Ruutu 4 - Ma Jou ai Demo-demo o Totobelohoka

O Boasa womile o ngo Ruutu la womihidadi ngoi fekata

¹ De duru o wange gea o Boasa woiki o Beteleheeme ma nyawa manga dimo-dimonika manga doomu ma ngiika. Abe o Beteleheeme ma kota gea yahigilolitino de o dadaduhu ho naga ma ngorana abe genangino dika o nyawa yohupu yowohama de genangoka manga doomu ma ngi. De manga ngioka gea o Boasa widamaa ai gianongoru abe una kiani wohira womibangu o ngo Ruutu ami kangelaino nako una woigo angamoi ka unangohi itigino ai dutu de una o ngo Ruutu ami rokata abe wohonengoka. Ho ipahaino abe ma oraha ai gianongoru gea woboaino witilakuru de o Boasa wiahoko, wato, “Gianongoru, nainohi nenangoka nogogerukuohi.” Ho ai gianongoru gea woboaino de wogogeruku o Boasa ai datekoka.

² De ahao o Boasa wahokino o nauru yangimoi abe ona o Beteleheeme ma dimo-dimonino de wogahoko la onangoo yogogeruku manga doomu ma ngioka la ona yototoihene o Boasa ai hingahu to una ai gianongoruika.

³ De ahao o Boasa wihingahu ai gianongoruika abe ka unangohi ai tagongo itigi o ngo Naomi de o ngo Ruutika, wato, “Ngona marai nomihioriki o ngo Tobasanangi abe nanga gianongoru ngoi bao abe ami dekana o Moaboka mogogere masara ma oraha naa muna moboaka molio nanga kotaino. De o redi ma tonaka gea abe ma dihiraino ami rokata o Eli-meleke ai tonaka mato kiani mafukunu. De gea ma titi, Gianongoru, hiadono toniahoko abe o Eli-meleke una gea de ngona duru itigino nia dimonino.

⁴ Ho kiani ngona nohira ma tonaka gea nomaija nako noigo nobangu la ka ihikaika naga to ngone nanga fam ma goronaka. Ho ma titi gea ena hiadono ngohi toniahoko de tonihingahu o nyawa mata-mata manga himangoka abe yogogere nenangoka abe kiani nanga dimo-dimono onangoo yoihene to ngone inahinooto nanga demo. Ho iti ona yoihene nako ngona nato ma tonaka gea nomaija eko ko nomaijaua. Angamoi nako ngona ma tonaka gea ko nobangua ngohi ka idadi tobangu.” Hokogea o Boasa ai hitararono to ona mata-mata manga himangoka. De ahao ai gianongoru gea wopaluhu wato, “Ngohi marai toigo tale o tonaka gea.”

⁵ De ahao o Boasa wihingahuoo wato, “Irahai Gianongoru hokogea, iti nohiorikoo abe nako o ngo Naomino ma tonaka gea nomaija de ahao ngomi hunungu o Moaba ma nyawa, o ngo Ruutu, gea munangoo kiani nomile. Angamoi hokogea nanga pareta ma hiaturu la muna mamake ami ngofa-ngofaka abe yodadi ami rokata wohonengoka ai duruuru, de ma tonaka gea idadi to ona manga oara.” Hokogea o Boasa utuohi wihitararono ai gianongoruika.

⁶ De una abe wohira o bobangu ma tagongo wale, wopaluhu wato, “Ou, nako hokogea marai ngohi ko idadiuali tobangu done ahi oara ahao ona ko amakeua abe ngohi toigo yamake. Ho ngona ka idadi ma tonaka gea nomaabangu, angamoi ngohi ko tadadiuali tale.” Hokogea to una ai putuhu.

⁷ De ma oraha gea naga o Isiraele ma nyawa manga biaha abe ma titi hokokia ihitunguu manga behehongo, de gea ihitunguu de manga sandaala. De hokonaa ma hiaturu, nako naga ma kiahonanga abe ka womatengo dika ka idadi womaija masara ma bahauku ko wofanguali de wahibehehongo o nyawa moiikali abe ka idadi ona iwituruuru yomaija gea naga o sandaala ma dodunguu kiani yodiai. Abe de ena gea wohitunguu la o nyawa mata-mata ihioriki abe ko waijauali. Ho ma dodunguu gea ai sandaala wahuputu de wihidoaka ai dodiawoika abe unangoli naa ka idadi womaija ma kiahonanga gea.

⁸ Ho hokogea o Boasa ai gianongoru wodiai abe ka de wato o tonaka gea ko idadiuali wafangu de ai sandaala wahuputu de wihidoaka o Boasika de wihingahu wato, “Ahi sandaala naa nodafongo la hohitunguu ma tonaka gea ngohi ko taleuali ho ngona ka idadi ena gea nomaabangu.” Hokogea wodiai la ona mata-mata genangoka ihioriki o Boasoli naa ka idadi ma tonaka gea wafangu de o ngo Ruutoo womile la womihidadi ngoi fekata.

⁹ De ahao o Boasa naga ai hingahu o Beteleheeme ma kota ma dimo-dimonika de onangika abe yomatoomuino yawuni-wuningi genangoka abe ma titi o ngo Naomi ami tonaka de ngomi hunungu. Abe onangika wahingahu wato, “Ngini mata-mata naa niamake abe naa idadioka nia himangoka ho nako o nyawa inileha nginika de ka idadi niataana niahingahu ma gou-goungu onangika abe naa idadioka. Ho naa tinihingahu o wange naa ngohi tomaija o ngo Tobasanangi ami oara mata-mataika abe mamake ami rokatino o Eli-meleke de manga ngofa-ngofakino o Wotobaona-ona de o Wotobapanyake manga oara.

