Sosawaro 7 - Ma Jou ai Demo-demo o TotobelohokaDuru yobodo ona o nauru abe iminiiki o ngofeka abe to muna ami datoro itorou 1 Ahi ngofaka, ahi hiowa ma demo ngonaika kiani mata-mataika nagogono ani hiningaka la idadi ahi behehongo ngonaika. 2 Ka de ngona nohingounu ahi behehongika gea de idadi ani wowangoka ihititi genangino. De ani dodotoko ahi hingahuino naa kiani ka ihikaika nomahigoana ani wowangoka hiadono ngona nato nako ani ngirikino abe ngaro o kiahonanga de ani baba ai demo, ma, kiani ka ani baba ai demohi abe natihira nairiki. 3 De ahi demo idadi o hohininga ani hiningaka imaketero hoka o ali-ali moi abe duru de ma ijaka hiadono ka ihikaika nogoana ani hagaraaraka. De imaketero hokogea nogoana o hohininga abe tinihidoaka de ahi dodotoko nginika abe ena gea de o ali-ali ka enangohi de ma utumoka ani wowangoka. De imaketero hoka hotulihi de o pawa o hakaru ma baka-bakaika la ma dulihi ko ihihangua duru genangoo imaketero hoka ngonaoo kiani ahi hiowa ma demo notulihikaka ani hiningaka. 4 Abeika ahi ngofaka abe hokokia ma amoko ani dora itagi ngoni firangika de duru irahai nako imaketero hokogea ani dora itagi o sosawaro ma gou-goungika. Gea de ahao ani mangaratii o sosawaroino idadi imaketero ani dutu ma gou-goungu ho hiadono ani dora duru ilamoko o sosawaroika. 5 Hokogea nomahigagao o sosawaroika de ahao ahi hiowa ma demo idadi o dudumungu ani wowangoka la ko nominiikua o ngofeka abe moigo yomakitigi de onaguna dika abe ko ami rokatua. De gea angamoi o hiowa ma demo idadi ani buturungu hiadono ko idadiua moniakunu ami higaroino ngaro duru mososawaro matobahigaro o naurika ma ka idadi nomidokaowara angamoi nomahigagao o sosawaroika. 6 De naa ahi ngofaka toniade-ade abe una womatengo o ngofekaika wahowono. Ma oraha gea ngohi naga ahi tau ma goronaka duru o jendela ma datekoka tolega-lega ma hoanika. 7 De timake womatengo o goduuru abe ai hininga ko ibaluhuahi de ai tobahiorikoo ma, ko iwahi abe hoka ngone hoperelu la nanga wowango hao itiai. 8 De ma goduuru gea o ngekomo ma marihapongino woboa de waniiki ma ngekomo abe o ngofeka momatengo ami tau naga genangoka. Naa muna gea abe ami biaha motobalingiri o nauru. 9 De ma oraha gea o wange ihumuririhuku ho ngade-ngade ifufutu. 10 De ma ngofeka ami tauino mohupuoka de ngaro o nauru onaguna dika ka de imimake muna de ka idadi imihioriki ami biaha ma titi ami hidiai ami pakeangoka. De ahao muna moboa ma goduuruino de ami hidee nagau unangika. 11 De muna o ngofeka abe ami wowango motobatagi-tagi ho ko moriidua ami tauoka de mowarodemoholi de ami demoka ko iwa ma horomati. 12 Hokogea to muna ami wowango ma datoro imakiniiki o ngo-ngofeka manga datoro abe manga biaha manga badanga yomafuku-fukunu ho ka ihikaika ka idadi ona gea hamake o ngekomoka eko o bubukunu ma ngioka. 13 Ho ka de muna naa mibuhuku ma goduuruika de mikooino de mibounu unangika de ami himangoka ko iwa ami hawana abe ahao o nyawa utuino imimake modiai hokogea. 14 De muna miade-ade unangika mato, “Ngohi naa kanganoinohi tomahihuba o gogao ma huhuba Ma Jouika ho naga ahi tauoka ahi huhuba ma roehe ma hidokuino ho ngona de ngohi ka idadi haolomo angamoi ahi behehongo Ma Jouika tabootoka. 15 Ho gea ma titi tohupu tonitutumu, de abeika, duru ka ngona dika tonilingiri de naa tonimakeoka! 16 De ahi koi tohitamunu de o ngoere abe o Mesiirino de ma bunga ma ngoe ma ngoeroka ho duru irahai. 17 De toderero o minya ma bounu duru ma rorahai, abe de o muuru, de o bokuwini, de o kayu manis ma kai ho ma bounu duru ma rorahai ahi koi ma lokuoka. 18 Ho ngona naino nohiniiki de ngone ahao duru homaidu hososanangi ka hiadono o ngorumino. Naino la ngone hodiai homahisosanangi abe inahinooto dika abe ngone hamake! 19 De ngaro ufa ngone hohawana angamoi ahi rokata ko iwiwa mia tauoka. Una woikoka de ai dodagi kohagurutika ho marai ko ai dekanohi de ahao woboa. 20 De womagao ai popojeuku hiadono waomanga de ai tiwi de una wogahe wato, ‘O mede ma nobohuku de ahao toboa.’” Hokogea muna mihigaro o goduuruika gea. 21 De muna de ami higaro ma muti-mutiti hokogea hiadono mihirehene o goduuru gea ai ngekomino. Duru mososawaro de ami higaro la to una ai hininga adaene hiadono wosanangi wominiiki o howonika! 22 Abeika, una gea ka itodokanino de una wominiikoka imaketero hoka o hapi abe yaniiki dika o nyawa abe yao o dedetoro ma ngiika, de ko ihiorikua ma bodito ma himangoka. Hokogea una ma oraha wominiiki muna. De ka idadi una gea hihiketeroli hato una gea wodadioka hoka o luadana ma nauru o modoi ma ngoranika. 23 Ka de o luadana gea alikoka de ko idadiokaua iloara ho yodamaa dika ma hihiipi abe ahao iboa duru ma fuoika ho ka yotengo. Eko una gea hihiketero de o totaleo abe itaiti o titigonuku yodangi de ko idadiua imaduhunu. Hokogea o goduuru gea unangoo womataiti o boditoika de ko wohiorikua abe ahao womahifangu de ai wowango. 24 Ho ahi ngofa-ngofaka, ngini nihihigihene nia baba, kiani nitotoihene ahi demo naa! 25 Nihidodiai o ngofekaika hoka munangoli ami datoro la ufa nimihigihene munangika done nia hininga minihirehene hiadono nimihigunoa la to muna ami ngekomika miniao. 26 Ona ma ngofeka gea duru ko manga ngoeoka yahikala o nau-naurika. Ngone ko idadiua haetongo manga ngoe abe o nau-nauru yahitomaka manga wowango. 27 Ho gea tohiromanga to muna ami tau ma ngorana idadi o ngekomo o lungunika de ami koi gea o hone-honenge ma ngi! Hokogea o Saloomo wahitiari ai ngofa-ngofaka de ai demo de ma buturungoka la ufa yahowono o ngofekaika. |
Gereja Firman Allah, Yayasan Misi Masyarakat di Pedalaman
New Tribes Mission