Roma 9 - Ma Jou ai Demo-demo o Totobelohoka

O hitararono ma hidogo abe ma titi o pasala 9-11 O Pasala hiwo ma hitararono ma hidogo O Paulusu womahingahu ma titi ai hininga duru ihuha

¹ De naa moi toigo tomahingahu nginika ma titi ahi hininga ma huha, de gea duru tagou-goungu de ko tinielukua. De ahi demo naa duru tagoungu mangale ma titi ahi gogao o Kristusika. De ngaro ahi hininga ma goronaka masara gea Ma Jou o Womaha wohihihira-hira hiadono to ngohi ahi demoka de duru tagou-goungu abe ahi hininga ma huha naga.

² De naa ngohi tinihingahu nginika abe to ngohi ahi hiningaka de duru tohuha ma titi ahi gogianongoru o Yahudi ma nyawa ona ko manga ngoe iwioluku o Kristusika ho ahao manga hohowono yadaene onangika. Ho gea ma titi hiadono ngohi naa ka ihikaika ahi hiningaka hoka o hakara angamoi ahi hininga duru itagi onangika.

³ De tanu nako hoka ngohi ka idadi taturuuru ahi gogianongoru o Yahudi ma nyawa gea la to ona manga hohowono ihidaene ngohi naa, gea ngohi tosanangi dika todafongo. Abe ngaro ngohioli ihikatingaka o Kristusoka de aino la genangino de taduhunu ahi gogianongoru gea abe ngohi de ona mimahidutu moi o Yahudi ma nyawa, ma gea ngohi tosanangi todiai iti ufa ona manga hohowono yamake Ma Jouino.

⁴ De ngohi tagoungu tosanangi taduhunu hokogea ahi gogianongoruika nako hoka Ma Jou wohihigunoa ngohi todiai. De duru ahi hininga ihuha ma titi abe ona iwioluku o Kristusika. De hiokoo abe o Yahudi ma nyawa iwioluku o Kristusika, angamoi o Kristusino de tanu ka idadi yamake Ma Jou ai hiowa abe ka enangohi ikurutiye. De gea toheranga ona iwioluku, angamoi ma dihirainohi de naga yamakeoka to Una ai hiowa ma ngoe. Masara ngaro hokogea wahiowa ma dihiraino ma ka iwiolukohi Unangika. Abe nako ngomi o Yahudi ma nyawa, hokonaa ma hiowa ma ngoe abe ngomi miamakeoka Unangoka de aino. Abe ma hiowa ihira-hira, gea ma dodihirainohi de Ma Jou womiirikoka ngomi la midadi to Una ma hirete ai nyawa. De nagali abe Ma Jou womihidadi to Una ai ngofa-ngofaka. De abe ai medebini ma dararono womahimatoko ngomino. De abe Una ma dodihiraino de ai behehongo ma ngoe womihibehehongo ngomino. De abe ngaro to Una ai Pareta ma enangoo womihidoaka ngomino. De nagali Ma Jou womidotoko ngomi o Yahudi ma nyawaino abe hokokia mimahuba itiai Unangika, De nagali ai behehongo ma owa ma ngoe ngomino abe gea womihiowa ngomi to Una ai nyawaino.

⁵ De moioli ma hiowa abe ma dodihiraino to ngomi mia totofora gea de Ma Jou wairiki de wagoraka ona la manga romanga idadi ikurutiye, de onangino gea ngomi o Yahudi ma nyawa midadi. De ma utumu mata-mata gea ngomi miamakeoka Ma Jouino, masara hongoli abe ma titi to ngone nanga Duduhunu o Kristusu, abe Una Ma Jou wonahibehehongoka ngoneino, Una gea womaboa ngomi o Yahudi ma nyawaino. Abe Unangoo Ma Jou Wokokurutiye, ho gea itiai ngone hihigiriiri Unangika ka hiado-adonika. Amin. De ngaro ngomi o Yahudi ma nyawa Ma Jou duru womihiutumu hokogea ngomino, masara ahi gogianongoru manga ngoe o Yahudi ma nyawaka de ona gea ka iwiolukohi Unangika abe Ma Jou wihidingoto la waduhunu. Ho mangale ma titi ona iwioluku Unangika ho hiadono kiani ona gea ahao yamake Ma Jou ai hohowono onangika. De gea ena ma titi hiadono ngohi ahi hininga ihuha de hiadono tanu ngohi toigo taturuuru ona ahi gogianongoru o Yahudi ma nyawaka, la ka idadi to onangoo manga hohowono ko yamakeuali Ma Jouino.

