Roma 8 - Ma Jou ai Demo-demo o Totobelohoka

Abe ma titi nanga wowango hokokia nako hitobaniiki Ma Jou o Womahika

¹ Ho naa itararonoka abe onagona dika naga o Yesusu Kristusoka, ona gea ko yamakeokauali manga hohowono Ma Jouino.

² Angamoi ngaro o howono ma kuaha de ngaro o hone-honengoo ma kuaha ma ena gea ko inahiparetakaua ngoneino. De mangale ma titi wonahihoheoka ma kuaha hinootoino gea ho ngaro ufa dika de Ma Jou wonahohowono ngoneino. De hokokia idadi hiadono Ma Jou wonahihoheoka genangino? De gea ma titi Ma Jou o Womaha wonahidoaka ngoneino o wowango ma hiaturu abe ma hungioli. De o wowango ma hungi Ma Jou o Womahoka de aino, gea inahihupuoka nanga wowango ihira-hiraka de aino ho ngaro ufa dika de haniikohi o howono de o hone-honenge ma ngekomika.

^3-4 De ngone hohioriki abe Ma Jou ai hininga ngoneino gea la ngone howango hototiai to Una ai himangoka. Masara ngaro to Una ai Pareta wonahidoaka masara ngone ko hakunua haniiki enangika ma titi nanga badanga imanoa o howono ma kuahaka. Ho ai Pareta gea tanu ko inaduhunua la howango hototiai. De gea ma titi hiadono Ma Jou Una ma hirete wonaduhunu ma titi ai Ngofakino. Abe Una wihidingoto to Una ma hirete ai Ngofaka ngone o nyawauku de wihidoaka la to Una ai badanga ma rupa imaketero abe hoka to ngone o nyawali nanga badanga ma rupa. Masara naga moi abe duru imakohowono. Abe to ngone nanga badanga gea imanoa o howono ma kuahaka, masara to Una ai badangoka gea de ko iwa o howono Unangoka. De gea Ma Jou wihidingoto ai Ngofaka gea ngoneuku la wohibinaaha o howono ma kuaha to ngone nanga bada-badangoka. Ho mangale ma titi to Una ai Ngofakino de Ma Jou wohikalaka o howono ma kuaha ngoneoka. De hokogea wodiai angamoi ma dodihirainohi de Ma Jou ai hidee nagau la wato ngone howango hototiai abe nanga datoro duru imakiniiki de abe to Una ai Pareta ma demo ma goronaka. Ho naa ngone onagona dika abe ngone ko haniikokaua nanga badanga ma hafini ma dorouika de hinii-niikoli Ma Jou o Womahika, gea ngone abe ka idadi howango hototiai to Una ai himangoka. De gea mangale ma titi Ma Jou o Womaha ai karajaangino hiadono ngone ko hamakeokauali nanga hohowono Ma Jouino.

^5-6 Ho igoungu abe nako nanga wowangoka de hapake Ma Jou o Womaha ai kuahaino, gea nanga hininga ka ihikaika itagi to Una ai mauika. De nako hokogea nanga hininga itagi Unangika, de ahao nanga wowango duru irahai abe ma titi imakiniiki de Ma Jou ai mau, de ka idadi nanga hininga duru iriidi Unangoka. Masara nako o nyawa abe ka yaniikohi manga badanga ma hafini ma dorouika, ona gea manga hininga de manga wowango duru imakohowono. Abe ona manga hiningaka de ka ihikaika yongano-nganono manga hafini ma dorou. De ahao ona gea ka o hone-honenge dika yamake abe yomakitingaka Ma Jouoka de aino.

⁷ De gea ona abe manga hiningaka aomanga de manga badanga ma hafini ma dorou, ona gea tanu iwimusu Ma Jouika. De to ona manga hiningaka de ko iwa manga hingounu Ma Jou ai Paretaika, ho hongoli yaniiki enangika gea duru ko yakunua.

