Sosawaro 3 - Ma Jou ai Demo-demo o Totobelohoka

Nanga utumu ma ngoe nako o sosawaro homahitongone

¹ Ahi ngofaka, abe ngohi tonidotoko ufa nawohanga abe kiani o dodotoko ma titi mata-mata gea ka ihikaika nagogono ani hiningaka.

² Mangale nako ahi dodotoko gea naniiki de ani wowango ikurutu o duniaka. Ho itararono ani wowangoka naga o sosanangi de ani utumu ma ngoe hiadono ka ihikaika noriidi de ani hininga de ma riidokaoo mangale nomahitongona ahi dodotoko.

³ De o dora abe naga ani wowangoka kiani ka ihikaika napake imaketero hoka ani rante moi abe duru noigo la ka ihikaika naga ani tomaroka. De o kia dika nahibehehongo o nyawaika gea kiani mata-mata de ma ngodumoka la ani behehongo ma demo ma gou-goungu hiadono moioo de ko nanoaikaua abe naga ani hiningaka. Ho imaketero hoka ko noigoua la ani rante ihihanga abe naga ani tomaroka, hokogenangoo de ani dora abe ka ihikaika itagi o nyawaika, enangoo ko noigoua ihihanga. Hokogea ani datoro la nomahitaana ahi dodotoko nohitulihukuoka ani hiningaka.

⁴ De hokogea ani dora de ani hibehehongo o nyawaika de Ma Jou wonimake de wonisanangi ngonaika angamoi ani datoro irahai onangika de Unangikaoo. De gea ma titi hiadono o nyawa onangoo manga horomati itagi ngonaika.

⁵ De naa duru tonihigaro la ngona ningaku Ma Jou o Yaweika de ani hininga ma gahumu, de ufa nomahinganono to ngona ani tobahiorikika hiadono nato nomangaratii enangika abe nohimanga.

⁶ Ngona ka ihikaika nomahinganono la to Ma Jou ai mau dika ilaku ani wowangoka de Una ka ihikaika wonihihira-hira ani wowango ma dodagioka.

⁷ De ufa ngona nomagorakiye nato nososawaroka. Masara ngona kiani naga ani horomati ma modongo ma amoko Ma Jou o Yaweika la nimodongo Unangika hiadono ka ihikaika noporete ma dorou mata-mataika.

⁸ Hokogea ngona naniiki Ma Jou ai mau de idadi hoka o houru abe inihiputurungu ani badanga ma goronaka de ka ihikaika ani wowangoka de ma buturungoka. Abe imaketero hoka hoperelu o inomo ma rahai la nanga badanga ma goronaka hamao de ma buturungoka, hokogenangoo kiani de nanga hafini Ma Jouika hiadono ai sosawaro idadi nanga inomo la nanga wowango itiai de ma buturungoka.

⁹ De ngona kiani nohitunguu ani horomati Ma Jou o Yaweika de ani hidoaka Unangika. Abe ka de ani horomati ilamoko Unangika de ani hidoaka gea nale ani kayaino ngaro ani tiwi eko ani kiahonanga utu. De ngona nodiai itiai nako ani hidoaka abe ani kangela ma hasili ani redino nairiki ma hofoko ma domoro, eko nairiki gea abe ka enangohi irahai la idadi ani hidoaka Ma Jouika.

¹⁰ Abe nako ani hidoaka Unangika ihititi de ani horomati ilamoko Ma Jouika de Una wonihiowa hiadono to ngona ani inomo ma gogogono ma ngi Una waomanga. De ani angguru ma teongoo ma muti-mutiti ahao duru ilamoko ka hiadono ikopoa angamoi ani ngi-ngi ko iniwedonua. Hokogea hohiketero abe Ma Jou wonahiutumu nako ngone homafikiri hihitihira Una de nanga karajaangino ma hasili la to Una ai karajaanga hoduhunu de nanga hidoaka.

