Roma 7 - Ma Jou ai Demo-demo o Totobelohoka

O Pasala tumidi ma hitararono ma hidogo O hiketero moi abe ma titi nanga gogao o paretaika

¹ De naa, ahi gogianongoru, ngohi tinihitararonoka abe ngini naa o howono ma kuaha ko inihiparetakaua nginika. De ngaro o kia dika naga abe ma dihiraino de inihirehene hiadono ihihofoko o hone-honenge nginika, enangoo de nia papakiti enangika ko iwaka. Abe hoka ma titi ma Pareta, enangoo tinihitararonoka abe ma Pareta ko idadiokaua inihipareta nginika. De naa abeika ngone honganonoli abe ma titi ngone naa ko o pareta ma kuahakaua homanoa. Abe ngini nihiorikoka ma pareta, ho marai nihiorikoo abe nako o nyawa yohonengoka, ona gea ko yaniikokauali ma paretaika. Angamoi nako o hone-honenge ma nyawa, gea itararono abe ona ko idadiokaua yaniiki o paretaika ma titi yohonengoka, ho ona gea duru ko o pareta ma kuahakaua yomanoa.

² De naa tohiketero de nanga pareta abe ma titi o giaberekioka manga gogao ma pareta. Abe nako o fekata momatengo, muna gea kiani mitobagou-goungu ami rokatika ka hiadono wohonenge, angamoi hokogea to ngone nanga pareta itemo. Masara abe nako ami rokata wohonengoka, gea de ahao ma pareta ko imihidapakitokaua ami rokatika, ho muna ka idadi moilaka de o nauru moioli.

³ Masara nako ami rokata ka wowangohi de muna moilakoli o nauru moioli, muna gea ahao ka idadi o nyawa imihiromanga munangika ko matobagou-goungua ami rokatika de mahowono ami badangoka. Masara nako hoka ami rokata wohonengokahi de ahao muna moilakoli de o nauru moioli, muna gea o nyawa ko imihiromangua o ngofeka abe ami datoro itorou, angamoi ma pareta ma papakiti ko iwaka munangika ma titi ami rokata wohonengoka.

⁴ De, ahi gogianongoru, hokogenangoo de ngini naa! Abe ahi demo ma dumutu ko ma titiua o nyawa womatengoika abe wohonengoka, masara gea ma dumutu nginika angamoi ngini ma hirete nihonengoka! Angamoi ngini inihingohamoka o Kristusika, ho abe ma oraha to Una ai badanga ihonenge de nginioo inihidohonengoka ka ma moi de Una. De mangale ma titi ngini nihonengoka, ho gea nia papakiti ma Paretaika gea duru ko iwaka. De mangale ma titi nia papakiti ko iwaka ma Paretaika ho gea ko ihowonua abe nako moiikali ngini nimahidapakiti. De hokogea Ma Jou wohiaturu la ka idadi ngone homahidapakiti o Kristusikali abe Una wihimomikoka ai honengino. De gea Ma Jou wohiaturu la ngone ka idadi homahidapakiti o Kristusika la ka idadi nanga wowangoino de ihihofoko de o hofoko ma rorahai abe iwihisanangi Ma Jouika. Abe ma dihiraino ma oraha inahidapakiti ma Paretaika de ko hakunuahi hihisanangi Ma Jouika nanga wowangoino, masara naa ka idadi hihisanangi Unangika ma titi inahidapakitoka o Kristusikali.

⁵ Masara nako ma dihiraino de nanga hofoko hokogenangua. Abe ma oraha ngone ka haniikohi to ngone o nyawa dika nanga hininga de gea nanga badanga ma goronaka naga nanga hafini o howonika hiadono ngone ka hahowo-howonohi. De ahao naga ma oraha abe hoihenino Ma Jou ai Pareta. Masara gea ka de hoihenino de ipuda nanga hiningaka abe hoigo halawana ai Paretaika. Ho ma titi ai Paretaino de gea barikua hohioriki to Una ai hininga ma ka idogoli abe hahowono Unangika ma titi nanga badanga ma hafini ma dorouino. De nanga howo-howono gea ihihofoko de o hone-honenge ngoneoka.

