Ruutu 1 - Ma Jou ai Demo-demo o Totobelohoka

O Beteleheeme ma nyawa o tau moi yomaturuuru o Moaba ma tonakika

^1-2 O ade-ade naa idadi ma oraha o Isiraele ma nyawa yogogerokau o Kanani ma tonakoka ma dekana. De ma oraha gea manga musu ka ihikaika yahikangela o Isiraele ma nyawa ho Ma Jou wohigali-gali wairiki manga hihira ma hidimono abe ona gea wahiakunu la hiadono ka idadi manga gogianongoru yahihupu manga musu manga kuahaino. De ma oraha gea naga o Isiraele ma nyawa womatengo ai romanga o Eli-meleke. Una de ngoi fekata de manga ngofa-ngofaka o Yehuda ai totoforauku abe yahiromanga o Efaraata ma nyawa angamoi manga kapongo gea ihira ihiromanga o Efaraata de ika-ika ihiromangoli o Beteleheeme. De ma oraha o Eli-meleke wogogere ma kapongoka gea ma romanga ma dekanokau o Beteleheeme. De ipaha manga tonakoka gea naga o hiwara duru ikiriakaholi hiadono idadi o hafini ho o Eli-meleke gea wato o hafini ma kangelaino wodokaowara. Ho o Beteleheeme wanoaka de una de ngoi fekata de manga ngofaka o nauru yahinooto wao. De ona yoiki ma gurutika angamoi o hiwara gea adaene o Isiraele ma tonaka ma hononga mata-mataika gea abe ihiromanga o Yehuda ma tonaka. Ho o Eli-meleke de ngoi fekata de ai ngofa-ngofaka yoiki hiadono o Isiraele ma tonaka ma batingi yatilakuroka de yogila-gila daku o Moaba ma tonakiye. De o Eli-meleke gea ngoi fekata ami romanga o ngo Tobasanangi abe nako to ona manga demo o ngo Naomi. De manga ngofaka o riaka ai romanga o Wotobapanyake de manga ngofaka o dodoto ai romanga o Wotobaona-ona. Ho ona o tau moi yomaturuuruoka ho hiadono yogogere o Moaba ma nyawa manga hidogoronaka.

³ Masara ma oraha ona yogogere o Moaba ma tonakoka gea de o ngo Tobasanangi mofao angamoi ami rokata o Eli-meleke gea wohonenge genangoka. Ho munangokahi de ami ngofaka yahinooto gea.

⁴ De ona ahao yomale manga feka-fekata o Moaba ma nyawaino. De o Wotobaona-ona gea ngoi fekata ami romanga o ngo Orpa de o Wotobapopanyake ngoi fekata ami romanga o ngo Ruutu. De ona yogogere o Moaba ma tonakoka gea ngade-ngade manga taongo ngimoi ma dekana.

⁵ De ahao imaketero hoka manga babali, o Wotobapanyake de o Wotobaona-ona gea onangoo yokokihonenge. Ho o ngo Naomi abe ami romanga ma titi motobasanangi naa muna duru mamao momatengoka ma titi ami rokata de ami ngofa-ngofaka yokokihonengoka.

O ngo Naomi molio o Beteleheemika de o ngo Ruutu mominiiki

⁶ De ipaha ahao naga o nyawa yoboa o Moabino de yoade-ade ato, “Ma Jou o Yawe duru ai nyawa waduhunoli doka o Yehuda ma tonakoka hiadono ma oraha naa o Isiraele ma nyawa genangoka manga inomo kohangoe abe hoka ma dihirali.” Ho ka de manga demo gea o ngo Naomi moihene de momaputuhu molio ami tonakika. Ho muna de ngomi hunungu, o ngo Ruutu de o ngo Orpa, yomahidiai la yoiki o Beteleheemika.

⁷ Ho yomahidiai ibooto de ahao o ngo Naomi de ngomi hunungu yahinooto gea manga ngi yanoaka de yoiki yaniiki o ngekomo abe ma dumutu o Yehuda ma tonakika.

⁸ Masara ona yahange gea yoiki ko manga gurutikauahi de o ngo Naomi duru mahininga ngomi hunungu gea hiadono mahibehehongo onangika, mato, “Ahi ngofaka, duru tonganono Ma Jou o Yawe ai dora itagi nginika. La gea Una wabalaha de ma owa ti ngini nia dora abe itagi nia roka-rokatika de ngohino abe duru nihitaana de nia duduhunu ngomino. Masara naa ngaro ufa nihiniikohi abe utuohi irahai nikokilio ti ngini nia me-memeika.

⁹ De ngaro Ma Jou o Yawe wosanangi winihigogilakoli la genangoka ngini niriidi de nia roka-rokatoli nigogere.” Hokogea o ngo Naomi mahibehehongo o ngo Ruutu de o ngo Orpaika. De ahao makokibounu onangika de ona duru yoari de manga huha ma ilingi.

¹⁰ De manga demo ka moi dika munangika, ato, “Meme, ufa hokogea nomihuloko ngomino angamoi ngomi mioigo mininiiki de hiadono to ngona ani dutuoka ngomioo migogere.” Hokogea manga dora itagi manga hunungika.