¹¹ De ahi ngofaka naga ma oraha abe kiani Ma Jou o Yawe wonitaere eko wonidotoko de ma buturungu la notoba genangino abe naga ani wowangoka hiadono ko wonisanangiua. Ho ma oraha wonihitiai ani datorino hokogea de ufa noporete ai dodaerika de ufa ani hininga ihuhaholi ma titi Ma Jou kiani wonitaere hokogea.

¹² Mangale ona gea abe duru Ma Jou o Yawe wahitiai gea ona abe Una duru wadora onangika. Una hoka o baba abe duru wisanangiholi ai ngofakika ho nako hiadono wimake ai ngofaka gea wahowono de woluku una ka ihikaika wodiai abe ko iwihisanangiua ai dimonika. Ho kiani ma baba gea witaere ai ngofakika la ufa waniiki abe ko itiaiua. De Ma Jouoo wodiai imaketero hoka o babali gea ma oraha ngona nahowono angamoi duru wonidora.

¹³ O nyawa abe yamakeoka o sosawaro Ma Jouino, ona gea duru yosanangioka manga wowangoka. De to ona manga utumu gea ka ihikaika utuohi yomangaratii itiai o tobahioriki ma gou-goungika.

¹⁴ Angamoi ahi ngofaka, nako o sosawaro gea hohidotelega de o tiwi, abe ngaro duru ma amoko ngona namakeoka ma tiwi gea, masara ka Ma Jou ai sosawaroinohi ma utumu ilamoko namake. De gea ngaro ngona nokarajaanga de inihihewa de o gurasi masara ani utumu o sosawaroino ka enangohi inihiutumu.

¹⁵ Ho gea ngaro o hakaru abe duru ma leto-letongo masara ka o sosawarohi gea inihiutumu ma amoko ani wowangoka. Moioo de ko iwa ma kiahonanga abe ngona ka idadi nomalingiri abe ani utumu enangino ka idadi imaketero hoka o sosawaro namake Ma Jouoka de aino.

¹⁶ Abe o sosawaro gea ihiboa ngonaika ani ngumuru ma dekana o duniaka, de ani kaya enangoo naga, de o nyawa manga horomatioo ngonaika enangoo naga.

¹⁷ De nako o sosawaro Ma Jouino ngona naniiki de ena gea idadi ani hihira ani wowangoka hiadono ani wowango ma dodagi ma goronaka naga nadaene o sosanangi ma ngoe. De nagali o sosawaroino ma utumu abe iniao o hikadame ma ngekomika.

¹⁸ Ho nako ngona duru nomahigagao o sosawaroika gea de ahao utuohi ikurutu ani wowango o duniaka, abe ka idadi o sosawaro hohiketero hoka o gota moi abe nako naolomo to ena ma hofoko de ihidogo ani wowango ma dekana o duniaka. De imaketero hokogea idadi mangale ngona nomahigagao o sosawaroika abe genangino inihiowa ma ngoe ani wowangoka.

¹⁹ Ma Jou o Yawe ai sosawaroka de aino wohititi o dunia abe wotulaada. De gea to Una ai sosawaroino womangaratii hokokia wohigogere o dunia ma hoana de ena mata-mataika abe naga ma dihangoka.

²⁰ Ho gea to Una ai tobahiorikino de o dunia ma goronaka naga ipelaka hiadono naga o akere ibubungiye de Una wohiaturu la o akere o lobino ipuraraha o duniauku.

²¹ Ho ngona ahi ngofaka kiani nomahigagao o wowango ma sosawaroika abe genangino nohioriki nomaputuhu itaana, de ani ngiriki mata-mataika abe o kia dika naga nohimanga de ka idadi nohidotelega de nomangiriki itiai ani wowangoka. De ngona nomagoana la ufa nomahipidili o sosawaroino.

