Sosawaro 1 - Ma Jou ai Demo-demo o Totobelohoka

O nyawa manga utumu nako yaniiki o sosawaro ma demo o Saloomoino

¹ Naa o demo o Saloomoino abe to una ai baba o Dautu. De o Dautu gea una o Isiraele ma nyawa manga koano ma dihira. De o Saloomo ai sosawaroka de aino wonahidoaka ngoneino o hiowa ma demo naa.

² De o Saloomo ai hiowa ma demo wonahidoaka ngone o nyawaino la ngoneoo hososawaro hiadono homangiriki o wowango ma ngekomo itaana ma totiaiika. Abe o hiowa ma demo naa inaduhunu la hohioriki homahiaturu irahai nanga wowangoka de homangaratii o dodotoko ma demoino.

³ Ho nako homadoihene de hapake o Saloomo ai hiowa ma demo nenanga de ahao inahiakunu la hohidodiai homahiaturu itiai nanga wowangoka. De gea hiadono nanga wowangoka ngone homaputuhu itaana, de haniiki ma totiaiika. De gea ngone homakao irahai de o nyawa utu ho ko habudiua onangika.

⁴ Abe o Saloomo ai hiowa ma demo nenanga ma titi inahiakunu ngone o nyawa la ngaro ona abe ko yososawaroua ma ka idadi yososawaro abe to una ai hiowa ma demoino yamake o sosawaro ma tobahioriki. De ngaro o goo-goduuru de o momoholehe ma nako yaniiki o Saloomo ai hiowa ma demo nenanga ka idadi yomafikiri la ka hiadono yobaluhu manga hiningaka.

⁵ De ngaro ona abe yososawaroka masara onangoo youtumu nako yomadoihene o Saloomo ai hiowa ma demoino nenanga la gea manga sosawaro idogoli genangino. De ngaro o nyawa abe yomadotoko ma ngoeoka, masara manga sosawaro abe yamake o hiowa ma demoino naa ahao naga manga hiningaka de ma demo gea imaketero ka ihikaika yahihira-hira manga wowangoka.

⁶ Igoungu naga o demo utu o nyawaino abe duru ihuha hataoko itiai ma titi angamoi nanga hininga ko adonikaua ifikiri. Ma nako ngone hotobafikiri o Saloomo ai hiowa ma demoika hiadono ma titi homangaratii, gea inaduhunu. De ngaro o demo gea abe ihuha o nyawa yataoko itiai ma titi, ma, genangoo ahao homangaratii ngaro ma dihira ko homangaratiiuahi.

O sosawaro o hiowa ma demoino ihititi o modongo Ma Jouika

⁷ Onagona dika abe yoigo ihioriki ma sosawaro kiani ihira naga manga modongo ma horomati Ma Jou o Yaweika de ahao ka idadi ihioriki ma sosawaro gea. Abe kiani ngone hihiorikoka itiai abe Ma Jou ko ai buturungu de ahao gea nanga hiningaka himodongo Unangika hiadono nanga horomatioo duru ilamoko Unangika. De nako ngone o nyawa nanga modongo ilamoko Ma Jouika de ahao ka idadi hataoko itiai o Saloomo ai hiowa ma demo ma tobahioriki. Masara ona o nyawa abe yoluku yotoihene o sosawaro ma demoika de yodohata o dodotokika abe ma titi o wowango ma ngekomo itiai, o nyawa gea duru yobodo.

O hitiari o ngofa-ngofakika la yaniiki o hiowa ma demo manga dimonino

⁸ Naa ngini ahi ngofa-ngofaka kiani nitotoihene, abe nia baba winitemo nginika kiani nihigihene abe gea ai dodotoko nginika. De abe nia meme minidotoko, enangoo nimihigihene de ufa niodokaowara ami demoika gea.

⁹ Abe mata-mata niamake manga dodotokino gea idadi nia utumu nia wowangoka. Ho ahi hiketero hokonaa, nia wowango ma datoroka tohiketero ma rorahai de o rante nia tomaruku de utu abe niapake ma hohailoa nia tadauroka. Abe imaketero hoka o rante niapake nia tomarino de daku nia peaka niapake ma kiahonanga ma hohailoa la o nyawa inimake nginika ato nia rupa irahai, de hokogenangoo nako nia wowango ma datoro irahai hiadono o nyawa yomalega ti ngini nia datorika de yamake ma datoro ma rupa ma rorahai. De hokogea ngini ahi ngofa-ngofaka nia datoro nako nianiiki nia baba de nia meme manga dodotoko nginika.

