Tobadotoko 2 - Ma Jou ai Demo-demo o Totobelohoka

2:1-26 ko atailakouahi Nako o sosanangi ma hofoko gea ma bahauku sarakia?

¹ De ngohi tomatemo ahi hiningaka tato, “Abeika, ngohi naa tohitaili o sosanangi taniikohi la gea tatailako enangika de ka idadi tohioriki to ena ma hofoko ma rorahai eko koua.” Masara tomahisosanangi ipaha de tamake abe enangoo ko kia-kiaua ma titi.

² Ho ngohi tato ngaro ngone ka ihikaika horame-rame la hotobagiete dika, masara gea duru ko iwa ma titi. De nako homahisosanangi dika, enangoo ko iwa ma dumutu!

³ De ahao duru tomafikiri de tomalingiri ma titi o kia hiadono o nyawa yosanangi yokere o angguru ma teongo ma gohaka. De tongano-nganono abe ma hofoko hokokia nako o nyawa yatobaniiki o sosanangi dika. De ma oraha tomafikiri gea de ko ma titiua ahi hininga ihihihanga, masara gea o hininga ma sosawaro abe ka ihikaika ihihidumutu ma totiaiika. La genangino ka idadi tohioriki ma ngekomo o kia koaho ngone o nyawa haniiki abe ma oraha ngone nagahi o dunia ma lokuokahi, ngaro ko ikurutua nanga wowango naangoka.

⁴ De nagali abe ngohi tomahidogo ahi kiahonanga ma ngoe ahi wowangoka. Abe ma titi tomahigoko ahi tau muruono naga de tomadiai o angguru ma redi.

⁵ De ngaro o redi ma rorahai de ma hohailoa abe naga de ma gota ma hofoko irupa-rupa masara enangoo tomadiai la ihihisanangi.

⁶ De ma redioka gea tohidogo o taaga la ma gota ma hohailoa gea naga de ma akeroka la iwango irahai.

⁷ De naga tomaijaino o huhuloko yamuruono naga o nau-nauru de o ngo-ngofeka, de nagali abe yomaboa ahi tauoka ho onangoo yodadi ahi huhuloko ma nyawa. De nagali ahi aewani kohangoe, abe ngaro ngohi de o nyawa utu mata-mata abe ma dodihirainohi de onangoo yogogere o Yerusaleeme ma kotaka, masara ka ngohiohi ahi duduono duru ma amoko de ma ngoe.

⁸ De tomahidogoo o gurasi de o haaka de o kiahonanga utu abe duru de ma ijaka abe o kokoano de o popareta ma nyawa ihihidoaka ngohino. De nagali tahikarajaanga ona abe yotobanyanyi la ka idadi totobaihene manga nyanyiangika. De hongoli naga ngohioka ngohi fekata manga ngoe abe duru yohohailoa / yororahai, ho ka ihikaika ngohi naga de ahi sosanangioka!

⁹ Ho igoungu abe ngaro ka ngohiohi de ahi tiwioka nako de ona utu abe ma dodihirainohi yogogere o Yerusaleemoka, masara nagaoo ahi hininga ma sosawaro abe ka tomatumungohi la ihihihira-hira ahi wowangoka.

¹⁰ De o kia dika tamake abe ahi hininga adaene enangika, gea tomahitongohioka dika, abe duru ko tomatumungua o kia dika abe ka idadi ihihisanangi. De igoungu abe ahi wowango ma datoro mata-mata ihihofoko o sosanangi ahi hiningaka.

¹¹ Masara ipahaino de ngohi tongano-nganono abe ma titi ahi wowango ma datoro gea todiaioka, de ahi karajaanga ma hasili mata-mata tamakeoka. De ahi hiningaka taetongo gea mata-mata tato ma bahauku de duru ko iwa ma titi genangino. Abe gea duru ka ma hoanino halegono, ho nanga sosanangi tanu ko inahiutumua ngone.

Nako o sosawaro ma hofoko gea ma bahauku sarakia?

¹² De ahao ipahaino de ngohi tomaputuhu tato irahai tatailako de tohidifikiri o sosawaro de o bodo ma hininga. Angamoi nako ngohi de o nyawa utu mata-mata masara ka ngohiohi ahi hininga ma lako idoto la gea tohidifikiri.

¹³ De tatailako ibooto de duru tohioriki abe nako o sosawaro de o bodo ma hininga masara koaho o sosawaro hatobanii-niiki nanga wowangoka. Abe gea ngade-ngade imakadaene hoka o dararono hohidotelega de o fufutu de hohioriki abe koaho hatobaniiki o dararono.

¹⁴ Angamoi o sosawaro ma nyawa ona ka idadi yamake manga wowango ma ngekomo de manga dumutu enangoo ihioriki. Masara o bodo ma nyawa ona ka yotagi-tagi o fufutuoka. De masara ngaro o sosawaro ma nyawa de ngaro o bodo ma nyawa masara ona mata-mata manga bahauku de ka imakoketero dika, abe ma titi ona yoborihonenge dika.

