Yeremia 18 - Ma Jou ai Demo-demo o Totobelohoka

Pasala 18 ko atailakouahi O hiketero ma demo ma titi o tonaka ma tau-taulino

¹ De ipahaino Ma Jou o Yawe wohitemoli ngohino wato,

² “Yeremia, ngona nosobo noiki nitutumu unangika abe wotobadodiai o kiahonanga o tonaka itau-taulino. De nomahiadono to una gea ai ngiika de ahao nagali ahi demo ngonaika.”

³ Ho ngohi taniiki ai demo de toiki una gea ai karajaanga ma ngiika, de ma oraha tomahiadono de timake una ai karajaanga ma gogiriaka abe wodiai o rube moi. De gea wokarajaanga de ma tonaka abe wakelenga ai meja ma lokuoka, de ai meja gea wohilo-loliti.

⁴ Abe ma tonaka ma tau-taulu gea wohidoojo de ma akere de watauru la ma hapa wodiai. Masara ma rube gea ko imakiniikua de to una ai hidee ho ma tonaka watukukuoli la idadioli o kumukulu de ahao womulaengoli wodiai o rube ma hapa moioli.

⁵ De gea tamake de ahao Ma Jou o Yawe wotemoli wato,

⁶ “Abeika ngini o Isiraele ma nyawa nitotoihene ti ngini nia Jou ahi demo nginika. Abe Ngohi naa ka idadi dika todiai nginika imaketero hoka una wotobadiai o kiahonanga o tonaka itau-taulino wodiaioka to una ai tonakika. Angamoi imaketero dika hoka ma tonaka naga to una gea ai giamoka, hokogenangoo ngini naa mata-mata naga to Ngohi ahi giamoka.

⁷ Ho nako hoka Ngohi totemo tato o dutu moi eko o koano womatengo de to una ai nyawa ahao tahibinaaha ona mata-mataika. Abe manga hohowono gea imaketero hoka o gota moi tohiruba eko o tau moi tohiturabaha.

⁸ De ngaro totemoka ma titi manga hohowono ahao idadi masara nako ma nyawa gea yakokiporete manga datoro ma dorou la ma totiaioli yaniiki manga wowangoka, gea de ahao manga hohowono tagorakoli ho ko idadiuali onangika.”

⁹ “De hokogenangoo naga ma oraha abe tomahingahu ma titi o dutu moi eko o koano womatengo de ai kokawaaha mata-mata, abe Ngohi tato ahao taduhunu onangika la manga wowango irorahai dika. Abe gea imaketero hoka o gota todatomo eko o tau moi tohigoko.

¹⁰ De ngaro totemoka tato tahiowa onangika gea, masara nako ona ko iwa manga hingounu ahi demoino de yomahirehene ma dorouika, gea de ahao manga hiowa abe totemoka tagorakoli onangoka de aino ho ko idadiuali onangika. Hokogea ahi demo ngini o Isiraele ma nyawaika.”

¹¹ De ahao Ma Jou wohitemoli ngohino de wohihidoaka ai hingahu ma demo abe wohidumutu ahi gogianongoruika. Abe Una woigo la ai demo gea ngohi ahao tadofanga onangika abe yogogere o Yerusaleeme ma kotaka de o Yudea ma tonaka mata-mataika. De hokonaa to Una ai demo. “Ngohi Ma Jou o Yawe tomahidiaioka la tinihipoha de o hohowono ma amoko nginika, hiadono ngini niamao o binaaha inidaenoka. Ho mangale ma titi gea ho to Ngohi ahi hininga tato ngini homoi-homoi koaho nioporete dika ti ngini nia datoro ma dorou de nianiikoli ka o datoro ma rorahai nia kokiwowangoka.”

¹² De ai dodaere ma demo onangika wotemo ipaha de ahao wohitemoli ngohi o Yeremiaino wato, “Masara ahao ma oraha ahi demo gea nadofanga ani gogianongoruika de ona duru yoluku enangika abe ahao yotemo ato, ‘Marai ngomi naa ka to ngomi dika mia hininga mianii-niiki. Abe ngomi miato koaho mia hafini ma dorou dika miatobanii-niiki ho mia hininga duru ko mimangaliua.’”

O Isiraele ma nyawa ahao wahikabarihi

¹³ Ho mangale ma titi o Isiraele ma nyawa manga pea itotogowini hokogea ho Ma Jou o Yawe wotemoli wato, “Abeika ahi nyawa abe ma dihiraino tairikoka la yodadi to Ngohi dika ahi nyawa. Nako ona gea de o dutu ma homoa mata-mataika masara ka to onangohi manga hininga de manga datoro duru itorou! Abe o Isiraele ma nyawa yodadi hoka to Ngohi ngohi fekata, ho koaho ona manga hiningaka de yatobagou-goungu yaniiki ka Ngohi dika. Masara ona manga datoro duru itorouoka!”

