Sosawaro 6 - Ma Jou ai Demo-demo o Totobelohoka

Ufa honagimi o tiwi o nyawaika

¹ De ahi ngofaka naangoli o hiowa ma ngekomo la ufa kalioli nomahikangela. Hokonaa idadi nako o homoaino ma nyawa, eko ngaro ani dodiawo, naga abe ngona naduhunoka ma oraha ona yoagi ani himangoka. Abe ngona nahibehehongo ma tiwi ma dutuika nato, “Ngohi duru tongaku to una naa ai nagimi ka wofanguoka de nako ko wofangua gea ahao ngohi tomahitagongo.” Masara nako una woagi-agi ko wofangua ai nagimi gea kiani ngona nofangu, angamoi idadiokali to ngonali ani nagimi.

² Ho to ngona ani kangela gea ihititi ani behehongoka abe ani behehongo onangika idadi o modoi ngonaika. Ho imaketero de ngona nomahiliko de ani uru ma demo.

³ Ho nako noigo nomahohe ani lilikoino hokonaa ma ngekomo. Kiani ngona natutumu o nyawaika gea abe to ona manga kuahaka nogogere ma oraha naa de ahao ngona de ona kiani nimakoketemo de nimahikaaturu. De ma oraha noiki natutumu de kiani ani hininga ma dodipokouku la ufa ani sade naga yamake ani demoka. De ngona nomangaku onangika gea nahowonoka abe ma oraha nomahitagongo nato ngona nofangu nako ona ko yofangua. De nahitararono onangika nato, “Tomahilooa masara ngohi ko idadiuali tofangu.” Hokogea noboa de ani hilooa onangika de duru nomagahoko la ona yahihanga ani howono gea.

⁴ De ufa nodamaa ma dekanohi de ahao noiki. Abe ka de ngona nohioriki abe ma nagimi gea iotaka ngonauku de ufa ka nomaiduohi eko nomahiainohi ma, kiani itaiti nomahingahu onangika.

⁵ Ngona kiani nodiai imaketero hoka o luadana abe ka de yamao ngade-ngade o nyawa yatoimi de iloaroka, eko hoka o meleu ka de yaliko de itaiti imaduhunu la imahohe ma boditoino. Hokogenangoo de ngonali kiani nomataiti nomaduhunu la nomahitingakoka o kangelaino gea.

O hitiari la ufa hodebeturu o karajaangika

⁶ De ahi ngofaka tonimake ngona hoka ko iwa ani magawe o karajaangika ho kiani ngona duru nomadotoko hoka o iuroli nomaaduru la ufa nodadi ngona o debeturu ma nyawa. Ho o hiowa ma sosawaro kiani nomalingiri ma oraha nomadotoko o iuru ma magaweino.

⁷ Abeika o iuru gea o aewani abe ngaro ko iwa ma koano, ko iwa ma kimalaa, de ko iwa ma mandoro abe yahiaturu ma karajaangino masara duru ikarajaanga de ma magawe.

⁸ Abe ma oraha naga o inomo ma ngoe ena duru ikarajaanga aleino la yagogono to ena ma ngioka la ka de adonoka ma oraha o inomo ko iwa de to ena nagau ma hidiai ho ko ihuhaua ma inomo.

⁹ Masara abeika ngona ahi ngofaka, ngona duru o nauru ma dorou abe ko nokarajaangua. Hokokia ma dekanohi nomahisosanangi ani giooko ma goronaka? Ahao hokokia ma dekanohi de ahao nowangoro ani ngiduino? Ahi leleha ngonaika naa angamoi ngohi ani baba duru toigo la tonihimagawe!

¹⁰ Abeika ahao idadi ngonaika nako nomafikiri nato, “Ngohi ma hohutulohi tomaidu,” eko nato, “O giooko kiani utuohi ihikiooko.” Ka de hokogea notemo de utuohi nomahiaini de ani giama nakelenga ani aluoka!

¹¹ De nako hokogea ani hininga itagi de jai-jai dika de o huha inibaatino ngonaino imaketero hoka ona yotobaora-ora iningohama! Ho nako ko nokarajaangua de ani giama de itodokanino de inidaene o hafini imaketero hoka ona de manga daeoka inioraka ani kiahonanga ho hiadono ani kuranga duru ilamoko. Ho ahi ngofaka, kiani ngona nomaaduru hoka o iuroli ma magawe la ufa inidaene o hafini!

O hitiari abe ma titi ufa ngone o nyawaika hahikapusaka

¹² De hokonenangoli o nyawa manga wowango ma datoro abe tahiromanga yotobatualono de ko iwa ma utumu manga wowangoka! Abe ona yotobadiai itorou muruono naga, abe hoka ona duru ka ihikaika yotobaeluku de manga demo.

¹³ Masara abe duru itagi manga hiningaka gea yomahiketehidunguu de manga lakoka hiadono manga dodiawoika yalakodawi, de manga lou yahikulapete, eko yahitunguu de manga hagaraara.

¹⁴ Ka ihikaika hokogea manga hidee ma dorou ma dodunguu yodiai la yahikangela o nyawaika. Angamoi to ona manga hininga la ka ihikaika o nyawa yahikapusaka de yahikangamo.

¹⁵ Masara ona abe yotobadiai itorou hokogea ahao itodokanino de o bodito o kangelaino yadaene onangika. Ho to ona manga wowango duru awede-wederuku ka hiadono ko idadiokaua yomahinganono yotogumu.

