Yakobusu 1 - Ma Jou ai Demo-demo o Totobelohoka

O Yakobusu ai demo ihira-hira ai gogianongoruika

¹ Ahi gogianongoru abe nginioo o Yahudi ma nyawa abe imaketero hoka ngohioli de ngini nimahikokabarihika o tonaka utuokali. Ngohi naa o Yakobusu abe to Ma Jou de to nanga Baluhu o Yesusu Kristusoo manga huhuloko. De naa ngohi tinihurata nginika de ahi tabea tohidingoto ngini mata-mataika.

Abe ma titi nako o kangela haohana

² Ahi gogianongoru, ngaro idadi abe o kangela o kia dika ma rupa niaohana nia wowangoka, ma gea ufa nia hininga ihuha, masara tanu ka idadiohi ngini duru nigarago dika, angamoi nia kangela gea tanu yataili nia ngongaku Ma Jouika la nako iputurungu eko kouahi.

³ De gea kiani ngini nihioriki abe nako nia ngongakuoka initaili de ko nikalaua genangino, gea ahao nia dongohono abe nia ngongakuino ka idadi idogoli.

⁴ Ho ngini kiani ka ihikaika nimatongohono abe ma oraha o kokangela homoi-homoi niohimanga ka hiadono nia dongohono gea ihihofoko de o hofoko duru ma rorahai nia wowangoka. Abe gea ma titi nia dongohonino de nia ngongaku ka idogo-dogo hiadono nibaluhu Unangika de ko iwa nia kuranga ti ngini nia hiningaka.

⁵ De nako hoka naga nia gianongoru abe wamao ai hiningaka abe ai sosawaro ka ikurangohi ho ko wohiorikua ai wowango ma datoro hokokia wodiai la itaana de Ma Jou ai mau, una gea koaho o sosawaro womagahoko Ma Jouino. Angamoi Una gea duru de ai hininga ma gahumu wonahidoaka ai sosawaro ngoneino de ko wonataerua, ho nako ai sosawaro ngone homagahoko Unangino, gea ahao wonahidoaka.

⁶ De onagona dika yomagahoko Unangino, iti ufa manga hininga ka hinootohi masara kiani duru iwingaku ka Unangika dika. Angamoi nako manga hininga ka hinootohi gea ona yomaketero abe hoka o lulu moi o gahioka abe ka ihikaika o hidaloko yao yaika yaino ho duru ko irii-riidua to ona manga hiningaka.

⁷ Angamoi o nyawa abe manga hininga ka hinootohi Ma Jouika, ngaro ufa ona gea yongano-nganono o kia dika ahao yamake nanga Baluhino ma titi manga gogahokino.

⁸ Angamoi to ona gea manga hiningaka de ika yomahinganono Ma Jouika, masara ika ko yomahinganonokauali, de ngaro manga wowango ma datorokaoo ma ahao ma hononga manga datorino de yataana de Ma Jou ai mau Unangika, masara utuoli ko yataanua. Ho nako ngone homagahoko Ma Jou ai sosawaro, iti ufa nanga hininga ka hinootohi ma titi Unangika done gea ko hamakeuali ai sosawaro.

Abe ma titi o nyawa nanga gogere

⁹ De nako nanga gogianongoru abe manga wowango ma gogere itipokouku, ona gea ka idadi manga hininga duru isanangi angamoi ona duru ihioriki abe ma titi manga gogere o Kristusoka gea ikokurutiye.

¹⁰ De abe nako nanga gogianongoru utuoli abe duru de manga tiwioka, onangoli gea ka idadi manga hininga isosanangi ma titi abe ona ma dihiraino de Ma Jou wahitipokoukuoka la hiadono ona ka idadi iwingaku o Yesusu Kristusika. De ona ka idadi yosanangi ma titi manga gogere ma dodipokouku gea angamoi to ona manga tiwi de manga kaya gea ahao ko itongohonua masara ka ihihanga dika abe imaketero hoka o ruruubu ma hurioli ipuraraha ho ihihonongaka ihihanga. Ho gea irahai ona ko yomahinganonokaua manga tiwika angamoi ena gea ka parahaja dika.

