Sakaria 3 - Ma Jou ai Demo-demo o Totobelohoka

3:1-10 ko atailakouahi O himatoko abe ma titi Ma Jou wakokiofi manga hidemo wokokurutiye ai howo-howono

¹ 1 De ipahaino de ahao naga moioli Ma Jou wohihimatoko ngohino. Abe tamake womatengo ai romanga o Yosua, abe una wodadi o hidemo ma nyawa Ma Jouika abe duru wokokurutiye. De o Yosua gea womaokoino Ma Jou o Yawe ai malaekata ai himangoka. De nagali genangoka o Ibilihi ma haeke imaokoino ma malaekata ai datekoka. De ena gea ma hininga la iwitae-tae o Yosuaika.

² Masara Ma Jou o Yawe wotemo o Ibilihi ma haekika wato, “Ngohi naa Ma Jou o Yawe de Ngohi duru toluku ani dadae ma demo! Abe Ngohi naa Ma Jou o Yawe abe tairikoka o Yerusaleeme ma kota la idadi to Ngohi ahi kota, ho naa tohigalioli abe duru toluku to ngona ani dadae ma demo abe notemoka ma titi ahi nyawa o Yosua! De ahi nyawa naa tihiketero tato una gea ngade-ngade hoka o gota ma jaga moi abe youku / yotokara o uku ma goronaka, masara ko yotinouahi de agorakoka.”

³ De gea igoungu abe o Yosua ai baju duru isafarune abe ma malaekata ai himangoka.

⁴ De nagali ona utu yomaokoino genangoka, ho ma malaekata wahuloko onangika wato, “Niahuputoka ai baju ma fofarune gea.” De wotemoli o Yosuaika wato, “Ngohi naa ani howo-howono taapongoka ho naa ka idadi nomahinoauku de o baju ma hohailoa.”

⁵ De ahao ngohioli totemo tato, “Irahai la o tuaa ma debi-debini iwihinoauku ai peauku.” De gea ahao ona iwihinoauku de o baju ma hohailoa de o tuaa ma debi-debini, de Ma Jou ai malaekata naga ma digi-digino womaokoino de womalega-lega unangika.

⁶ De iwihinoauku ibooto de Ma Jou ai malaekata wihibehehongo o Yosuaika wato,

⁷ “Ma Jou o Yawe duru Wokokurutiye wotemo ngonaika wato, ‘Nako ngona ani wowangoino de ani karajaangino de natobaniiki ahi hiaturu, gea ahao ngona ka idadi nopareta to Ngohi ahi Tau ma debi-debinoka. Abe ahao tonihidoaka ani kuaha la ahi Tau ka ma moi de to ena ma loa mata-mata ngona dika nodadi to ena ma hidimono. De tonihidoakoo la ngona ka idadi notobaboa ahi himangino abe imaketero hoka onangoli naa abe yomaokoino ani datekoka.

⁸ Ho naa ngini kiani nihihigihene ahi demoino. Abe ngaro ngona o Yosua abe nodadi ahi hidemo ma nyawa duru nokokurutiye de ngaro ani dodiawo abe onangoo yodadi ahi hidemo ma nyawa, masara ngini mata-mata kiani nitotoihene ahi demoino naa. Abe Ngohi tinihingahu tato ngini nidadi hoka ahi dodunguu moi o nyawaika. De gea ma dodunguu ma titi abe itigioka ma oraha Ngohi tihimatoko o nyawaika to Ngohi ahi Duduhunu abe tihiromanga “o Gota ma Jaga.” Abe ma dihiraino de tahibehehongoka tato ahao ahi Duduhunu gea tihimatoko o nyawaika. De ngini naa nidadi hoka ma dodunguu abe gea ko itedekanokaua de tihimatoko Una gea.’”

⁹ “‘De naa moioli tinihingahu nginika. Abeika nimalega ma hakaruika abe takelenga doka o Yosua ai himangoka. Abe ma hakaru moioka gea de naga to ena ma lako tumidika. De Ngohi Ma Jou o Yawe Tokokurutiye ahao tahonotoko de totulihi ma hakaruika gea la itemo ato, “Ahao naga ma oraha abe o tonaka naa manga howo-howono o wange moioka dika de takokiofioka ma howono mata-mataika.” Hokogea ma dulihi abe ahao totulihi ma hakaruika gea.

¹⁰ De dokengika abe ma wange gea adonoka de ahao ngini homoi-homoi ma tonakoka naa de duru niamao o dame nia kokihiningaka. Abe ma oraha gea de ka idadi niahokino ona nia date-datekoka la nigogeruku de nimakerekata abe nia tau ma loaka o gota ma timiuku eko nia redioka de nimaketeade-ade, de gea ko iwa nia hawana angamoi nia wowangoka de duru iriidoka.’ Hokogea Ma Jou o Yawe ai demo ngona o Yosuaika.”