Sosawaro 9 - Ma Jou ai Demo-demo o Totobelohoka

O ngo Sosawaro mohigila-gila ami hitiari ngoneino O Hitararono ma hidogo

¹ De o ngo Sosawaro muna ma hirete mohigoko to muna ami tau de ami tau gea naga ma liate tumidi.

² De muna mahidiai o ngolo-ngolomo duru ma amoko abe ami duduonino ma roehe duru kohaamoko abe mahidiai. De o nyawa manga ngokeroo duru imuti-mutiti hoka o angguru ma teongo ma gohaka abe masapu-sapuroka. Ho ami ngolo-ngolomo ma meja muna duru mohidiaioka.

³ Ho ami gogilaongo o momoholehe ona mahidingoto o nyawa mata-mataika ho mata-mataika yahoko la yokokiboa yolomo munangoka. To muna ami gogere daku o kota ma honongaka abe ka enangohi ikurutiye de ka idadi molega arihononga de ma gurutika de ami gogahoko ma demo itagi o nyawa mata-mataika.

⁴ De hokonaa o ngo Sosawaro ami demo, mato, “Ngaro ngini mata-mata abe nia tobahioriki ka ikurangohi, ngohi tiniahoko la niboa nihidulu ngohioka. De ngini tiniahoko abe ko nihiorikuahi nimaputuhu itiai de ngaro nihidotelega ma owa de ma dorou ma, enangoo nikangela nihikohowono.

⁵ Ngini mata-mata niaino la ka idadi niaolomo ahi inomo de niaokere ahi angguru ma teongo ma gohaka abe tosapu-sapuroka la genangino niamake o hiowa ngini homoi-homoiika.

⁶ Ngohi tinihigaro la kiani nianoaika nia wowango ma datoro abe duru aniiki o bodo ma hininga. Ti ngini nia wowango ma datoro ma biaha kiani gea nioporetika la nimangalioli o datorika abe genangino niamake o wowango ma gou-goungu. Ti ngini nia perelu o dodotoko abe genangino niamake o sosawaro abe inihidumutu o sosawaro ma ngekomika.

⁷ Onagona dika abe yataere onangika abe yotobahohedu de manga dodaere ma demo gea ko yaduhunua. De ona yamake dika o kokangela de o himaleke ma amoko yotobahoo-hoheduino. De onagona dika abe yataere onangika abe yotobatualono ahao manga hasilino ka o kangelaino dika yadaene abe o hibalahino.

⁸ Abe ka de ngini niataere onangika abe yotobahohedu de ahao ona inidohata dika ho ngaro ufa de niaduhunu onangika. Masara ka de ngini niataere onangika abe yososawaro de ona yotarimakase nginika de utuohi manga dora ilamoko nginika.

⁹ Ho irahai niadotoko onangika abe yososawaro angamoi de ahao utuohi yaniiki itiai o sosawaro manga wowangoka. De ma oraha niadotoko o totiai ma nyawa de manga tobahioriki utuohi ilamoko yamake manga wowangoka.

¹⁰ O nyawa abe naga manga horomati ma modongo Ma Jou o Yaweika ena gea yahidadi la yososawaro. De nako o nyawa iwihioriki abe ma titi Ma Jou duru Wotebi-tebini de ahao ona gea utuohi yomangaratii o kia dika naga abe yohimanga manga wowango ma goronaka.

¹¹ De angamoi nako ngini nihiniiki ngohi o ngo Sosawaro de ahao utuohi ikurutu nia wowango o duniaka. Abe o sosawaroino niamake nia ngumuru ma hidogo ma taongo.

¹² Ho nako ngini nidadi nisosawaro duru niutumu nia wowango ma goronaka. Masara nako o sosawaro niaemono enangika de ahao ngini duru ma ngoe nikangela nia wowango ma goronaka.” De naa o Saloomo ai hiketero moioli abe o ngofeka womihiromanga o ngo Bodo. Abe nako o nyawa yaniiki to muna ami hininga ma bodo de ahao yaniiki abe duru ko itiaiua manga wowangoka. Ho o totiaiika ka yoluku dika de manga wowango ma dumutu o hohowonika de o hone-honengika dika.

O Hitararono ma hidogo abe ma titi o ngo Sosawaro de o ngo Bodo O ngo Bodo mahoko o nau-naurika la ami hininga ma bodo yaniiki

¹³ De naga momatengoli abe naga mahigaro o nyawaika ami romanga o ngo Bodo. Muna gea ami demo hoka o budi abe mofeto-feto de ko iwa ma horomati. Abe to muna ami tobahioriki o sosawaroino ko iwa masara ngaro hokogea ma, muna ko mohiorikua abe ko mososawaroua.

¹⁴ De o ngo Bodo mogogeruku ami tau ma ngoranoka abe naga o ngekomo ma datekoka. Abe ami tau gea imanoa daku o kota ma honongaka abe ka enangohi ikurutiye la genangoka utuohi yowoe o nyawa abe yoboa imitilakuru.

¹⁵ De muna ka de o nauru woboa o ngekomino abe ami tau ma himangoka de miahoko unangika ngaro woiki ai karajaanga moiika de ai dumutu ko munangikaua.

¹⁶ De o ngo Bodo gea ka de mimake de miahoko mato, “Ei ngona ka idadi nohidulu ngohino! Abeika nowohamino angamoi ngaro onagona dika abe manga tobahioriki ka ikurangohi, ona gea ka idadi ngohino dika ihidulu-dulu!

¹⁷ Abe o akere duru hamao imutiti gea ena o dohikino. De o inomo abe haolomo o gogogono ma ngioka ka enangohi de ma jameoka!”

¹⁸ Masara muna mabudi dika o nau-naurika gea, angamoi ona ko ihiorikuahi abe ona yohira-hira yowohama munangika ona nagau manga lungunoka.