Roma 6 - Ma Jou ai Demo-demo o Totobelohoka

Abe ma titi ngone hingaku-ngakuoka inahidohonengoka de o Yesusu

¹ De naa tonaleha moi. De nako to ngone o nyawa nanga howono ka idogo-dogo masara gea de Ma Jou ai hininga ma owa ka enangohi duru idogo ilamoko, ho sarakia, koaho ngone ka hahowo-howonohi dika la to Una ai hininga ma owa utuohi ilamoko hamake?

² Koua! Duru ko idadiua hokogea hodiai! Angamoi Ma Jou ai hininga ma dumutu naga ngoneino la wato ngone howango hototiai dika. De hokonaa ma titi muruono naga hiadono ngone hingaku-ngakuoka duru ko idadiua haniikohi o howono nanga wowangoka. Abe ma titi ihira, ngone naa tanu homaketero hoka hohonengoka ma titi nanga howonika gea.

³ Masara marai ngini utu ko niataokuahi abe ma titi ngone naa homaketero hoka hohonengoka o howonika. De gea bote ko niataokua angamoi ngini ko nihiorikua abe nanga gogohiki gea ma titi o kia. Ho hokonaa tinihitararono ma titi nanga gogohiki. Abe ma oraha inaohiki de gea ma dodunguu abe ngone inahingohamoka o Yesusu Kristusika la Unangokali homanoa. De mangale ma titi inahingohamoka Unangika, ho gea ngone onagona dika abe inaohikoka o Yesusu Kristusika de gea ngoneoo hohonengoka abe ma oraha Unangoli wohonenge.

^4-7 Ho naa tonaleha, sarakia, o nyawa yohone-honengoka de ka idadiohi yahowono Ma Jouika? Koua! Angamoi o honenge gea ko kia-kiakaua akunu idiai! Ho ngone naa abe inahidohonengoka ka ma moi de o Yesusu, ufa ngone ka haniikohi o howonika! De nagahi ahi hitararono abe ma titi inahidohonenge de o Kristusu. Abe igoungu ma dihiraino de o howono idadi hoka to ngone nanga dutu angamoi o kia dika inahipareta de ngone ka haniiki dika hodiai ho gea homaketero hoka hodadioka o howono ma gogilaongo, de ka ihikaika hahowono Ma Jouika. Masara ipahaino de inahingohama de inahidohonenge ka ma moi de o Yesusu Kristusu. De ma oraha inahidohonenge de Una de gea ngone hohiorikoka abe nako nanga wowango ma hirahi ma dorou, ena gea hoka ihidapakuika o gotaika de de o Kristusu. De gea ihidapakuika la genangoka de ihonenge nanga wowango ma hirahi, ho to ena ma kuaha ngoneino duru ko iwaka. De nako nanga hirahi ma kuaha ko iwaka ngoneino, gea ma titi o howono ko idadiokaua inahipareta ngoneino, ho ngone ko o gilaongokaua ma nyawa abe kiani haniiki o howonika. Ho gea mangale ma titi ngone hohonengoka, abe o howono de nanga wowango ma hirahi ko idadiokaua inahipareta nanga hiningaka, ho ngone naa ngaro ufa dika de ka haniikohi o howono nanga wowangoka angamoi inahihoheoka to ena ma kuahaino! De naa ma titi moioli tinihigaro la ngone hingaku-ngakuoka ufa ka haniikohi o howono nanga wowangoka. De nenangoo ihititi abe ngone inahingohamoka o Kristusika ma titi nanga gogohikino. Abe mangale ma titi inahingohamoka Unangika, ko ma titiua inahidohonenge de inahidulungunu dika de de Una, masara nagali abe Ma Jou wohiaturu la wonahidomomiki ka ma moi de o Kristusu nanga wowango ma honengoka de aino! Abe igoungu Ma Jou o Baba wihimomikoli o Kristusu ai honengoka de aino ma titi to Una ai medebini ma dararonino de ahao wihidoaka o wowango ma hungi Unangika. De hokogenangoo de ngone abe inahingohamoka Unangika, abe ngoneoo hamake o wowango ma hungi Unangoka de aino. Ho gea ma titi o kia hiadono Ma Jou wonahidoaka o wowango ma hungi? Gea wonahidoaka la howango Unangoka dika de ibootohi o howono inahipareta ngoneino!

⁸ De mangale ngone imaketero hoka inahidohonenge ka ma moi de o Kristusu, ho gea duru hohioriki abe ka ihikaika howango de de Una.

⁹ De gea ngone ka idadi hohioriki abe ahao ka ihikaika howango Unangoka angamoi Una ma hirete ko idadiokaua wohonenge. Abe o Kristusu Una wihimomikoka ai honengino de duru ko wohonengokaua, angamoi o hone-honenge ena gea duru ko iwaka ma kuaha Unangika.

