Sosawaro 10 - Ma Jou ai Demo-demo o Totobelohoka

Ma koano o Saloomo ai hiowa ma demo ma titi ma ngoe

¹ Nenanga mata-mata o sosawaro ma demo abe o Saloomo ai sosawaroino. O ngofaka manga baba de manga meme ka idadi yadogarago eko yohuha ma titi manga ngofaka manga wowango ma datorino. Abe nako manga ngofaka yomaputuhu de manga sosawaro ma totiaiino de ahao manga dimono yahigarago onangika. Masara manga ngofaka abe yobodo hiadono yomahiaturu ko ihiorikua, ona gea yahihuha manga dimonika.

² O nyawa manga kiahonanga duru ko iwa ma utumu onangika nako ena gea yamake o dohikino, eko o rusino, eko o goraino. Masara o nyawa abe manga datoro hokogenangua de yaniiki o totiai ma ngekomo gea manga datoro yaduhunu la ufa yorehene o hone-honenge ma ngekomika.

³ Ma Jou o Yawe ko wahigunoaua la hiadono o totiai ma nyawa de ihihonenge de o hafini. Masara abe ona yotobatualono manga hafinino ko wahidailakoua de wodiai la ufa yamake ena gea abe yoohafini genangika.

⁴ Onagona dika abe duru yatebeturu o karajaangika ahao yodadi duru o huha ma nyawa. Masara abe o nyawa duru yomagawe o karajaangika ona ahao yokaya.

⁵ O goduuru onagona dika abe wososawaro una gea duru woigo womakarajaanga o hiwaruku ai redioka. Masara una abe iwitebeturu ho hiadono ko woigoua womaredi, una wohiboa o himaleke ai tau ma goronaino.

⁶ Ona abe yaniiki o totiai ma ngekomo ka ihikaika ma owa yamake. Masara imakawalimi de ona abe ko yaniikua o totiai ma ngekomika masara to ona manga dumutu o bobinaahaika. De abeika ona yotemo ato ko angakua o nyawa manga hitiari abe ato ahao o bodito yadaene. De ngaro ko angakua masara ahao ma bodito gea yadaene onanguku.

⁷ Ngone o nyawa duru hosanangi ma oraha hahininga onangika abe ma dihira to ona manga wowangoka yao ma totiaiika. Masara o nyawa abe ma dihira ka yowangohi de manga datoro ka ihikaika itorou ka de hahininga onangika de nanga hiningaka manga romanga ikorofuoka.

⁸ Ona abe naga manga sosawaro ona yotobahigihene o hiowa ma behehongika de ka ihikaika yoigo o nyawa manga behehongo yotobadiai. Masara ona abe ko iwa manga sosawaro ko yotobahigihenua de duru yowarodemo dika ho ona gea ma bahaika de o kangela yadaene onangika.

⁹ Ona gea abe manga demo ma gou-goungu hiadono ka idadi hongaku manga behehongika ona ko yorubaua de ko yorehenua arihonongaika. Masara ona abe ka ihikaika ma gou-goungu yodokaowara, ona gea ka ihikaika yoruba ma dorouika de o nyawa utu yahioriki abe yotobadiai ma dorou.

¹⁰ Nako ngona nalakodawi ko itiaiua o nyawaika de igapanga nohiboa o hikangela. Masara nako ngona de ani domoroini nataere onangika abe yahowo-howono de nohiboa o hikadame.

¹¹ Ona abe yaniiki o totiai ma datoro, ko yohawanua manga hininga yafelenga, de to ona manga demoino ihiboa o wowango o nyawaika. Masara ona abe yaniiki o dualono ma datoro, gea ma titi yoigo yahikangela o nyawaika, ho de to ona manga demoino yomadatoko la ufa o nyawa yahioriki abe manga hiningaka ma hidee ma dorou.

¹² Nako o dohata ilaku o nyawa manga wowangoka gea ahao idadi o kapusaka ma amoko. Masara nako o dora ilaku o nyawa manga wowangoka gea ka idadi o hiapongo de o hilooa yapake hiadono o kangamoino ihimaata.

¹³ Ona abe manga tobahioriki ma gou-goungika yapake hiadono yomangiriki itiai, ona gea manga uruino yotemo o sosawaro ma demo. Masara ona abe yobodo, ona gea ihidemo de o bodo ma demo ho yoperelu o dodotoko o bobohaino la yotoba manga uruino ma bodo.

¹⁴ De ona yososawaro ka ihikaika yoigo manga tobahioriki idogo. Masara ona abe yobodo yowarodemoholi de yofeto-feto dika ho hiadono de manga demoino dika de yomagahoko o kokangela.

¹⁵ Abe ona o kaya ma nyawa, ona ka ihikaika ka idadi yomahitatoko de manga kiahonanga de manga tiwi. Masara ona abe duru ko iwa manga tiwi de ngaro manga kiahonanga ma ko iwa, de ahao to ona manga huha ka ihikaika idogo dika.

¹⁶ Ona abe yaniiki o totiai ma datoro to ona gea manga tiwi yapake la manga wowangoka yomahidailako manga perelu. Masara ona abe o dorou ma datoro yanii-niiki, to ona manga tiwi ihipake ma dumutu o howonika.

¹⁷ Ona abe yataeroka de yahigihene manga dodaere, ona gea yaniiki o wowango ma ngekomika. Masara ona abe ko ihigihenua o dodaere ma demoika, ona gea yaniikoka o hirehene ma dumutu ma dorouika.

