Ruutu 2 - Ma Jou ai Demo-demo o Totobelohoka

O ngo Ruutu mokarajaanga o Boasa ai redioka

^1-3 De o ngo Ruutu moigo malingiri manga inomo ho momitemo ngomi hunungu o ngo Naomika mato, “Meme, toigo nohihigunoa toiki o redi-redika tonadoraka o gandumu abe genangoka youtuku o gandumu de abe ipopurarahuku yanoaika. De ena gea ko yaleokaua la ka idadi o huha ma nyawa yomale ho ka idadi ngohi tonadoraka. Marai naga o redi ma dutu utu abe yosanangi ihihigunoa ngohi tonagoraka manga gandumu ma redioka abe youtuku ibooto.” Hokogea o ngo Ruutu ami hininga ngaro muna o homoa ma nyawa o Moaba ma tonakino. De o ngo Naomi mohimoteke o ngo Ruutu ami demoika gea ho mato, “Ahi ngofaka, ngohi tosanangi dika ho irahai noiki nonalingiri abe ma inomo ipopurarahuku gea.” Ho o ngo Ruutu moiki youtu-utukika la momagahoko la ma gandumu abe iree-rerouku momagoraka. De ona youtu-utuku gea ami gogahoko yodafongo ho imihigunoa manii-niiki manga poretino la momadoraka abe manga gandumu ipurarahuku ma oraha yautuku manga gandumu gea. De genangoka o ngo Ruutu momadoraka ami inomo masara muna ko mohiorikuahi abe o redi ma dutu gea o ngo Naomi ami geri yadaene. Abe ma redi gea ma dutu ai romanga o Boasa de una o nauru abe ai wowango ma datoro irahai hiadono o nyawa yogogere o Beteleheeme ma kotaka naga manga horomati ilamoko unangika. De unangoo ai dutu adaene de o Eli-meleke, abe o ngo Naomi ami rokata wohonengoka gea. Abe o Boasa de o Eli-meleke o gianongoru imahitigino de manga dimo-dimonino. Hokogea hiadono idadi una de o ngo Naomi o giageri adaene. De gea to Boasa ai redioka abe o ngo Ruutu momadoraka ai gandumu ipopurarahuku abe ma oraha yautuku. Ma Jou ai hiaturu o Isiraele ma nyawaika la ka idadi o huha ma nyawa hoka o bao-bao yaduhunu. Ma dihira Ma Jou ai hiaturu o Isiraele ma nyawaika la ka idadi o huha ma nyawa yomadoraka o inomo ma hou abe yamake o nyawa utu manga redioka. Hokonaa hamake o Higalioli 24:19-22 de o Gogao 19:9 abe itemo, “Abe ma oraha ngini niale nia redi ma hasili de abe nia hou-hou ufa nialeoli. Kiani ma hou-hou gea nianoaika la idadi o huha ma nyawa manga inomo. Abe hoka ma oraha niautuku nia gandumu de utu iota-otakuku de gea ena nianoaika la ka idadi o homoaino ma nyawa abe yogogere nia hidogoronaka yomale. De nagali o gohihi, de o bao-bao, gea to onangoo manga inomo. Ho ngaro nia saitunu ma hofoko, eko nia angguru ma hofoko, eko nia redi ma hasili o kia dika naga abe ma oraha niale de ipurarahuku o tonakoka, eko ko nialeua ma titi ka ma gogilauohi, eko abe iwangoiye dika nia redi ma batingoka, ufa ena gea niogilio de niale. Masara nianoaika la ona abe yohu-huha gea ona dika ka idadi yomale. Ngohi Ma Jou tohiaturu hokogea la ngini nimahihohininga de ufa niawohanga abe ma dihira nia totofora yogogere o Mesiiri ma tonakokahi de manga karajaanga ko iwa ma gaji ho ona duru yohuha. Masara ngohi Ma Jou o Yawe ko tawohangua de ka ihikaika manga kangela ma goronaka tahidailako manga inomo. Ho ngini to Ngohi ahi nyawa toigo nimaaduru to Ngohioli ahi hininga la nginioo nia dora itagi o huha ma nyawaika de gea niahidailako to onangoo manga perelu.” Hokogea Ma Jou ai hiaturu o Isiraele ma nyawaika ma dodihirainohi.

O Hitararono ma hidogo

⁴ Ho ma oraha gea o ngo Ruutu momadoraka o Boasa ai redioka de una woboa abe o Beteleheeme ma kotaka de waino la ona watutumu abe yokokarajaanga to una ai redioka. Ka de ona watutumu de wotemo onangika, wato, “Ngaro Ma Jou o Yawe winihiputurungu nia karajaanga ma goronaka!” De ona youtu-utuku gea iwipaluhu ato, “De ngaro Ma Jou o Yawe wonihiowa ngonaika mia baluhu!”