Ngaro ma dodihiraino ka hiadono ma oraha naa masara Ma Jou ai ngekomo ko waturuurua

⁶ De naa moi toigo tinihitararono. Abe kangano tinihingahuoka abe ahi gogianongoru o Yahudi ma nyawa manga ngoe ahao yamake manga hohowono Ma Jouoka de aino. Masara iti ufa niataoko ihowono to ngohi ahi demo. Angamoi igoungu ma dodihiraino de naga Ma Jou ai behehongo ma owa o Yahudi ma nyawaika, masara ona manga ngoe ko yamakeuahi ai behehongo ma owa gea de ika-ika ahao yamake manga hohowono Unangino. Masara gea ko ma titiua abe to Ma Jou ai behehongo ma demo ai nyawaika ko wohingodumua. Angamoi abe igoungu Ma Jou duru wohingodumu ai behehongo ma demo, masara gea wohingodumu onangika dika abe waetongo wato to Una ai nyawa idodutu. Abe ahi demo ma titi hokonaa. Nako Ma Jou ai himangoka, ko o Yahudi ma nyawa mata-mataikaua abe Una waetongo wato to Una ai nyawa idodutu, masara ka manga hononga dika.

⁷ Abe ngaro ma dodihiraino ma oraha o Abarahaama de hokogea Ma Jou waetongo ai nyawa. Abe nako o Abarahaama ai totoforauku, onangoo ko mata-mataikaua abe Ma Jou waetongo wato to Una ai nyawa, masara ka manga hononga dika. De ka idadi hohioriki gea duru igoungu angamoi ma dodihirainohi de Ma Jou witemo ai behehongo ma demo o Abarahaamika wato, “De ahao o Isakino dika namake ani dano-danonguku abe tahiromanga ani totoforauku idodutu.” Hokogea itemo ma dodihiraino.

^8-9 De to Una ai demo gea ma titi nako o Abarahaama, abe igoungu una womamake ai ngofaka manga ngoe, de abe yowoe-woe manga boa biaha dika. Masara ai ngofaka ka womatengo dika abe womaboa ma titi Ma Jou ai behehongino abe wihibehehongoka o Abarahaamika wato ahao o ngofaka wihidoaka unangika. De abeika homahihohininga ma dodihiraino de Ma Jou wihibehehongo moi o Abarahaamika wato, “O taongo moi ipahaika de ahao Ngohi toboali tonitutumoli. De ma oraha gea de o ngo Sara ami ngofaka o nauru mamakeokau.” Hokogea Ma Jou wihibehehongoka de hokogea wohingodumu ai behehongo ma demo o Abarahaamika. De genangino itararono abe ka o Isaka dika abe womaboa to Ma Jou ai behehongino, ho una gea dika de ai totoforauku abe ona yamake ma hiowa duru ikurutiye Unangoka de aino.

¹⁰ De nagali ma ade-ade moioli abe utuohi inahitararono ngoneino ma titi Ma Jou ka idadi womaputuhu onagona dika abe wato wahiowa onangika. De gea ma ade-ade ma titi o ngo Ribeka ami ngofaka yahinooto abe yohago. De ngaro onangoo ma ko mata-mataikaua abe yodadi to Ma Jou ai ngofaka idodutu, angamoi gea kiani imakiniiki de Ma Jou ai hininga onangika. Abe ma oraha gea de nanga tofora o Isaka una de o ngo Ribeka yoilaka de ipahaino de muna de ami badangoka, abe ami ngofaka yohago naga ami pokoro ma goronaka.

