Yakobusu 5 - Ma Jou ai Demo-demo o Totobelohoka

Abe hokokia o kaya-kaya ma nyawa manga hohowono ahao yamake

¹ De ngini abe duru de nia tiwioka, abeika nitotoihene ahi demoino naa. De ngini koaho niari-ari de nia ilingi duru ilamokiye ma titi nia hohowono o kokangelaino abe ma oraha adonoka de ahao niamake Ma Jouino.

² Angamoi ti ngini nia kiahonanga abe niatou-touniye, gea imulaengoka iwedere. Abe nia pakeanga ngaro iwoe masara gea ka parahaja dika abe imaketero hoka o gahiki yaolomoka nia pakeanga gea.

³ De ngaro ti ngini nia gurasi de nia haaka ma enangoo gea ka parahaja dika abe imaketero hoka yokokimookoka. De nia kiahonanga ma parahaja, gea mata-mata ahao ma oraha dokengika de inihitaana ma titi nia horoodo o kiahonangika. Ho ahao ma oraha Ma Jou winitailako nia boriwowango de ahao ti ngini nia hohowono niamake Unangino. Abe imaketero hoka nia kiahonanga ihibinaaha abe ma titi ka yomooko eko o uku enangoo ma ka aolomo o kiahonanga hiadono ihibinaahaka, hokogenangoo ti ngini nia roehe ahao ihibinaahaka ma titi nia hohowonino. De ngini ngaro itigioka ma oraha abe Ma Jou winitailako masara ngini nia hininga ma dumutu la niato o kiahonanga dika niatou-touniye.

⁴ De ngini gea abe de nia tiwioka, abeika niongano-nganonohi ti ngini nia datoro abe ma dihiraino nidiaioka. Angamoi naga o nyawa gea abe ngini niahikarajaanga la youtuku nia redi-redioka, masara yautuku abootoka de ngini ko niahidoakuali manga karajaangino ma hasili onangika. Ho ona gea duru yomagahoko Ma Jouiye de manga ilingi ma amokiye la ato Una waduhunu onangika. De Una gea nanga Baluhu Wokokurutiye, Una wagihenoka to ona manga gurubungu ma demo ma titi manga hewa ngini niatumungu.

⁵ De nako ti ngini nia wowango o duniaka naa duru ko iwa nia huha masara gea nimahisosanangi de o kia dika abe nia hininga adaene enangika la duru ko iwa nia kuranga. Masara gea ko nihiorikua abe ngini nimaketero abe hoka o hapi moi o nyawa yatoofo-toofo dika la hiadono duru ikutufuroka de ahao ka idadioka yomadoma ma hapi gea. Angamoi nginioo imaketero hoka nimahitoofo de o sosanangi dika masara ko nihiorikua abe ma bahauku de ahao o hohowono kohadubuho Ma Jouino ngini niamake.

⁶ De hongoli ngini niahohowono o nyawa utuika ngaro ona ko yahowonua, de utuoli naga abe hiadono niahohonenge onangika masara ona ko yahowonua nginika. De ona gea hongoli ko yakunua yomaduhunu nia hohowonoka de aino. Ho ngini gea nia hohowono ma dubuho ahao niamake Ma Jouoka de aino. De hokogea to ngohi ahi hitiari ma demo onangika abe de manga tiwi-tiwioka.

O Yakobusu wahigaro la yomatongohono manga kangela ma goronaka

⁷ Ho ahi gogianongoru, ngaro o nyawa inihikangela nginika masara ngini nimatongohono dika ka hiadono nanga Baluhu idodutu woboali. De abeika honganono abe womatengo wotobaredi ai dongohono la ka idadi ngone homaaduru abe hoka unangoli ma titi ai dongohono. Abe una wotobaredi-redi gea kiani wodamaa ka hiadono ai redi ma datomo ma rorahai gea iwangoiye de ihofoko. De gea ko wodatomuahi de kiani una wodamaa o awana ihira la gea ma tonaka yapehakokahi de ahao ka idadi ai gihiihi wodatomo. De wodatomo ipaha de ahao ma dekanohi wodamaa hiadono o awana itoturuino iboa abe gea ma dodunguu ma gugutuku itigioka. De ma awana itoturuino gea ena abe ihifero ma redi ma hofoko hiadono ilomukoka. Ho una wotobaredi-redi kiani duru de ai dongohonoka wododamaa ai redi ma hofoko ilomuku.

