Yeremia 19 - Ma Jou ai Demo-demo o Totobelohoka

O hiketero abe ma titi Ma Jou ai hohowono o Yehuda ma nyawaika

¹ De ahao Ma Jou o Yawe wotemoli o Yeremiaika wato, “Noikohi nomaijaino o rube moi. Nomaija ipaha de ahao noiki natutumu o nyawa manga balu-baluhu de o hidemo ma nyawa manga hohidimono yamuruono naga. De gea nahoko la ona de ngona nimakiniiki ani dumutika.

² Abe ngini kiani nihupu o Yerusaleeme ma kota ma dadaduhu ma ngoranino abe ihiromanga o Rube Itefu-tefuruku ma Wale ma Ngorana. Nihupuoka de ahao ma digi-digino naga o Bene-Hinomo ma dola genangoka. Ho ma dolaka gea nimahiadono de ahao kiani niadofanga onangika to Ngohi ahi demo naa.

³ Abe Ngohi tato, ‘Ngini o Yehuda ma nyawa manga kokoano de o Yerusaleeme ma kota ma nyawa, ngini mata-mata kiani nitotoihene to Ngohi ahi demoino. Angamoi Ngohi naa ti ngini o Isiraele ma nyawa nia Jou abe duru Tokokurutiye. De naa Ngohi tinihingahu tato ahao o hohowono duru ma amoko tohiboa nia tonakuku naa. De nako hiadono idadioka de o nyawa mata-mata abe yoihene ma titi ma hohowono gea de duru yoheranga de hiadono yokokihawanoka.

⁴ De gea Ngohi tahohowono ma tonaka ma dola naa mangale ma titi ma nyawa nenangoka ihidadidorou manga datoro ma dorouino. Abe o nyawa yotobatufu-tufuku o manyanyi o jou-jou ma homoaika. De ngaro ma dodihiraino masara ko ma moiuahi manga totofora eko manga kokoano o Yehuda ma tonakoka naa yomahuba-huba ma popangaoika gea. Naa de ahao naga o nyawa abe yomahuba enangika. De nagali manga datoro ma dorou moioli, abe o nyawa manga awunu yahikopoa nenanguku ngaro ma nyawa gea ko iwa manga dorou ho tanu ko iwa ma titi la yahohonenge.

⁵ Abe ma nyawa nenangoka yomadiai manga huhuba ma ngi-ngi la ka idadi manga ngofa-ngofaka yahidadi manga huhuba iharo-harongo, de hokogea yodiai ma oraha yomahuba-huba manga jou o Baalika! De Ngohi naa ngaro ma dodihiraka hiadono ma oraha naa masara ko ma moiuahi tahuloko o nyawa la o datoro hokogea ma dorou yodiai. De ngaro ahi hiningaka dika masara ko ma moiuahi ipuda ma datoro ma dorou gea, ho duru ko Ngohiua ma titi hiadono o nyawa yotobadiai hokogea!

⁶ Ho Ngohi tinihitiari nginika tato ahao naga ma oraha abe ma wale ma ngi naa ko ihiromangokaua o Tofete de ko ihiromangokaua o Bene-Hinomo ma dola. Masara ma oraha gea ahao ihiromanga enangika ato o Doma ma dola angamoi o Yehuda manga musu yatoma o nyawa manga ngoe nenangoka.’”

⁷ “‘Abe ngaro o Yerusaleeme ma nyawa de o Yehuda ma nyawa mata-mataika yomahidodiai ma titi manga wowango ma hidee masara manga hidee gea tohirusaka. Angamoi Ngohi todiai la to ona manga musu yoboaino de yahikala hiadono o parangi ma gogiriaka de manga ngoe yohonenge ma titi manga musu manga humarangino. De gea ahao manga hone-honenge ihikabarihi ma dola ma amokika naa ho idadi o aewani o fuhuku de o totaleo ma inomo.