⁸ Ho ona abe ka yaniikohi manga howono ma kuahaika abe imanoa manga bada-badangoka, ona gea duru ko yakunua iwihisanangi Ma Jouika.

⁹ Masara ngini naa hokogenangua. Abe ngini ko inihiparetakaua de o howono abe ngaro imanoa nia badangoka, masara naa ngini ka niakunu nianiikoli Ma Jou o Womaha ai hiningaika. De gea ka idadi niwiniiki angamoi ma oraha naa de Ma Jou o Womaha Una wogogere nginioka. De abe nako o nyawa abe o Kristusu ai Womaha ko iwiwa onangoka, ona gea duru ko o Kristusua ai nyawa, angamoi ngone hohiorikoka abe o Kristusu ai nyawa homoi-homoiika yaborimakeoka Ma Jou o Womaha manga hiningaka.

¹⁰ Ho mangale ma titi Ma Jou o Womaha wogogere nginioka ho ka idadi nianiiki to Una ai hininga de nialawana o howonika la niwango nitotiai. De naga moioli nia utumu ma titi abe o Kristusu Una naga nginioka, de gea ngini niamake o wowango ka hiado-adonika! Ho ngaro nia badanga ahao ihonenge ma titi o howonino, masara nako nia womaha gea ka ihikaika iwango ma titi Ma Jou winihitotiaioka.

¹¹ De gea igoungu abe nia badanga ahao iborihonenge, masara ipahaino de ahao Ma Jou ti ngini nia badanga gea wohimomikoli nia honengino. Angamoi ngini mata-mata de naga Ma Jou o Womaha ngini homoi-homoioka. De gea ngone hohioriki abe ma dihiraino de Ma Jou o Womaha Una gea wihimomiki o Yesusu ai honengino. Ho mangale ma titi Ma Jou o Womaha naga womanoa ngini homoi-homoioka ho ka idadi nihioriki abe ngaro ahao nia badanga naa iborihonenge masara ahao Ma Jou winihimomiki nginioo ma titi to Una ai Womahino abe imaketero hoka o Yesusoli wihimomikoka ai honengino.

¹² Ho ahi gogianongoru, mangale ma titi ma oraha naa de o howono ma kuaha ko inahiparetakaua ngoneino, ho ufa hamao nanga hiningaka abe kiani hanii-niikohi o howonika gea abe naga nanga badangoka. Angamoi ngone naa Ma Jou duru wonahihoheoka nanga howono ma kuahaino, ho tanu Unangikali abe koaho ngone hinii-niiki. Ho ngini ufa o howonika nianiiki nia wowangoka.

¹³ Angamoi nako o nyawa de manga wowango ma goronaka de yanii-niiki manga badanga ma hafini ma dorouika, gea ahao manga wowango hoka ihonengoka angamoi gea ka yomakitingaka Ma Jouoka de aino. Masara Ma Jou o Womaha wonahiakunu la ka idadi nanga badanga ma datoro ma dorou gea hatingakika! De nako nanga datoro gea hatingakika, gea ahao nanga wowango duru irorahai angamoi imakiniiki de Ma Jou ai mau.

¹⁴ De marai ngone hohiorikoka abe Ma Jou ai ngofa-ngofaka dika abe ka idadi yowango hokogea, angamoi ka ona dika abe Ma Jou o Womaha wahihira-hira onangika. Ho naa ngohi duru tonahigaro de tonahibehehongo la nanga wowangoino de ka ihikaika hokogea haniiki.