¹⁰ Abe Una gea ko wohonengokaua angamoi wonabanguoka ma titi nanga howo-howono, ho ai karajaanga o howonika gea wabootokau. Nako hoka ai bobangu ma karajaanga gea Ma Jou ko wodafongua, gea marai kiani ma moiokali wohonenge, masara hokogenangua abe idadi. Ai karajaanga de duru Ma Jou wosanangi wodafongo enangika, ho o Kristusu ngaro ufa dika de wohigalioli wohonenge. De abe ma titi Una wowangokali naa, gea Una wowango Ma Jouika la o higiriiri ka idadi wohiboa Unangika.

¹¹ Ho nginioo koaho nimahitingini to Kristusu ai hininga gea. Abe ngohi tinihuloko la nimaetongo abe ngini ma hirete hoka nihonengoka o howonika de ma oraha naa niwangokali Ma Jouika, angamoi ngini naa inihingohamoka o Yesusu Kristusika ho koaho ti ngini nia hininga imakadaene dika de to Unangoli ai hininga. Ho gea ufa ngini ka nianiikohi o howonika abe ma oraha inihigaro la ato niahowonoli. Masara kiani nginioo niwango Ma Jouika la ka ihikaika o higiriiri nihiboa Unangika.

¹² De igoungu ngone nagahi nanga hafini o howonika, masara naa ngohi tinihuloko la ibootohi nianiiki nia hafini ma dorou gea! Abe ngohi tato ngini ufa nimahigunoa la o howono inihipareta nia badanga homoi-homoioka hiadono nia badanga ma hafini ma dorou nihingounu enangika. Angamoi nako nia badanga, ena gea ahao ka ihonenge dika, ho done sarakia de ngini ka nihingounu enangika?

¹³ Ho ufa ngini nimahidoaka nia badanga ma kiahonanga la gea idadi o howono ma dodiawo de genangino nimahitorou. Masara koaho ngini nimahidoaka Ma Jouika la nia badanga ma kiahonanga mata-mata nimahigunoa la Ma Jou wapake hiadono o datoro ma totiai wodiai ti ngini nia badangino. De ma titi o kia hiadono ngohi tinihigaro tato nimahidoaka Ma Jouika? Kiani hokogea angamoi nia wowango ihititi Unangoka de aino! Abe Una gea winihimomikoka nia wowango ma honengoka de aino la nia wowango ma ngango niamake!

¹⁴ De gea ka idadi tinihigaro tato ngini naa ko o howono ma kuahakaua nimanoa. Masara igoungu ma dihiraino abe ma oraha ngini ka nimanoahi o Pareta ma goronaka de gea ngini o howono ma kuahakahi angamoi nioigo niwihisanangi Ma Jouika o Paretaino masara ko niakunua nianiiki enangika. Masara ma oraha naa de ngini ko o Pareta ma goronakaua nimanoa masara Ma Jou ai hininga ma owaka dika nimanoa, ho o howono ko idadiokaua inihipareta nginika angamoi Una ma hirete winiduhunu la ka idadi nialawana o howonika! Ho gea ma titi hiadono ngohi tato ngini ka idadi nimahidoaka Ma Jouika dika la ibootohi o howono inihipareta nia badangika! Ho mangale ma titi Ma Jou wonahingohamoka o Yesusu Kristusoka de abe wonahihoheoka o howono ma kuahaino, ho duru ko iwaka ma titi hiadono ngone haniikohi o howono nanga wowangoka, ho naa duru tonahigaro la howango ka Unangika dika!

Abe ma titi ngone hokokia homahidadi o gilaongo ma nyawa

¹⁵ De marai naga utu yomatemo manga hiningaka ato, “Abeika, ma oraha naa de Ma Jou wonaetongo wato hototiai ai himangoka, de Ma Jou ai hininga ma owaka dika ngone homanoa. De gea itararono abe ngone ko o Paretakaua homanoa. Ho nako ngone homanoa ko o Paretakaua, marai ngone ka idadi o howono hanii-niikohi de ko wonahohowonua. Angamoi ai Paretaino ma hohowono ko inadaenokaua de bari wonadafongoka ma titi ai hininga ma owaka de aino. Ho bote duru ko iwaka nanga hohowono ngaro nanga datoro hokokia dika haniiki!” De naa ngohi ka idadi tapaluhu manga demoika gea tato manga demo gea ena duru ko itiaiua!