⁶ Masara ma oraha naa de ngone inahihoheoka ma Paretaino. Angamoi ngone naa inahingohamoka o Kristusika, ho abe ma oraha Una wohonenge de gea imaketero ngoneoo hohonenge ka ma moi de Una. De gea ma titi hiadono ngohi tato ngone hohonengoka ma Paretaika ho inahihoheoka genangino. Ho igoungu ma dihiraino de nagahi nanga papakiti ma Paretaika ho kiani hanii-niikohi ma ngekomo ihira-hiraika gea. Abe ma pareta ma demo o kia dika ihitulihuku, de ena gea duru hanii-niiki enangika. Masara ma oraha naa de inahihupuoka genangino la ka idadi hileleani Ma Jouika de to Una ai Womaha ai kuahaino, abe Ma Jou o Womaha wonaduhunu nanga hiningaka la hiniiki Unangika de hileleani itiai Ma Jouika.

Ma Jou ai Pareta gea inahimatoko ngoneino abe to ngone nanga howono

⁷ De marai naga o nyawa utu yataoko ihowono ahi demo abe ma titi ma Pareta. De ona gea marai manga hiningaka yomatemo ato, “De nako ma titi Ma Jou ai Paretaino hiadono ngone ka idogoli abe hahowono, gea bote ma titi to Una ai Pareta gea itorou.” Masara duru ko hokogenangua ahi demo ma titi. De ahi demo ma hidumutu hokonaa. De Ma Jou ai Pareta gea tanu duru inaduhunu la ka idadi hohioriki abe ma datoro o kia naga Ma Jou waetongo enangika wato gea o howono. Angamoi abeika ena gea honganonohi. De abe ngohi ma dodihiraino, ngohi ko tohiorikuahi abe tahowono ma oraha abe o nyawa utu manga kiahonanga tohafini. Masara ipahaino de ngohi toihene ma Paretaino abe itemo ato, “Ngini ko idadiua niohafini o nyawa utu manga kiahonanga.” Ho ma Pareta ma demoino gea de ahao ngohi ka idadi tohioriki abe nako tohafini o nyawa manga kiahonangika gea tahowono.

⁸ Ho nako to Una ai Pareta, gea ko itoroua, masara abe nako to ngohi ahi hininga, gea ena abe itorou. Angamoi ka de toihenino abe ma Pareta ma demo itemo ato, “Ko idadiua,” de gea imaketero hoka ihifuaele ahi hiningaka la duru tohafini o nyawa utu manga kiahonanga irupa-rupa, ho gea ahi hininga ma hafini idadi ilamokoli. Masara nako hoka Ma Jou ai Pareta ko tohiorikuahi, gea ahi hafini o howonika ko ihifuaeluahi ahi hiningaka ho ahi hafini gea ka biaha dika. Ho genangino de ka idadi totemo tato nanga howono ma oraha gea ka ikurangohi angamoi ko hoihenuahi ma Paretaino. Masara nako hiadono ma Pareta hoihenoka, de genangino ahao o howono duru ikarajaanga nanga hiningaka. De gea ma titi hiadono ngohi tato ahi howono ko ihititiua ma Paretaino masara gea o howono ma titi nagau ngohioka abe ahi hininga ma goronaka imanoa.

