Tobadotoko 7 - Ma Jou ai Demo-demo o Totobelohoka

7:1-6, 9-18 ko atailakouahi Nanga hininga koaho o kiaika itagi?

¹ O minya abe ma bounu ihailoa o nyawa yaetongo ato duru irahai. Masara nako ngone howango itiai la homalingiri nanga romanga ma rahai, ka enangohi duru ikurutiye. De ngaro o nyawa yogarago ma titi ngone homaboa, masara koaho nanga romanga ma rahai naga abe ma oraha nanga baha adonoka.

² Ngone koaho haniiki ma doomu abe o nyawa yagari manga gianongoru yohone-honengoka angamoi genangoka ka idadi homadotoko de hongano-nganono ma titi nanga wowango ma dumutu homoi-homoi gea o hone-honengika. Masara nako o rame-rame de o ngolo-ngolomo dika hatobaniiki, gea tanu ko inahiutumua nanga hiningaka.

³ Nako o hininga ma huha de o gie-giete, koaho o hininga ma huha hamao nanga hiningaka. Angamoi ma oraha ngone hohuha de ka idadi homadotoko de hongano-nganono abe hokokia howango itiai.

⁴ De o nyawa abe yoigo yomadotoko la yodogo yosawaro, ona yoiki yomadotoko onangoka abe yahigari manga riaka yohonengoka. Masara o nyawa abe yosanangi dika yobodo, ona gea yatobaniiki o rame-rame la yomahisosanangi dika.

⁵ De nako o sosawaro ma nyawa manga dodaere ma demo ngoneino de o bodo ma nyawa manga higiriiri ma demo, gea koaho hotoihene o dodaere ma demoika de hamalaika dika o higiriiri.

⁶ Angamoi o bodo ma nyawa manga giete gea ma ilingi imakadaene dika de o take ma rudu ma taage nako yomahidaulu de ipopotoka. De gea ma titi enangoo duru ko inahiutumua.

⁹ Ufa homahigunoa la itaiti nanga ngamo ifaeiye nanga hiningaka, angamoi gea o bodo ma nyawa abe yotobangamo.

¹⁰ Ufa hotemo hato, “Nako nanga wowango ma dihiraino de abe ma oraha naa naga masara ka ma dihirainohi nanga wowango irahai.” Angamoi o demo hokogea ko ihititiua o sosawaro ma hiningaino.

O sosawaro ma hininga duru inahiutumu nanga wowangoka

^11-12 Nako hohidotelega o nyawa nanga oara de o nyawa nanga sosawaro, gea hinootoo irahai angamoi gea mata-mata inahiutumu nanga wowango ma dodagioka de inadatoko la ufa o nyawa inahikangela. Masara tanu ka o sosawarohi duru ikurutiye angamoi ka idadi o sosawaro ma hininga duru inagoana la ufa o bodito inadaene.

¹³ Abeika ngone hongano-nganono ma titi Ma Jou ai datoro. Abe nako hiadono Una wohidadi moi la ipaleele, done o nyawa onagona ka idadi ihirikoto?

¹⁴ Ho koaho hodafongo dika abe Una wonahidoakino. Abe ma titi nako nanga wowango itagi irahai, gea ka idadi hosanangi dika. Masara nako hiadono o kangela inadaene de ufa hawohanga abe enangoo ihititi Unangoka. De ngone naa ko moiua abe hohioriki o kia ahao idadi nanga wowangoka.

¹⁵ Ngohi naa ngaro ahi wowango o duniaka ko iwa ma titi, masara naga ahi hininga ma dadaoko muruono abe tamakeoka. Abe ma moi ma moi tamake o totiai ma nyawa abe ko yaperekiuahi de ka yohonenge ngaro yowango yototiai dika. De nagali ma moi ma moi abe o dorou ma nyawa duru youmuru ngaro manga wowango ma datoro ma dorou yotobadiai.

¹⁶ Ho koaho ufa ngone homaetongo abe hototiaiholi eko hososawaroholi ho hiadono hafikiri hato o bodito ko idadiua inadaene, done de duru hoheranga nako hiadono inadaenoka!

¹⁷ De ngaro o dorou ma nyawa utu youmuru, masara ufa homahidadidorou dika la gea hafikiri nanga wowango ka idadi ikurutu o duniaka. De ufa hiadono o bodo ma hininga hatobaniiki, done genangino ma titi hiadono ka itodokanino de nanga bodito inadaene!

¹⁸ Ho ngohi tato irahai ahi hitiari ma demo hinooto gea mata-mata hatobaniiki la nanga horomati itagi Ma Jouika. Abe ufa ma demo moi dika hasoika de abe moioli gea hamalaika.