Titusu 3 - Ma Jou ai Demo-demo o Totobelohoka

Kiani naga nanga hingounu o poparetaika

¹ De naa, ahi gianongoru o Titusu, naa tonihibehehongoli ngonaika tato kiani ka ihikaika nahihohininga nanga gogianongoruika genangoka. De gea nahihohininga la kiani naga manga hingounu o poparetaika de onangikaoo abe manga gogere ikurutiye la hiadono manga huhuloko ma demo o nyawaika yatobaniiki. De gea nahihohiningaoo la ona ka ihikaika yomahidiaioka la nako naga ma oraha abe ka idadi yodiai ma rorahai, gea kiani yodiai de ufa hiadono yokapaanga de ko yodiaiua.

² De kiani nahihohiningaoo onangika nato, “Ufa o nyawa niangelo la niato niahikangela onangika, de ufa niaribuutu, masara kiani niabole-bole o nyawa utuika de niao itiai ka hiadono nia hininga ma dodipoko ma gahumu niapake o nyawa mata-mataika.” Hokogea kiani ka ihikaika nahihohininga nanga gogianongoruika genangoka.

Ma Jou wonaduhunu nanga howono ma hohowonino de wonahidoaka ngoneino o wowango ma hungi

³ De gea ahi behehongo ma demo kiani nahihohininga onangika la ena gea yahigaro hiadono yaabole-bole o nyawa mata-mataika. Angamoi Ma Jou waduhunoka manga howonino, ho gea ona kiani manga wowango ma datoro imakiniiki de to Una ai mau onangika. De abeika ngaro ngone naa abe hingaku-ngakuoka, masara abe ma dihira de ngone nanga wowangoka duru homaketero dika abe hoka onangoli abe ma oraha naa ona gea ko iwingakuahi. Abe ngoneoo ma dihira gea duru ko iwa nanga tobahioriki abe hiadono ko moiua de hataana de Ma Jou ai hininga. De ma oraha gea ngoneoo ko iwa nanga hingounu, de gea hiadono o nyawa utu inatobabudi de inahihira-hira ma dorouika. De igoungu ma oraha gea duru ka ma dorouika dika inahipareta hiadono nanga horoodo ma gimono mata-mataika ngone ka ihikaika hoohafini genangika, de gea ngone hoigo la homahisosanangi enangika. De ma dihira nanga wowango ma datoroka duru ka ihikaika hotula-tulaka dika de homaketetaleana de ka hiadono homakodohata ngone de o nyawa utu. Hokogea ma dihira nanga datoro ma dorou, de gea ka imaketero dika abe hoka o nyawa utu ma oraha naa abe ona ko iwingakuahi Unangika. Ho ngone koaho haabole-bole o nyawaika abe manga hininga hokogenangohi.

⁴ Angamoi ngaro ma dodihiraino hokogea nanga datoro ma modorou, masara de ma bahaika de ahao nanga Duduhunu Ma Jou wonahimatoko ngoneino de ai hininga ma bole-bole de ai dora.

⁵ De duru ma oraha gea abe Ma Jou wonaduhunu nanga howo-howonino. De gea Una wonaduhunu ko ma titiua to ngone nanga datoro ma totiai naga, masara wonaduhunu gea mangale ma titi to Una ai hininga ma doraka dika de aino ngoneino. De abe wonaduhunu, gea Ma Jou o Womahino wonaduhunu abe Una wonahidoaka ngoneino o wowango ma hungi de wonahitebini nanga howonino. De abe imaketero hoka nanga ngofaka haohiki la manga tonaka iofi, hokogenangoo de Ma Jou o Womaha hoka wonaohiki ngone nanga hiningaka hiadono wonahitebinoka la nanga howono ko iwaka. De gea ma oraha abe Una wonahiwangoli de o wowango ma hungi de abe nanga wowango waturuuru la gea nanga wowango ma ngekomo ma hungioli.

