Titusu 2 - Ma Jou ai Demo-demo o Totobelohoka

Ngone hingaku-ngakuoka kiani nanga wowango hokokia?

¹ De naa tonihibehehongo ngonaika ma titi abe o dodotoko ma gou-goungu, de naa tato ngona o Titusu kiani ka ihikaika nahingahu-ngahu ani gogianongoruika o Yesusoka, de gea ani dodotokino kiani imakiniiki de ma dodotoko ma gou-goungu.

² De abe hoka ona ani balu-baluhu yatimonoka o nau-nauru, onangika kiani nadotoko nato, “Ngini kiani nia wowango ma dumutu nimahipareta done nirehene ma dorouika, de kiani niwango itiai la hiadono nimahitaana abe o nyawa utu ka idadi inihayanga nginika, de kiani niakunu nimatongohono ma dorouino. De abe nia ngongaku Ma Jouika de nia doraoo o nyawa utuika, gea kiani ibitumu de ko ikelu-kelua mata-mata. De ngaro o kia dika abe ahao naga niohimanga nia wowangoka, ma ngini kiani nimatongohono de ufa nirehene Ma Jouino.” Hokogea kiani nadotoko ani balu-baluhika genangoka abe yaperekioka.

³ Ho naa moioli tonihibehehongo ngonaika, abe ona o ngo-ngofeka yapoperekioka genangoka, onangikaoo ma kiani nadotoko onangika abe imaketero hoka ma nau-naurikali. De gea kiani nadotoko onangika nato, “Ngini nia wowango ma datoroka kiani itebini la hiadono o nyawa utu ahao inihioriki abe ngini naa naga nia horomati Ma Jouika de ona ahao inihiorikoo abe ngini nia wowango nimahidoakoka Unangika la gea ka idadi niwileleani. Ho ngini ufa o nyawa utu manga wowango nihitobahiade-ade de ufa o daluku inihipareta. Masara koaho ngini kiani niahigaro o nyawa utuika la ma rorahai dika ona yaniiki.

⁴ Abe hoka o ngo-ngofeka utuoli abe ona hatoli ka o goohi, onangika gea ka idadi ngini niahigaro de niadotoko la onangoo manga wowango ma datoro itotiai. De ona niadotokoo la ihioriki hokokia kiani yadora de yahayanga manga roka-rokatika de manga ngofa-ngofakika.

⁵ De niadotokoo la ona ka idadi yakunu yomatongohono ma dorouino, de ka hiadono ko yahowonua manga badangoka. De nagali kiani niadotoko abe ona manga karajaanga manga tau homoi-homoioka yao irahai, de niadotoko onangika la kiani yomahitipokouku manga rokata manga himangoka abe ma titi kiani naga manga hingounu manga rokatika. Angamoi nako ma dodotoko hokogea mata-mata niadotoko onangika abe ona ka o goohi hiadono ona yaniiki gea nia dodotoko onangika, de gea ahao o nyawaka ko iwa ma ngekomo la ka idadi yongelo nanga dodotokika abe gea nanga dodotoko Ma Jou ai Demo-demoino.” Hokogea ngona o Titusu kiani nahibehehongo o ngo-ngofeka yatimo-timonoka genangoka abe ma titi hokokia kiani to ona ma hirete manga wowango de hokokia abe manga dodotoko gea yahigaro manga dodiawoika abe ona ka o goohi.

⁶ Ho naa moioli ahi behehongo ngonaika, abe o nau-nauru ka o goohi genangoka, onangikaoo kiani nadotoko abe imaketero hoka ona yatimo-timonokali. De onangika kiani nahigaro la ngaro o kia dika mata-mata naga ahao yohimanga manga wowangoka, de ka idadi yakunu yomatongohono ma dorouino. Hokogea kiani nahigaro onangika abe o nau-nauru ka o goohi.

⁷ De abe ngona ma hirete, ngonaika tonihibehehongo tato kiani notobadiai abe ma rorahai la ani gogianongoru ka idadi yomaaduru abe hoka ngonali ani wowango ma datoro ma rorahai. De abe ma oraha ani gogianongoru manga himangoka de nadotoko, gea kiani nadotoko onangika de ani hininga ma hohailoa dika. De kiani ani dodotoko gea nao itiai de gea ani demoka ufa hiadono yafikiri ato ka o hawaliti dika ma demo, done ahao ko iwa manga horomati ngonaika.

⁸ Masara ani dodotoko ma titi kiani ka itotiai dika de gea ko idadiua o nyawa yatae enangika. Angamoi nako ahi behehongo ngonaika gea mata-mata ahao naniiki, de gea ahao o nyawa onagona dika inalawana ngoneino ma gea ona ka ona dika yomahimaleke, angamoi duru ko iwa ma titi la hiadono ona gea ka idadi inatae ngoneino de hiadono inahitaana.