^11-12 De ona yahinooto o Yakubu de o Esau ko yomaboauahi de nagau Ma Jou ai behehongo ma demo ma titi ona abe ai behehongo gea wotemo manga meme o ngo Ribekaika. De ai demoino gea de womihitararono ma titi ami ngofaka yahinooto gea manga totoforauku. De gea wohibehehongo wato, “Abe ani ngofaka o riaka to una ai totoforauku ona ahao yaleleani ani ngofaka o dodoto ai totoforauku.” Hokogea Ma Jou ai behehongo ma demo o ngo Ribekaika. De gea hadongoo ma oraha Ma Jou wohibehehongo de ona yahinooto ko yomaboauahi ho ko iwahi manga datoro ma rorahai ekola manga datoro ma dorou. De ma demoino gea de duru itararono abe Ma Jou ai hininga itagi o nyawaika ko ma titiua to ona manga datoro masara gea ma titi to Una dika ai hininga ma dumutu abe hokokia wahideeoka o nyawaika. De Una wohibehehongo hokogea ma titi ona yahinooto ho de ipahaino ahao idadi duru imaketero hoka wohibehehongoka.

¹³ De abeika naga to Ma Jou ai demo moioli abe wonahingahu de wonahitararono ma titi ona yahinooto gea. Abe wotemo wato, “Nako o Yakubu de ona abe yomahidutu moi de una, ona gea to Ngohi ahi hininga itagi onangika. Masara nako o Esau de to unangoli ai totoforauku, onangika ahi hininga ko itagiua.” Hokogea Ma Jou ai demo ma dodihiraino. De ai demo genanginoo de inahimatoko abe ma titi o kia hiadono o nyawa utu Ma Jou wahiowa onangika. De gea ma titi Ma Jou ai hiningaka dika hiadono o nyawa utu wahiowa, masara o nyawa utuoli naga abe to Una ai hiowa gea ikuranga yamake. De hokogenangoo ma oraha naa, abe ko o Yahudi ma nyawa mata-mataikaua abe Ma Jou ai hiningaka de womaputuhu la wahiowa onangika. Angamoi ma oraha naa de to Una ai putuhu la wahiowa onagonaika dika abe naga de manga ngongakuoka ai behehongo ma demoika. De mangale ma titi naga ngomi utu o Yahudi ma nyawa abe miongaku ai behehongo ma demoika gea de miamake to Una ai hiowa, ho gea iwihitaana abe wohingodumoka ai behehongo ma hiowa ngomi o Yahudi ma nyawaino! Abe ma hidoku naa ma timiuku de o Paulusu wahitararono onangika ma titi Ma Jou ai hiokoo ma dora de ai dongohono abe wahimatoko o nyawaika. Abe ma oraha o Yahudi ma nyawa yaoluku Ma Jou ai behehongika de tanu ka idadi ma oraha gea dika de Una wahohowono onangika. Angamoi Una wihidingoto o Kristusu onangika la wodadi manga Duduhunu masara ona gea ka iwioluku dika Unangika. Masara Una womatongohono dika de ko wahohowonuahi angamoi hokogea ai hininga ma putuhu. De ai dongohono gea duru imakiniiki de ma dodihiraino abe manga totofora o Yahudi ma nyawa iwitobalawana Unangika masara ko wahohowonuahi. De nagali ka imakadaene dika de ma oraha o Mesiiri manga koano o Firaunu de Ma Jou womatongohono abe ma oraha waoluku waniiki Ma Jou ai huhuloko unangika. Ho o Paulusu wahitararono o Roma ma nyawaika wato nako Ma Jou womaputuhu la wapake ai hiokoo ma doraino la ko wahohowonuahi o nyawaika abe yahowonoka Unangika, gea ka Unangoka dika ai putuhu, de ngone o nyawa ko idadiua hihigurubungu Unangika ma titi ai hininga ma dora.

