Sakaria 4 - Ma Jou ai Demo-demo o Totobelohoka

4:1-14 ko atailakouahi O himatoko abe ma titi Ma Jou ai Tau yodiaiokali

¹ De ahao Ma Jou ai malaekata abe kangano mimaketemo de una wohigilio ngohino de wohitumomiki angamoi ngohi imaketero hoka ihikiookoka.

² Wohitumomiki de wohileha wato, “O kia naga ngona namake?” De ngohi topaluhu tato, “Ngohi ka idadi tamake o posi ma liate abe yodiai o gurasi iree-reeino. De gea ma dekaroka naga ma minya ma ngi moi de ma posi tumidi, de nagali ma minya ma dodagi abe ma posi amomoiika.

³ De ahao nagali o saitunu ma gota o utu hinooto abe imanoa gea ma aridatekoka, moi ma nirakoka de moioli ma gubadioka.”

⁴ De ahao ngohi tileha ma malaekatika tato, “Ahi baluhu, gea ena o kia?”

⁵ De wopaluhu wato, “Done ngona ko nohiorikua?” De tato, “Koua, ahi baluhu, duru ko tohiorikua gea o kia.”

⁶ Ho una wohitararono ngohino wato, “Gea ena ihitunguu Ma Jou o Yawe ai Demo abe wihingahu o Serubabelika o hiketero abe ma titi ai karajaanga ma oraha wodiai Ma Jou ai Tau. Abe Ma Jou wato, ‘Ahao idadi ko ma titiua o buturungino, de hokogenangoli ko ma titiua o kuahaino de idadi. Masara gea ahao idadi de duru ihititi to Ngohi ahi Womahino dika.’ De hokogea Ma Jou o Yawe abe duru Wokokurutiye wotemo.”

⁷ De ai demoino gea ma titi abe ko kia-kiaua ka idadi ihitogumu o Serubabele ai karajaanga ka hiadono wabooto. De ngaro o loku ma amo-amoko masara ko akunua atukoro ma karajaanga, masara ma loku gea ahao idadi o tonaka ma dola abe ka itotiaiika ma titi o Serubabele ai karajaanga! De ahao ma oraha una wabooto ai karajaanga de wakelenga ma hakaru ma baha daku Ma Jou ai Tau ma dekaroka de o nyawa yohagaaga yotemo ato, “Ngaro Ma Jou wohiowa ai Tau gea la duru itongohono ka hiado-adonika.”

⁸ De ahao naga moioli Ma Jou o Yawe ai Demo abe wohihidoakino ngohino. De ai demoino gea wato,

⁹ “O Serubabele una gea ai giama abe akelenga ma hakaru ihira-hira ahi Tauoka naa, de abe ihibobaha ahi Tau ma karajaanga, enangoo to Serubabele ai giama dika wohibobaha.” Hokogea Ma Jou o Yawe ai demo ngohino, ho ma oraha ngini niamake abe idadi duru imaketero hoka ahi demo abe naa tinidofanga nginika de gea ka idadi nihioriki abe Ma Jou o Yawe wagoungu wohidingoto ngohi nginika.

¹⁰ De gea koaho ufa ngini niahitipokouku o karajaanga naa abe niato ma karajaanga ko kia-kiauahi, angamoi Ma Jou o Yawe duru wogarago wamake de ai lako o Serubabele ai karajaanga abe ahao womulaenge wodiai. De gea ma titi Ma Jou o Yawe ai lako tumidino abe ka ihikaika wolega-lega o dunia ma amokika.

¹¹ De ipaha de tileha ma malaekatika tato, “Ma saitunu ma gota o utu hinooto gea abe ma posi ma liate ma arihonongaka, gea ma titi o kia?”

¹² De tilehali tato, “De ma saitunu ma gota ma dodofanga hinooto gea, abe ma minya ihahuru genangino la ahao itagi ma minya ma dodagino, enangoo ma titi o kia?”

¹³ Tileha ipaha de wohipaluhu wato, “Done ngona ko nohiorikua to ena ma titi?” De ngohi topaluhu tato, “Koua, ahi baluhu. Ko tohiorikua.”

¹⁴ Ho una wohihitararono wato, “Ma hinooto gea ihitunguu ma nyawa yahinooto abe Ma Jou o Yawe womadingakino la ka idadi iwitobagoana de iwitobaduhunu Unangika abe wodadi o dunia naa mata-mataika ma Baluhu idodutu.” De hokogea ma himatoko abe Ma Jou wohihidoakino ngohi o Sakariaino.