Sosawaro 2 - Ma Jou ai Demo-demo o Totobelohoka

Nanga utumu abe hamake o hiowa ma demoino

¹ Naa, ahi ngofaka, duru togahoko la nohitoihene ngohino la de ani hininga duru de ma gimonoka nodafongo de nomahitongona ahi behehongo ma demo ngonaika.

² Irahai nako ngona nomaribuutu la nomadoihene ahi demoika la ma titi nataoko itiai. Angamoi ahi demoino gea ngona namake o sosawaro ma gou-goungu iti ka ihikaika nomahihohininga ahi demoika la ma titi nomangaratii utuohi itararono.

³ De imaketero hoka o ngofaka duru yahafini hiadono yogari o inomika kiani ngonaoo duru nohafini o sosawaro ma demoika la nomangaratii to ena ma titi.

⁴ Abe nako duru de ani magaweoka ngona nomalingiri de ani hininga ma gahumu de ahao ani utumu ahi sosawaro ma demoino duru ilamoko. De gea tohiketero hoka o nyawa de manga magawe ma gahumu abe yotobalingiri o gurasi eko o kiahonanga ma hali-hali abe naga o tonaka ma goronaka imanoa.

⁵ Abe nako to ngona ani hafini de ani magawe hokogea o sosawaroika ilamoko de ahao ngona nomangaratii o horomati ma modongo Ma Jou o Yaweika de namake ma tobahioriki abe duru Ma Jouoka de aino.

⁶ Mangale Ma Jou o Yawe woigo wonahidoaka o sosawaro ngoneino! De o sosawaro gea wonahidoaka de o tobahioriki ma demo abe to Una ai uruoka de aino. Abe o sosawaro ma demo nagaoo ma hitararono la hiadono ngone homangaratii Ma Jou ai demo ma titi.

⁷ De o higaro ma demo ma owaika Una watoomuino o nyawa manga hiningaka la idadi manga lolaku manga wowangoka. Abe onagona dika duru yoigo yotoihene de yomahitoona Ma Jou ai sosawaro ma demo ona gea ahao yamake o lolaku Ma Jou ai sosawaroino. Hokogea manga hiningaka ma datoro nako yoigo la itiai Unangika. Mangale Ma Jou Una wodadi o nyawa manga dadatoko ma dorouino nako to ona manga wowango ma datoro itiai ai himangoka.

⁸ De hokogea Ma Jou wadatoko o boditoino ona abe yomahitaana ma totiaiika manga wowango ma dodagioka. De o kia dika ona iwihibehehongo Ma Jouika ato naga abe yodiai, de gea yagoungu yodiai, ho ahao onangika Ma Jou wosanangi wagoana.

⁹ Abeika ahi ngofaka, ani utumu ma ngoe Ma Jouino namake ma titi nomahitongona ahi behehongika! De mangale ani gogao Ma Jouika hokogea ho hiadono ngona nomangaratii nohidodiai nomahiaturu la ani wowango ma datoro irahai ma dumutu. Ho ani wowangoka nomaputuhu itaana, de naniiki ma totiai de ma gou-goungu, de ko nabudiua o nyawaika ani wowango ma dodagioka.

¹⁰ De hokogea ani datoro angamoi naga o sosawaro imanoa to ngona ani hiningaka. De naga o tobahioriki ani badanga ma goronaka ho hiadono ani nyawaoo imaimono, abe naga ani badanga ma goronaka ani sosawaro ho enangoo igarago.

¹¹ De ka de hokogea nososawaro de ahao ani hidee ma ngoe nafafo ani hiningaka la nomahiaturu itiai ani wowangoka. De ani hiaturino gea inihirehene o boditoino. De ani mangaratii Ma Jou ai hiningaika naga ani wowangoka la ngona nohioriki nomafikiri mata-mata gea abe nohimanga ani wowango ma hidogoronaka ho hiadono ani sosawaro gea inigoana ma dorouino.

¹² De naa tinihitararono ahi ngofaka o sosawaro abe imanoa to ngona ani hiningaka ka idadi inihidumutu o totiaiika ho hiadono inihikatingaka o dualono ma nyawaino de iniduhunu la ngona ko naniikua manga higaro ma demo ma dorouika.

¹³ Abe ona gea yomatingaka ma rorahaioka de aino la yaniikoli o fufutu ma ngekomo.

¹⁴ Ho ona ko ihigiriiriua ma totiaiika masara ihigiriiri ma dorouika dika abe ihikawalimi de ma owa. Hokogea to ona manga hininga hiadono yoigo dika yodiai abe duru ihowono.

¹⁵ De manga wowango ma dodagi ipaleele ho manga datoro itorou duru ko iriidua. De ka ihikaika ona yomahiaturu la yolingiri ma ngekomo ma dorou la utuohi yodiai itorou.

¹⁶ De ahi ngofaka ahi higaro ma demo o sosawaroka de aino ahao iniduhunu la ka idadi nomiporete o ngofeka matobahowono de o nauru yowoe-woeika. Muna gea mosabaranga molingiri o nauru abe mososawaro matobahigaro o naurika la yomakitigi. Masara ngona nadokaowara o ngofeka hokogea mangale naga o hitiari ma demo ani sosawaroino imanoa ani hiningaka. Ho ami higaro ngonaika, abe ami demo ma ilingi ma mutiti, gea ufa nohigihene enangika.

¹⁷ Gea muna o ngofeka abe ami rokata minoaikaka de ko mopusingokaua ami gogilaka ma behehongo abe ma dihira mihibehehongo Ma Jou ai himangoka.

¹⁸ De nako to muna ami tauika nowohama gea imakadaene de noaguru ani honenge ma ngiika.

¹⁹ Angamoi o nauru abe womirekata munangika, una gea worehenoka o wowango ma ngekomino ho waniikoli o honenge ma ngekomika de duru wokangela wolio o wowango ma ngekomino.

²⁰ Ho ahi ngofaka la ufa naniiki o ngekomo ma dorouika gea kiani ngona nadodiawo o nau-naurika abe manga wowangoka yatobaniiki Ma Jou ai totiai ma ngekomika.

²¹ Ona gea ka idadi yogogere ma tonakoka gea abe Ma Jou wahidoaka hoka wahibehehongoka. De nako ona yaniiki ma gou-goungu ma ngekomo de yodiai itiai gea yomahitaana o nyawa mata-mataika abe manga wowango yao itiai. De ona gea ka idadi ka ihikaika yogogere de yoriidi o behehongo ma tonakoka gea.

²² Masara o nau-nauru abe manga datoro ka ihikaika itorou, ona Ma Jou ahao wahihupu o behehongo ma tonakino gea. De ona abe yogogere o behehongo ma tonakoka de iwihibehehongo Ma Jouika ato iwiniiki masara iwilawana de ko yodiaiua abe iwihibehehongoka, ona gea ahao Ma Jou waumo hiadono ko idadiokaua yogogere o behehongo ma tonakoka gea.