O hitararono ma hidogo abe ma titi o ayata 14-29 naa ma timiuku Abe ma titi Ma Jou ai hiokoo ma dora de ai dongohono o nyawaika

¹⁴ De marai naga o nyawa yomaleha ma titi Ma Jou ai hiowa de ai hohowono o nyawaika ato, “De nako Ma Jou waetongo o nyawa utu dika wato to Una ai nyawa de wahiowa onangika, masara de o nyawa utuoli ka manga hohowono dika amake, gea done sarakia? Bote genangoka de Ma Jou ai hininga itorouoka angamoi gea wonairiki!” Masara nako ngohi, hokonaa ngohi topaluhu manga demoika gea. Abe ngohi tato nako Ma Jou duru ko iwa moi ai putuhu eko ai hininga abe ko itiaiua, masara gea mata-mata ka itotiai dika.

¹⁵ De abeika ngone hongano-nganonohi Ma Jou ai demo abe ma dodihiraino witemo o Musaika, wato, “Ngohi dika ma hirete abe tomaputuhu ma titi onagonaika abe ahi hiokoo itagi onangika la ufa manga hohowono yamake. De Ngohiokaoo ma putuhu abe ahi hininga ma hiokoo ma dora itagi onagonaika abe toigo la yamake ahi hiokoo ma dora manga wowangoka.” Hokogea Ma Jou ai demo ma dodihiraino.

¹⁶ De ai demoino gea de itararono abe o nyawa yamake Ma Jou ai hiokoo ko ma titiua ona ma hirete manga mauoka de aino. De ngaro o nyawa duru yomaribuutu la ato de manga karajaangino de Ma Jou ai hiowa yomamake la ufa manga hohowono yadaene onanguku, masara gea ko idadiua. Angamoi gea kiani Ma Jou ai hiningaka dika ma putuhu abe nako wahohowono o nyawaika ekola nako wapake de ai hiokoo ma doraino onangika. Ho ngaro ona abe ma oraha naa de yalawana to Una ai ngekomo, masara Una womaputuhoka wato wahiohi wahohowono ho gea ai hiokoo ma doraino ka wapakeohi onangika.

¹⁷ De abe ma titi Ma Jou wapake ai hiokoo ma dora o nyawa yahowo-howonika la ngarouahi de wahohowono, ai putuhu enangoo naga de ma titioka. Abe ma moi ma moi hokogea womatongohono la ka idadi o nyawa yamake to Una ai buturungu ma medebini. De hokogea idadi duru ma dekanoka abe Ma Jou ko wihohowonuahi o Mesiiri manga koanoika. Ho abeika, ngone ka idadi honganonohi Ma Jou ai Demo-demoino moi abe ma dodihiraino ihitulihukuoka. Abe genangoka de Ma Jou wotemo o Firaunika abe una gea o Mesiiroka manga koano. De gea Ma Jou wotemo wato, “De Ngohi naa tonigorakoka la nodadi o koano la ahao o nyawa ka idadi ihioriki to Ngohi ahi kuaha abe ma oraha tonihikala. Angamoi ngaro ngona naga de ani kuahaka ma amoko masara Ngohi ahao duru tonihikala ngonaika. De gea ma titi hiadono Ngohi tonigoraka ngona, la ahao ma oraha tonihikala de o dunia ma nyawa mata-mataika ihihioriki abe to Ngohi ahi kuaha duru de ma buturungoka hiadono ahi romanga yagorakiye de manga horomati.” Hokogea Ma Jou ai demo o Firaunika ma dodihiraino abe wohitararono ma titi o kia hiadono ko wihohowonuahi o Firaunika.

¹⁸ Ho ai demoino gea de hohioriki abe Ma Jou ka idadi waputuhu la o nyawa utuika wapake de ai hiokoo ma doraino, de nagaoo o nyawa utuoli abe Ma Jou wahitogowini to ona manga pea abe hoka o Firaunoli ai pea.