¹⁸ Nako to ngone nanga dohata hahininga-gogono nanga badangoka masara homahingahu o nyawaika hato ko hahininga-gogonua, gea onangika habudioka ho ngone hotobaeluku. De nako ngone hatobahohedu de hatobahiade-ade o nyawa manga datoro gea duru hobodo angamoi ko hohiorikua homatongohono nanga uru ma demoino.

¹⁹ Ngone kiani hohidodiai nanga uruino ma betongo angamoi nako hoade-ade iwoeholi de igapanga hahowono hoka o nyawa hahiade-ade, eko haeluku, eko habudi, eko hahirehene. Ma nako hososawaro gea homahitiari de nanga uru ma oraha hotemo la ufa nanga demo ifoloiholi.

²⁰ Ona abe manga wowango ma dumutu o totiaiika ka ihikaika manga demo ma owa. Abe gea ka idadi hohiketero hato manga demoino hamake ma utumu imaketero hoka nanga utumu abe hamake o haakaino abe ena gea duru ihali ma ija. Masara o nyawa abe manga wowango ma dumutu o dorouika dika duru ko hamakeua ma utumu to ona manga demoino.

²¹ Ona abe yaniiki ma totiai gea o nyawa manga ngoeika yahitofo de manga demo ma totiaiino. Masara o bodo ma nyawa ona ma hirete manga wowango yomatoma angamoi ko yomahitoonangua o sosawaro ma gou-goungu ma demo ho ona yomangiriki ko itaanua de yomaputuhu ko itiaiua.

²² Nako ngone o nyawa hiadono hokaya gea ma titi Ma Jou o Yawe ai hiowa ngoneino hiadono nanga kiahonanga ma ngoe gea duru houtumu. De nanga kaya gea nako duru Unangoka de aino ko iwa nanga toduba ma huha abe hamake genangino.

Nanga horomati ma modongo Ma Jou o Yaweika genangino ihititi nanga wowango ikurutu o duniaka

²³ O nyawa abe yanii-niiki ma dorou yomahisosanangi de gea abe yodiai itorou, masara ngaro ona ato yososanangi masara gea ona duru yobodo. De naga o nyawa utu yaniiki ma totiai manga wowangoka de ona duru yososanangi yanii-niiki dika manga datoro ma rorahai gea. De ona abe manga tobahioriki ma gou-goungu naga, ona yososanangi gea ma titi yapake manga sosawaroino.

²⁴ Ona abe yototualono duru yomodongo o boditoika de igoungu ika-ika de o bodito yadaene. Masara ona abe yanii-niiki Ma Jou ai totiaiika, ona yongano-nganono la yamake ma rorahai manga wowangoka. De igoungu to ona manga nganganono ma rorahai ena gea ahao yamake.

²⁵ Naa o hiketero abe hokokia o nyawa abe yodiai itorou de naga manga hohowono iboa itodokanino. O hitodokanino ma hohowono iboa imaketero hoka o rato ma ngutuku ihiara, ho ka de iboaino de ma kiahonanga adaenika ihihailoka ho ma rato ipahaka de ma kiahonangoo ko iwaka genangoka. De imaketero hokogea o hitodokanino ma hohowono adaene onangika abe yototualono ho hiadono ona ko yaiwaka. Masara ona yototiai ngaro o kia dika naga adaene manga wowangoka ma naga to ona manga hakaru ma dengeoti abe ona duru yomahibitumuku genangoka ka hiado-adonika.

²⁶ Nako naga womatengo abe hihikarajaanga masara una ka ihikaika wokapaanga ma karajaangika de gea duru ka ihikaika ngone ai dutu wonahihuha ai debeturika. Abe to una ai debeturu gea inahihuha imaketero hoka o suka-suka inakiofiki nanga ingirika. De imaketero hoka o uku ma nofo nanga lako yaolete, hokogea ai debeturu ka ihikaika wonahihuha.

²⁷ O horomati ma modongo Ma Jou o Yaweika yahiputurungu o nyawa manga wowangoka hiadono manga ngumuru yahitedekana o duniaka. Masara ona abe ko iwimodongua Ma Jouika, ho hiadono manga datoro ma dorou dika yanii-niiki, ona ahao ko yaperekikauahi de yohonengoka.

²⁸ O totiai ma nyawa yongano-nganono ma owa de ahao de to ona manga garago ma amoko yamake. Ma abeika ona yototualono ngaro onangoo yomahinganono ma owa yamake masara manga nganganonika gea ka parahaja dika.

²⁹ Ma Jou o Yawe Una wodadi to ona manga gogoana ma tau o nyawaika abe manga wowango ma datoro itiai. Masara Una wodadi to ona manga bobinaaha abe to ona manga wowangoka yotobadiai itorou.

³⁰ De ona abe Ma Jou ai totiaiika yanii-niiki ka ihikaika wahidogunoaika la manga tonakoka yogogere. Masara ona abe yodiai itorou Unangika ahao wahihupu manga tonakino.

³¹ O totiai ma nyawa yadora o nyawaika de yapake manga uru la o nyawa yaduhunu de o sosawaro ma demo. Masara ona abe manga uruino ka o ngeluku ma demo dika ihupuino, to ona manga uru ahao Ma Jou wohidokaritamoka ka hiado-adonika.

³² O totiai ma nyawa manga uruino ihitobademo o demo abe ma rorahai dika. Masara ona abe manga datoroka itorou yapake manga uru ihidemo ihowono, ho manga demo ma dorou dika.