Roma 5 - Ma Jou ai Demo-demo o Totobelohoka

Ngone hingaku-ngakuoka nanga utumu Ma Jouino naga ma ngoe

¹ De naa Ma Jou wonaetongoka wato ngone hototiai abe ma titi nanga ngongakuino, de genangino hohioriki abe Una wonahikadameoka ngone de Ma Jou hiadono ngone ko homakalawanokaua de Una. De gea wonahikadame ma titi nanga Baluhu idodutu o Yesusu Kristusu ai datorino.

² De naga utuoli ma utumu hamake ma titi nanga ngongaku Unangika. Abe mangale ma titi ngone hingakuoka Unangika hiadono o Yesusu wonahigogere ngone Ma Jou ai hininga ma owa ma goronaka. Abe ma titi ma oraha naa de Ma Jou wonaao duru de ai hininga ma owa dika ngoneino abe nanga boriwowangoka. De nagali ma utumu abe ngone ka idadi hogogarago nanga hiningaka angamoi duru hohioriki abe ahao wonahikodoku ngoneino to Una ai medebini ma dararono, ho ngoneoo ahao naga Ma Jou ai medebini ma dararono ngoneoka.

³ De igoungu gea mata-mata nanga utumu hamakeoka ma titi Ma Jou wonaetongoka wato hototiai ai himangoka, ho nagau nanga gogao duru irahai ngone de Ma Jou. Masara ka nagahi nanga utumu abe ka idadi hamake ngaro nanga kangela haohana nanga wowangoka. Abe ngaro nanga kangela ma goronaka ma ka idadiohi ngone hogarago mangale ma titi hohioriki de hongaku abe nanga gogao Unangika ko idomo-domoua. Ho ma oraha ngone nanga kangela ma goronaka de ka idadi hogarago angamoi hohioriki abe nanga kangelaino gea de inaduhunu hiadono ka idadi homatongohono.

⁴ De abe homatongohono nanga kangela ma goronaka, nanga dongohonino gea de ka idadi utuohi itararono homahioriki abe ma dihirainohi de Ma Jou wonaetongo ngone wato ai nyawa abe duru de nanga ijaka. De ahao mangale ma titi homahioriki itararono abe ngone Ma Jou ai nyawa abe duru de nanga ijaka, gea ka idadi utuohi hohioriki de honganono abe ahao Ma Jou wonahikodoku to Una ai medebini ma dararono gea ngoneino.

⁵ De nanga nganganono gea ahao Ma Jou kiani wonahingodumu ngoneino, ho ngaro ufa dika hafikiri hato marai inahimaleke abe ma titi nanga nganganono gea ko idadiuali, ho ko wonahikodokuokauali ai medebini ma dararono ngoneino. De ngone ka idadi duru hohioriki abe ahao nanga nganganono gea hamake ma titi Ma Jou ai dora abe kohaamoko ngoneino. Abe Una ai dora kohaamoko gea wonahikopoa nanga hiningauku, de gea wohikopoa ma titi Ma Jou o Womahino. Ho Ma Jou o Womaha, abe ma dihiraino de Una wihidoakoka ngoneino, Una gea ka ihikaika wonahihohininga ma titi Ma Jou ai dora kohaamoko ngoneuku. Abe Una nanga hiningaka de ka ihikaika wonatemo wato, “Ma Jou ai dora kohaamoko duru itagi ngonaika.” Ho ma titi Ma Jou o Womahino hiadono ngone duru hohioriki abe nanga nganganono gea ahao Ma Jou wonahingodumu ngoneino hiadono hamake to Una ai medebini ma dararono.