^9-11 Abe ma dihiraino ma oraha ngohi ko tohiorikuahi ma titi Ma Jou ai Pareta de gea tomaetongo tato duru towango irahai de marai ahi howono ko iwa. Masara ipahaino de toihenino ma Pareta ma demo de to ngohi ma hirete ahi hininga ma dorou ma moiokali ihibudi ngohino hiadono ngohi tomatemo tato, “Ngohi ka idadi tatobaniiki ai Pareta, de ahi hingounino gea de Una ahao wohietongo wato ngohi tototiaioka la tamake o wowango genangino.” Masara tanu genangino de ahi hininga ihibudioka. Angamoi ai Pareta gea ko takunua taniiki enangika, ho ma bahauku de ko o wowangoua tamake masara o hone-honenge dika tamake ai Paretaino, angamoi hokogea ma hohowono abe nako ngone ko hanii-niikua genangika. Ho gea ma oraha ngohi toihenino de tataoko ai Pareta ma demo ngohino de genangoka ahao o howono ahi hiningaka gea hoka iwangoro de ihiatara la talawana ai Paretaika, de gea hiadono ngohi tahowonoka Unangika. Ho ka idadi hotemo hato ma titi to Una ai Paretaino de hiadono ngohi tohonengoka Ma Jou ai himangoka. Ho naa tonaleha, ma Pareta gea ma hidumutu sarakia? Ma oraha naa de ahao ngohi duru tomangaratii abe nako Ma Jou ai Pareta, gea ma hidumutu la ihiao o wowango ma ngekomino. Masara ai Pareta gea barikua de ihihofoko de o hone-honenge ngohino angamoi ngohi ko tanii-niikua enangika.

¹² Ho ka idadi tohigalioli abe ahi demo kangano abe ngohi tato nako Ma Jou ai Pareta, gea ko itoroua masara ka itebi-tebini dika, de to ena ma demo mata-mataika gea duru ka itotiai dika de irorahai angamoi Ma Jouoka de aino iboa. Masara ma howono gea duru imanoa ngohioka angamoi ko tanii-niikua ai Paretaika.

¹³ De naa abeika ahi demo gea ma titi honganonohi. Abe ahao kangano ahi demo ma goronaka de totemo tato o hone-honenge ngohi tamake Ma Jou ai Paretaino. De ipaha ahao naga ahi demo moioli abe tato to Una ai Pareta gea irorahai dika. Ho naa tonaleha, sarakia, ka idadi Ma Jou ai Pareta abe tohiromangoka tato irorahai de genangino ma titi hiadono ngohi tohonenge? Duru ko idadiua hokogea! De gea ko ai Paretainoua abe ngohi ihihohonenge masara to ngohi ma hirete ahi howonino abe ihihohonenge ngohi. Angamoi nako to Una ai Pareta, ena gea ma hidumutu la inahimatoko ngoneino abe hokokia itorou to ngone nanga howono nanga hiningaka. Angamoi abeika, ngaro Ma Jou ai Pareta ma demo abe duru irorahai, masara nanga howono nanga hiningaka ka idadi yapake ma rorahai gea la ma bahauku de ngone hahowono. De genangino ma titi hiadono ngone hamake o hone-honenge ma Paretaino.

Abe ma titi nanga hininga ma igo hinooto abe imakalawana nanga hiningaka

¹⁴ De naa ngone hohiorikoka abe nako Ma Jou ai Pareta ena gea ka irorahai dika angamoi Ma Jou o Womahoka de aino iboa. Masara nako ngohi naa, ngohi naa ka o nyawa biaha dika abe ma ngoe ahi hiningaka ma dorou ihiatara ngohi o howonika. Abe ngohi tanu tomahiketero hoka o howono ma gilaongo.

¹⁵ Ho mangale ma titi ngohi hoka o howono ma gilaongo, ho to ngohi ahi wowango ma datoro naga ma ngoe abe ko tomangaratiiua gea ma titi o kia naga ahi hiningaka hiadono ma datoro gea todiai. Abe nako ma datoro abe toigo todiai ena gea ngohi ko todiaiua. Masara abe ma datoro duru todohata, ena gea ngohi ka todiai. Ho genangino de itararono abe o howono ka ihikaika ihihipareta ngohino de ngohi ka taniiki enangika, ho gea imaketero ngohi todadioka o howono ma gilaongo. Abe ngaro duru todohata enangika masara ka uku dika todiai ma datoro gea.

¹⁶ Ho abeika, mangale ma titi naga ma datoro abe ngohi todohata enangika de ma Paretaoo itemo ato gea ko itiaiua todiai, gea ihitaana abe ma Pareta irorahai. Angamoi ngaro to ngohi ahi hininga eko ngaro to Una ai pareta, masara gea mata-mata imakiniiki de ihidumutu abe itemo ato ma datoro gea ko itiaiua todiai.