⁶ De mangale ma titi o Yesusu Kristusu nanga Duduhunu wohonenge la Una wonaduhunu hiadono ka idadi Ma Jou o Baba wihidoaka Ma Jou o Womaha ngoneino, de gea ai hidoaka ma owa moi duru kohaamoko. De gea Ma Jou ka wihidoaka dika ngoneino la Ma Jou o Womaha gea ka idadi duru de ai buturungu wonaduhunu nanga wowangoka

⁷ hiadono wonahidadi to Ma Jou ai ngofa-ngofaka de ka idadi ngone duru hongaku de hongano-nganono abe ahao ngone hamake nanga oara nanga Babaino, abe nanga oara gea nanga wowango ka hiado-adonika. De gea ka idadi Ma Jou wonahidadi ai ngofa-ngofaka mangale wonahitotiaioka ho wato, “Ti ngini nia howono ngohino gea takokiofioka.” Ho gea duru ma titi Ma Jou ai hininga ma owa ngoneino hiadono ngone nanga howo-howono duru waofioka de to Una ai himangoka duru wonahitotiaioka. Ho naa tonahigaro tato irahai hongano-nganono nanga wowango ma dihiraino de to Una ai duduhunu ngoneino ma oraha abe ngone ka homanoahi nanga howono ma goronakahi, la genangino inahihohininga la hiadono haabole-bole o nyawa utuika.

O Paulusu ai hitiari ma titi o rerehene ma dodotoko

⁸ De ahi demo gea abe ma titi hokokia Ma Jou wonaduhunoka de hokokia wonahidoakoka nanga wowango ma hungi, de gea ma demo duru igou-goungu, de ka idadi hangaku genangika. Ho naa ngohi tonihibehehongo ngonaika tato ka ihikaika ahi demo gea kiani nadotoko de ani hininga de ma buturungoka nanga gogianongoruika abe genangoka o Kereta ma nuuhoka yogogere. De gea ahi demo kiani ka ihikaika nadotoko onangika la hiadono ona manga hiningaka duru yongano-nganono irahai de duru yamagawe abe yotobadiai ma rorahai dika. De igoungu ahi demo gea abe ma titi Ma Jou ai duduhunu ngoneino de nanga wowango wonahidoaka, duru ma demo ena gea abe ka idadi ngone mata-mataika inaduhunu de inahigaro ma totiaiika.

⁹ Masara naga o demo utuoli ma ngoe abe genangino duru ko iwa ma utumu ngoneino. De naa ngohi tonihitiari ngonaika tato nako o nyawa yomaketeribuutu ma titi o Yahudi ma nyawa manga totofora manga roma-romanga de manga ade-ade abe ihidogo Ma Jou ai Demo-demoika, ona gea ngaro ufa dika de nahigihene onangika angamoi manga ade-ade gea ka o nyawa dika yodiai de duru ko iwa ma titi genangino. De nako naga o nyawa utuoli abe ka ihikaika yomaketeloliliara de yokadatoro ma titi o Musa ai Pareta, de ona gea kiani nadokaowara dika, angamoi ona mata-mata manga ribuutu de manga kadatoro gea duru ko inaduhunua de duru ko iwa ma utumu.

¹⁰ De naa moioli tonihibehehongo ngonaika tato nako naga o nyawa onagona dika nginioka de ona gea manga hininga la nia rimoi ihikapusaka, ngona kiani nahitiari onangika gea nato, “Ibootohi nia rerehene ma demo nidotoko nenangoka.” Hokogea nahitiari. De nako hiadono ona gea ka yogila-gila dika iniruwae, kiani nahitiari ma hinootoli abe gea ani demo onangika imakadaene dika abe hoka ani demo ma dodihirakali onangika. Masara nako hiadono ona gea ko yomatogumuahi de ka yaruwaeohi nia rimoi, gea de ahao kiani ngona duru de ani buturungu nahitogumu ona gea de ufa ko nahigunoa la ona nia rimoi o garejaka yahikapusaka.