¹⁹ De marai naga utu abe nia hiningaka nihileha ngohino niato, “De nako Ma Jou ai hininga hokogea, gea done sarakia de ngone hakunu halawana to Una ai mauika? Angamoi nako ngone o nyawa, ko moiua ka idadi hohikala to Una ai mau abe ngoneino.” Marai hokogea nimatemo nia hiningaka.

²⁰ De nako nia hininga hokogea, marai ahao ngohi tinipaluhu hokonaa. Abe ngohi tato ngone o nyawa ko idadiua homademo Ma Jouika, angamoi ngone ka o nyawa dika, de ko iwa nanga kuaha to Una ai himangoka. Ho done sarakia to Una ai dulaada moi de iwileha Una wotobatulaadaika ato, “Ho Ngona adodoa ho nohitulaada hokonaa?” Gea duru ko itiaiua ma leleha gea! Angamoi nako hoka ngone hitaere Unangika abe wonatotulaada, gea imaketero hato to Una ai kuaha ngoneino gea ko iwa.

²¹ Masara abe igoungu naga to Una ai kuaha ngoneino imaketero hoka womatengo wotobadiai o ngi-ngi o tonakino una naga ai kuaha ma tonakika. De gea hohioriki abe ka idadi una gea wagoraka o tonaka ma doporonino de waregu hinooto abe hokokia adaene de to una ai hininga. Abe ma tonaka ma regu moiino gea ka idadi wodiai o boto eko o ngi abe to ena ma dumutu duru ihailoa. De bote ma tonaka ma regu moiinoli gea wohipake la o ngi ma rupa moioli wodiai abe to ena ma dumutu ikuranga ihailoa. Masara genangoka de una wotobadiai gea una ko wahowonua angamoi una naga de ai kuahaka ma tonakika la ka idadi wodiai hokokia dika adaene de to una ai hininga. Ho duru ko idadiua ma tonaka gea iwihigurubungu una wotobadiaika!

²² De hokogenangoo Ma Jou naga de ai kuahaka ngoneino naa abe wonatulaadauku. Abe naga to Una ai kuaha la wonahohowono dika eko la womatongohono. De igoungu abe Ma Jou kiani wahohowono onangika yahowo-howono, ho naga ai hidee la ahao wonahimatoko ai hininga ma ngamo o howonika. Masara ma oraha naa de hamakeoka abe Una womaputuhu la ai hininga ma dongohono wonahimatokohi ngoneino. Abe mangale ma titi ai hininga ma hiokoo ma dora ma amoko ho Una ka womatongohonohi de ko wahohowonuahi ona yahowo-howonika. De gea ma putuhu ka Unangoka dika, ho ngone naa duru ko idadiua hihigurubungu Unangika ma titi ai dongohono gea!

²³ De abe womatongohono de ko wahohowonuahi, ai dongohonino gea de naga moioli ai hininga ma dumutu. Abe Una woigo womahimatoko to Una ai medebini ma dararono abe duru kohaamoko o nyawaika. De gea ma dihirainohi de nagau ai hidee la o nyawa waduhunu ai hiokoo ma doraka de aino. De ahao ona gea abe Ma Jou waduhunu, to ona manga wowangoino de Una womaputuhu la womahimatoko ai medebini ma dararono la mata-mataika ka idadi yamake ai medebini gea.

²⁴ De o nyawa gea abe ma dihirainohi de wahidiaioka la Ma Jou ai medebini ma dararono yamake manga wowangoino, gea tanu ngone naa abe wonaahokoka Unangino. Abe ko ma titiua ngomi o Yahudi ma nyawa dika womiahoko, masara nginioo winiahoko abe ngini ko o Yahudi ma nyawainoua. Ho nako Ma Jou womaputuhu la winiahoko abe ko o Yahudi ma nyawaua la nginioo niamake ma hiowa Unangoka de aino, de done o nyawa onagona ka idadi iwitaere Unangika?