¹⁶ Angamoi nako ngini niatobaniiki o howonika, gea tanu nimahidadioka hoka o gogilaongo ma nyawa abe o howonika, ho ena gea idadioka nia dutu. De abeika tohiketero moi. De nako hoka ngone homahidoaka o nyawaika la hato ka ihikaika haniiki de hahingounu onangika, de gea homahidadioka to ona manga gilaongo. De hokogenangoo de o howono, abe nako naga nanga hingounu enangika, de gea ena idadioka nanga dutu. Ho gea iti ngone nanga putuhu. Abe ngone ka idadi hohingounu o howonika masara hohioriki abe o howono ma hofoko gea o hone-honenge dika. Ekola ka idadi nanga hingounu itagi Ma Jouika la genangino de ihihofoko de o datoro ma totiai to ngone nanga wowangoka. Ho done sarakia de o nyawa yoigo yomangiriki o howono? Genangoka de duru ka yobodo dika!

¹⁷ De igoungu ngini ma dodihiraino de nidadioka o gogilaongo abe o howonika. Masara ipahaino de ngini nitotoihene ma dodotoko ma gou-goungu abe inihingahu nginika. De gea ma dodotokika ngini duru nihingounu de nia hininga ma gahumu, ho naa ngini ngaro ufa dika de nianiikohi nia hininga ma hafini abe o howonika. De gea ma titi hiadono ngohi duru tihigiriiri de totarimakase Ma Jouika abe ma titi nia hingounino gea.

¹⁸ Ho naa ngohi ka idadi tinihiromanga nginika tato ngini ko o gogilaongokaua ma nyawa abe ko nihingounokaua o howonika, masara ngini naa nimahidadioli hoka o gogilaongo abe ma totiaiika.

^19-20 De gea tinihiketero abe ngini hoka o gogilaongo ma nyawa angamoi ka enangohi igapanga niataoko itiai nia hiningaka. Abe ngohi tato nako hoka o hiketero ma demo ko tapakeua, gea marai nikangela niataoko ahi demo ma titi. Angamoi ngini ka o nyawa biaha dika ho marai nia hininga ma hiakunu ka ikurangohi. De ma dodihiraino de ngini nimahigunoa la nia badanga ma kiahonanga homoi-homoi idadi hoka o gilaongo o howonika, abe ma howono gea imanoa nia bada-badangoka. De ngaro o datoro o kia dika abe imakalawana de Ma Jou ai Paretaika ma genangikaoo de ngini nimahidadi to ena ma gilaongo. De ma bahauku de ngini ka ihikaika nialawana Ma Jou ai hiningaika. Masara hokogenangua ma oraha naa. Angamoi abeika, ahi gogianongoru. Ma dihiraino abe ma oraha ngini ka nidadiohi o gogilaongo ma nyawa o howonika, gea nia hininga duru ko itagiua o totiaiika angamoi o totiai gea ko inihiparetaua nginika. Masara ma oraha naa de gea mata-mata aturuuruoka! Naa ngini inihihoheoka o howonoka de aino la ma totiaioli ka idadi niatobaniiki nia wowangoka. Ho ma oraha naa de kiani nimaputuhu la ti ngini nia badanga de to ena ma kiahonanga homoi-homoi ka nimahidoaka la nimahidadioli o gogilaongo abe ma totiaiikali. De gea nako o totiai dika niatobaniiki nia wowangoka, de gea ahao ma bahauku de ngini duru niwango nitebi-tebinoka Ma Jou ai himangoka.

²¹ Abeika, ahi gogianongoru. Ma dihiraino abe ngini niatobahowono Ma Jouika, de gea ma hofoko o kia niamake genangino? Naga ma hofoko ma hohailoa niamake? Koua! Abe ngaro ma oraha naa de nimahohininga nia datoro ma dihiraino gea de inimaleke nia borihiningaka! De gea ngaro ufa de hoheranga, angamoi nia datoro gea ma hofoko ka o hone-honenge!

^22-23 Angamoi nako o nyawa manga howono de gea ma hibalaha o hone-honenge dika. Masara ma oraha naa de ti ngini nia wowango ma hofoko duru imakohowonoka de ma dihiraino. Angamoi ma oraha naa de ko nidadiokaua o gogilaongo ma nyawa abe o howonika masara niwihingounoli Ma Jouika, ho to Unangoli ai gogilaongo ngini nidadioka. Ho ma oraha naa de naga nia wowango ma hofoko ma rorahai abe iniduhunu hiadono inihihira-hira la ngini nitebi-tebini Ma Jou ai himangoka. De mangale Una winihihoheoka nia howonino ho gea ma bahauku de ihihofoko de o wowango ka hiado-adonika nginika. De gea duru igoungu, abe mangale ma titi to ngone nanga gogao nanga Baluhu idodutu o Yesusu Kristusika ho hiadono Ma Jou ka wonahidoaka dika o wowango ka hiado-adonika ngoneino. Abe Una ko wonahibalahua ma titi nanga howono, masara nanga wowango gea ka o hidoaka dika Unangoka de aino ngoneino! Ho mangale ma titi ai hidoaka ma hohailoa gea ho ngone ma oraha naa de koaho howango hokokia la nanga wowangoino de duru itararono abe o howono ko inahiparetakaua ngoneino!