Yakobusu 3 - Ma Jou ai Demo-demo o Totobelohoka

O Yakobusu wonahitiari ma titi nanga uruino ma demo

^1-2 Ahi gogianongoru, ngone hohioriki abe ngone mata-mata ka hahowonohi de gea nanga howono ma rupa naga ma ngoe. De nako ngone hato homahipareta nanga uru ma demoino hiadono ko horubakaua ma titi nanga uruino, gea duru ko igapangua. Angamoi tanu nako onagona dika abe ka ihikaika manga uru ma demoino ka yakunu yomahipareta ho ko yorubakaua ma titi manga uruino, ona gea duru yongodu-ngodumoka. De ka idadi hahiromanga onangika hato manga badanga ma amokika yakunu yomahipareta ho hiadono ko yahowonokaua. Angamoi nako to ngone nanga badanga ma kiahonanga mata-mataika, marai ka nanga uruohi hokangela homahipareta. Ho mangale ma titi gea hiadono ngohi tinihitiari nginika, tato, kalioli ka niwoe nioigo nimahidadi abe nitobadotoko nia gogianongoru utuikali. De hokogea tinihitiari angamoi nako o nyawa yotobadoto-dotoko, to ona gea manga demo abe ihupu manga uruino kiani hatoli iwoe. De genangino ma titi hiadono igapanga yahowono ma titi manga demo gea ma ngoe abe ipaata manga akiroka de aino. De gea imaketero dika abe hoka ngomi naa abe mitobadoto-dotoko o nyawaika. Ho ngaro ngomi eko ngaro ngini utu abe hotobadoto-dotoko, masara nako hiadono hahowono ma titi nanga uru ma demoino de gea kiani ngone hamake nanga hohowono Ma Jouino. De ka to ngoneohi nanga hohowono gea hatoli itubuho nako de o nyawa utu manga hohowono abe ona ko yodoto-dotokua, angamoi to ngone nanga tagongo gea la Ma Jou ai Demo-demo hadotoko o nyawaika. De nako genangoka de hahowono gea itararono abe utuohi itubuho ma hohowono Unangino. Ho koaho ngini kalioli ka niwoe nioigo nimahidadi abe nitobadotoko nia gogianongoru utuikali, done niahowono ma titi ko nimahiparetaua abe nia uru ma demoino.

³ De abe ma titi homahipareta nanga akiri nanga uruoka, gea ka idadi tohiketero abe de o kuda. De nako ngone hato o kudauku hofarene, gea ihira o behi ma dobiki moi hohitaanaoko o kuda ma uruoko la ma titi genangino de ma kuda ka idadi ihioriki de yaniiki to ngone nanga hininga ma dumutu abe o kiaika dika hato hoboa. Angamoi ma behi ma dobiki gea yalikoika de o tali ma behi aridobiki ho nako ngone hofarenuku de hatauru ma tali arihononga, gea ma behi ma dobiki abe naga ma kuda ma uruoka ena gea ihidumutu irahai. Ho ngaro ma behi ma dobiki duru ma eteteke o kuda ma uruoka de ma kuda ma badanga duru ilamoko, masara ma titi ma uruino de ihidumutu ma kuda ma badanga ma amokika.

⁴ De hokogenangoo de o kapa ma ago-agomo abe o hidaloko duru kohabuturungu yatila o gahi ma lokuika. Angamoi gea ma titi ma ririmi ma etetekino abe ihidumutu ma kapa, ho iti una o kapa wao-ao wasoino ma lololiti la wohipareta ma ririmika, de gea ka idadi wohidumutu ma kapa ma amoko la imakiniiki de to una ai hininga ma mau abe wohidumutu ma kapa ma himanga.

⁵ De hokogenangoo de to ngone o nyawa nanga akiri nanga uruoka. Angamoi nako nanga akiri enangoo ma eteteke dika, masara to ena ma hofoko abe nanga uru ma demoino de ka akunu ihidadi duru ma ago-agomo. De abeika hafikirohi ma titi o uku. Abe ngaro o uku moi duru ma eteteke masara genangino de ka idadi o fongana ma amokika yatufuku.

⁶ De naa ngohi tohiketero to ngone nanga akiri de ma uku gea. De nanga akiri ka idadi hohiromanga enangika hato ena gea imaketero hoka o uku moi abe o Ibilihi ma haeke ihiwango o Naraka ma ukuino abe ena gea duru ko ihone-honengua. Angamoi ma dorou irupa-rupa abe idadi ngoneoka, gea ihititi nanga akiroka, de genangino ahao ihupu nanga uru ma demoino ko itiaiua. De gea ma titi nanga demoino hiadono ma dorou gea imahora nanga badanga ma amokika ho ngaro nanga hiningakaoo eko ngaro nanga badangokaoo masara gea homahipesekoka mata-mataika. Ho to ngone nanga wowango ma ngekomo ka idadi duru ihibinaahaka ma titi nanga demo gea abe ipaata nanga akiroka de aino. De gea ma titi hiadono tohiromanga nanga akiri tato gea imaketero abe hoka o uku, angamoi ngaro ma eteteke masara o bobinaaha duru ma amoko ka idadi enangoka de aino iboa.

⁷ De nako o aewani ma rupa mata-mata o duniaka naa, masara gea mata-mataika ngone o nyawa ka hakunu hohiaturu hiadono inahingounu ngoneino. Abe ngaro o aewani o tonakoka eko o totaleo mata-mata, eko ngaro abe imalia-liara eko o nawoko mata-mataika, masara gea ma rupa mata-mataika de ka idadi ngone o nyawa hohiaturu enangika.