¹¹ Abe nako o ruruubu ma huri de ma wange ma gurutiyeoka ho duru yodahauku hiadono yatoolenge enangika, gea ahao ma huri yamaai de ipurarahuku ho to ena ma hohailoa ko iwaka. De hokogenangoo ahao idadi onangika abe de manga tiwioka, angamoi ona gea ka ihikaika yokarajaanga la genangino yomatiwi-tiwi, masara ahao ma moiuku de manga karajaanga ma goronakahi de yohonengoka ho manga tiwi de manga kaya gea yomakitingakoka onangino de duru ko iwaka. Ho manga tiwi gea tanu ko yahiutumua onangika. Ho gea ma titi hiadono ngohi tato ngaro ngone abe de nanga tiwioka eko ngaro hatoli hohuha, masara ngone mata-mata abe hingakuoka ka idadi nanga hininga isanangi angamoi duru hohioriki abe nanga gogere o Kristusoka gea ikokurutiye.

¹² De o nyawa onagona dika abe ngaro o kokangelaika yaohana masara ka yomatongohono ma titi manga ngongakuoka, onangika gea ahao Ma Jou wahiowa. Angamoi ona gea yomahitaanoka abe ngaro de o kangela yahitaili onangika masara gea yagou-goungu iwingaku Unangika. Ho ahao Una wahiowa onangika de manga hadia o wowango ma ngangoino ka hiado-adonika. De ma hadia gea ma dihirainohi de wonahibehehongoka ngoneino onagona dika abe hidora Unangika wato gea ahao wonahidoaka ma titi nanga dora Unangika.

¹³ De nako o nyawa naga yaohana o kangelaika, ko idadiua ona gea yotemo ato, “Ma kangela naa Ma Jouoka de aino wohihitaili la wato wohihiruba o howonuku.” Angamoi nako Ma Jou, Una duru ko iwa ai hininga o dorouika, ho gea itararonoka abe Una ma hirete ngaro ma hohutuloo ma ko wonahitailua de o dorou ngoneino.

¹⁴ Masara gea tanu to ngone o nyawa homoi-homoi nanga hafini ma dorou abe inahitaili de inahiata-atara la ato inahiloara o howonika.

¹⁵ Ho nanga hafini ma dorou gea ka de haniiki enangika de idadioka abe hahowono. De nako ngone homahigunoa la nanga wowangoka ka ihikaika o howono haniiki, gea hohioriki ma bahauku de kiani ihihofoko de o hohonenge.

Nako Ma Jou Una ai hininga ka irorahai dika ngoneuku

¹⁶ Ahi gogianongoru abe duru tinidora nginika, de naa ngohi tinihitiari tato ufa inibudi o nyawa manga demoino abe ona ato Ma Jou ka idadi o dorou wodiai.

¹⁷ Angamoi abe igoungu Ma Jou Una gea ka ma rorahai dika wonahidoaka ngoneuku, abe ngaro ma hidoaka o kia dika naga abe irahai de ko iwa ma kuranga, masara gea mata-mata iboa o Horogaka de auku ngoneuku. De ngaro ma kiahonanga daku ma dihangoka abe ihitotararono naa o duniauku, masara gea Ma Jou abe wohidadi ena gea mata-mataika. De masara gea ena ma dararono naga ma oraha de ma oraha dika ho ko ihikaikaua ihitararono ngoneuku. Masara nako Ma Jou, Una gea ka ihikaika ma rorahai dika wodiai de duru ko worehe-rehenua genangino.

¹⁸ De naga moioli ma rorahai abe ai hiningaka de aino iboa. Abe mangale ma titi to Una ma hirete ai mau ma rorahai ngoneuku ho hiadono ngone homaboa Unangoka, abe ma titi ngone hoihene ai hingahu ma demo ka ma gou-goungino dika ho genangino homaboa. Angamoi Una ai hiningaka wato ngone hodadi hoka to Una ai dulaada ma domoro la ngone naa duru hohira-hiraika abe hagou-goungu hodadioka to Una. Ho ngone naa ufa hiadono hafikiri hato Ma Jou ka idadi o dorou wodiai, angamoi Una gea ka ma rorahai dika wonahidoaka ngoneuku.

Nako hato haniiki Ma Jou ai Demo-demo, gea ufa ka hoihe-ihene dika de ko hodiaiua, masara kiani hoihene de hodiaioo

¹⁹ Ahi gogianongoru abe duru tinidora nginika, abeika niafikirohi naa ahi demoino. Kiani ngini homoi-homoi niamagawe nitotoihene Ma Jou ai demo abe ka ma gou-goungika. De masara nako ti ngini ma hirete nia demo, gea kalioli ka nimataiti nimahingahu ti ngini ma hirete nia hininga. De naa moioli tinihibehehongo, tato kalioli ka nimataiti nia ngamo ipudaiye.

