Sosawaro 5 - Ma Jou ai Demo-demo o Totobelohoka

O hitiari o nau-naurika abe ma titi o ngofekaino manga datoro o howonika

¹ Ahi ngofa-ngofaka, kiani ngini duru nitotoihene ahi hiowa ma demo nginika naa. Nimadoihene o hitararono ma hingahu abe ahi sosawaroino nenanga.

² Nako ngini nihigihene ahi hingahuika naa, de nimadotoko irahai enangino, de ahao inihiakunu la duru nihioriki nimangiriki itiai. Abe ahi demo nenanga ka idadi nia tobahioriki ma hidogo hiadono de ti nginioo nia uruoka de aino iboa o hiowa ma demo abe niamake ma tobahiorikino nenanga.

³ De ahi hingahu naa ma titi o ngo-ngofekaika abe to ona manga datoro o naurika itorou. To ona manga higaro ma demo imaketero hoka o gula-gula iwihidoaka o naurika ho de ma mutitoka manga demo hiadono to una ai hininga adaene ami demoika. De manga ilingi inouhu hiadono iwitauroka ai hininga ho wominiikoka!

⁴ Masara ma hasili manga demoino gea duru imali imaketero de o mirimi ma mali. De ma bahaika manga demo gea yahibodito o naurika imaketero de o humaranga ma doto arihononga.

⁵ O ngofeka abe ami hininga ma dodagi hokogea, muna moigo modiai o kia dika la minitauru abe muna moigo la nginioo nia hininga ma dodagi imakiniiki hoka to munangoli. De ami dodagioka gea abe iniao o bodito de o bobinaahaika. To muna ami aguru ka ihikaika ma dumutu o narakaika.

⁶ Masara muna gea ko mopusingua o totiai ma ngekomika abe genangino kiani hoboa la hamake o wowango ma gou-goungu. De ngaro ami wowango ma biaha aika aino de ko iwa ma riidi o howono ma ngekomika masara hoka ko mohiorikua mafikiri ma totiai ma ngekomika.

⁷ Ho gea ahi ngofa-ngofaka nia baba ahi demo nenanga duru togahoko la ngini nihidodiai nihigihene ahi demoino naa. De ufa niodokaowara ahi demoika la ka de niamake abe ka idadi inihibodito de ahi demo naa naga nia hiningaka de inihitiari.

⁸ Ho ka de o ngofeka manga demo nginika hokogea de niloaroka! Ngaro to muna ami tau ma ngoranika nomahitigi ma, ufa! Kiani duru nomidokaowara o ngofeka hokogea.

⁹ De angamoi nako ngona o nauru nowohama to muna ami ngiika de ahao o nyawa manga horomati ngonaika ihihangoka. De utuohi ngona norugi abe ani kiahonanga abe ani kangela ma hasilino, ena gea ahao o nyawa utu yomahitoona. Abe ka de ma howono gea naniiki de irupa-rupa o nyawa ka idadi yodiai ngonaika.

¹⁰ Ho to ngona ani kaya ahao idadi o homoa ma nyawa to onangoli manga kaya. O nyawa utu yapake de yomahisosanangi de ani karajaanga ma hasili gea.

¹¹ De ma bahaika ahi ngofaka, ngona duru nokokururihi ma titi ani odiri abe o panyakeino angamoi ma panyake gea aolomo ani roehika hiadono ani roehe de ani badanga ma buturungu amataka.

¹² De ahao gea ani kangela ma demo ma goronaka de ngona nomatoduba nato, “Duru tomatoduba ngohi ma dihira gea todohata o wowango ma totiai ma hiaturika. De ngaro o nyawa naga abe ihitaere, de manga dodaere de ma buturungu, masara ngohi duru talawana manga dodaere ma demoika.

¹³ Adodoa ho ngohi ko tahigihenua ahi guru-guruika abe ona ato ihiduhunu? Masara ngohi duru toluku tohigihene manga demoika abe yoigo ahi howonino ihiduhunu. Adodoa ho ngohi tahowono hokogea ma amoko?

