Titusu 1 - Ma Jou ai Demo-demo o Totobelohoka

O Paulusu ai demo ihira-hira o Titusika

¹ Ahi gianongoru o Titusu. O hurata naa ngohi o Paulusu totulihi. Abe ngohi naa Ma Jou ai duduhunu tomatengoino, de hongoli ngohi o Yesusu Kristusu ai hidingoto ma nyawa la tatobahingahu-ngahu o nyawaika ma titi Una. De gea ngohi wohiirikoka la wato to Una ai nyawa wairi-irikoka, onangika gea taduhunu. Abe Una woigo wato tonaduhunu ngone mata-mata la hiadono nanga ngongaku Unangika idogo iputurungu de hiadono utuohi itararono ngone hohioriki ma gou-goungu Ma Jouoka de aino. Angamoi nako hiadono ma gou-goungu gea hataoko itiai, gea de ahao hapoa howango itiai Ma Jou ai himangoka de hihisanangi Unangika.

² De mangale ma titi nanga ngongaku Unangika de abe ma gou-goungu hataoko itiai, ho hiadono ngone ka idadi duru honganono abe ahao hamake o wowango ka hiado-adonika. Angamoi o dunia naa ko watulaadauahi de Ma Jou wohibehehongoka wato ahao ai nyawa yamake o wowango ka hiado-adonika. De angamoi Una gea duru ko wotobaelu-elukua ho ngone duru kiani hongaku abe ahao hamake nanga wowango gea abe imaketero hoka ma dodihiraka de wonahibehehongoka ngoneino.

³ Masara ma dodihiraka de ai hingahu ma demo gea ko wahingahuahi o nyawaika angamoi ma oraha gea ko adonuahi. Masara naga ma oraha wairikokau abe ahao wahingahu, de ipahaika de ma oraha gea naa adonoka abe ma dihira Ma Jou wairikoka wato gea ma oraha itiai la wahingahu o nyawaika to Una ai hingahu ma demo. De gea ka idadi wapake to ngohi ahi uruino. Abe Ma Jou nanga Duduhunu wohihitagongo ngohino de ai karajaanga gea de wohihuloko la wato to Una ai Abari ma Rorahai tahingahu-ngahu o nyawaika. Hokogea ahi karajaanga abe wohihidoaka ngohino.

⁴ Ho naa ahi hurata tohidingoto ngona o Titusika, abe ngona nodadioka hoka ahi ngofaka idodutu ma titi ngona de ngohi nanga ngongaku ka moi. De naa tonigahoko Ma Jou nanga Babaiye de nanga Duduhunika o Yesusu Kristusu nanga Koano abe Ma Jou wonahibehehongoka. De tonigahoko la Una ahao wonihidoaka ngonaika to Una ai hininga ma owa de ai hininga ma miriidi.

O Paulusu wihihohininga o Titusika ma titi o gareja ma hihira

⁵ Nengokadau abe ma oraha toninoaika genangoka o Kereta ma nuuhoka de tonihibehehongoka la gea tato ngona ka idadi nohitiai ma kuranga eko ma kangela o kia dika nagahi o gareja ma dodoomu ma goronaka gea. De ma oraha gea tonihibehehongo ngonaika tato ahao ngona kiani nairiki de nagoraka o nau-nauru o kapongo homoi-homoiino abe naga iwingaku-ngakuoka genangoka la ma nau-nauru gea ona yodadi o gareja ma hihira manga ngi homoi-homoioka. Ho ngohi naa tonihihohininga abe ma titi ahi behehongo ma demo ngonaika ma oraha gea. Abe hokonaa ahi demo.