¹⁵ Ho ngohi tomatemo tato, “Done ma utumu o kia ahao tamake ahi sosawaroino? Angamoi ahao ahi bahaika tomahiadono de ngohioo ka tohonenge imaketero hoka o bodo ma nyawa yohonenge!” De ahao ahi daiana ma demo ihupu ahi uruino abe tato, “Nako hokogea dika marai o sosawaro ma hofoko gea tanu ko kia-kiaua!”

¹⁶ Angamoi ngaro o sosawaro ma nyawa de ngaro o bodo ma nyawa masara ona yoborihonengika de ko itedekanuahi de manga romanga de manga wowango o nyawa ko yahiningakaua! Ho ngohi tato hiokoo abe o sosawaro ma nyawa onangoo kiani yohonenge imaketero hoka o bodo ma nyawaoo yohonenge!

¹⁷ De gea ma titi hiadono ka idadi totemo tato todohata ngone o nyawa nanga wowango o duniaka naa. Angamoi to ngone nanga datoro mata-mata o dunia ma lokuoka ko kia-kiaua ma titi, de ngaro hatobaniiki o sosawaro ma ngekomo masara gea imaketero hoka duru ka ma hoanino halegono.

Nako o karajaanga ma hofoko gea ma bahauku sarakia?

¹⁸ De abe ma titi to ngohi ahi karajaanga de ahi gahaukoka, gea ahi karajaanga ma hofoko enangoo todohata enangika, angamoi gea mata-mata kiani todogunoaika dika la idadi ahi oara onangika abe ihituruuru.

¹⁹ De gea duru ko tohiorikua nako ona gea o sosawaro ma nyawa eko o bodo ma nyawa abe ahao yodadi ahi karajaanga ma hofoko ma dutu. Abe ngohi duru tokarajaanga de ahi buturungu ma gahumu de ahi tobahioriki ma gahumu o dunia ma lokuoka naa, masara gea ahao kiani todogunoaika dika. Ho done o kia ma titi ahi karajaanga gea? Marai duru ko iwa ma titi!

²⁰ Ho to ngohi ahi hiningaka de duru tohuha ma titi ahi karajaanga ma hofoko mata-mata gea abe o dunia ma lokuokahi todiaioka.

²¹ Angamoi ngaro ngone o nyawa hapake nanga sosawaroino de nanga tobahioriki ma gahumino la nanga karajaanga ma hofoko duru irahai, masara ma bahauku de kiani hahidoaka dika o nyawaika abe manga gahauku ko ihupua de ko yokarajaangua la yamake ma hofoko gea. Abe kiani nanga karajaanga idadi to ona manga oara la yodafongo dika! Ho nako ngohi tongano-nganono ma titi nanga karajaanga ma hofoko, gea taetongo tato duru ko itiaiua, de duru tokangela tataoko ma titi o kia hiadono kiani idadi hokogea!

²² De abeika homafikirohi, done o kia nanga utumu abe nanga karajaangino de nanga hininga ma huhaino ma oraha ngone hokarajaanga o dunia ma lokuokahi naa?

²³ Angamoi o wange-wangeiye nanga karajaanga ihihofoko ma odiri nanga badangoka de ma kangela nanga hiningaka. De ngaro o futu-futuoka masara nagahi nanga hininga ma huha abe iboa nanga karajaangino gea. Enangoo ko kia-kiaua ma titi!

²⁴ Ho ngohi tato koaho o nyawa yodafongo dika Ma Jou ai hidailako de manga hininga ma sanangi. Abe ngaro yolo-olomo de ngaro yokere masara gea ka idadi yosanangi dika yodiai. De ngaro yotobakarajaanga masara koaho yososanangi dika manga karajaangika. Angamoi gea ma rorahai mata-mata abe Ma Jouoka de aino wonahidoaka.

²⁵ Abe nako ko Unangua, done onagona yamake manga inomo de onagona ka idadi yogogarago?

²⁶ De onagona dika abe iwihisanangi Ma Jouika, ahao Ma Jou wahidoaka o sosawaro de o tobahioriki de o garago onangika. Masara o tobahowono ma nyawaika de Ma Jou wahidoaka la ona ka idadi o kiahonanga de o kaya dika yomahidogo-dogo hiadono itou-touniye. De ipahaino de to ona manga kaya gea ka ihihanga angamoi ahao idadi to onangoli abe iwihisanangi Ma Jouika. Ho ona abe yomahidogo-dogo dika, to ona manga karajaanga ma hofoko tanu ko kia-kiaua ma titi. Abe gea imaketero hoka duru ka ma hoanino dika halegono.