¹⁵ De gea igoungu abe ngone naa hodadioka to Una ai ngofa-ngofaka. De tanu ngone homoi-homoi nanga hiningaka de hohioriki abe ai ngofa-ngofaka hodadioka angamoi Ma Jou o Womaha hiborimakeoka nanga kokihiningaka. Angamoi abeika homatailako to ngone nanga hiningaka. Abe ma dihiraino de ngone himodongo Ma Jouika abe imaketero hoka o gilaongo womatengo wimodongo ai dutuika. Masara ma oraha naa de nanga modongo Ma Jouika ko iwaka ngoneoka angamoi Ma Jou o Womaha wokarajaanga nanga hiningaka la ka idadi ngone duru hohioriki abe Ma Jou Una gea wodadioka nanga Baba. De hiadono ngone ma oraha hitemo Unangiye de hobaba Unangika de nanga hininga de ma dora.

¹⁶ Ho ngaro Ma Jou o Womaha eko ngaro to ngone nanga womaha, masara gea mata-mata imakiniiki de inahingahu ma titi ngone naa hodadioka Ma Jou ai ngofa-ngofaka idodutu.

¹⁷ De mangale ma titi ngone to Una ai ngofa-ngofaka ho ngoneoo ahao kiani hamake nanga oara abe nanga Babaka de aino. De ngone ahao hamake nanga oara nanga Babaino gea duru imaketero abe hoka o Kristusoli ai oara wamake, ho gea ngone de Una ahao hakokimake nanga oara Ma Jouino. Masara igoungu abe ma oraha naa de kiani o kangela inadaene ngoneuku abe imaketero hoka Unangoli ma dihiraino o duniaka naa de iwihikangelaka. De ngaro ma oraha naa de inahikangela masara ahao naga ma hofoko ma rorahai hamake genangino. Abe ma oraha adonoka de ahao Ma Jou wonahikokodoku ngoneino to Una ai medebini ma dararono abe imaketero hoka o Kristusikali wihikodokuoka ai medebini ma dararono. De gea mata-mata abe hamake ma titi nanga gogao o Kristusika, gea inahitaana abe ngone hodadioka to Ma Jou ai ngofa-ngofaka, ho duru itararono abe ngone ahao hamake nanga oara Unangoka de aino. Ho mangale ma titi nanga gogere ma hohailoa Unangoka hiadono ngohi tato koaho hatobaniiki abe hokokia Ma Jou o Womaha wonahihira-hira nanga wowangoka.

Abe ma titi ahao Ma Jou wonahikodoku to Una ai medebini ma dararono ngone ai ngofa-ngofakino

¹⁸ De igoungu abe o duniaka naa de ngone o kangela duru ma ngoe haohana, de tanu ma ngoeokau inahikangelaka. Masara nako ngohi tohidotelega nanga kangela ma oraha naa de nanga medebini ma dararono abe ahao dokengika de Ma Jou wonahikodoku ngoneino, de gea ngohi tato nanga kangela naa ngade-ngade ko kia-kiaua. Angamoi nanga medebini ma dararono ma oraha gea ahao duru ihohailoa.

¹⁹ De ngaro Ma Jou ai dulaada mata-mataika ma ena gea ihiorikoka abe ahao dokengika de ngone Ma Jou ai ngofa-ngofaka naga de nanga medebini ma dararonoka. Ho ai dulaada mata-mata gea duru yoigo de yonganono la yolega-lega abe ma oraha Ma Jou wonahikodoku ngoneino nanga medebini ma dararono gea.