^6-8 De abeika ngone honganonohi abe hokokia ma amoko Ma Jou ai dora ngoneino. Abe Una wihidoaka to Una ma hirete ai Ngofaka o Kristusu la wohonenge de wonaturuuru ngone, de genangino womahitaana ma titi ai dora ma amoko ngoneino. De hongoli abe ma oraha wihidoaka ai Ngofaka de ngone o nyawa ka hilawanohi Unangika. Abe ma titi ngone gea hahowo-howonohi Ma Jouika de duru ko iwa nanga hiakunu la homaduhunu de hiadono Ma Jou wonadafongo. De duru ma oraha gea abe ngone ko kia-kiaua inadaene de wihidoaka la o Kristusu wohonenge la wonaturuuru. De ai dora gea abe wonahimatoko ngoneino, gea duru imakohowono de ngone o nyawa nanga dora. Angamoi nako ngoneoka, duru yokuranga abe yoigo iwituruuru o nyawa womatengo abe ngaro womatengo gea ai wowangoino de hatoli wototiai. Masara marai ka ihimomoi dika ka idadi o nyawa yoigo iwituruuru manga dodiawo womatengo abe ai hininga duru irahai la ufa wohonenge. De gea yosanangi iwituruuru ma titi abe manga dora itagi manga dodiawoika gea. Masara abeika Ma Jou ai dora ngoneino. Angamoi ma oraha ai dora wonahimatoko de wonahidoaka ai Ngofaka o Kristusu la wonaturuuru de gea ngone ko hodadiuahi to Una ai dodiawo masara ngone ka homakalawanohi Unangika! De ngaro hokogea masara ai dora kohaamoko itagi ngoneino hiadono wihigunoa la ai Ngofaka wohonenge la wonaturuuru. De ai honengino gea de Ma Jou duru wonahimatoko ai dora kohaamoko ngoneino.

⁹ De naga ma titi moioli abe ngone duru ka idadi hohioriki igou-goungu. De gea ka idadi hohioriki abe Ma Jou ahao ko wonahohowonua ngone, ho ngaro ufa dika hohawana o hohowonika. De gea ko wonahohowonua mangale ma titi Ma Jou wonaetongoka wato hototiai o Kristusu ai awunino o gotaka. De genangino ngone ka idadi duru hohioriki de honganono abe Una wonahihoheoo nanga hohowonoka de aino. Angamoi done sarakia nako Ma Jou wonaetongoka hototiai de ipahaino de ma bahauku de wonahohowonoli? Hokogenangua to Una ai hininga!

¹⁰ De igoungu, nako ma dodihiraino de gea ka homakalawanohi ngone de Ma Jou, masara ma oraha nenangoli de wonahikadameoka ma titi to Una ai Ngofaka ai honengino. De nako ma dihiraino gea ngone ka homakumusuohi ngone de Ma Jou. De abeika ngaro hokogea nanga hininga ma Una ka woigohi wonaduhunu ngoneino. Ho nako ma dihiraino abe ngone ka hilawanohi de wosanangi wonaduhunu, hongoli wosanangi wonaduhunu ma oraha naa, angamoi naa ko homakumusuokaua de hiadono hodadioka to Una ai dodiawo. Angamoi ma oraha naa Una wonahikadameoka la ufa nanga hohowono hamake Unangino, ho Una kiani wonaao irahai abe hoka itiai o dodiawo yomakao irahai. De naga ma titi moioli hiadono ka idadi duru hohioriki abe Una ko wonahohowonua, de gea ma titi abe ma oraha naa de o Kristusu wowangokali! Abe ma dodihiraino gea de Una wonahiowa abe ma titi o Kristusu ai honengino, de ma oraha naa de utuohi ilamoko ai hiowa ngoneino angamoi Una ka wowangokali. Ho mangale ma titi Una wowangokali hiadono ngone ka idadi duru hohioriki abe nanga hiowa hamake Unangoka de aino.

¹¹ De ufa ngone hafikiri hato ka dokengika dika de ahao nanga utumu hamake Ma Jouino. Angamoi ngaro ma oraha naa masara nagau nanga utumu duru kohaamoko hamakeoka. Abe mangale ma titi nanga Baluhu idodutu o Yesusu Kristusino hiadono wonahikadameoka la nanga gogao ngone de Ma Jou duru ihohailoa. De nanga gogao gea Unangika duru idadi ma utumu ngoneino ho hiadono ngone duru hidogarago Ma Jouika. Ho to ngone nanga utumu naga duru ma hohailoa hamake ma titi nanga ngongaku Unangika.