⁸ De nginioo kiani nimatongohono imaketero abe hoka unangoli gea wotobaredi-redi. De ngini kiani nimahinganono Unangika de nia hininga ma gahumu, angamoi nanga Baluhu idodutu ai gahe abe woboali gea itigioka.

⁹ De ahi gogianongoru, ufa ngini nimahiketehikurubungu ma titi nia dodiawo manga datoro ko itiaiua, done ngini ahao winihohowono Una gea abe wotobauru-urusu o howono. De to Una ai boa duru itigioka, abe imaketero hoka nanga tau ma ngoranoka womahiadoninoka.

¹⁰ De ahi gogianongoru, naa tinihihohininga abe ma titi nanga gogianongoru ma dodihiraino Ma Jou ai uru ma dodofanga, la ngini ka idadi nimaaduru abe hoka onangoli ma titi manga dongohono. Abe ona gea Ma Jou wapake la to Una ai hingahu ma demo yatobadofanga o nyawaika, masara o nyawa utu duru yahikangela onangika. De ngaro hokogea manga kangela yohimanga masara gea de ka yomatongohonohi de manga hininga ma miriidi.

¹¹ De abeika, ngone naa hahoromati o nyawa onagonaika abe ngaro manga kangela ma goronaka masara ka yomatongohonohi, de gea hohioriki abe Ma Jou wahiowa onangika ma titi manga dongohono manga ngongakuino. Abe hoka o Ayubu ma dodihiraino, gea marai ngini nihiorikoka ma titi to una ai dongohono ai kangela ma goronaka angamoi ai ade-ade ngini niihenoka. De o Ayubu ai ade-adeino gea de ka idadi hamake abe ma bahauku de Ma Jou duru wihiowa unangika ma titi ai hininga ma owa de ma doraino abe duru ilamoko o Ayubika. De gea wihiowa unangika abe ma titi womatongohono ai ngongakuoka. Ho ngoneoo ka idadi homaaduru hoka o Ayubu de Ma Jou ai uru ma dodofangoo manga dongohono abe ma oraha o kangela haohana nanga wowangoka.

Abe ma titi nanga behehongino ma demo

¹² De ahi gogianongoru, naa moi tinihingahu abe duru ikurutiye. Abe nako ngini nimahiketehibehehongo, gea ufa nimahiketehibehehongo de o koboto la niato duru nimahitaana abe nia behehongo ma demo duru igou-goungu. De gea ngaro ufa dika de nitemo niato, “Nako ngohi toeluku ahao Ma Jou o Horogaka wohihohowono ngohino.” De ufaoo niato, “Nako ngohi toeluku ahao Una abe o dunia naa ai kuahaka Una gea wohihohowono ngohino.” De igoungu hokogea ma koboto ma demo ma ngoe o nyawa yapake la yomahitaana abe ma titi manga behehongoka de duru yagou-goungu, masara nako ngini ufa nimaaduru abe hoka onangoli manga demoino. Angamoi nako nimahiketehibehehongoka de o koboto de ahao ko nianiikua, gea de ahao utuohi itubuho nia hohowono ma titi nia koboto ma demoino. Masara ngini koaho hokonaa nia demo abe ma oraha nimahiketehibehehongo. Abe nako niahibehehongoka o nyawaika ma titi moi niato nidiai, gea ufa nieluku ma kiani nidiai dika. De ngaro niahibehehongoka ma titi moi niato gea ko nidiaiua, gea ufa nidiai! De iti niagou-goungu nia behehongo ma demoika gea de o nyawa ka idadi yongaku nia demoika. Ho ngaro ufa dika de nihidogo nia behehongika abe de o koboto ma demoino.