^20-21 De Ma Jou ai dulaada gea duru yoigo inalega-lega ngone ma oraha gea angamoi ena yonganono ato marai ma oraha genangoo de Ma Jou wohibobaha ai dulaada mata-mataika ma kangela, la ibootohi o hone-honenge ilaku ai dulaadoka. Abe ma dodihiraka de naga Ma Jou ai hidee ma rahai ai dulaadaika, masara mangale ma titi ngone o nyawa nanga howono hiadono o hohowono adaene ai dulaada mata-mataika hiadono naga ma kangela adaene enangika. De gea ko ma dulaada ma hiningaua abe yoigo ma hohowono adaene, de ena ko yoigoua la o hone-honenge ilaku to ena ma hidogoronaka. Masara hokogea idadi ai dulaadaika ma titi Ma Jou ai hohowono abe ngone o nyawa nanga howonino de ka ma moi ihidotadaene enangikaoo. Ho ma oraha naa de Ma Jou ai dulaada ka yonganonohi abe ahao ma oraha Una wonahikodoku ngone Ma Jou ai ngofa-ngofakino to Una ai medebini ma dararono, de ma oraha genangoo de Una wagorakoka ma hohowono ai dulaadaino la o hone-honenge ko ihiparetakaua enangika. Abe ka de ma hohowono gea agorakoka ai dulaadoka de aino de ena gea duru yamao abe yahoheoka ma rorahaiika ho duru igogarago. De gea ma titi hiadono ai dulaada mata-mataika duru yoigo de yonganono la ma oraha adonoka abe Ma Jou wonahikodoku ai medebini ma dararono ngoneino.

²² Masara ma oraha naa de ngone ka honganonohi abe ahao idadi hokogea ngoneino. De ngone hohioriki abe ma dodihirainohi ka hiadono ma oraha naa de ai dulaada hoka duru yamao ikangela ma titi ma hohowono abe adaenoka. Abe ngade-ngade imaketero hoka o ngofeka momatengo abe itigioka momagerewoto ho mamao ami odiri duru ikiria hiadono mohigururihi, hokogenangoo ai dulaada mata-mataika hoka ihigururihi ma titi ma hininga de ma kangelaka abe ena yoigo ato ma kangela Ma Jou wagorakoka la ma rorahaioli amakeoka.

²³ De ka ai dulaadaua dika abe hoka ihigururihi, masara tanu ngoneoo nanga hininga ma goronaka de hoka hohigururihi angamoi ngoneoka nagahi nanga badanga naa abe ko itongohonua. De nagali abe ngone hohigururihi ma titi duru hoigo de hododamaa la Una waturuuru nanga badanga naa la ngone hoahumu hodadi to Una ai ngofa-ngofaka idodutu. De gea duru hohioriki ahao idadi ngoneino, angamoi Ma Jou o Womaha nagau ngoneoka. Abe Una wodadi hoka Ma Jou ai hidoaka ma domoro ngoneino, angamoi ahao ka Unangua dika abe naga ngoneoka masara naga utuoli ma hiowa hamake Ma Jouoka. De Una Ma Jou o Womaha ka ihikaika wonahihohininga la duru hohioriki abe ahao Ma Jou wonahidoaka ngoneino nanga hiowa ma gahumu. Ho mangale ma titi Una wihidoaka Ma Jou o Womaha ngoneino de gea ka idadi hohioriki abe ai behehongo ma owa utuoli, enangoo ahao wonahidoaka ngoneino. De gea ma utumu hamake Ma Jouino ma oraha wonahihupu nanga badangoka de aino la nanga badanga ma hungioli wonahidoaka abe imaketero hoka wonahibehehongoka. Abe ma oraha gea de ahao wonagoraka la duru itararono abe ngone naa hagou-goungu hodadioka to Una ai ngofa-ngofaka idodutu. De gea ena abe ngone naa duru hongano-nganono de hododamaa, de ka idadi duru hohioriki abe ahao hamake gea mata-mata Unangoka de aino. Angamoi abe kangano ngohi tafetongo tato Ma Jou ai medebini ma dararono wonahikodoku ngoneino, ai hiowa ma hohailoa mata-mata naa de ka ma moi tohidefetongo ai medebini ma dararono abe wonahikodoku. Ho gea mata-mata ahao Una wonahidoaka ngoneino.

