Sosawaro 4 - Ma Jou ai Demo-demo o Totobelohoka

O Saloomo ai dodotoko ai ngofa-ngofakika

¹ Ahi ngofa-ngofaka nihihigihene ngohino. Nia baba ai dodotoko nginika naa kiani nitotoihene la ka idadi niataoko itiai la utuohi nisosawaro nia tobahiorikino.

² De angamoi ngohi ka ihikaika tinidotoko nginika de ahi dodotoko ma owa abe duru idadi ti ngini nia wowangoka ma hihira, ho ufa ahi hingahu naa nioporetika.

³ Ma oraha ngohi, ti ngini nia baba, ngohi ka o ngofakohi, de ngohi to ngohi meme ami ngofaka tomatengo dika ho ngohi duru toutumu abe to muna ami dora itagi ma gahumu ngohino.

⁴ De nia ete duru wohidotoko ngohino, wato, “Ahi ngofaka, ngona kiani de ani hininga ma gahumu nomahigagao ahi dodotokika. Abe nako de ani hininga ma gahumu nomahigagao ahi demoika, de naniiki ahi behehongo ngonaika, de gea ahao nowango ma gou-goungu.

⁵ Ngona kiani nomadotoko la namake o sosawaro ahi hiowa ma demoino la nohioriki nomaputuhu itaana. Ho ahi ngofaka, toigo nomadotoko la ufa ko nawohanga ahi hingahu ma demoika de ufa noporetika.

⁶ Abe nako o sosawaro ma demo noporetika ko idadiua namake o duduhunu ani wowangoka abe inidatoko o dorouino. Masara nako ngona nodora o sosawaro ma gou-goungu de ena gea duru idadi ani gogoana ka ihikaika ani wowangoka.” Hokogea ahi babaino ai dodotoko ngohino ho naa nginikali tadofanga ahi babaino ai hiowa ma demo la nginioo genangino inihiutumu.

⁷ De nia ete gea duru wohihigali-gali wohihingahu ngohino, wato, “Ahi ngofaka abe duru noperelu ani wowangoka gea o sosawaro ma gou-goungu ho kiani ka ihikaika noigo la nomahidogo ani sosawaro ma gou-goungu ka hiadono ani wowango ma bobahaika. De ngaro o kiali naga abe irahai nodiai masara iti ngona nomahioriki nomaputuhu itaana.

⁸ Nako ani sosawaro hokogea naga ngonaka de genangino ahao o nyawa duru inigorakiye. Ho ka de nomahigagao o sosawaro ma demoika de o nyawa manga horomati duru itagi ngonaika ahi ngofaka.

⁹ Abe nako o nyawa yamake o sosawaro ma gou-goungu naga ngonaka de manga dora ma horomati ngonaika ma amoko. De hiadono idadi ani dodunguu abe imaketero hoka ka ihikaika o koano manga dodunguu o sapeo abe duru ma hohailoa manga peaka. De imaketero hokogenangoo ka ihikaika o nyawa manga dora de manga horomati ihitunguu abe ona de manga hininga ma gahumu ma hohailoa ngonaika.” Hokogea ahi baba ai hingahu ngohino ho naa idadi ti nginioli nia dodotoko ma owa nia babaino.

¹⁰ Ho ngini homoi-homoiika tinihingahu tato, “Ahi ngofaka duru nohidodiai nomafikiri abe ma titi o dodotoko ma demoino naa abe nako gea ngona naniiki de ahao to ngona ani wowango ikurutu o duniaka nogogere.

¹¹ Ngohi ma ngoe tonidotokoka o wowango ma sosawaro abe ngone o nyawa hamake o hiowa ma demoino la genangino ngohi tonihihira-hira o totiai ma ngekomika.

¹² Abe nako ma sosawaro gea ka ihikaika inihipareta ani wowango ma dodagioka de ngona ko nosugaua de ko norubaua ma titi napeleke ma dorouika ngaro nomapopaata eko ngaro nomabole-bole notagi ma, ko norubaua.

¹³ Ho, ahi ngofaka ngona ka ihikaika nomahihohininga de napake ahi hingahu ma owa naa. Ufa ani dodotoko nenanga nanoaika masara kiani o dodotoko ma demo naa nogoana la ka ihikaika ilaku ani wowangoka hiadono ani wowango ihititi ahi dodotokoka.”