¹⁴ “Ho naa tinihidoaka o hiketero ma demo. Nako homalega daku o Libanono ma loku-lokuiye, genangoka ka ihikaika naga ma gare-garehe angamoi o es ma awana akokitamunu ma loku ma geleforo gea. Duru ko ihoa-hoanua ho ma dudutumu ka ihikaika ma rorahai dika hamake. De ma akere ma maata dakena ka ihikaika ihahuruku ho o akere ma rorahai ka ihikaika naga.

¹⁵ Masara nako to Ngohi ahi nyawa ona gea hokogenangua angamoi manga rorahai ko ihikaikaua naga. Abe ona gea yomahirehene Ngohioka de ma homoaika, de ona yotobatufu-tufuku o manyanyi o jou-jou ma homoaika. De ona duru yokangela yaniiki manga totofora manga wowango ma ngekomo ma rorahaiika, ho yorehenoka la yaniikoli o dodagi ma dorouika de ka yotobapele-peleke dika manga wowango ma dodagioka. Hokogea ahi hiketero ma demo ma titi ahi nyawa gea.”

¹⁶ “Ho mangale ma titi ona ko ihinii-niikua ho ahao to ona manga tonaka idadi duru itorou, hiadono o nyawa abe ahao yatilakuru manga tonaka gea yamake de duru ka ihikaika yaemono enangika de manga pea alenge-lenge de yahohedu enangika.

¹⁷ Angamoi Ngohi ahao tohiaturu la ahi nyawa manga musu yoboaino de yabaataika, de genangino tahikabarihi ahi nyawa gea hiadono kiani yokokiloara o tonaka utuika. Abe gea imaketero hoka Ngohi tohiboaino o hidaloko ma amoko de ahi nyawa ona hoka o tonaka ma kuhuhunu dika abe ihihailiye de yao ma guru-gurutika. De ahao ma oraha manga musu yoboaino de yahikangela ahi nyawaika de Ngohi naa ka taporete dika onangika de ko talegaikaua ho duru ko taduhunua.” Hokogea Ma Jou o Yawe womahingahu ai hininga.

Ai gogianongoru iwihidee o Yeremiaika

¹⁸ De ahao ma nyawa gea yomakoketemo ato, “Irahai la ngone hihitogumu dika o Yeremia gea la ibootohi hotobaihene ai demo! Angamoi nagahi nanga gogianongoru utu abe ka idadi inahingahu-ngahu Ma Jou ai demo ngoneino. Abeika, naga ngoneoka o hidemo ma nyawa Ma Jouiye de nanga balu-baluhu abe yososawaro de Ma Jou ai uru ma dodofanga utu, de ona mata-mata ka idadi inadofanga to Una ai demo ngoneino. Ho koaho hiwea-weara dika o Yeremia ai romanga de nanga dadae ma demo la ka idadi hikiniiki ngoneoka de waika ma homoaika. De gea ahao ngaro ufa de ngone hitoihene to una ai demo-demoika!”

¹⁹ De ahao ngohi o Yeremia toihene o nyawa gea manga hidee ma demo ho tomaniata Ma Jou o Yaweiye tato, “Ahi Jou, ngohi duru tomagahoko la nototoihene ngohi naa ahi demoino de nohiduhunu ahi kangelaino! Abeika ahi musu manga demo ma titi ngohi!

²⁰ De ngohi naa tao irahai ma titi ahi demoino abe tanu ka idadi yaduhunu onangika, angamoi ngaro Ngona nato nahohowono ma titi ani ngamo onangika masara tagahoko la tato ufa ma hohowono gea yadaene onanguku. De ngaro tagahoko ma rorahai masara ona gea naga manga hidee la ihihikangela dika. Abe gea imaketero hoka ona yodiai o baiti ma gurutuku / haara la ato ngohi ihiotakuku genanguku de tohonenge.

²¹ Ho naa ngohioli tomahingahu ahi hininga onangika. Abe mangale ma titi manga hininga ma dorou gea ho tagahoko la Ngona duru nahikangela onangika. Irahai la manga ngofa-ngofaka yohafini dika de manga baba abe yopoperekioka yohonenge ma titi o panyake ma dorouino. De ka idadi Ngona nahiaturu manga musu la yokokiboaino de yahikala onangika hiadono manga goo-goduuru onangoo yokokihonenge o parangi ma goronaka. De ahao manga ngo-ngofeka mata-mata yodadi yofao-faooka de manga ngofaka duru ko yaiwaka!

²² Ho ngohi toigo la Ngona nahiboaino manga musu de ka itodokanino de yabaataika manga tau-tauoka. De gea ahao naga yoihene manga tau-tauino manga ngoe yopoa-poaka hiadono yohaangara abe ma oraha manga musu yangino. Hokogea tomagahoko angamoi ona ahi gogianongoru ihihideeoka ato ngohi ihiotakuku manga haarauku /baiti ma gurutuku eko ihitaoko manga modoioka.

²³ De Ngona ahi Jou nahiorikoka manga hininga de manga hidee ma dorou ngohino. Ho tomagahoko la ufa namalaika dika manga datoro ma dorou de ufa ka naofi dika manga howo-howono. Masara koaho nahohowono onangika de nohipake ani ngamoino la manga musu ka idadi yokokiboaino de duru yahikala onangika to Ngona ani himangoka!”