Yakobusu 4 - Ma Jou ai Demo-demo o Totobelohoka

To ngone nanga hininga ma hafini ma dorouika gea imakalawana de to Ma Jou ai hininga

¹ De naa moioli tonaleha la ka idadi homafikirohi. Sarakia, abe ngini nimakokalawana de nimaketeloliliara, gea bote ma titi o kia hiadono idadi nginioka? Nako ngohi, gea ma titi ti ngini homoi-homoi nia badanga ma hafinoka abe niato nimahisosanangi. De nia hafini gea imakokalawana ti ngini homoi-homoi nia kokihiningaka.

² De ngini marai naga o kia moi duru niohafini masara ko nimamakeua, ho nia hiningaka ka ipuda o doma la genangino de ka idadi nimahitingini. Eko utu niataleana o nyawa masara ko idadiua niale, ho gea ena niokadatoro ho nimakalawana. De gea nako naga nia kuranga, tanu koaho nimagahoko Ma Jouiye ma titi ena gea. Masara barikua ngini utu ko nimagahokua Ma Jouika ma titi nia perelu.

³ De naga ngini utuoli nimagahoko Unangino masara genangoo ko niamakeua angamoi ti ngini nia hininga ma dumutu ko itaanua de to Una ai hininga ma dumutu. Masara Ma Jou winihioriki abe nako hoka niamake nia gogahoko, gea ahao ti ngini nia badanga ma hafinika dika niapake la nimahisosanangi genangino. Ho gea Una wato ho koaho ka ngaro ufa dika de winihidoaka nginika nia gogahoko gea.

⁴ De ngini naa tinihiketero abe ngini hoka o ngofeka momatengo ko magou-goungua ami rokatika masara mahowono de o nauru utuika. Angamoi ngini nimahiromanga Ma Jou ai nyawa masara nia dora itagi o dunia ma biahaikaoo, ho ngini ko niagou-goungua Unangika niwidora. Ho mode ngini ko nihiorikua abe nako nimaketedodiawo de o duniaika, gea igoungu niwilawana Ma Jouika? Ho onagona dika yomangiriki la yadodiawo o duniaika, ona gea yodadioka Ma Jou ai musu.

⁵ Masara tanu nako Ma Jou ai hininga, gea ka idadi hamake to Una ai Demo-demoka abe ma dodihiraino ihitulihukuoka. De ai demo gea inahingahu ato Una duru de ai hininga ma gahumu wohafini la wato to ngone nanga jiwa ma hidumutu duru ingodumu itagi ka Unangika dika. Abe Una wohigogere nanga jiwa to ngone homoi-homoi nanga badangoka, de Una ai hininga la wato ka Unangika dika ngone hidora. De hokogea Ma Jou ai Demo-demo ngoneino ma dodihiraino, de gea inahitaana abe Ma Jou duru ko woigoua la ngone hadodiawo o duniaika, masara ai hininga la wato ka Unangika dika ngone hidora. Ho bote ma titi o kia naga hiadono ngini ka niadodiawohi o duniaika? Mode ngini niafetongo Ma Jou ai Demo-demoika niato gea ko kia-kiaua?

⁶ De ngaro ngini utu nagahi nia dora o duniaika, masara Ma Jou ai hininga ma owa abe wonahidoaka ngoneuku, gea duru inawedono la ka idadi inaduhunu nanga hiningaka hiadono homahitipokouku de holioli la ka Unangika dika hidora. De ahi demo gea duru imakiniiki de Ma Jou ai Demo-demo moioli abe ma dodihiraino ihitulihukuoka ato, “Ma Jou walawana o nyawaika abe yomasadeoka, masara nako o nyawa yomahitipokouku manga hiningaka, onangika gea wahidoaka ai hininga ma owa.” Hokogea itemo ma dodihiraino.

O Yakobusu duru wahigaro la ona yolio Ma Jouika

⁷ Ho naa ngini kiani naga nia hingounu ka Ma Jouika dika nia hiningaka. Masara nako o Ibilihi ma haeke gea kiani nialawana enangika la gea ahao iloara nginioka de aino ho ko iniruwaeokaua.

⁸ De ngini kiani nimahitigi Ma Jouino la nimagahoko ai duduhunu Unangino. De gea ahao Unangoli womahitigi nginika abe ma titi winiduhunu ai hininga ma owaka de aino. De ngini o howo-howono ma nyawa abe nia wowango ma datoroka de nimahipesekoka, gea kiani nimahitebini la nia wowango itebini. De abe ngini nia hininga ka hinootohi ma titi nia ngongaku ma dumutu, gea kiani nimaputuhoka la ka Ma Jouika dika niwinii-niiki nia hiningaka.