²⁰ Angamoi nako ngone o nyawa nanga ngamo ipuda gea ko ihihofokua de Ma Jou ai totiai ma hofoko, masara tanu nanga ngamoino gea de to Una ai totiai hata-tatoko la ufa ihofoko.

²¹ Ho ngini niatingakika nia datoro de nia hininga ma dodorou eko ma pese-peseke o kia dika abe nagahi nginioka, de nimahitipokouku nia hiningaka la nianiiki Ma Jou ai hingahu ma demo abe Una wodatomoka nginioka. Angamoi nako ai demo gea ngini nianiiki, genangino de ka akunu iniduhunu o howono ma kuahaino.

²² De ngini kiani ka ihikaika niatobanii-niiki to Una ai demo gea nia wowango ma goronaka, de ufa ka niihe-ihene dika genangino ma ko nidiaiua, angamoi nako hokogea de ngini nimabudioka abe niato ma titi niihene dika ai demoino de Ma Jou winisanangi nginika. Masara genangino de ngini duru niangofu Ma Jou ai mau.

²³ Abe nako hoka o nyawa womatengo de una ka wotobaihene dika Ma Jou ai demoino masara gea ko waniikua ai wowangoka, una gea womaketero abe hoka womatengoli ai gurumini o kahinaaka wolegaika la ai rupa womahidotelega la wohioriki itiaioka eko kouahi. Masara abe naga ai kuranga womamakeoka, gea ko wohitiaiikaua

²⁴ de ka wosobo de wanoaika ma kahinaa. Ho ka de uku de to una ai rupa womawohangoka. Ho una gea ngaro womahidotelegaikaka o kahinaaika masara ma utumu ko wamakeuali genangino angamoi ko kia-kiaua wodiai la ai rupa wohitiai.

²⁵ Masara nako Ma Jou ai behehongo ma demoika, koaho irahai o nyawa ka ihikaika yomalega genangika. Angamoi to Una ai demo gea duru itotiai dika de ena gea ka idadi inahihupu o howono ma kuahaino la hiniiki ka Unangika dika. Ho onagona dika abe Ma Jou ai behehongo ma demoika ka ihikaika yomalega, ona gea ahao Ma Jou wahiowa onangika ma titi manga datorino. Angamoi ona ko yomakadaenua de una gea abe ka woihene dika Ma Jou ai demoino de ka de uku de to ena ma titi wawohangoka ho ko waniikua. Masara ona gea yatobaniiki Ma Jou ai demoika la genangino de Ma Jou ai mau yotobadiai. Ho mangale ma titi ona yomanoa Ma Jou ai demoka ho Una wasanangi onangika.

²⁶ De nako o nyawa yomahingahu manga hiningaka ato duru yomahuba-huba de iwiniiki itiai Ma Jouika, gea tanu ka idadi yomahipareta manga uruino. Masara nako ona gea manga uruino ma betongo ko yomahiparetaua hiadono yotemo-temo ma dorou dika, gea ona manga hiningaka yomabudioka, ho ka parahaja dika yomahuba-huba Ma Jouiye.

²⁷ Masara nako o nyawa abe Ma Jou o Baba wafetongo onangika wato ona yagou-goungu yomahuba-huba de iwiniiki duru itiai Unangika, ona gea ka idadi manga datoro hokonaa hamake manga wowangoka. Abe ona gea yatutumu o gohi-gohihi de o bao-bao la yaduhunu onangika manga kokangela ma goronaka. De nagali abe ona gea ma rorahai dika yatobanii-niiki, abe ma titi ngaro manga hiningaka eko ngaro manga wowango ma datoroka ma ko iwa manga howono angamoi yatingakika o dunia naa ma hininga onangino. De ona hokogea yaduhunu o huha ma nyawaika de yoluku o howono yodiai angamoi to Una ai demo ona yanii-niiki. Abe ai demo ma goronaka de Ma Jou wonahigaro ngoneino wato kiani hokogea hodiai nanga wowangoka, ho ona gea yaniiki to Una ai demoika dika.