⁸ De Ngohi ahao todiai la o Yerusaleeme ma kota idadi duru itorou, hiadono o nyawa abe ahao yatilakuru ma kota gea yamake de duru ka ihikaika yaemono enangika. De ona gea ahao yaemono enangika ma titi ma kokangela mata-mata abe idadioka ma kotaika gea.’”

⁹ “‘De gea manga musu ahao yoboaino de yakodoruhu ma kota hiadono yahigororomino la ko idadiokaua o Yerusaleeme ma nyawa yohupu yowohama. De ahao ika ika o kota ma nyawa ma oraha gea duru yokangelaholi angamoi manga inomo yakiditoko ho ka yotobahafini dika. Abe utu manga hafini ikiriakaholi hiadono yahohonenge manga dodiawo eko to ona ma hirete manga ngofa-ngofaka la manga roehe ka idadi yaolomo.’ Hokogea ahi demo abe ngona o Yeremia kiani nadofanga o nyawa manga balu-baluhika gea.”

¹⁰ “De abe ma oraha nahingahu ipaha ahi demo de ahao duru to ona manga hima-himangoka ngona kiani ma rube abe naga ani giamoka naumo dau ma tonakuku.

¹¹ Naumoka de ahao naga ahi demo moioli kiani nadofanga onangika, nato, ‘Ngohi naa o Yawe abe duru Tokokurutiye tinihingahu abe ngini ahao nimaketero hoka o rube ma wale gea abe itefu-tefuroka nia himangoka de ko idadiokaua o nyawa yodiai la iahumoli. Angamoi Ngohi ahao tohiaturu la o Yerusaleeme ma nyawa de o Yehuda ma nyawa mata-mataika tahibinaahaka. De manga hone-honenge ahao yapohu-pohuku naa o Tofetoka hiadono ma ngi akokiomangoka ho ko idadiokaua yalungunu nenangoka.

¹² De hokogea Ngohi Ma Jou o Yawe tahohowono ahi nyawa abe yogogere ma kotaka naa. Abe o Yerusaleeme ma kota ahao idadi itorou ahi himangoka imaketero dika hoka o wale ma ngi naa abe ihiromanga o Tofete.

¹³ Ho ma kota ma tau mata-mataika ngaro o kokawaaha manga tau ka hiadono o Yehuda manga kokoano manga tau masara mata-mataika idadi itorouoka ahi himangoka. Angamoi ngini o Yerusaleemoka nidoa-doa nia tau ma lokuiye la dakenangoka nimahuba-huba nia jou-jou ma homoaika. Abe utu nitobatufu-tufuku o manyanyi ma oraha nimahuba o muru-murumika, de nagaoo o ngokere ma huhuba o angguru ma hofokino abe nimahihuba o jou-jou utuika. De gea ma titi hiadono ahao tinihohowono nginika.’”

¹⁴ De o Yeremia Ma Jou ai hingahu gea wadofanga onangika ibooto de wosobo wanoaika o Tofete de woiki Ma Jou o Yawe ai Tauika abe o Yerusaleeme ma kota ma goronaka. De woboa Ma Jou ai Tau ma loaino abe genangoka ona o nyawa yomatoo-toomuino de hokonaa wahingahu ona mata-mataika, wato,

¹⁵ “Ma Jou o Yawe Wokokurutiye, abe Una ti ngini o Isiraele ma nyawa nia Jou, hokonaa ai demo nginika, wato, ‘Ngohi ahao tohiboa o kangela abe idadi o bodito duru ma amoko o Yerusaleeme ma kotaino naa de o kapo-kapongikaoo abe imakokadateke de o kota naa. De o kangela gea duru imaketero abe hoka Ngohi ma dodihiraino tinihingahuokau. De kiani hokogea todiai angamoi ngini nidadioka o nyawa abe nia pea kohadogowini hiadono ka ihikaika ko nihihigihenua Ngohi abe ahi hingahu nginika.’” Hokogea o Yeremia wahitiari de Ma Jou ai hingahu onangika.