Abe ma titi nanga niniata

¹³ De nako naga nginioka abe o kangela niaohana, gea ngini ka idadi nimagahoko Ma Jouino ai duduhunu. De nako nginioka naga utu abe nisosanangi dika koaho ngini ninyanyi la niwihigiriiri Unangika.

¹⁴ De nako naga nginioka abe inigogama ho nikangela, gea ngini niahokino o gareja ma hihira la yoboa nginino de inigahoko Ma Jouiye ma titi ngini. De gea ka idadi inihituagi ti ngini nia peauku de o saitunu ma minya la ihitunguu Ma Jou ai kuaha de gea yafetongo nanga Baluhu idodutu ai romanga. De hokogea o gareja ma hihira ka idadi inigahoko Ma Jouiye ma titi ngini inigo-gogama gea.

¹⁵ De nako to ona manga hininga duru imakiniiki de to Ma Jouoli ai hininga ho duru iwingaku Ma Jouika, gea de ahao nanga Baluhu idodutu winihitogumu nia panyakeino de ahao winihimomiki ngini inigo-gogama gea. De nako hoka nia panyake gea ihititi o howonoka abe ngini niahowonoka Ma Jouika, de nako ngini nimangakuoka ma titi nia howono gea, ahao nanga Baluhu winihiapongo nginika.

¹⁶ Ho mangale ma titi nanga Baluhu idodutu ka idadi wonahitogumu nanga popanyakeino de ka idadioo wonahiapongo nanga howono ma titi nanga niniatino, ho duru tinihigaro nginika la nia howo-howono nimangaku nia gogianongoruika de nimakokagahoko Ma Jouiye la ngaro nia kangela nia bada-badangoka eko ngaro nia gogao Unangika itoakoka, ma gea mata-mataika de Una ka idadi winihitogumu genangino. Angamoi nako womatengo wataana de Ma Jou ai mau, to una gea ai gogahoko naga duru de ma kuahaka angamoi Ma Jou ahao wihigihene unangika de hiadono wohingodumu ai gogahokino gea.

¹⁷ De abeika honganonohi o Elia ai ade-ade, angamoi una gea o nyawa biaha abe hoka ngoneoli naa o nyawa biaha. De una ma dodihiraino de womaniata Ma Jouiye de wogahoko la wato ibootohi iawana, de uku de ko iawanokaua o taongo hange de ma honongaino ma dekana ma tonakoka gea.

¹⁸ De gea ipaha de ahao womaniatoli de wogahoko la iawanoli, de gea ahao Ma Jou wohidadi la o awana ipuraraholi ma dihangoka de auku ma tonakuku, de genangino ma tonaka ma datomo iwangoiyeokali de hiadono ikokihofoko. De hokogenangoo to ngone nanga gogahoko ka idadi duru de ma kuahaka iti ngone ka ihikaika hataana de Ma Jou ai mau ngoneino.

O Yakobusu wohibobaha ai hurata naa

¹⁹ De ahi gogianongoru, nako naga nginioka womatengo abe worehenoka ma gou-goungoka de aino, gea ngini niwihigaro la una wolioli o totiai ma ngekomino. De nako una wolioli,

²⁰ gea ka idadi ngini nihioriki abe Ma Jou ahao widuhunu unangika ma titi ngini niwihigilio una wahowo-howono gea ai rerehene ma ngekomoka de aino. De genangoka de Ma Jou ahao widuhunu unangika la ufa wohonenge masara wihiapongo unangika ma titi ai howono marai kohangoe abe wahowonoka Ma Jouika. Ho ngohi duru tinihigaro la ngini mata-mata nimahikudumutu Ma Jou ai ngekomika.