O hitiari abe o howono tumidika abe duru Ma Jou wodohata

^16-19 Abe Ma Jou o Yawe duru wodohata gea o howono butaanga eko utuohi o howono tumidi tofetongo abe duru waemono enangika. 1) Gea ihira o nyawa manga datoro hokonaa: ona de manga lako yomalega o nyawaika de manga sade ma dohata. 2) De o howono ma hinooto, o nyawa manga uru itobaeluku dika. 3) De ma howono ma hange, o nyawa manga giama yapake la yatoma o nyawa ngaro manga howono duru ko iwa onangika. 4) De ma howono ma iata, o nyawa ka ihikaika itagi manga hiningaka manga hidee duru itorou. 5) De ma howono ma motoa, o nyawa de manga lou yomataiti o dorouika la yodiai abe duru ihowono. 6) De ma howono ma butaanga, o nyawa yadofa-dofanga de manga ngeluku la o nyawaika yahikangela. 7) De ma howono ma tumidi, o nyawa yoigo yodiai la o nyawa utuino yahikangamo.

O hitiari la ufa homakitgi de o nyawa abe ko nanga fekatua eko ko nanga rokatua

²⁰ Ahi ngofaka tohigalioli tonihingahu kiani nohihingounu ngohi ani baba ahi behehongo ngonaika de ufa noporetika ani dodotoko abe namake ngoni memeino.

²¹ Ani dimono mia demo ma owa ngonaika kiani duru nagogono ani hiningaka la ka nohiningahi ka hiadono ani wowango ma bahaika. De kiani ka ihikaika napake ani wowangoka la o nyawa yamake mia demo ma hasili ani datoroka imaketero hoka yamake o rante abe napake ani tomarino.

²² La ngaro o kiaika ngona naika de mia demo ma owa gea naga ngonaka la ena gea idadi ani hihira ani wowangoka. De ngaro nomaidu ma, mia demo gea idadi ani gogoana. De ma oraha nomomiki o ngorumino de ani hiningaka nagau o hiowa ma demo gea abe itemo inihihohininga ma totiaiika.

²³ Abe ani dimonino mia behehongo de mia dodotoko ngonaika gea idadi ani hilo abe inihitararono ani wowango ma dodagioka. De ahi ngofaka, ma oraha ngomi miamake ani wowangoka abe kiani minihohowono de ahao minitaere la mia dodotokino minihitiai de minihidumutu o wowango ma gou-goungika.

²⁴ De ahi ngofaka abe ngomi ani dimono minihingahuoka to ngomi mia demo ngonaika gea iniduhunoo la noluku nomahitigi o ngofekaika abe ami datoro itorou. Abe ngaro de ami ilingi inouhu monihigaro masara ngona ko nomihigihenua ami demoika abe to muna ami biaha yomakitigi de o nauru abe ko ami rokatua.

²⁵ Ufa ngona nohafini de o ngofeka manga rahaiika, de ufa nomihigunoa monihiatara de ami lako hiadono monitauru ani hininga.

²⁶ Angamoi o ngofeka abe momatiwi-tiwi hokogea ka idadi monihihuha abe ika-ika ami hewa ka hiadono muna mamataka ani tiwi. De nako muna o nyawa ngoi fekata de nomaidu munangoka de ani wowango ahao to muna dika ami kuahaka hiadono o kia dika to muna ami demo ma ka naniiki.

²⁷ Ho naa tonileha, “Sarakia, ka idadi o nyawa wakelenga o uku ma ngaboho ma ngoe ai uguroka de ko iwiukua?

²⁸ Eko, sarakia nako una ko womasandaaliyeua de ka idadi walou-lou o uku ma ngabo-ngaboho ma lokuika de ko wamakeua ai nabo o ukuino gea?” Gea kiani wamake ai nabo.

²⁹ De duru imaketero hokogea o nauru ai hasili nako womaidu de o nyawa utu ngoi fekata. Ngaro onaguna dika ma nako una wahowono munangika hokogea de ahao naga ai hohowono iwidaene.

³⁰ Nako naga womatengo abe wotohiki angamoi ngade-ngade wohonenge o hafini de ka idadi womademo abe wagou-goungu iwihafini hiadono wotohiki.

³¹ Masara nako una gea iwitaoko de iwihitaana abe wotohiki gea kiani wohigilio ma tumidi onangika abe wadohikoka. De ai hohowono hokogea kiani wofangu de nako ko wakunua wofangu ma tumidi de ka idadi iwiribuutu la ai kiahonanga mata-mata wafukunu iti ai howono ma bobangu wohingodumu.

³² Masara nako naga womatengo abe wahowono de o ngofeka abe muna o nyawa utu ngoi fekata de hahidotelega una abe wotohi-tohiki, de gea ka unangohi duru wobodo abe wahowono o nyawa ngoi fekatika. De hokogea angamoi una womahibinaaha to una ma hirete ai nyawa.

³³ Abe ma hasili wamake ai howonino gea o nabo ai badangoka de ai maleke o nyawa manga himangoka. De ai maleke gea ko iwa ma bobaha abe ko idadiua ihihanga angamoi o nyawa ko idadiua yawohanga.

³⁴ De o ngofeka gea ami rokata ahao duru iwilufungoka de ai goomu ho widohataholi unangika gea abe wahowonoka ngoi fekatika. Ho una womahibalaha unangika de ma oraha gea duru ko idadiua wakuranga ai hohowonika angamoi ko iwaka ai dora ma hiokoo wahowo-howonika gea.

³⁵ De ko iwa o hohowono ma bobangu eko ma balaha abe ka idadi una wahowo-howono wihidoaka ami rokatika la hiadono wilaru. Hokogea o Saloomo ai hiketero ma ade-ade wapake la idadi o ngofa-ngofaka manga hitiari.