²⁴ De ngaro ma dihirainohi abe ma oraha Ma Jou wonaduhunu ngone homoi-homoi nanga howo-howonino, masara genangoka de aino de ngone ka ihikaika hongano-nganono abe ma titi ahao nanga badanga ma hungi de nanga medebini ma dararono wonahikokodoku ngone homoi-homoiino. De gea ena ka idadi hohiromanga hato nanga nganganono angamoi gea ko hamakeuahi ho ka hongano-nganonohi. Angamoi nako naga o wani moi abe hamakeoka, gea ko idadiokaua hohiromanga enangika hato nanga nganganono angamoi gea idadioka, ho ko honganonokaua enangika.

²⁵ Masara mangale ma titi ngone nagahi nanga nganganono abe ka hododamaaohi de honganonohi abe ahao iboa, gea hododamaa de nanga hininga de ma dongohonoka abe duru hoigo hato irahai nako ena gea iboaka.

²⁶ Masara abe ma oraha naa de nagahi nanga kangela haohana. De abe nanga kangela ma goronaka de igoungu nanga nganganono inaduhunu la ka idadi naga nanga dongohono. De imaketero hoka nanga nganganono inaduhunu, hokogenangoo Ma Jou o Womaha Una wonaduhunu ngone nanga hiningaka abe ma oraha homaniata. Angamoi nako ka to ngone dika nanga hininga ma buturungu gea ko ilamokua. Ho Una woboaino nanga date-datekino de Unangoo womahimoku to ngone nanga gina la ma dubuho ikuranga ngoneoka. Abe ngaro homaniata masara ngone ko hohiorikua abe tanu hokokia homaniata la nanga niniata duru itaana de Ma Jou ai hininga. Ho nanga niniatoka gea de Ma Jou o Womaha Una ma hirete wonagahoko Ma Jou ai duduhunu ma titi ngone, hiadono Unangoo hoka wohigururihi angamoi ko iwa ma betongo abe imakiniiki de to Una ai niniata ma demo gea.

²⁷ De ngaro hokogea masara Ma Jou ka idadi wataoko itiai Ma Jou o Womaha ai niniata ma demo mata-mataika. Abe Ma Jou Una wonahioriki to ngone nanga hininga mata-mata, de wohiorikoo Ma Jou o Womaha ai hininga. Ho duru wohioriki itararono nanga gogahoko de nanga niniata angamoi Ma Jou o Womaha wadofanga nanga niniata ma demo Ma Jouika, de gea to Una ai demo ka ihikaika imakiniiki de to Ma Jou ai mau, ho gea tanu ko ihuhaua la Ma Jou wataoko itararono ai demoino. Ho ngone duru houtumu abe Ma Jou o Womaha wonaduhunu nanga niniatino abe ma oraha naa ngone naga nanga kangela ma goronaka.

²⁸ De nagali ma titi moioli abe duru inaduhunu ma oraha naa abe ka hongano-nganonohi nanga utumu. De gea ngone hohioriki abe Ma Jou wohikokiaturu mata-mataika abe idadi nanga boriwowangoka la genangino de idadi ma rorahai ngoneino. De gea igoungu abe ngone onagona dika hidora Ma Jouika de Una wohikaaturu la ngone hamake ma rorahai Unangoka de aino. De Una wonaduhunu hokogea ngoneino angamoi ma dodihiraino de wonaahokoka Unangino la wato to ngone nanga wowango imakiniiki de to Unangoli ai hininga ma dumutu.