⁹ Ho naa moioli tonihibehehongo ngonaika, abe nanga gogianongoru genangoka abe ona gea ka o nyawa manga gogilaongohi, onangikaoo ma kiani nadotoko. De gea kiani yomahitipokouku manga hidimono manga himangoka, abe ngaro o kia dika ahao yohimanga, masara kiani naga manga hingounu manga hidimonika. De gea kiani ona yamagawe la yahisanangi manga hidimonika, de ufa yotariana onangika.

¹⁰ De ufa yadohi-dohiki manga dimonika, masara kiani ona yomahitaana manga wowango ma datorino la gea manga dimono ka ihikaika duru yangaku ona manga gogilaongika. Angamoi nako o gogilaongo de manga hingounu duru itiai manga hidimonika abe hoka imaketero ahao naa ahi behehongo ma demo abe nabasaka, de gea ahao idadi hoka o hiliara moi Ma Jou ai dodotokino. De ahao o nyawa utu ma oraha iwimake o gilaongo womatengoino abe ai hingounu ingodumu ai dimonika de bote ahao ma nyawa gea womatemo wato, “Abeika o gilaongo gea ai hininga ma rahai! Marai ngohi kiani tileha unangika abe ai ngongaku ma titi o kia!” Marai ahao hokogea itemo manga hiningaka hiadono yoigo yototoihene nanga dodotokino abe ma titi Ma Jou nanga Duduhunu.

Abe ma titi Ma Jou ai hidoaka ma owa ngoneino abe wonaduhunu o howono ma kuahaino

¹¹ Abe duru igoungu Ma Jou womahimatoko ngoneino ai hininga ma owa ma oraha wihidingoto o Yesusu Kristusu la Una gea wonaduhunu ngone nanga howo-howonino. Ho mangale ma titi Ma Jou ai hininga ma owa ngoneino ho gea ngohi naa tonihibehehongoka ngonaika tato kiani nadotoko nanga gogianongoruika la gea ahao manga wowango imakiniiki de to Una ai mau ngoneino.

¹² De Ma Jou ai hininga ma owa ngoneino, gea ena inahigaro de inadotoko la hiadono ka idadi holuku o kia dika naga nanga wowangoka abe imakalawana de to Una ai mau ngoneino. Ho gea wonadotoko la ngaro ngone naa ka o dunia ma lokuokahi hogogere masara ibootohi o dunia ma horoodo ma dorou haniikohi. Hokogea wonaduhunu la homatongohono hiadono to Unali ai mau ngoneino ka idadi haniiki de nanga wowango ma datoro ka itotiai dika.

¹³ De gea kiani nanga wowango itotiai mangale ma titi ma oraha naa ngone hidodamaa o Yesusu Kristusu ai gahe abe wato womahimatokoli. Angamoi nako ai gahe ma wange gea adonoka, de ahao idadioka abe ma dihirainohi de hongano-nganono abe Una womahimatoko de ai medebini ma dararono. De ma wange gea ahao o nyawa mata-mataika duru iwihioriki o Yesusu abe Una gea nanga Jou de ko ai buturungu, de Una gea nanga Duduhunu, de Una gea nanga Koano abe Ma Jou wonahibehehongoka. Ho ma oraha naa kiani imakiniiki to ngone nanga hininga de to Una ai hininga ka hiadono dokengika abe nanga sosanangi ma wange gea adonoka Una woboa.

¹⁴ Abe Una gea womahidoaka la ka idadi wonahihohe nanga howono ma kuahaino de wonahitebini nanga wowango. De ai datorino gea de wonatingaka Unangino la hiadono hodadi to Una ma hirete ai nyawa, de Una woigo wato ngone duru inamagawe hotobadiai ma rorahai dika. Ho mangale ma titi ai hininga ma owa gea ngoneino ho hiadono ngone mata-mata kiani nanga wowango hao itiai ma oraha naa de ka hiadono nanga Baluhu ai gahe ma wange adonoka.

O Paulusu wihibehehongo o Titusika wato, “Kiani nadotoko de nahigaro de nataere nanga gogianongoruika!”

¹⁵ Ho naa ahi hurata ma goronaka de ahi behehongo ma demo ngonaika ma ngoe, de gea mata-mata duru ka tonihibehehongokali tato kiani nadotoko nanga gogianongoruika o Kereta ma nuuhoka gea. Abe gea kiani onangika nahigaro la yaniiki ma behehongo abe onangika yahidumu-dumutu. De abe onangikali ko yaniikua ani dodotoko, onangika gea kiani ngona nataere. De ngaro o nyawaika nadotoko eko nahigaro ekola nataere, ma gea ufa nawohanga ani kuaha naga Ma Jouoka de aino la hokogea kiani nodiai onangika. De ufa nahigunoa la o nyawa genangoka de yaetongo ani dodotoko ma demo onangika done ato ani dodotoko gea ko kia-kiaua.