²² Abe nako ka ihikaika nomangiriki itiai de nomaputuhu itaana de ahao ngona nowango ma gou-goungoka de o nyawa manga horomati ilamoko ngonaika. De ka idadi tohiketero ani datoro ma rahai gea abe imaketero hoka o rante ma rahai ani tomaroka, abe ka de o nyawa yamake de ato o rante gea yoigo. De hokogenangoo manga igo ani datorika hiadono manga horomati naga ngonaika.

²³ Abe nako ani wowango ma hiaturu itiai de ahao ani dodagioo itiai ho ko noboditoua de ngona ko iwa moi inihipeleke o howonika.

²⁴ De o kiaka dika nomaidu de ka idadi ani giooko ma goronaka irahai angamoi ko iwa ani hawana, de ani buluharoo ma, irahai.

²⁵ De o nyawa manga howono ma hasili abe duru yahikangela gea ena ko inidaenua ho ngaro ufa ngona nomodongo o kokangelaika gea abe yadaene onangika ma titi manga datoro yotobadiai itorou dika.

²⁶ De gea angamoi ngona nomahinganono Ma Jou o Yaweika abe Una gea wodadioka ani gogoana ka ihikaika. De ngaro naga o bodito hoka o modoi abe ka idadi iniliko masara Ma Jou wonidatoko la ufa genangika noboa done iniliko.

²⁷ De nako ngona ani wowangoka de namake o nyawa abe itiai nahiowa de ufa ma owa gea natumungu. Abe nako noigo naduhunu gea napake dika abe naga ngonaka la idadi ani hidoaka ma owa onangika.

²⁸ Ho ngaro o nyawa gea wogogere ani datekoka ma ufa nahingahu onangika, nato, “Marai itebini ka idadi nohitutumoli de ahao toniduhunu.” Masara nako ngona naga de ma enanga, koaho ma oraha gea dika de nahidoaka la naduhunu onangika. Hokogea Ma Jou ai mau la nahiowa o nyawaika.

²⁹ De ufa hiadono ani hidee ani wowangoka naga abe nato nahikangela onangika abe yogogere ani datekoka. Angamoi ona iningaku ngonaika ho done manga ngongaku ngonaika parahaja dika.

³⁰ De nako naga o nyawa yodiai abe ihowono ngonaika masara nako ko nahiorikua abe ma nyawa de ufa natae-tae nahidodutuga o nyawaika abe ngona ko nahiorikuahi nako gea ona eko ko onangua abe yahowono ngonaika. De nako hokogea ufa o nyawa manga howono nahiade-ade o nyawa utuika angamoi ona ko nahiorikuahi.

³¹ De ngaro naga o nyawa utu yotobatualono o nyawaika hiadono manga utumu yamake ilamoko masara ufa ngona nataleana onangika. De hongoli ufa ngona nomaaduru hoka onangoli manga datoro ma dualonino gea.

³² Angamoi Ma Jou o Yawe duru wodohata manga dorouika abe yotobadiai itorou hokogea. Masara ona abe manga datorino iwihisanangi Ma Jouika, ona gea duru wadodiawo onangika.

³³ Ma Jou o Yawe ai hohowono yadaene o nyawaika abe yotobadiai itorou. De gea hiadono ona manga tauokaoo Ma Jou ai hohowono yadaene. Masara Una wahiowa to ona manga tauika abe to Una ai totiai yaniiki hiadono onangoo wahiowa.

³⁴ De Ma Jou o Yawe duru wodohata o hohedu ma demo ma dorouika, ho o nyawa abe manga uru ma hauku ma dorouino, ahao manga demo ma hohedu yadogilioro onangikali. Angamoi hokogea Ma Jou wodiai la onangoo o hohedu ma demo yadaene onangika. Masara to Una ai dora itagi onangika abe manga hininga ma dodipokouku, ho wahiowa onangika gea.

³⁵ De ona abe manga sosawaro ihititi Ma Jouoka de aino, to ona manga utumu o horomati ma amoko o nyawaka de aino. Masara ona abe yososanangi yogogere manga bodo ma goronaka dika ona gea ahao yamake ka o himaleke dika ma amoko o nyawa manga hima-himangoka.