Yakobusu 2 - Ma Jou ai Demo-demo o Totobelohoka

Wonahitiari la ufa ka hairiki o nyawa

¹ Ahi gogianongoru, ufa ngini niairiki o nyawa, angamoi ma hininga gea ena ko imakiniikua de to ngone nanga ngongaku ma dumutu. De gea ngone hingaku Unangika abe Una duru ko wairikua o nyawa masara duru de ai medebini ma dararono, abe nanga Baluhu idodutu o Yesusu Kristusika hingaku.

² De abeika hafikirohi abe nako ngini nimatoomuinoka ho nia doomu ma goronaka de o nyawa womatengo woboaino abe naga de ai ali-ali o gurasino ai hagaraaraka de ai baju ma hohailoa womahinoauku. De ahao naga womatengoli wihidoduruino woboaino o huha ma nyawa abe to una ai baju imulaenge ibabiti.

³ De nako hoka ngini duru niwihayanga womatengoika gea abe ai baju ma hohailoa de niwitemo unangika niato, “Naino, la o gogogere ma kadera ma rorahaiuku naa nogogeruku.” De masara nako una wohu-huhaika niwitemo niato, “Ngona ka genangoka dika nomaokoino, ekola nako nogogeruku kiani daena ahi louoka.”

⁴ De nako ngini hokogea nia demo ona yahinootoika, gea itararonoka abe ngaro ti ngini nia doomuoka ma niairiki o nyawa! Angamoi o nyawa utu niahayanga de utuoli niahitipokouku, de gea idadi abe nimareguoka ho tanu gea ko o doomu moiokaua. De nako hokogea o nyawa niairiki, gea mangale ma titi ti ngini nia hininga ma dorouino niapake de ko nia ngongaku ma hiningaua.

⁵ Ahi gogianongoru abe duru tinidora nginika, abeika ngini nitotoihene ahi demoino naa. Nako ngini niahitipokouku o huha ma nyawaika, gea duru ko to Ma Jouua ai hininga ngini nianiiki. Angamoi nako Ma Jou ai hininga, Una wairikoka o huha ma nyawa o duniaka naa la ma titi manga ngongakuino de ona yodadi o nyawa abe duru de manga utumoka. De ona gea Ma Jou wahigogere to Una ai kuahaka la ahao Una wahikoano onangika, de gea duru imaketero abe hoka ma dodihiraino wohibehehongoka wato onagona dika yagou-goungu iwidora Unangika de ona gea ahao yogogere to Una ai kuahaka.

⁶ Masara nako nginioli nia hininga gea duru imakohowono de to Una! Angamoi ngini naa niatobangelo-ngelo o huha ma nyawaika masara nako o nyawa abe de manga tiwioka gea ngini niahayanga onangika! De genangino ngohi duru tiniheranga, angamoi abeika hafikirohi. Sarakia, gea onagona abe inihikokangela nginika? De gea ko o huha ma nyawaua inihikokangela masara ona abe naga de manga tiwioka. De nagali abe ona de manga tiwioka initaokino de iniao o tobauru-urusu ma ngiika la o nyawa manga himangoka de initae ato bari ngini niahowonoka onangika.

⁷ De naa tinileha, sarakia, gea ko o nyawa de manga tiwiokaua abe yongelo-ngelo o Yesusu Kristusu ai romanga ma rorahaiika? Ho ngini naa ufa niawohanga abe ngini nidadioka to Una ai nyawa, masara gea de ngini nioigo niahayanga onangika abe yongelo-ngelo to Una ai romangika! Ho genangoka de ngohi duru tiniheranga, angamoi ti ngini nia hininga gea duru ko imakiniikua de to Ma Jouoli ai hininga genangino.

⁸ De nako homalega to Una ai Demo-demoika, genangoka hamake nanga Koano ai huhuloko ma demo abe duru ikurutiye itemo ato, “O nyawa utuika kiani niadora imaketero hoka ti ngini nia roehe ma hirete niodora.” De nako ngini niagou-goungu nianiiki to Una ai demoika gea, gea ngini nidiai irahai.

⁹ Masara nako ngini niairiki o nyawa, gea niahowonoka, angamoi duru ai huhuloko ma demoka gea ena de ngini ko nianiikua, ho gea inihiromanga nginika ato Ma Jou ai Pareta niatilakuroka.

¹⁰ Angamoi ngaro o nyawa yatobaniiki ai Pareta mata-mataika masara to ena ma demo moi dika de yahowono, eko ngaro ai Pareta ma demo muruono naga abe ko yaniikua enangika, masara gea Ma Jou waetongo wato ona gea mata-mata yomaketero dika o howo-howono ma nyawa angamoi ona yatilakuroka to Una ai Pareta.

