kiani nimahingahu la itararono. Abe kiani nimangaku ma titi nia howo-howono angamoi niatilakuroka to Ngohi Ma Jou o Yawe ahi demoika. Ho ngini kiani nimangaku abe nimahidoakoka o jou de o pangao utuika la nimahuba-huba enangika o gota ma timi-timiuku. De abe ahi pareta ma demo nginika niatilakuroka, enangoo kiani nimahingahu la ka idadi nanga gogao ilioli abe hoka ma dihiraino.

¹⁴ Ho ngini abe tinihiromanga ahi ngofa-ngofaka nikokirehenoka ma homoaika, ma oraha naa de tiniahoko la nikokilio Ngohino. Angamoi Ngohi naa ti ngini nia Baluhu idodutu.’” Hokogea Ma Jou o Yawe ai demo o Isiraele ai nyawaika.

¹⁹ De ahao Ma Jou wotemo o Isiraele ma nyawaika wato, “Ngohi ahi hiningaka tomatemo tato, ‘Duru tosanangi nako hiadono ka idadi ngini tiniao abe imaketero hoka ahi ngofa-ngofaka idodutu! De togarago dika tinihidoaka o tonaka duru ihohailoa, abe ngaro o dunia ma amokika masara ka enangohi duru irorahai ma tonaka! De gea tato bote ngini ahao nihiahoko nia Baba de ka ihikaika naga nia hingounu Ngohino.

²⁰ Masara ngini o Isiraele ma nyawa nidadioka hoka o fekata abe duru ko magou-goungua ami rokatika. Angamoi ngini naa nihinoaka Ngohi imaketero hoka o fekata abe minoa ami rokata ma titi ami hininga ko itagiokaua unangika.

²¹ Masara abeika nia datoro gea ma hofoko. Angamoi ma oraha naa de ka idadi hoihene ngini o Isiraele ma nyawa nia ilingi o loku-lokuoka. Abe ngini niari-ari de nimagahoko o dora ma hiokoo ma titi nia kangela inidaenoka. De gea igoungu ngini nikangela angamoi nimangirikoka la o howo-howono ma ngekomo nianiiki, de nihiporetoka Ngohi nia Jou o Yawe ho ko iwa nia hingounu ahi demoino.

²² Ho naa Ngohi tinihigaro abe ngaro ngini nirehenoka masara toigo la nilio Ngohino. De gea ka idadi niboaino de ahao Ngohi tinihitogumu la ibootohi nirehene ma homoaika. De duru toigo la ngini nihitemo Ngohino niato, “Ngomi naa miboaka, de mimahitigi Ngonaika angamoi ka Ngona dika mia Jou o Yawe.” Hokogea ti ngini nia demo abe duru toigo toihene nia uruoka.’”