⁵ De ahao o Boasa wileha manga karajaanga ma hihiraika, wato, “O ngofeka gea dokena, muna o kiaino? De sarakia, ngona nomihioriki muna gea to onagona manga ora?”

⁶ De manga karajaanga ma hihira gea wipaluhu o Boasika, wato, “Nako ma ngofeka dokena gea muna o Moaba ma nyawa abe o ngo Naomi mominiikino ma oraha o ngo Naomi molio o Moaboka de maino.

⁷ De kangano o ngorumino muna moboa ngohino de momagahoko la mato muna manii-niiki ona youtu-utuku manga poretino la momadoraka o gandumu abe ipopurarahuku. De gea ngohi tomihigunoa la momadoraka ma gandumu gea ho muna kanganoinohi mokarajaanga de ko momatogu-togumua masara ma moi dika momahiaini jai-jai dika o foo-fofongo ma tau ma timiuku de ahao mokarajaangokali ka hiadono ma oraha naa de ko momahiainuahi.” Hokogea wihitararono ai dimono o Boasika.

⁸ De ahao o Boasa waika womitutumu o ngo Ruutika wato, “Ahi ngofaka, toigo la nohihigihene ahi demo naa. Ngona ngaro ufa dika noiki o redi utuika la nomadoraka, masara togahoko nenangoka dika nomadoraka.

⁹ De togahokoo la ufa naniiki o nau-nauru manga poretino masara o ngo-ngofeka dika nanii-niiki manga poretino. De gea ngohi bootino tahingahu o nau-nauru o goo-goduuruika la ufa iniruwae ngonaika. Masara nako ani ngomaha yodudungu gea ka idadi manga akere nokere abe nagau o goo-goduuru yaguitino o humuino de yoguheoka dokena ma botoka gea.” Hokogea o Boasa woigo ai hininga womihingahu munangika.

¹⁰ Ka de ai demo gea moihene de o ngo Ruutu momaponuku ai himangoka hiadono ami pea itiki o tonakuku de motemo mato, “Ahi baluhu, adodoa ho ngona nohilegaika ngohino de ani dora ngaro ngohi o homoaino ma nyawa dika?”

¹¹ De o Boasa wotemoli wato, “Nagoungu, de ngohi tonihioriki abe ngona o homoaino ma nyawa masara ngohi tohiorikoo ani ade-ade abe ma titi ani dora ngoni hunungika ngaro ani rokata wohonengoka. De ngohi toihenoka o nyawaino abe hokokia ani baba de ngoni meme nanoaika de ani tonakoo ma, noporetika la ngoni hunungu nominiiki hiadono noboa nenangino. De gea ngaro duru ko nomihiorikuahi ngomi o Isiraele ma nyawa masara noigo nogogere ngomioka.

¹² De ngohi tonganono to ngomi o Isiraele ma nyawa mia Jouika, abe Una gea Ma Jou o Yawe, la Una ahao wonihibalaha de ma owa ngonaika. Tonigahoko Unangika la ani utumu Unangino de ani dora ngoni hunungika imakiniiki ma amoko. De gea tohioriki ngaro ngona naga ani hawana masara noboaino de nongaku abe ka idadi nomahitatoko to ngomi mia Jouika duru imaketero hoka o kuru-kuru ma ngofaka abe iwohama ma ayo ma gafuufu ma timiuku la imahitatoko genangoka. De hokogenangoo ngona noboaino la nomahitatoko to ngomi mia Jouika.” Hokogea o Boasa ai demo munangika.

¹³ De o ngo Ruutu motemo mato, “Ahi baluhu, ngohi tamake ngona de ani sanangi nohiduhunu ngohino. De gea ngohi tonganono la ahi datorino ka ihikaika tonihisanangi ngonaika. De gea ngohi naa hoka to ngona ani gilaongo dika masara ngona noboa ngohino de nohilaru ngaro ngohi de o ngo-ngofeka abe yokokarajaanga ngonaka ma ka ngohiohi totipokouku ani himangoka.” Hokogea o ngo Ruutu ami heranga ma demo.

¹⁴ De ipahaino abe ma oraha o Boasa de ai nyawa yomakokitoomuinoka la yolomo de o Boasa womiahoko o ngo Ruutika la munangoo molomo onangoka. Ho womiahoko munangika, wato, “Naino, ngohi toigo la ngona nolomo de de ngomi, ho to ngomi mia roti ngonaoo nomagoraka de nako noigo nomahitabu mia angguru ma teonguku, nomahitabu dika.” Hokogea o Boasa ai demo munangika ho ona mata-mata yolomo yomatoomuino. De o Boasa waleino o gandumu abe yahinyoleoka de womihidoaka munangika. De o ngo Ruutu molomo hiadono imipunuhoka de ka nagahi ami hou ai hidoakino gea.