¹¹ De ka idadi hohioriki abe ma demo gea igoungu angamoi nanga Jou Una womatengo dika abe wonahidoaka ai pareta mata-mata ngoneino. Ho ngaro ma pareta o kiaka dika naga abe ngone hatilakuru masara genangoka de ko hihingounua Ma Jouika ho ka idadi inahiromanga ngoneino ato ngone o howo-howono ma nyawa ma titi hatilakuroka ai Paretaino. Angamoi Una gea abe wonahuloko wato, “Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua,” de gea Unangoo wonahulokoo wato, “Ngini ko idadiua o nyawa niatoma.” Ho ngaro hoka ko niahowonua abe nioluku nimakitigi ko itiaiua, masara nako o nyawa niatoma, gea ngaro to Una ai Pareta ma demo moi dika niatilakuru masara nidadioka o howo-howono ma nyawa ma titi niatilakuroka ai Paretaino.

¹² De masara nako ngini naa, kiani ti ngini nia hininga ma dora ka ihikaika niapake abe ngaro hokokia dika nitemo eko ngaro o kia dika nidiai nia wowango ma goronaka. De gea o hininga ma dora kiani ngini niapake angamoi ahao Ma Jou winiurusu nginika ma titi to Una ai doraino de ko ma titiua ai Pareta ma dodihiraino de winiurusu. Abe Una ahao winiurusu ma titi ai behehongo ma demoino abe inahihupu o howono ma kuahaino la ka idadi hiniiki Unangika dika. Ho genangino de ka idadi ngini niamake abe to Una ai hininga ma dora gea winihimatokoka nginika abe ai behehongo ma demo ma goronaka, ho gea nginioo kiani nia hininga ma dora ka ihikaika niapake nia wowango ma goronaka.

¹³ Angamoi nako o nyawa ko yapakeua manga hininga ma doraino ho gea ena ko itagiua o nyawa utuika, gea ahao nako ona manga baha adonoka de to Unangoo ai hininga ma dora ko wapakeua ma oraha waurusu onangika. Masara o nyawa onagona dika abe manga wowango ma goronaka de manga hininga ma dora itobatagi o nyawa utuika, ona gea yomahitaanoka abe yomahiketehiningamoioka ona de Ma Jou, ho ahao manga baha adonoka de ona duru yogarago angamoi genangoka de to Ma Jouoli ai hininga ma dora wapake ma oraha Una watailako manga wowangoika.

Nako o ngongaku ma gou-goungu kiani imakiniiki de to ena ma hofoko

¹⁴ Ahi gogianongoru, naa moi tinileha la ka idadi ngini nimafikiri. Nako naga womatengo womahingahu wato, “Ngohi naa tingakuoka Unangika,” masara gea de ko iwa ai datorino ma rorahai ai wowangoka. Ho nako una gea, sarakia, ka idadi ai demoino dika de iwihiutumu unangika? Marai ko idadiua! Abeika ahi leleha gea niafikirohi.

¹⁵ Abe nako hoka naga yoboaino nia gianongoru abe duru yohuha ma titi manga baju ko iwa de manga inomo enangoo ma ko iwaka.

¹⁶ De ahao nginioka nimatengo nitemo onangika niato, “Ngohi tonigahoko Unangiye la ani dodagioka de Ma Jou wonigoana ngona la ko kia-kiaua idadi ngonaika. De tonganono abe ahao inihidoaka ngonaika ani baju de ani inomo la gea iniwedono de ngona nosanangi.” Masara ngaro hokogea nitemoka ma hadongoo de ko kia-kiaua niahidoaka nia gianongoruika gea. De nako to ona manga badanga ma perelu ko niahidailakoua onangika, gea ti ngini nia demo onangika ka parahaja dika.

¹⁷ De ngohi tato hokogenangoo de nanga ngongaku, angamoi nako o nyawa ka yomahingahu dika ato naga manga ngongaku de masara ko iwa manga wowango ma datorino abe o ngongaku ma hofokino, to ona gea manga ngongaku ka o ngongaku ma honengohi de ka parahaja dika angamoi ka manga uruokahi dika igogere.

¹⁸ De bote naga o nyawa abe ahi demo gea ko yodafongua. De ona gea marai manga hininga yomahingahu ato, “Koua, hokonaa. Nanga gogianongoru utu Ma Jou waduhunu manga howonino ma titi manga ngongakuino dika Unangika, masara utuoli naga abe waduhunu ma titi manga wowango ma datoro ma rorahaiino dika abe manga gogianongoru utuika.” Marai hokogea to ona gea manga demo. Masara ngohi ahao tapaluhu onangika hokonaa tato, “Duru ko idadiua hohikatingaka o ngongaku de to ena ma hofoko o wowango ma datoro ma rorahaiino, kiani imakokiniiki. Ho done sarakia o nyawa yomahitaana abe naga manga ngongaku nako ko iwa manga datoro abe o ngongaku ma hofokino la gea inahimatoko ngoneino? Masara nako ngohi naa, ngohi ka idadi tinihimatoko nginika ahi wowango ma datoro abe o ngongaku ma hofokino la genangino de nihioriki abe ahi ngongaku igou-goungu naga ngohioka.”