¹⁷ De nako to ngohi ahi hininga imakiniiki de to Una ai Pareta, gea ihihitaana ngohino abe ko ahi hiningaua la o datoro ma dorou todiai. Ho ma oraha abe ngohi todiai o dorou, gea tanu ko ahi hiningainoua abe idiai, masara ahi howono abe imanoa ngohioka, ena gea abe itobadiai ma dorou.

¹⁸ De gea ngohi duru tomahioriki abe moioo de ko iwa ma rorahai abe imanoa ngohioka. De gea ahi demo ma titi tanu ko iwa ma rorahai abe imanoa ahi badangoka, angamoi duru tomahioriki abe ahi badanga naa o duniaka dika ho ma rorahai ko iwa genangino. De tohioriki abe ma rorahai ko iwa ahi badangoka angamoi ngaro ngohi duru toigo todiai o datoro ma rorahai masara gea ena ko takunua.

¹⁹ Ho ahi demo kangano duru igoungu, abe tato ngohi ko takunua todiai ma datoro ma rorahai abe toigo ahi hiningaka tato todiai. Masara abe ma datoro ngohi taetongo ma dorou de abe ahi hiningaka tato ma dorou gea ko todiaiua, ena gea ka totobadiai.

²⁰ Ho nako ngohi todiai ma datoro abe tanu ko toigoua todiai, gea ngohi tato tanu ko ahi hiningainoua abe ngohi todiai, masara ahi howono abe imanoa ahi badangoka, ena gea abe itobadiai ma dorou. De duru ena gea ahi kangela tohimanga, abe ma datoro ma rorahai toigo todiai ahi wowangoka masara tamao abe ahi hiakunu de ahi kuaha ko iwa ngohioka la ka idadi ma datoro gea todiai.

²¹ Ho naa tohidotoomuino ahi demo abe ma titi hokokia itobadadi ngohino. De gea ma oraha ngohi toigo ahi hiningaka tato o datoro ma rorahai todiai, genangoka de tamake ma dorou ahi badangoka ihita-tatoko hiadono ma rorahai gea ko todiaiuali.

²² Angamoi nako ahi hiningaka gea ngohi duru tosanangi dika taniiki Ma Jou ai Paretaika ho hiadono toigo ma rorahai todiai.

²³ Masara abe nako ahi badangoka, gea ko Ma Jou ai Paretaua abe ihihipareta masara to ngohi ahi howono abe naga de ma kuahaka. Ho naga moi ahi hiningaka de moioli ahi badangoka de gea hinooto imakalawana ngohioka. De mangale ma titi ahi howono naga de ma kuahaka ho hiadono ena gea yahikala ahi hininga ma mauika abe yoigo yaniiki Ma Jou ai Paretaika. De ahi howono gea ngade-ngade hoka ihitaokoka hiadono ngohi ahi howono ma kuahaka tomanoa.

^24-25 De igoungu mangale ma titi ahi howono ahi badangoka, ho ngohi naa duru tohuha ahi hiningaka angamoi ngohi duru ko kia-kiaua ihidaene! Abe ahi badanga naa imanoa o howono ma kuahaka ho gea tohioriki abe ahao ka ihonenge. Masara done sarakia ma ngekomo abe ka idadi ihihihupu ahi badangoka de aino ma rorahaiika la ahi howono ihitingakika ngohioka de aino? De gea ngohi tomahioriki abe ngohi ma hononga de toigo tohingounu Ma Jou ai Paretaika abe naga ahi hiningaka. Masara ma honongali de ngohi tohingounu o howono ma kuahaika ma titi ahi howono abe ahi badangokali imanoa. Ho done onagona yakunu ihiduhunu ngohi la ufa tohonenge ma titi ahi howono abe todiaioka ahi badangino? De gea ngohi ka idadi duru totarimakase Ma Jouika ma titi nanga Baluhu idodutu o Yesusu Kristusino ai karajaanga! Angamoi to Una ai karajaangino gea de wohiduhunoka ngohi la ahi howono ihitingakika ho hiadono o datoro ma rorahaioli ka takunu todiai ahi wowangoka!