Tobadotoko 5 - Ma Jou ai Demo-demo o Totobelohoka

5:10-20 ko atailakouahi Nako o nyawa yohafini o tiwi, gea ma bahauku sarakia?

¹⁰ Onagona dika abe duru yodora o tiwi, ona gea manga hiningaka de ka ihikaika yamao manga tiwi ko yawedonuahi. De onagona dika abe duru ihitihira manga kaya, ona gea duru ko ma iwa abe yamao manga dadaoko ka yaowa. Ho ngohi tato marai enangoo ko iwa ma titi nako ka hohafi-hafini o tiwika.

¹¹ Abe ngaro to ngone nanga kaya ka idogo, masara de ahao o nyawaoo yodogo-dogo abe yoboa yomagahoko ngoneino! Ho tanu ko iwa ma utumu nako ngone de nanga tiwioka, angamoi ngone ka jai-jai dika homalega enangika de ahao nanga tiwi gea ka aiaho!

¹² Ona abe yotobakarajaanga, ngaro manga inomo ilamoko eko ikuranga, masara o futu-futu de manga giooko irahai. Masara onagona dika abe de manga tiwi-tiwioka, to ona manga giooko ikuranga mangale ma titi manga kaya ma amoko gea.

¹³ De naga moioli ma dorou abe ngohi tamake naa o duniaka. Abe nako o nyawa manga hininga la o kaya itou-touniye onangoka, gea ma bahauku de manga huha enangoo itou-touniye.

¹⁴ Angamoi ka itodokanino de naga moi idadi hiadono manga tiwi ka aiaho, ho ipahaino manga gahe adonoka de ko iwaka manga ngofaka manga oara.

¹⁵ Ho ngohi tamake abe ngone homoi-homoi ma oraha homaboa de hoboribululunoka de ka homahomoa dika. De hokogenangoo duru imakadaene ma oraha nanga gahe adonoka la hoborihonenge, angamoi ka homagiawawe dika. Abe duru ko idadiua nanga kaya homagao de de ngone.

¹⁶ De hiokoo abe to ngone nanga baha ko imakohowonua de nanga boa, ka imakadaene dika ma homoa mata-mata. Ho done nanga utumu o kia homamake nanga karajaangino? Marai ko iwa!

¹⁷ Angamoi o wange-wangeiye duru hongorumiha de hokarajaanga ka hiadono ihohomuku, ho ka ihikaika holomo o fufutuoka dika! De nagali nanga kokangela inaohana de nanga gogama inadaene de nanga hininga ma huha ka ihikaika hamao, ho nanga utumu duru ko iwa!

¹⁸ De igoungu abe ngone o nyawa nanga wowango ko ikurutua o dunia ma lokuoka. Ho ngohi tato koaho hodafongo dika ma rorahai abe Ma Jou wonahidoakino ngoneino. Abe irahai la holomo de hokere de hotobakarajaanga, angamoi gea mata-mata Una wonahidailako la nanga hininga ma sanangi ihititi genangino.

¹⁹ Angamoi nako hiadono Ma Jou wonahidailako nanga tiwi de nanga kiahonanga ngoneino, gea irahai la ai hidoaka hapake nanga wowangoka de homahisanangi ma titi nanga karajaangino, mangale gea mata-mata Unangoka de aino ai hidailako ngoneino.

²⁰ De ngone onagona dika abe hosanangi ma titi nanga wowango ma dodagi, gea ahao ko hopusingua de nanga wowango ma kangela o duniaka, angamoi nanga hininga aomangoka de o sanangi ma titi nanga karajaangino!