¹⁹ “De ngini niangaku ma demoika abe inahingahu ato Ma Jou Una gea ka womatengo dika. De gea niagoungu. Masara ngaro o toka-tokata ma enangoo yangaku ma demoika gea, de hongoli ena gea duru ifafara angamoi ihioriki ahao Ma Jou wahohowono enangika. Ho gea itararono abe ngaro o toka-tokata naga de ma tobahiorikoka ma titi ihioriki abe naga Ma Jou, masara gea ko ihiutumua enangika la ufa Ma Jou wahohowono enangika.”

²⁰ Ho sarakia, bote ngini ko niataokuahi ahi demo ma titi? De ngaro nia hininga hoka ko yataokua o demo, masara ngohi ka idadi tinihitararonohi abe ma titi o ngongaku gea ka parahaja dika nako ko iwa ma hofoko o ngongakuino abe o datoro ma rorahaiino. De gea imaketero dika abe hoka o toka-tokatoo abe ngaro ena naga de ma tobahiorikoka abe ihioriki naga Ma Jou, masara genangino de ma utumu ko amakeua.

²¹ De abeika hinganonohi nanga tofora o Abarahaama. Nako una gea, ma titi o kia hiadono Ma Jou wifetongo unangika wato una wataana de Ma Jou ai mau? De gea ma titi duru ai datorino wataana Ma Jou ai mauika abe gea ai datoro ma oraha o Abarahaama wato to una ai ngofaka o Isaka womahihuba Ma Jouiye o huhuba ma ngioka.

²² Ho to Abarahaama ai ade-adeino gea de ka idadi hohioriki abe to una ai ngongaku de ai datoro gea ko imakitingakua masara duru imakiniiki, abe una ai datoro wodiai ma titi wingaku Ma Jouika, de nagali abe ai ngongaku idadi ingodumu Ma Jouika ma titi ai datorino.

²³ De ma dodihiraino naga ihitulihukuoka Ma Jou ai Demo-demoka ato, “De gea o Abarahaama wingaku Ma Jouika ho Una wietongo wato una duru wototiai Ma Jou ai himangoka.” Hokogea ihitulihukuoka, de ipahaino de o Abarahaama wonahimatoko ai datorino abe ma demo ma dodihirainohi gea duru igou-goungu. De hongoli Ma Jou ai Demo-demoka de iwihiromanga o Abarahaamika ato Ma Jou ai dodiawo. De hokogea ahi babaluhu de ahi hitararono onangika abe manga hininga la ato iti o nyawa yomahingahu ma titi manga ngongaku de gea dika yawedono la Ma Jou waduhunu manga howonino.

²⁴ Ho o Abarahaama ai wowango ma ade-adeino de ka idadi hamake itararono abe Ma Jou wafetongo o nyawa yataana de to Una ai mau mangale ma titi manga datorino abe yahitaana onangika ma titi manga ngongaku igou-goungu Ma Jouika. De gea nagali inahidumutu abe nako o nyawa manga ngongaku ka manga uruokahi dika abe yomahingahu ato iwingaku, masara ko iwa manga wowango ma datoro abe manga ngongaku ma hofokino, gea ona ko yataanuahi de Ma Jou ai mau onangika.

²⁵ De ka idadi hohiningaoo abe ma titi to nanga tofora o ngo Rahaba abe ma dodihiraino de muna gea momatobafukunu ami badanga. Angamoi munangoo Ma Jou womifetongo munangika wato mataana de to Una ai mau ma titi ami datorino abe ma oraha o Yahudi ma nyawa gea madafongo ami hininga ma rorahaioka de aino. Abe ona yoboa o Yeriko to muna ami kotaino la ena gea yatailako de ahao yolioika de yahingahu manga hidimonika abe hokokia yamake ma kotaka gea. Ho muna gea maduhunu de mahidumutu onangika o ngekomo moioli la gea ka idadi yaniiki yohupu ma kotaka de aino la manga musu ko yataokua. De hokogea ami datoro ma rorahai abe ma dodihiraino de muna modiaioka o ngo Rahaba de genangino imihitaana ami ngongaku ma gou-goungu.

²⁶ Ho naa moi ngohi tohiketero abe ma titi nanga ngongaku. Nako o nyawa manga badanga ko iwomahokaua, gea hohiromanga enangika hato ma badanga ihonengoka. De hokogenangoo nako o nyawa yomahingahu ato naga manga ngongaku masara gea de manga datoro ko iwa abe yataana de to Ma Jou ai mau, genangoo ka parahaja dika abe imakadaene hoka o badanga ma honenge enangoo parahaja dika.