¹¹ Masara o ngo Naomi mafikiri done ko yamakeokaua manga rokata ho mahigaro onangika la yolio mato, “Ngohioo tamao hoka ngohi ora ngini, masara koaho ngini nikokilio. De angamoi nia roka-rokata ko iwa manga dodoto ho done ma titi o kia ho hiadono nihiniiki ngohi? Sarakia ngini niafikiri ngohi ka tamakeohi o ngofaka abe ona ka idadi ahao yodadi nia rokata?

¹² Ahi ngofaka, tomahilooa, masara ngohi tafikiri ihiperekioka de marai ko toilakokaua. Ho kiani ngini nilio dika! Abe ngaro ngohi tomahinganono ahi rokatika womatengoli tamake eko ngaro duru ma oraha naa de ahi rokata nagau de tomaidu unangoka de tamake o ngofa-ngofaka o nauru masara ngini ko niadaenua.

¹³ Sarakia, gea ngini ngaro hokogea tamake o ngofaka de ka idadi nimatongohono hiadono yobaluhiye la ona yodadi nia rokata? Marai koua, ahi ngofaka ko niadaenua la yodadi nia rokata. Ho sarakia, ngini niapoa ko niilakokaua ka hiadono nia wowango ma bahaika? De ahi ngofaka, ma oraha naa ngone igoungu hohuha ma, nako ngini de ngohi, gea ka ngohiohi ahi hininga ma huha angamoi tamao hoka Ma Jou o Yawe wohihohowono ngohino!”

¹⁴ Ka de o ngo Naomi ami demo gea yoihene de utuohi ilamokiye yoari. Masara ahao o ngo Orpa momibounu ngomi hunungika de momahilooa mato, “Nako hokogea, marai ngohi tolio ngohi memeika.” Masara o ngo Ruutu, muna duru o ngo Naomika momahigagaoika hiadono moluku momipidili.

¹⁵ Masara o ngo Naomi momiribuutu la munangoo molio, mato, “Abeika, ngoni opo muna naa mosobo molio ami dutuika, de ami popangaoika, ho irahai ngonaoo nominiiki la nimakiniiki nikokilio.” Hokogea o ngo Naomi momihuloko o ngo Ruutika.

¹⁶ Masara o ngo Ruutu momipaluhu, mato, “Meme, ufa nohiribuutu ngohino la tolio ahi poretoko, angamoi ngohi tato ngaro ka homahidohonenguku ngona de ngohi ma ko toninoaua. Ngohi toniniiki o kiaika dika ngona noiki! Ho gea ngohioo naga o kiaka dika ngona naika la hogogere o ngi moioka. Ho to ngona ani gogianongoru ahao yodadi to ngohioo ahi gogianongoru. De Ma Jou abe ngona nomahijou Unangika, ngohioo tomahijou Unangika dika.

¹⁷ De ngaro o kiaka ngona ahao nohonenge ngohioo genangoka toigo tohonenge la gea ihilungunu ani datekoka. Angamoi ngohi duru toluku ngone homakitingaka ho o honenge dika abe ka idadi inahikatingaka ngona de ngohi. Abe nako naga utu tohigunoa ahi wowangoka eko naga utu abe genangino hiadono inahikatingaka ngona de ngohi duru toluku hokogea idadi. De nako hokogea idadi gea ngohi duru togahoko la Ma Jou o Yawe wohihohowono ngohino.” Hokogea o ngo Ruutu ami dora ngomi hunungu o ngo Naomika.

¹⁸ Ho ka de o ngo Naomi moihene ami demoino gea de mohioriki o ngo Ruutu ami hininga, ho mato, “Nako nomaputuhoka nohiniiki de ko tonihulokokaua la nolio.”

¹⁹ Ho o ngo Orpa molio ho yomakitingaka de o ngo Naomi de o ngo Ruutu ho ona yahinooto dika yogila-gila hiadono yoboa o Beteleheeme ma kotaika. De ka de yomahiadonoka o Beteleheeme ma kotaka de o Beteleheeme ma nyawa duru yoheranga ma oraha imimake o ngo Naomi. De o ngo-ngofeka abe ma dihira imitobadodiawo munangika yomakokeleha ato, “Igoungu, naa muna o ngo Tobasanangi moboaka?”

²⁰ Masara o ngo Naomi mopaluhu mato, “Ufa ngini nihihiromangohi o ngo Tobasanangi, masara kiani nihihiromangoli o ngo Tobamali angamoi Una Wokokurutiye wohiaturu la o huha dika tamake hiadono ahi wowangoka ma mali dika.

²¹ Ma oraha ngomi o tau moi nenangoka misobo de ngohi tamao ko iwa ahi kuranga masara Ma Jou o Yawe ka de wohihigilio nenangino de ahi homoa dika. Ho done sarakia de ngini ka nihiahokohi o ngo Tobasanangi? Angamoi Ma Jou o Yawe wohiaturu la o kangela dika ihidaene. Abe Una Wokokurutiye wohiboa o rugi dika ma amoko ngohino.” Hokogea o ngo Naomi momahingahu ami dodiawoika.

²² Hokogea o ngo Naomi ami ade-ade o Moaba ma tonakoka de hiadono maino molio muna de ngomi hunungu o Moaba ma nyawa, o ngo Ruutu. De ona yomahiadono o Beteleheemino duru ma oraha o Beteleheeme ma nyawa yokokimulaenge manga gandumu youtuku manga redi-redioka de gea o gandumu ma gugutuku ma domoro.