¹⁰ Ho, ahi ngofa-ngofaka nako naga o nyawa abe manga datoroka yatobahowono, ngini naa ufa ko nimaaduru hoka onangoli ho ma oraha inihigaro la manga dorou nianiiki kiani ona niadokaowara.

¹¹ Ufa ona nianiiki nako naga manga higaro ma dorou nginika ato, “Ngini niaino la niminiiki! Ngone ahao homagora o nyawa manga kiahonanga. Ka idadi ngone hagogataheke de hatoma onangika! De ngaro manga howono ko iwa ngoneino ma adodoaua.

¹² Imaketero hoka o nyawa manga honenge yodengedere o tonakoka hiadono manga badanga ko iwaka, de imaketero hokogea o nyawa hahihihanga o dunia ma lokuino la manga kiahonanga homagora. De ngaro ona ka de manga buturungokahi ma oraha hatoma ma hahidingoto manga honengika dika. Ho niaino homakuduhunu la ngone hatoma-toma dika la onangoo manga wowango ko iwaka iti manga kiahonanga homaleoka!

¹³ De abeika nanga utumu manga kiahonangino! Ena gea abe duru ihali-hali ahao hao nanga tauika ka hiadono aomanga de nanga goraino ma kiahonanga!

¹⁴ Ho ngini naa duru niutumu nako homakiniiki la hoiki homagora hokogea. De ma kiahonanga abe hamakeino ahao hotero-tero homakokeregu ma amoko. Ho niaino mia dodiawo!” Hokogea ahao naga o nyawa ma dorou inihigaro ma dorouika ahi ngofa-ngofaka.

¹⁵ Ho gea ahi ngofa-ngofaka duru tinihitiari nginika la ufa nianiiki ona gea abe inihigaro hokogea. Ho ka de manga higaro gea niihene de kiani nimataiti niadokaowara.

¹⁶ Ona duru yomatai-taiti manga dumutu o dorouika. De ona yoigo o nyawa manga awunu yakopoa.

¹⁷ Masara ka de hokogea manga hininga de itigioka to onangoo manga bodito. Ho nako ona yoigo yomahitiari la ufa yobodito, gea kiani yomadotoko o totaleo ma sosawaroino. Abe ka de o totaleo amao o bodito itigioka enangika de imatingaka ho ihohoka ma gurutika ho ko adaenua ma bodito gea.

¹⁸ De manga bodito itigioka onangika gea abe o nyawa yatobaora ka ihikaika. To ona manga hidee la o nyawa yagogataheke la yomagora manga kiahonanga masara ma bahauku de manga dorou yadogilioro onangikali ho hiadono onangoo yoboditoka.

¹⁹ De hokogea manga hasili ona mata-mataika abe manga horoodo o kiahonangika hiadono o nyawa yahikangela. Masara manga kalilu o goraika gea duru o fufutu ma ngekomo de ma bahaika de idadi manga honenge ma titi.

O ngo Sosawaro ma hiketero la hamake hokokia o sosawaro ma duduhunu ngoneino

²⁰ Abeika, o sosawaro ma gou-goungu Ma Jouino ka idadi hohiketero hoka momatengo ami hininga ma datoro duru itiai hiadono duru moigo o nyawa utu maduhunu la onangoo yowango itiai. Ho muna gea homihiromanga o ngo Sosawaro de hokonaa ami demo angamoi muna gea duru moluku o nyawa yomahidadidorou manga wowangoka. De ngaro o kiaika dika o nyawa yoiki masara o ngo Sosawaro naga manga ngekomoka de ka ihikaika o nyawa mahoko de o dodaere. De ngaro o ngi-ngioka abe o nyawa yomatoo-toomuino munangoo naga genangoka de maamo-amokiye mohidemo de o sosawaro ma demo la mato o nyawa yototoihene de yaniiki.