⁸ Masara nako to ngone nanga akiri ma hirete, gea ko moi-moiua hakunu hohiaturu enangika hiadono duru inahingounu ngoneino. Angamoi nanga akiri ma hofoko gea o demo ma dorou abe hokangela hohipareta enangika. De nanga demo ma dorou gea imaketero hoka o dodiha ma mibiha abe ka yahohonenge o nyawaika.

⁹ De igoungu ngone hihigiriiri nanga Baluhu idodutu de nanga Babaika ma titi nanga akirino gea. Masara nanga akiri genanginoo hapake la o nyawa utuika hahikoboto de ma dorou. Masara tanu gea ena duru ko itiaiua angamoi onangoo o nyawa abe Ma Jou wahidadi la onangoo ngade-ngade hoka Unangoli, ho gea ngone hahikobotoka to Una ai dulaadaika abe ona gea ngade-ngade yomaketero hoka Unangoli.

¹⁰ Ho abeika, nanga uru moiino dika naa de naga ihupu genangino ika o hiowa ma demo de ika o koboto ma dorou ma demo. Ahi gogianongoru, tanu koaho ufa hokogea idadi!

¹¹ De naa moi tonaleha la ka idadi hongano-nganono. De sarakia, naga o jobuubu moi abe genangino imahidububungiye o akere ma muti-mutiti de o akere ma maha-mahaoo? Nako o jobuubu moioka gea marai duru ko ma iwa, e?

¹² De hokogenangoo nako o gogilioro ma gota o utu moi gea ko idadiua ihihofoko de o saitunu ma hofoko, ahi gogianongoru. Eko nako o angguru ma roehe gea o gogilioro ma hofoko enangoo ma ko idadiua ihihofoko. De gea duru imaketero ma titi abe nako o jobuubu moi o akere ma maha-maha ihibubungiye, gea ko idadiua imahidububungiye de o akere ma muti-mutitoo abe gea ma bionino. Ho ngoneoo naa tanu kiani nanga uru ma hofoko ma rupa moi dika ihupu nanga uruoka de aino, de gea ka o hiowa ma demo dika abe ka ihikaika nanga uruino ipaata.

Abe ma titi Ma Jou ai sosawaro

¹³ De nako naga nginioka nia gogianongoru utu abe nimafetongo niato niagou-goungu nisosawaro Ma Jouoka, nako hokogea kiani nimahitaana nia sosawaroino gea ma titi ka ihikaika niwango nitotiai Ma Jou ai himangoka, abe gea nia wowango ma datoro itaana de to Una ai mau. De hokogea nimahitaana abe niagou-goungu nisosawaro. De masara ufa nimasade ma titi nia datoro ma rorahaiino gea, angamoi nako Ma Jou ai sosawaro niagou-goungu nianiiki, genangino ko iwa o sade masara o hininga ma dodipokouku dika.

¹⁴ Masara nako ngini nia hiningaka de duru niataleana o nyawaika, de ka ihikaika ti ngini dika ma hirete nia perelu nihitihira ho o nyawa utu manga perelu ko niolegaikaua, gea koaho ufa nimagoraka de nimahingahu niato nisosawaro Unangoka. Angamoi nako hokogea nia hininga masara ka nimahingahuohi o nyawaika niato nisosawaro, gea nieluku dika angamoi ma dodotoko ma gou-goungu ko nianiikua.

¹⁵ De nia hininga gea ngaro nihiromanga enangika niato o sosawaro ma hininga, ma tanu gea ena duru ko o Horogakaua de auku iboa masara ihititi o duniaka dika. Ho gea ko Ma Jou o Womahua winihidoaka nginika o sosawaro masara gea o toka-tokata dika ma sosawaro nianiiki nako hokogea ti ngini nia hininga.

¹⁶ Angamoi nako o nyawa manga hiningaka de naga o daleana de abe to ona ma hirete manga perelu dika yolegaika, gea duru itararono abe nagaoo o tobalawana ma hininga de o wowango ma datoro ma dorou kohangoe to ona gea manga hiningaka. Ho genangino de ka idadi hohioriki abe to ona manga hiningaka gea duru ko to Ma Jouua ai sosawaro yanii-niiki.

¹⁷ Masara nako Ma Jou ai sosawaro o nyawa yanii-niiki manga hiningaka, gea ahao manga hininga ka itebini iree-reeika. De nagali abe manga borigogao manga gogianongoruoka yoogoana la duru yomaketedodiawo, de abe yomakao de manga hininga ma mobole, de yomahikokongounu, de yomakuduhunu manga kangela ma goronaka, de nagali manga datoro ma rorahai utuoli ma ngoe yotobadiai. De nagali abe ona o nyawa ko yairikua, de abe yatobagou-goungu manga hiningaka ho ko ma iwa abe yomadokangelukino dika. De hokogea o nyawa manga hininga nako Ma Jou ai sosawaro o Horogaka de auku yahihira-hira onangika.

¹⁸ De igoungu nako Ma Jou ai totiai ma hofoko hoigo hamake nanga hidogoronaka, gea kiani nanga borigogao duru hoogoana de hohidodiai homakadame. Angamoi nako hiadono ngone hotobagoana nanga borigogao mata-mataika, gea ahao ka idadi ihihofoko Ma Jou ai totiai ngoneoka.