^29-30 De abe Ma Jou ai hininga ma dumutu ma titi ngone, gea woigo wato ngone homoi-homoi nanga hiningaka de hodadioka abe duru homaketero hoka to Una ai Ngofakoli o Yesusu ai hininga. De nako Ma Jou, Una ma dodihirainohi de wonahiorikokau abe ngone onagona honanga ahao hodadi to Una ai nyawa. Ho ngone abe wonahiorikoka abe ahao hodadi to Una ai nyawa, ngone naa wonaahoko Unangino. De ngone ko ma titiua wonaahoko dika, masara Unangoo wonaetongo ngoneino wato hototiai ai himangoka. De ka hokogenangua dika, masara nagahi abe wonahibehehongoka ngoneino wato ahao to Una ai medebini ma dararono wonahikokodoku ngone homoi-homoiino la ngone ahao hodadi homaketero abe hoka ai Ngofakoli. Ho gea mata-mata Ma Jou wonahidiai ngoneino angamoi imakiniiki de ai hininga ma dumutu la wato ngoneoo abe hodadioka to Una ai ngofa-ngofaka, gea ngone ahao duru homaketero de o Yesusoli. Abe o Yesusu Una gea wodadi hoka Ma Jou ai Ngofaka duru ma riaka, de ngoneoli naa hodadi hoka to Una ai doo-dodoto duru ko nanga ngoe. Ho gea ma titi hiadono Ma Jou wohiaturu mata-mataika la gea imakiniiki de to Una ai hininga ma dumutu ma titi ngone ai ngofa-ngofaka. Ho ahi demoino gea de duru ka idadi hohioriki abe ngaro ma oraha naa naga inahikangela masara hohiorikoo abe ahao dokengika de to Una ai medebini ma dararono wonahikokodoku ngoneino.

Moioo de ko iwa abe ka idadi inahikatingaka Ma Jou ai doraka de aino

³¹ De naa abeika honganonoli abe ma titi Ma Jou ai duduhunu kohaamoko de kohangoe abe ngoneino. De ai duduhunu gea mata-mata duru itaana abe Una ai hiningaka de duru wosanangi wonaduhunu ngone naa. De naa tonaleha, nako Ma Jou Una ma hirete wonatobaduhunu de ai hiowa gea mata-mata, done ka onagona yakunu inalawana de hiadono inahikala?

³² De ngone ka idadi hohioriki abe Ma Jou Una duru ko womadumungua ma utumu eko ma duduhunu o kia dika ngoneino abe gea ena hoperelu la howango Unangika. De gea hohioriki abe Una ko womadumungua angamoi barikua to Una ma hirete ai Ngofaka ma ko womadumungua. Masara ai Ngofaka gea wahidoakika o nyawaika la iwihohonenge la wonaturuuru ngone mata-mata. Ho nako ai Ngofaka de ko womadumungua, gea iwihitaanoka abe o duduhunu eko ma utumu utuinoli o kia dika ma wosanangi la genangoo ka wonahidoaka dika ngoneino.

^33-34 De nagali ai duduhunu ma utumu moioli, abe Una wonahidoaka la ahao ma bahauku de nanga hohowono ko inadaenokauali ngoneino. Ho ibootohi ngone hohawana ma titi Ma Jou ahao wonahohowono. Abe ngaro naga o nyawa eko o kia dika abe inatae ngoneino masara manga demo gea ko ilakua Ma Jou ai himangoka. Abe ma titi nako yoboa Ma Jouino la inatae de inakalaki ato, “Ona naa manga howono hokonaa de hokonaa ho kiani Ngona nahohowono onangika!” Masara ngaro hokogea inatae ngoneino masara Una ko wonahohowonua angamoi Una ma hirete wonahitotiaioka ho nanga howono wakokiofioka. De nako hiadono Una wonahitotiaioka, gea moioo de ko iwa abe akunu iwihigaro Unangika la ka wonahohowonohi! De gea Ma Jou ko wonahohowonokaua angamoi o Yesusu Kristusu Una wohonengoka la wonabangu ma titi to ngone nanga howo-howono. De hongoli Una iwihimomikoka ai honengino de wogorakiyeoka, ho ka idadi hohioriki abe Ma Jou duru wadafongo ai huhuba gea ma titi ngone la nanga hohowono aofioka. De Una wogorakiye ho ma oraha naa de wogogere ai kuaha ma ngioka abe Ma Jou ai nirakoka la wonahidemo Ma Jouika ma titi ngone. Ho nako naga abe yoboa Ma Jouino de inatae ngoneino de o Yesusu Kristusu ka idadi wonademo ai Babaika wato, “Ngaro ufa de nahohowono onangika angamoi Ngohi tomahimokuoka manga hohowono ho naa duru ko iwaka.” Hokogea ai demo ai Babaika ma titi ngone. Ho mangale ma titi Ma Jou wonahitotiaioka ma titi o Yesusu Kristusu ai datorino de wonaetongo ngone ai nyawa duru ma hohailoa, ho ngaro hokokia inatae ngoneino masara ko hamakeokaua o hohowono Ma Jouoka de aino.