⁹ De abe nia howo-howono Unangika niongano-nganono, gea koaho ngini duru nia hininga de ma huhaka de ka hadongoo de inihowo-howo niari-ari ma titi nia howono gea. De ufa niogie-giete de nigogarago dika enangika masara koaho niari-ari de nia hininga ma huha abe ma titi ngini niahowonoka Ma Jouika.

¹⁰ Ho ngini kiani nimahitipokoukuoka nanga Baluhu idodutu Ma Jou ai himangoka la gea Una ahao winigoraka de winihidoaka nginika o gogere moi hatoli ikurutiye Unangoka.

O Yakobusu wahitiari wato ufa yomahidadi o tobauru-urusu ma nyawa manga gogianongoruika

¹¹ Ahi gogianongoru, ufa ngini nimahiketehikangela ma titi nia gogianongoru manga roma-romanga niawea-weara. Angamoi onagona dika abe manga gianongoru ai romangika yawea-weara de hiadono ngade-ngade hoka iwihohowono una manga gianongoruika, ona gea yawea-wearoo Ma Jou ai Paretaika. Angamoi to Una ai Paretaka de naga ma behehongo abe ato kiani ngone homakodora. Ho nako ona ko yaniikua gea ma behehongika, gea imaketero hoka yawea-wearoo to Una ai Paretaika. De gea ka idadi hohiromanga hato ona gea tanu ato yahohowono ai Paretaika gea. Masara abeika, nako o nyawa ato yahohowono ai Paretaika, gea ma Pareta ko yaniikokauali masara yomahidadioli yato o nyawa abe yatobauru-urusu to Una ai Paretaika.

¹² Masara gea tanu Ma Jou womatengo dika abe wonahidoaka ngoneino to Una ai Pareta, ho ka Una dika wotobauru-urusu mata-mataika. De ka Unangoka dika ma kuaha la Una woputuhu ahao onagona wahihohe manga hohowonino de onagonali Una wahibinaaha. Ho ngini gea done sarakia nia hininga ma oraha o nyawa manga romanga niawea-weara? Angamoi nako hokogea nidiai, gea ngini imaketero hoka nimagorakiye la nidadi o tobauru-urusu ma nyawa de niato niahohowono nia date-datekika masara tanu duru ko iwa nia kuaha la o nyawaika niaurusu de itaana, ho ufa hokogea nidiai!

Ai hitiari la ufa yomagorakiye ma titi manga wowango ma hideeoka

¹³ De abeika ngini nitotoihene ahi demoino naa. Ngini utu nimagorakiye de nimahingahu nia dodiawoika hokonaa, niato, “Marai bootino eko itebini de ahao ngomi naa misobo miloiki ma kotaika, de mimahiadonika de ahao mimatiwi-tiwi genangoka mia taongo moi. Abe ngomi ahao genangoka de mifuku-fukunu de mimaija-ija hiadono mia tiwi idadi ilamoko. De mia taongo moi ibooto de ahao ka idadi genangoka de aino milio de gea ngomi naa duru de mia tiwioka.” De hokogea ti ngini nia hingahu ma demo nimahingahu.

¹⁴ Masara ngini gea tanu ko nihiorikua nako nia hidee gea ahao idadi eko koua. De ngaro abe o kia ahao idadi itebini nia wowangoka ma genangoo ko nihiorikua! Angamoi to ngone nanga wowango naa, gea ka idadi tohiketero de o hauramo abe ena gea ka jai-jai dika hamake de ipahaino de ihailoka ho ka aiaho ko hamakeokauali.

¹⁵ Ho ngini gea koaho nia hingahu ma demo hokonaa nimahikokangahu, niato, “Iti de Ma Jou ai mau abe Una ka womihidoakohi mia wowango o duniaka naa de naga mia hidee la hokonaa eko hokonaa midiai.” De koaho hokogea nimahingahu nia demo.

¹⁶ Masara nako ti ngini nia biaha ma oraha naa naga, gea ka ihikaika nimagorakiye de nimatobahingahu-ngahu o nyawaika ma titi nia hidee abe niato genangino de ka utuohi nimahikurutiye nia wowango ma goronaka. De naa ngohi ka idadi tinihitiarioli tato nako hokogea nimagorakiye de nimahingahu, gea ngini nidiai ko itiaiua.

¹⁷ Ho naa ngohi tinihibehehongo nginika tato onagona dika abe ona ihiorikoka abe o totiai ma datoro moi tanu kiani yodiai masara gea ko yodiaiua, ona gea yahowonoka.