⁶ Abe nairiki o nau-nauru la yodadi o gareja ma hihira, ona gea kiani manga wowango hokonaa. Ona gea manga wowangoino ko iwa manga datoro la hiadono o nyawa utu ka idadi yatae-tae onangika. Abe una kiani watobagou-goungu ngoi fekatika abe ma titi ko wahowonua de o ngofeka utuika. De abe nako to una gea ai ngofa-ngofaka, ona gea kiani naga manga higihene yatobagou-goungu manga dimonika, de ufa to una ai ngofa-ngofaka gea ka yomahisosanangi dika abe manga higihene ko iwa manga dimonika. Ho nako womatengoani abe ai ngofa-ngofaka o nyawa yahioriki abe ona manga datoro ko itiaiua de yatobalawana o nyawaika, to ona manga dimono gea ko idadiua nigoraka la wodadi o hihira o garejaka.

⁷ Abe una gea kiani o nyawa abe ai wowangoka ko iwa ai datoro ma dorou, ho o nyawa utu duru ko idadiua iwitae unangika, angamoi una gea Ma Jou wihitagongika la wato una gea watobagoa-goana ai gogianongoru o garejaka. De nako naga womatengo nato nigoraka la una ahao wodadi watobagoa-goana o garejaka, ho una gea iti ufa hiadono womahitobakurutiye eko wotobatualono eko womatobadaluku eko watobapoha o nyawaika ma titi ai ngamo. De iti ufa womatengoani abe wosanangi o nyawaika warusi la hiadono ai tiwi womamake genangino. Ko idadiua ai wowango ma datoro hokogea.

⁸ Masara kiani hokonaa ai wowango ma datoro. Nako hiadono o nyawa iwirekata unangika, una gea kiani wadafongo de wao irahai abe gea iwirekatino. De una gea kiani duru woigo o datoro ma rorahai hiadono ai wowangoka de ka ihikaika wotobadiai abe ma rorahai. De kiani una gea ai hininga ibaluhoka la hiadono ngaro o kia dika wohimanga ma ka wakunu wairiki abe imakiniiki de Ma Jou ai mau unangino. De kiani ai wowango ma datoro itotiai, de kiani ai hininga duru itebini Ma Jouika, de kiani una ka wakunu womatongohono ma dorouino. Ho una gea ko nigorakuahi de ai wowango ma datoroka kiani nihiorikohi abe to una ai wowangoka imakiniiki de ma hitiari ma demo naa mata-mata ngonaika.

⁹ De una gea kiani duru womahigagaoika o Abari ma Rorahaiika abe nengokadauino hidotokoka unangika la hiadono ai hiningaka ibitumoka de ko ikelu-kelua. Angamoi nako o Abari ma Rorahai gea duru womahigagaoika, de gea ahao ka idadi wakunu o dodotoko ma gou-goungu wadotoko o nyawaika de wakunoo onangika wahigaro la hiadono ma gou-goungu gea ona yatobanii-niiki. De iti abe o Abari ma Rorahai ibitumu o hihira gea ai hiningaka, de ahao nako naga o nyawa yalawana ma gou-goungika, onangikali una gea ka idadi wataere la ona ihioriki o kiaka manga hininga ko ataanua ma dumutu. Hokogea ahi demo abe ma titi o gareja ma hihira kiani manga wowango ma dumutu hokokia. Ho o nauru onaguna dika abe duru yomahigagaoika o Abari ma Rorahaiika de nahiorikoo abe manga wowango ma datoro imakiniiki de gea mata-mata abe ahao kangano nabasaka ahi hurata ma demoka naa, ona gea ka idadi nagoraka la ona yodadioka o gareja ma hihira.

O Paulusu wihitiari unangika ma titi ona yodoto-dotoko abe ko itiaiua

¹⁰ De gea abe ahi demo kangano ma titi o nyawa yatobalawana ma gou-goungika, ma titi gea ena hiadono naa tonihitiari tato igoungu o Kereta ma nuuhoka gea de naga manga ngoe abe yatobalawana ma gou-goungika, de onangoka gea manga ngoe o Yahudioka ma nyawa. De ona gea ka yofeto-feto dika, masara ona manga hiningaka la o nyawa utu yabudi manga demoino gea la hiadono onangoli dika yaniiki. Masara to ona manga demo gea duru ko iwa ma titi.