³⁵ Ho naa done onagona eko done o kia naga abe ka idadi inahikatingaka o Kristusu ai doraka de aino? Moioo de ko iwa! Abe ngaro o kangela naga haohana eko naga nanga hininga ma huha eko ngaro o nyawa inahikangela ngoneino, masara o Kristusu ai dora gea ka itagiohi ka ihikaika ngoneino. De ngaro ngone duru inahafini eko ngaro hohuha hiadono nanga baju ko iwa, masara gea ko idadiua yatoaka o Kristusu ai dora ngoneino. De ngaro o bodito haohana, eko ngaro hiadono inatoma, masara gea mata-mata de duru ko idadiua yakunu yatoaka o Kristusu ai dora angamoi gea ka ihikaika itagi ngoneino.

³⁶ De gea ka ngoneua dika ma oraha naa abe ma kokangela gea haohana, masara Ma Jou ai nyawa mata-mataika ngone hohimanga. Angamoi ngaro ma dodihiraino masara hokogenangoo ma kokangela Ma Jou ai nyawa yaohana. Abe gea ma dodihiraino de naga ihitulihukuoka to Una ai nyawa manga demo Ma Jouika abe ona ato, “Mangale ma titi mininiiki Ngonaika mia Jou ho hiadono ngomi naa ka ihikaika o bodito miaohana. Angamoi o nyawa imietongo ngomi naa mimaketero abe hoka o domba dika abe o nyawa yoigo yomadoma.” Hokogea ma dodihiraino ihitulihukuoka, ho ka idadi hohioriki abe ma dodihirainohi de Ma Jou ai nyawa ma ngoe yahikangela onangika.

³⁷ De ngaro ngone haohana o kangela gea mata-mata nanga wowangoka, masara ena gea ko idadiua inahikala de ko idadiua inahikatingaka ngone o Kristusu ai doraka de aino. Abe ma titi ngone naa duru holaku-laku ma titi o Kristusu wonatobadora ngoneino.

³⁸ De ngohi naa duru tohioriki de tonganono abe duru ko iwa moi abe ka idadi akunu inahikatingaka to Una ai doraka de aino. Abe ngaro o kia dika naga idadi nanga wowangoka eko ngaro hiadono ngone inatomaka, masara gea ngone nagahi ai dora ma goronaka. De ngaro o momalaekata eko ngaro o toka-tokata masara ko idadiua yakunu inahikatingaka ngone ai doraka de aino. De ngaro o kia dika idadi ngoneino ma oraha naa eko ngaro abe idadi ma oraha ahao dokengika, masara enangoo ma ko inaakunua angamoi o Kristusu ai dora ka ihikaika itagi ngoneino. De ngaro o kia dika naga abe duru de ma kuahaka, masara to Una ai dora ka itagiohi ngoneino.

³⁹ De ngaro o kia dika naga abe daku ma hoanino imanoa eko ngaro abe imanoa o duniaka naa, eko ngaro naga utuohi o kia dika abe Ma Jou wotulaadauku, masara gea mata-mataika de duru ko iwa moi abe ka idadi inahikatingaka ngone Ma Jou ai doraka de aino. De to Una ai dora gea wonahimatoko ngoneino ma titi nanga Baluhu idodutu o Yesusu Kristusino.