²⁵ De abe ma titi Ma Jou winiduhunu abe ngini ko o Yahudi ma nyawaua, gea ngaro ufa de hoheranga angamoi ma dodihirainohi de nagau Ma Jou ai hininga la winiahoko Unangino. Abeika homafikirohi to Una ai demo abe ma dodihiraino de ai uru ma dodofanga o Hosea wohitulihukuoka. Abe genangoka de Ma Jou wotemo ma titi abe ko o Yahudi ma nyawaua wato, “Abe ma oraha naa de naga o nyawa abe ko taetonguahi to Ngohi ahi nyawa. Masara ahao nako ma oraha adonoka de ahao tahiromangoli o nyawaika gea tato ona to Ngohi ahi nyawa. De o nyawa gea abe ko tahimatokuahi ahi hiokoo ma dora onangika ma oraha naa. Masara ahao ahi hiokoo ma dora itagi onangika.” Hokogea itemo ma dihiraino, de hokogea abe idadioka ma oraha naa, abe ngini ko o Yahudi ma nyawaua de winietongoka wato ngini nidadioka to Una ai nyawa!

²⁶ De naga moioli ai demo abe ma titi ngini ko o Yahudi ma nyawaua. Abe Ma Jou ma dodihiraino wotemo wato, “De ma dihiraino de igoungu doka manga tonakoka tahiromanga onangika tato ona ko to Ngohiua ahi nyawa. Masara ngaro to ona manga tonakoka gea abe tahiromanga onangika tato ko to Ngohiua ahi nyawa, masara ahao duru genangokaoo de tahiromangoli onangika tato ona to Ngohi Ma Jou totobawango ahi ngofa-ngofaka idodutu.” De hokogea Ma Jou ai demo ma dodihiraino abe ma titi ngini ko o Yahudi ma nyawaua, ho naa ma oraha adonoka abe winihiromangoli to Una ai nyawa!

²⁷ De abe ma titi ngini o Yahudi ma nyawa, tinihingahu nginika abe tanu ngaro ufa dika de niheranga abe ma titi ngini niamake Ma Jou ai hohowono nginika. Angamoi abeika o Yesaya ai demo abe una wohiboa-boaka ma dodihiraino de ai demo gea ma hidumutu ngone o Yahudi ma nyawaino. De ai demo ma goronaka de wonahitaana ngoneino abe ma titi o kia hiadono ko howoeua abe Ma Jou wonaduhunu nanga howonino. De gea o Yesaya wotemo de duru wohiree-reeika wato, “Ngaro o Yahudi ma nyawa duru ko manga ngoe abe gea yomaketero hoka o dowongi ma mui ma ngoe o gahi ma ngigorino, masara ahao yamake manga hohowono Ma Jouoka de aino hiadono ona gea duru ko yowoeokaua. De Una wahohowono ipahaino de ka manga huhutulokahi abe Ma Jou waduhunu manga howo-howonino.

²⁸ De hongoli manga hohowono gea duru itaiti yadaene onanguku. Angamoi ahao kiani idadi abe imaketero hoka ma dodihiraino Ma Jou wohibehehongoka ma titi o dunia ma hohowono. Abe Una wato ahao duru itaiti de duru wohingodumu abe Una wahohowono o duniaika.” Hokogea o Yesaya ai demo ma dodihiraino. Ho ngone o Yahudi ma nyawa ufa hoheranga ma titi Ma Jou ai hidee la wonahohowono ngoneino, angamoi gea ma dodihiraino de wonahingahuoka ai Demo-demoino.

