Yeremia 2 - Ma Jou ai Demo-demo o Totobelohoka

2:1-3, 20-22 ko atailakouahi Abe ma titi o Isiraele ma nyawa manga gogao sarakia Ma Jouika

¹ De Ma Jou o Yawe wotemo ngohino, wato,

² “Ngona kiani noiki o Yerusaleeme ma kotaika de nadofanga ahi demo onangika la ona mata-mata ka idadi yoihene. De hokonaa notemo onangika, nato, ‘Ngohi Ma Jou o Yawe tinihihohininga abe hokokia nanga gogao ma dihiraino. Abe Ngohi duru tinihininga ma oraha ngini ko itedekanuahi nidadi to Ngohi ahi nyawa, de gea nia hininga duru itagi Ngohino la niato nihihisanangi. Ma oraha gea ti ngini nia dora itagi Ngohino imaketero hoka o ngofeka momatengo abe ahao yoilaka de ami rokata ho duru midora unangika. De ma dihiraino gea ngini ka ihikaika nihiniiki o tonaka ma kakaahaino, abe genangoka ko iwa o joro.

³ De ma oraha gea ngini o Isiraele ma nyawa nimadingakoka Ngohi Ma Jou o Yaweino, ho ngini nimaketero hoka o redi ma gugutuku duru ihira-hira abe ihihidoaka Ngohino. De gea ngaro onagona dika inihidee la inihibinaaha masara Ngohi tohikawalimi ho tohiaturu la o bodito yadaene onangikali. Ho Ngohi duru tinisanangi de duru tinigoana irahai ma oraha gea. Hokogea Ngohi Ma Jou o Yawe ahi hohininga ma demo nginika.’”

²⁰ De ahao Ma Jou o Yawe wohigila-gila ai demo ai nyawaika, wato, “Masara naa duru ma dekanoka abe ngini nioluku nihihingounu Ngohino de niaumo nia papakiti abe ma dihiraino de homahidapakiti moi ngini de Ngohi. Abe ngini nimahingahu niato, ‘Ngomi mioluku mimahuba-huba Ngonaika!’ De gea igoungu abe ko nimahubakaua Ngohino, masara nako o jou de o pangao utuika de ngini duru nisanangi nimahuba-huba de nimahidoaka enangika! Abe to ena ma huhuba ma ngi mata-mata o loku-lokuoka de o gota-gota ma timiuku de nimahuba-huba enangika! De nia datoro gea tohiromanga tato ngini nimaketero hoka o ngofeka abe manga badanga yomatobafukunu o nau-naurika de duru yosanangi dika yomaidu de o nauru ma homoa de manga badanga yomahidoaka dika onangika!

²¹ Masara ma dodihiraino gea de ngini tinietongo hoka o angguru ma roehe duru ma rorahai ho Ngohi tinidatomo ahi tonakoka. Masara ipahaino de ahi datomo gea imaturuuruoka, abe ma titi ngini nidadioka hoka o angguru ma roehe ma fuhuku ho ti ngini nia hofoko duru itorou de iwederoka. Ho ngini done ma titi o kia hiadono nimahitorouoka hokogea?

²² De ti ngini nia howono gea ngaro o sabongo ma buturungu masara duru ko akunua aofi. Abe ngaro ma sabongo ma amoko niapake de nimagiho-gihoro ma dekana masara ka idadiohi tamake ma hengo-hengo abe nagahi nia bada-badangoka, abe ma titi nia howo-howono nagahi nginioka. Hokogea Ngohi Ma Jou o Yawe ahi dodaere ma demo nginika.”