¹¹ De naa tonihibehehongo tato ona gea ufa nahigunoa la yadotoko o nyawaika, angamoi mangale ma titi manga dodotoko ma demoino hiadono o nyawa manga ngoe manga tau yahikapusakoka hiadono manga tau ma goronaka ona mata-mata iwiporetoka o Yesusika. Abe ona manga tau ma goronaka de manga hininga yomangali ma gou-goungino de yaniikoli abe ona gea yotobadotoko manga demo ma homoa. De tanu duru ko itiaiua manga demo gea abe yadotoko o nyawaika. De ona gea bote ma titi o kia naga manga hiningaka hiadono o rerehene yodoto-dotoko? Gea la ka idadi manga tiwi yomamake abe ona yototoihenino. De gea abe yomatiwi-tiwi manga dodotokino, gea manga datoro moi duru ka o himaleke dika ma datoro yodiai.

¹² De abeika naa o Kereta ma nyawa manga dodaere ma demo abe ma dumutu ona ma hirete manga nyawaika. Abe ma dihira naga womatengo o Kereta ma nyawa abe una wotobadoto-dotoko yomahikokoonangika genangoka. De una gea ma dihira wotemoka wato, “Ngone o Kereta ma nyawa ngone duru ka ihikaika hotobaelu-eluku, de gea to ngone nanga datoro imaketero hoka o aewani o fuhuku ma hininga. De ngone duru hodebeturu o karajaangika masara nako holomo, gea duru kohaamokuku de ko nanga magawe.” Hokogea to una ai demo abe wotobadotoko gea ma titi to una ma hirete ai dodiawo abe yomahinuuhu moi.

¹³ De nako ngohi tato, to una ai demo gea duru itiai de wataana. Ho mangale ma titi o Kereta ma nyawa igoungu manga hininga hokogea, ho ngohi tonihibehehongo tato kiani duru ka ihikaika nataere nanga gogianongoruika o Kereta ma nuuhoka gea abe yorehenoka de yaniiki ma dodotoko utuoli abe gea ko itiaiua. Ho ngona ka idadi nataere onangika hiadono ona gea manga ngongaku ilioli de hiadono ko ilage-lageokaua,

¹⁴ de ko ihigihenokaua o Yahudioka manga totoadeika, abe manga totoade gea ko ma gou-goungua. De irahai nataere hokogea onangika la ibootohi ona yaniiki o nyawa dika manga pareta, angamoi ona abe yotulihi ma pareta, ona gea duru yorehenoka de yaolukoka ma dodotoko ma gou-goungika.

¹⁵ De naa moioli tonihingahu ngonaika. Onagona dika abe ona Ma Jou wahitebinoka, gea onangoka duru ko iwaka manga bohono ma titi hoka o inomo eko o kiahonanga, de ena gea mata-mata itebinoka onangika. Masara nako o nyawa gea abe manga hiningaka ka ipesekohi angamoi gea manga ngongaku ko iwahi, de gea to ona manga wowangoka moioo de ko iwa abe itebini. Abe ona gea manga hiningaka itobatagi ka ma dorouika dika, de ngaro manga hininga ka de itemo de yahigaro ma totiaiika, masara gea ko ihigihenokaua, ho hiadono ona gea ko yamaokaua o howono.

¹⁶ De igoungu ona gea yomahingahu ato iwihioriki Ma Jou, masara nako manga wowango ma datoroka, gea yahitaana abe ona gea ko iwihiorikua Unangika. De abe ona gea tanu itiai Ma Jou waemono onangika angamoi manga hingounu ko iwa Unangika. De nako ma karajaanga o kia dika abe Ma Jou wohiromanga enangika gea wato ma karajaanga ma rahai, ma, ona gea duru ko yakunua yodiai irahai. Ho naa ngona o Titusu kiani nahibehehongo ani gogianongoruika genangoka la ibootohi ona yahigihene o nyawa abe manga hiningaka hokogea ka ma dorouika dika.