²⁹ De naga moioli Ma Jou ai demo abe ma dodihirainohi de o Yesaya wohitulihuku wato, “Nako Ma Jou Una gea duru wokokurutiye o Horogaka. Ho tanu naga ai kuaha abe Una wonahohowono ngone mata-mata o Yahudi ma nyawa ma titi nanga howono Unangika, abe imaketero hoka ma dodihiraino o Sodomo de o Gomora ma nyawa ona mata-mataika Una wahiofioka. Masara to Una ai hininga la ngone utu wonatingaka la to Una ai hohowono ko inadaenua ngoneuku, done ngoneoo hohotumu de done imaketero hoka o Sodomo de o Gomora ma nyawali ho ngone ko inaiwaka.” De hokogea o Yesaya ai demo abe ma titi Ma Jou ai hohowono ngone o Yahudi ma nyawaino.

O Yahudi ma nyawa yoluku yangaku o Abari ma Rorahaiika

³⁰ De naa ka idadi tohidotoomuino ahi demo abe kangano, la ka idadi hataoko itiai ma titi o kia hiadono to ngohi ahi gogianongoru o Yahudi ma nyawa de yamake manga hohowono. Angamoi ma dodihiraino de ona yahiromanga Ma Jou ai nyawa ho done sarakia ma bahauku de waporete onangika? De hokogenangoo, done sarakia hiadono ngini ko o Yahudi ma nyawaua de niamake Ma Jou ai behehongo ma owa abe ma dodihiraino de Una womihibehehongo ngomi o Yahudi ma nyawaino? Ho naa tinihitararono tato nako ngini abe ko o Yahudi ma nyawaua, abe ma dodihiraino de tanu ngini ko nipusingua de ko nimaribuutua la niolingiri de nimamake Ma Jou ai totiai ti ngini nia wowangoka. De ngaro ngini hokogea, masara ma bahauku de Ma Jou winihitotiaioka ma titi nia ngongaku o Kristusu ai datorika.

³¹ Masara nako ngomi abe o Yahudi ma nyawa, ngomi naa ma dodihirainohi de ka ihikaika mimaribuutu la mianiiki Ma Jou ai Paretaika angamoi miato bote genangino de Ma Jou womihitotiai. Masara ngomi naa ma bahauku de ko womihitotiaiua genangino.

³² De gea marai irahai ngone homaleha hato, “Adodoa ho o Yahudi ma nyawa ko yamakeua Ma Jou ai totiai nako ena gea ato duru yoigo yamake?” De gea ma titi o Yahudi ma nyawa yomahinganono manga datoro ma rorahaiika dika abe ma titi o Pareta yanii-niiki, de gea ko ihititiua o ngongaku manga hiningaka. De gea ma titi hiadono ka idadi hahiromanga onangika hato ona yomaketero hoka yopeleke de yorubaka o bebeleke ma hakaruoka, abe o Kristusu ai hohonenge ena gea idadi manga bebeleke onangika angamoi gea ena ko yodafongua. Abe ona yotemo ma titi o Kristusu ato, “Una gea womahiromanga Ma Jou ai Ngofaka, masara ngone naa duru ko idadiua hodafongo ai demo gea! Ho ngone naa hioluku dika Unangika!” De manga demoino gea hiadono yopeleke de yorubaka.

³³ Masara gea ma dodihiraino de Ma Jou wahitiariokau o Yahudi ma nyawaika ma titi ena gea, abe to Una ai Demo-demoka de Una wotemo wato, “Abeika Ngohi naa tikelenga womatengo o Yerusaleeme ma kotaka, de onagona dika iwingaku Unangika, ona gea manga hininga duru ko ietekua ma titi Una angamoi ona ahao yamake ahi totiai Ngohioka de aino. Masara abe onagona dika ko iwingakua de ona manga hininga ieteke womatengoika gea de hiadono yoruba Unangoka. Abe ma titi Una hoka o hakaru moi abe Ngohi takelenga genangoka. De Una wodadi o bebeleke o nyawaika gea hiadono yopeleke enangika de yoruba. Ho ona gea yoruba Unangoka gea abe Ngohi ma hirete tikelenga.” Hokogea Ma Jou ai demo ma dodihiraino abe ma titi o Kristusu. De gea ngohi tato hiokoo angamoi o Yahudi ma nyawa ko iwingakua Unangika.