¹⁴ Ho ngini homoi-homoiika ka ihikaika tinihitiari tato, “Ufa ngona ahi ngofaka nomaaduru hoka o dualono ma hininga eko naniiki ona abe yotobadiai duru itorou.

¹⁵ Kiani nadokaowara manga ngi abe ona yotobadiai ma dorou de nako noboa nomahitigi manga ngiika ufa ngona nogila-gila hiadono manga ngi ma goronaika ma, kiani itaiti norehene de o ngekomo moioli naniiki.

¹⁶ Angamoi o nyawa ma dorou gea imaketero hoka ko yosanangiua yomaidu nako ko yodiaiuahi itorou de duru yoigo la ko yakiookuahi de o nyawa utu onangoo yahiruba ma dorouika.

¹⁷ De imaketero hoka o nyawa manga badanga ma hafini itagi o inomika de o akerika, ona gea abe yotobadiai itorou manga hininga ma hafini ka ihikaika itagi o dorouika la ka idadi o nyawa yahikangela.”

¹⁸ “Masara o nyawa abe yaniiki o totiai gea to ona manga ngekomo hoka o wange ipotokaiha ma dararono abe itararono ma morikotiha de ka ihikaika idogo ma buturungu ma dararono gea ka hiadono o wange ikoronaiha. De imaketero hokogea idadi nako o nyawa yapake Ma Jou ai totiai abe gea ma ngekomo la ka ihikaika idogo ma buturungu manga totiai manga wowango ma datoroka.

¹⁹ Masara, duru imakohowono to ona yotobadiai itorou manga wowango ma datoro, abe to ona manga dodagi duru o fufutu ma ngekomo dika yanii-niiki. Ho ka ihikaika yopeleke de yoruba masara manga wowango ma dodagi o fufutuoka ho ko ihiorikua manga bebeleke gea o kia.”

²⁰ Gea ho hiadono nia baba tinihitiari ma ngoe ngini homoi-homoiika tato, “Ahi ngofaka, la duru nototoihene ahi demoika tonihigali-gali ngonaika, kiani nohidodiai nomadoihene!

^21-22 Ufa ngona nomahigunoa la hiadono nomatingaka ma gurutika de ahi demoino nenanga. Ma kiani ngona nomahigunoa la ahi demo imahingutukuku ani hiningaka. Angamoi nako ahi demo imahingutukoka ani hiningaka de to ngona ani badanga ma amokika de ma buturungoka abe nomahigagao itiai ahi hiowa ma demoika.” Hokogea ahi demo ngini homoi-homoiika.

²³ Mata-mata ngone hodiai ngaro ma dorou eko ngaro ma owa, ma mata-mata gea imulaenge nanga hiningaka de aino. Ho gea abe itagi nanga hiningaka ahao ihupu de imahimatoko nanga wowango ma datoroka. Ho abe ngini kiani duru ka ihikaika nimahigoana la ufa nia hininga itagi ma dorouika angamoi ngaro mata-mata utu nia wowangoka ma ka enangohi kiani niogoana.

²⁴ Ho ngaro ka nia hiningaka dika ma ufa ngini niapake o hawaliti ma dorou abe ma rupa o kia dika! De ufa nia uruino ihupu o doana de o ilingi abe o gorofu!

²⁵ Ho ngini nia wowango ma dodagi ma goronaka kiani ka ihikaika niododiaiika. Ngini kiani de nia lako ma dumutu ka ihikaika niodamaanika ma totiaiika.

²⁶ De nihidodiai nia lou la gea nianiiki dika o totiai ma ngekomo, de genangika dika niboa, la ka ihikaika nimangiriki itiai la ko niboditoua.

²⁷ Hokogea ka ihikaika nihidodiai nimangiriki ahi ngofa-ngofaka la ufa naga arihonongaino abe inihirehene nia hininga ma dodagioka de aino. Angamoi ka de nia hininga aniiki o hirehene ma ngekomo de nia louoo inihitagi de ma dumutu ma dorouika. Hokogea o Saloomo ai hiowa ma demo ai ngofa-ngofakika la duru wahitiari ma dorouika de wahigaro ma totiaiika.