¹¹ Angamoi nako hokogea manga hininga de manga demo, gea ka idadi nahioriki de duru itararonoka abe ona gea yomahirehenoka ma gou-goungino. De gea ngaro manga wowango ma datoroka ma ona yomahitaana abe yahowo-howono Ma Jouika. Ho gea duru itiai nahitogumu onagona dika nginioka abe hokogea manga hininga. Hokogea ahi hitiari ma demo ngonaika.

O Paulusu ai hidee de ai behehongo ma bobaha

¹² Ahi gianongoru o Titusu, marai naa tonihingahu ngonaika abe ahi hidee la tato ahao ka idadi ngona de ngohi homakamakeoli. De gea ngohi tato nanga gianongoru womatengo ahao tihidingoto ngonaiha la una gea ahao ka idadi ngona wonituruuru ani karajaangoka. De gea nanga gianongoru onaguna, gea ko tomaputuhuahi nako o Aratemasa tihidingoto ekola o Tikiku ahao tihidingoto ngonaiha. De yahinooto gea masara onaguna ahao taputuhu de tahidingoto, gea nako hiadono una womahiadonoka ngonaiha de duru togahoko la ngaro o kia dika naga ma gea ngona nanoaikahi o Kereta ma nuuhu gea de noboa nohitutumu ngohi o Nikopoli ma kotaka. Angamoi ngohi tomaputuhoka tato ahao tosobo toiki o Nikopoli ma kotaika de genangoka tomagoo-gogerohi abe o mede muruono gea abe nanga himangoka ngone hato ma oraha o maata. De ma oraha o maata ipahakahi de ahao marai o ngi moiikali toiki. Ho ngohi duru togahoko la ngonaoo noboa genangino la ahao ngone ka idadi homakamakeoli genangoka.

¹³ De naa moioli tonihibehehongo abe ma titi nanga gogianongoru o Senas de o Apoloso. De nako o Senas una gea wososawaro ma titi abe o popareta ma hiaturu. Ho ahao ma oraha ona yahinooto nginioka de yosobo, gea tonihibehehongo tato to ona manga dodagi ma perelu kiani nolegaika la o kia dika naga de ma enanga ngonaka, gea ena dika nahidoaka onangika. Angamoi done ahao manga dodagi ma goronaka de naga manga kuranga.

¹⁴ De igoungu ahi behehongo gea ma dumutu ngonaika la tato naduhunu yahinooto gea, masara tanu irahai tahidumutoo nanga gogianongoruika mata-mataika abe genangoka o Kereta ma nuuhoka yogoo-gogere. De onangoo gea koaho yomadoto-dotokohi abe hokokia yaduhunu o nyawaika hiadono ona gea ka idadi yakunu yotobadiai abe ma rorahai. De nako ahao naga idadi ma kangela o kia dika abe ahao naga yadaene o nyawaika abe ka hiadono manga perelu o nyawa utu duru ko iwa hiadono yohuha, gea de ahao nanga gogianongoru genangoka ka idadi yaduhunu onangika de manga perelu yahidailako angamoi gea ma dodihirainohi de ona yomadotokoka de yakunoka yotobadiai abe ma rorahai. De nako hokogea yodiai, gea yomahitaana abe manga wowango gea duru ko parahajaua.

O tabea ma demo wohidingoto o Titusika

¹⁵ De naa marai nanga gogianongoru abe naga nenangoka ihidodiawoino ngohi, ona gea mata-mata manga tabea ihidingoto ngonaika. De naa marai ngomi migahoko ngonaika la mia tabea nadofanga nanga gogianongoruika genangoka o Kereta ma nuuhoka abe ona gea imidora ngomino. De naa tinigahoko la Ma Jou ai owa winihidoaka ngini mata-mataika.