¹⁰ De gea ma titi manga tonaka de Wotobapanyake ngoi bao o ngo Ruutu abe muna gea o Moaba ma nyawa munangoo modadi to ngohi. Ho ma oraha naa ngohi o ngo Ruutu tomile la modadi ngohi fekata. Hokogea itiai la muna mamake ami ngofaka o nauru abe una wituruuru ai baba abe wohonengoka la manga fam ko ihihangua. Ho ma oara abe toobangu o wange naa ahao idadi to una ai oara ai babaino de ka idadi ma titi gea ihitulihuku o Beteleheeme ma bukuoka la ufa o Eli-meleke de ai ngofa-ngofaka manga romanga ihihanga. Hokogea ngohi tomahingahuoka ti ngini nia hima-himangoka, ho naa ngini nidadioka o hakihii ma nyawa ma titi ahi behehongo ma demoino.” Hokogea o Boasa ai hingahu.

¹¹ Ho ka de manga dimo-dimono de ona utu abe yomatoomuinoka genangoka yoihene ai demo gea de yotemo ato, “Ngomi midadioka o hakihii ma nyawa abe miamake ma gou-goungu abe ngona o Boasa o wange naa nodiaioka. Ngaro Ma Jou o Yawe wonihidadi ngonaika la ani gogianongoru, o Efaraata ma nyawa, inigoraka la ngona nodadi manga dimono. Angamoi itiai o nyawa manga horomati ilamoko ngonaika o Beteleheeme ma kotaka la ka ihikaika ona duru ko iniwohangua. De ma ngofeka gea abe nomile la nigogere moi ani tauoka duru mimigahoko la muna modadi imaketero hoka nanga be-be o ngo Lea de o ngo Rahele abe ma titi manga ngofaka manga ngoe hiadono ngone o Isiraele ma nyawa hofaa-faatuku nanga totoforaino gea.

¹² De ngonaoo minigahoko Ma Jou o Yaweika la muna o ngofeka ka o goohi naa Ma Jou womipake la to ngona ani ngofaka de ani totoforauku yowoe-woeuku. Abeika nanga ngoe o Yehuda ma nyawa homahidutu o Peresika abe una o Yehuda de o ngo Tamarino manga ngofaka de una gea wodadi to ngone mata-mata nanga tofora. Hokogenangoo de ngomioli minigahoko Ma Jou o Yaweiye la to ngonaoo ani totoforauku manga ngoe abe o ngo Ruutino namake.” Hokogea o Beteleheeme ma nyawa manga hiowa ma demo o Boasika.

¹³ Ho o Boasa womile o ngo Ruutu de womiao ai tauika de yodadi o giarokata. De ahao ma oraha yomakitigi de Ma Jou o Yawe womihiakunu o ngo Ruutu la ka idadi modami ho muna de ami badangoka de mamake o ngofaka o nauru.

¹⁴ Ka de una womaboa de o ngo-ngofeka o Beteleheemoka yotemo o ngo Naomika ato, “Duru hihigiriiri Ma Jou o Yawe o wange naa, abeika ai owa wohidingoto ngonaika o ngo Tobasanangika! Naga ani ngofaka o nauru womatengoli abe unangoo ahao ka idadi ani dutu waabangu la manga oara ko ihihangua. Honganono la una naa duru o Isiraele ma nyawa mata-mataika ahao iwihioriki de ko iwiwohangua!

¹⁵ Abe ma oraha o ngofaka naa namake de to ngona ani hininga idadiokali itobasanangi hoka o ngofeka o gooli! De gea angamoi una naa nimake ngoni hunungino abe muna duru monidora ngonaika de gea munangino namake o nauru naa. Ho ngaro hoka ma dihira ani ngofaka o nauru yatumidi manga ngoe masara ani utumu onangino ko imakadaenua de ma utumu ngona namake o wange naa o ngo Ruutino.” Hokogea manga garago ma demo o ngo Naomika.

¹⁶ De o ngofaka gea idadi o ngo Naomi ami dofo de mipaliara imaketero hoka una to muna ami ngofaka idodutu.

¹⁷ De ami dodiawo o ngo-ngofeka yomakoketemo ato, “Abeika o ngo Tobasanangi mamake ami ngofaka womatengoli!” De ami ngofaka gea iwihiromanga o Obede. De o Obede gea wobaluhoka de naga to unangoli ai ngofaka ai romanga o Isai. De ahao o Isai naga ai ngofaka o Dautu abe una o Isiraele ma nyawa wahikoano duru irahai.

¹⁸ Ho hokonaa o Obede gea ai totofora ma dodihiraka de ai ngofakuku ka hiadono to una ai danongo o Dautuku. Ai tofora o Perese ai ngofaka o Heserono.

¹⁹ De o Heserono ai danonguku o Raama, de o Raama ai danonguku o Aminadaba.

²⁰ De o Aminadaba ai danonguku o Nahasono, de o Nahasono ai danonguku o Salamono.

²¹ De o Salamono ai ngofaka o Boasa, de o Boasa ai ngofaka o Obede.

²² De o Obede ai ngofaka o Isai, de o Isai ai ngofaka o Dautu.