¹⁵ Ka de muna molomo ibooto de molio ami karajaangika de ahao o Boasa wahingahu o nau-naurika wato, “Nako o ngo Ruutu gea ngini nimihigunoa la ngaro o kiaika dika moigo momadoraka ma ka idadi. De ngaro hiadono maadono abe niapaki-pakitino ma genangikaoo nimihigunoa de ufa ngini nimitaere done nimihimaleke eko nimihihuha.

¹⁶ De ma oraha abe niagoraka nia paki-pakitino de ka idadi o roehe amomoi niakiwuku ma papakitoka de niaumo-umouku o tonakoka la enangoo ka idadi momadoraka abe niaumouku gea.” Hokogea o Boasa wahibehehongo ai nyawaika.

¹⁷ Ho o ngo Ruutu momadoraka o ngorumino ka hiadono o bobimaowaka de ahao ami gandumu mata-mata matoomuino, de ahao mohiboha-boha la irero, de ahao mataloko hiadono ma afa ko iwaka. De ami gandumu abe mamake gea ma amoko imaketero de manga duduga ma amo-amokuku moi abe aomangoka. Abe manga duduga gea ma romanga o efaa. De o efaa gea imaketero de o litere monaoko ma dola nako aoma-omangiye.

¹⁸ Ho ami gandumu o litere monaoko gea momagao molio ngomi hunungu o ngo Naomika o kotaka. De o ngo Ruutu momihidoakoo munangika ami inomo ma hou abe kangano o Boasa womihiolomo de ko mamataua ho naa ma hou momihidoakoli ngomi hunungika.

¹⁹ De o ngo Naomi momileha de ami heranga o ngo Ruutika mato, “Ahi ngofaka, o kiaka ngona nomadoraka o wange naa? Eko onaguna wonihikarajaanga to una ai redioka hiadono namake ani gandumu ma amoko hokonaa? De una gea toigo tihioriki la gea ngohi duru tigahoko la wamake ma owa ma titi wonilegaika hiadono ani karajaanga ma hasili hokonaa ma amoko.” Hokogea o ngo Ruutika momileha ibooto de o ngo Ruutu momihingahu ngomi hunungika, mato, “Meme, naga womatengo ai romanga o Boasa abe una gea wohiduhunu ngohino la hiadono ngohi tokarajaanga to una ai redioka.”

²⁰ Ka de o ngo Naomi moihene abe mifetongo o Boasa de muna mihioriki una gea de motemo mato, “Ngaro Ma Jou o Yawe wihiowa unangika! Abeika Ma Jou ai duduhunu ngoneino! Duru ko wotogu-togumua Ma Jou wonahimatoko ai owa ngone o tau moiino. Abe itaana Una ko wonawohangua ngone o tau moi, ngaro ngone ka howangohi eko ngaro ona nanga tauoka abe yopahaka, masara ai hininga de ma dora itagi ngoneino ko itoa-toakua!” De ahao momihitararono o ngo Ruutika mato, “O Boasa gea nanga dutu adaene ahi rokatino! Abe nako o Boasa de ahi rokata ona o gianongoru itigino ho una gea naga ai tagongo ngoneino la wonaduhunu de ka idadi to ngone nanga kangelaino wonabangu.” Hokogea o ngo Naomi momihingahu o ngo Ruutika.

²¹ De o ngo Ruutu mopaluhu mato, “De una ma hirete wohihibehehongo ngohino la ka ihikaika tomadoraka de tanii-niiki to una ai nyawa youtu-utuku ka hiadono ai gandumu yamata yautuku.” Hokogea o ngo Ruutu momihingahu o Boasa ai hininga munangika ngaro muna o Moaba ma nyawa.

²² Ka de moihene gea de ngomi hunungu, o ngo Naomi mato, “Irahai hokogea idadi ahi ngofaka! Ngona nanii-niiki o ngo-ngofeka abe yokarajaanga to una ai redioka dika angamoi nako o gandumu nomadoraka o nyawa utu manga redioka de done naga utu iniruwae o goo-goduuru.”

²³ Hokogea ngomi hunungu ami demo ma owa munangika ho o ngo Ruutu duru madodiawo o ngo-ngofekaika abe o Boasa ai duduhunu yokokarajaanga ai redioka. Ho muna mogogere de ngomi hunungu o ngo Naomi de o wange-wangeiye o kotaino mohupu de manii-niiki o ngo-ngofeka gea manga karajaangoka. De o gandumu gea yautuku ibooto de ahao o Boasa ai redi utuikali yoiki abe o gandumu o fara moioli genangoli yautuku hiadono enangoo yamata. Hokogea o ngo Ruutu ami hasili abe ma gugutuku ma karajaangino gea.