¹⁴ De abeika, o nyawa ma oraha naa manga hininga ngohino ikurangoka ihidodiawo. Masara ka de yomatoomuino de ka ihihiade-ade dika ahi datoro ma dorou de ngaro ahi himangokaoo ma ihihiade-ade.” Hokogea ti ngini nia toduba ma demo ahi ngofa-ngofaka nako niminiiki to muna ami mau abe ma dorouika.

Nanga tagongo de ma garagoka nako hoilaka itiai

¹⁵ Ngohi tohiketero hokonaa la duru ngini nimangaratii. O ngo-ngofeka abe ahao yodadi ti ngini nia feka-fekata tohiketero homoi-homoiika de o humu abe ma dutuoo homoi-homoi. Ho gea ka de ngini nidadi o rokata de naga abe duru to ngona dika ani akere angamoi nale ka to ngona dika ani humuino. Hokogea ngini mata-mataika ho ma oraha nia ngomaha yodudungu de kiani niokere ti ngini homoi-homoiika nia humuino la hiadono iniwedono. Hokogea tohiketero la ngini duru nimangaratii kiani ngini homoi-homoiika nimakitigi duru de ti ngini dika nia fekata.

¹⁶ De naa ahi hiketero moioli ma titi ngini o roka-rokata. Abe ngini tinihiketero hoka o akere abe ibubungiye ho gea ngini o giarokata naga abe duru ti ngini dika nia akere ngaro o rokata eko ngaro o fekata. Ho ahi leleha naga ngini o nau-naurika hokonaa, “Done ma titi o kia hiadono ti ngini nia akere gea niahidogopoa nia tau ma hoanoka?”

¹⁷ Gea duru ti ngini inihinooto dika nia akere ho ufa o nyawa utuika niahidoaka. Ma titi, duru ko itiaiua nimakitigi o nyawa utuika abe ko nia rokatua eko ko nia fekatua!

¹⁸ O ngofeka modadi o nauru ngoi fekata la munangino una ka idadi wamake ma owa ma ngoe. Ho ngona abe o rokata itiai ka nomidogarago ngoni fekatika dika. Ho kiani ngini nimaidu moi ngona de muna dika abe ngini nidadi o giarokata ka o gooinohi.

¹⁹ Ngaro ka ihikaika to muna dika ami badanga inihisanangi abe ka de nomalega ami rupaika de atauru ani hininga. De ngini nia gogao nia feka-fekatika nipaliara la hiadono ka ihikaika inidogarago ngoni fekatika abe ami hininga de ma modekoka de ma doraka ngonaika.

²⁰ De ahi ngofa-ngofaka, naa tinilehali, “De o kia nia utumu nako hiadono ngini nimalingiri o hijai-jai ma sosanangi de o ngofeka utuika? De done sarakia nohigunoa ani hafini inipareta itagi o ngofeka utuika ka hiadono nomikooino ami badangika abe ami datoro duru itorou?”

²¹ De kiani ngini o giarokata hokogea nia gogao angamoi Ma Jou o Yawe duru wolega-lega mata-mataika de wohioriki ngone o nyawa nanga hininga abe itagi mata-mata. De abe ngone o nyawa nanga biaha, gea Ma Jou duru wohidotelega de o totiai ma datoro, abe Una duru wonganono la ena gea haniiki.

²² De gea ma titi o nyawa manga howono idadi to ona manga dadaoko! Angamoi manga hafini o howonika gea duru imaketero hoka o modoi ma liliko abe o nyawa yaliko de yatumungu genangoka.

²³ De ona ahao yohonenge ma titi ko iwa manga dongohono o howonika. Ho gea ma titi ona yohihanga abe duru ma dihiraino de ko yalawanua manga hininga ma hafini hiadono duru yoigo yaniiki o bodo ma ngekomika. Hokogea to ngohi ahi hitiari ma demo nginika ahi ngofa-ngofaka.