²¹ De ngaro o gigoro ma goronaka o kota ma ngeko-ngekomoka ma o ngo Sosawaro munangoo naga. De ngaro o kota ma ngora-ngorana abe genangika hohupu o ngekomo utuikali, ma genangokaoo ami sosawaro ma demo naga abe ka idadi homadoihene. Hokogea hohiketero hoka o sosawaro de ma ilingoka abe muna o ngo Sosawaro gea ka ihikaika maaho-ahoko o nyawaika la mahigaro o totiaiika. Abe gea hoka maleha o nyawaika mato,

²² “Ei, ngini initotopongonoka ma totiaiika! De abeika nginioo abe duru nitobahohedu, hokokia ma dekanohi niatobahohedu o nyawaika la nia sosanangi niamake o hohedu ma demoino dika? Ho muruonoka de nitoba nia hohedu ma demoino gea? De hokokia ma dekanohi nia hininga ma lawana itagi o tobahiorikika ho hiadono ngohi o ngo Sosawaro ahi dodotoko niaoluku? Marai ngini duru ka niosanangi dika nigogere nia bodo ma goronaka e?

²³ Ngaro ufa dika ngini ka ihikaika hokogea. Abe nako ma oraha ngohi tinitaere nginika abe tapake o hiowa ma demo de nako duru nimadoihene gea de ahao to ngohi ahi hininga ma owa ma dola ngohi tinihidoaka nginika la nihioriki o sosawaro ma demo ma titi.” Hokogea hapake ma hiketero de o ngofeka la o sosawaro hoka de ma ilingoka.

²⁴ Masara nako o ngo Sosawaro ami demo hoporetika de gea motemo ngoneino mato, “Ngohi naa tinikokiahokoka masara ka nimatopongonokahi hiadono ko moiua nginioka nitoihene angamoi ahi duduhunu nioporetika.

²⁵ Abe ahi hiowa ma demoika niaoluku de ahi dodaere ma demo nginika enangoo ma ko niogihenua.

²⁶ Ho mangale gea nako ma oraha adono ngini duru nikangela de ngohi o ngo Sosawaro tinigiete dika nginika. De ma oraha o bodito inidaenoka de ngohi tinihohedu dika.

²⁷ O bodito ahao inihidotadaene hoka o rato de nia kangela gea ko idadiokaua niodokaowara ka hiadono inilufungoka de nia kangela de ti ngini nia hininga ma huha.” Hokogea ma hiketero abe nako o ngo Sosawaro motemo ngoneino.

²⁸ De ahao hoka o ngo Sosawaro gea ami hingahu ma titi to ona manga hininga nako manga bodito yadaenoka mato, “Abeika ona duru yokangelaka de ahao yomagahoko ngohino o duduhunu masara to ngohi ahi sosawaro ma demo ko iwa manga hiningaka abe ngohi ko ihiwa ho ko topaluhua. De ngaro duru ona yolingiri o duduhunu o sosawaro ma demoino masara ko ihimakeokaua ngohi naa.

²⁹ De gea angamoi ona o nyawa abe yodohata o tobahiorikika de duru ko ma moiuahi yamao o horomati ma modongo Ma Jou o Yaweika ho ko iwimodongua Unangika de ko yopusingua to Una ai tobahiorikika.

³⁰ De gea yomahitaana abe ko iwa manga horomati Unangika angamoi o hiowa ma demoika yaoluku de ngaro o dodaere ma demo onangika naga ma, enangoo ko yodafongua.

³¹ Ho gea ona ahao yaolomo manga dorouino ma hofoko de ona yalufungoka de ma hasili abe manga wowango ma datoro ma dorouoka de aino.

³² Hokogea o bodo ma nyawa manga bobaha o duniaka angamoi duru yaniiki abe ko ma totiaiikaua de ona gea hoka yodogiookika manga dorou ma goronaka ho manga giooko gea ena abe yatoma.

³³ Masara onagona dika abe yomadoihene o sosawaro ma demoika de ona ko yoboditoua. De to ona manga wowangoka yoriidi de ko yohawanua abe ahao naga o bodito iboa de yadaene.” Hokogea ma hiketero la o sosawaro ma demo de ma ilingoka la ka idadi inahingahu to ena ma duduhunu ngone o nyawa nanga hiningaino.