Abe ma titi hohikohowono o Adama ai datoro de o Kristusoli ai datoro

¹² De marai utu yomaleha-leha ato, “Done sarakia to ngone nanga utumu ma hohailoa gea hamake o nyawa womatengoino dika?” Ho gea ka idadi tinihitararono nginika. Abe gea ka imakadaene dika hoka duru ma dodihiraka, abe ma oraha wonatulaadauku de ipahaino de ngone hodadioka o howo-howono ma nyawa. De genangokaoo inadaene ma titi o nyawa womatengoino dika ai datoro. De hokogenangoli ma oraha naa, abe ngone o nyawa ka idadi o wowango ma ngango hamake ma titi womatengoino dika ai datoro, de gea nanga Baluhu idodutu o Yesusu Kristusu ai datorino! De gea nanga wowango ka idadi hohikohowono de ma dodihiraino o Adama ai datoro moioli abe genangino de ngone o nyawa hohonenge. Abe nako ngone o nyawa mata-mata nanga howono, de gea ihititi abe womatengoino dika ai howono. De gea o Adama una duru wohira wahowono, masara ipahaino de ai howono gea imahora-hora hiadono ngone o nyawa mata-mataika o duniaka naa ngoneoo hakokihowonoka Ma Jouika. Ho mangale ma titi o Adama ai howono gea hiadono ika-ika de una wohonenge. De o hone-honenge enangoo imahora-hora o dunia ma nyawa mata-mataika, ho ngoneoo mata-mata hohonenge angamoi ngoneoo hahowonoka.

¹³ De igoungu abe nako ngone hafikiri ma titi o howono, gea biaha ma titi naga ma pareta abe o nyawa yatilakuroka ho hato yahowonoka. Masara tanu ma dodihiraino abe Ma Jou ko wahidoakuahi ai Pareta o Musaika de o nyawa yahowonoka Unangika. Abe ngaro ma oraha o Adama de ka hiadono ma oraha Ma Jou wahidoaka ai Pareta o Musaika, masara ma oraha gea de nagau o howono o duniaka. De masara ma oraha gea de ma Pareta ko iboauahi, ho Ma Jou ko wafetongua o nyawaika wato ai Pareta yatotilakuru onangika.

¹⁴ De ngaro ona ma dodihiraino abe ma Pareta ko iwahi ho ona ko yatilakurua Ma Jou ai pareta ma demo abe hoka o Adamoli watilakuru Ma Jou ai demo moi, masara ngone ka idadi hohioriki abe onangoo mata-mata yakokihowono Ma Jouika. Angamoi onangoo mata-mata ma oraha gea de yoborihonenge. Abe nako hoka ona ko yahowonua gea tanu ona gea ko yohonengua. Ho nako o Adama, una de o Kristusu tanu ma hohutulu yomaketero, angamoi ngaro to Adama ai datoro eko ngaro to Kristusoli ai datoro, masara manga datoro hinootoo gea duru de ma hofoko ilago-agomo angamoi o nyawa mata-mataika yadaenoka.

¹⁵ Masara igoungu abe manga datoro hinooto ma hofoko gea duru ko imakadaenua. Angamoi Ma Jou ai hidoaka ma owa ngoneino la wonaetongo ngone hototiai ai himangoka, gea ena duru imakohowono de to Adama ai howono ma hofoko. Abe mangale ma titi womatengoino gea ai howono hiadono o nyawa ko manga ngoe yohonenge. Masara abe ma titi o Kristusu ai datorino ma hofoko, duru ka enangohi abe ikurutiye ma titi ngoneino. Angamoi nako to Yesusu Kristusu ai datoro, gea duru mata-mata ka ai hininga ma owaka dika de aino. De ma titi genangino hiadono o nyawa duru ko manga ngoe yamake Ma Jou ai hidoaka ma owa. De gea ai hidoaka la o nyawa ka idadi waetongo yototiai ai himangoka. De ai hidoaka ma owa mata-mata abe wonahidoaka, gea o nyawa duru ko manga ngoe yamake ai owa gea ma titi o Kristusu ai datorino abe o gotaka.

¹⁶ De naga ma titi moioli abe hokokia imakohowono to ona yahinooto manga datoro ma hofoko. Abe mangale ma titi womatengoino gea ai howono moi dika de hiadono Ma Jou womaputuhu wato kiani o nyawa mata-mataika manga hohowono yamake. Masara nako Ma Jou ai hidoaka ma owa, gea imakohowono. Angamoi gea ko ma titiua o nyawa womatengoino ai howono moi dika, masara gea ma titi to ngone o nyawa nanga howono duru kohangoe hiadono Ma Jou womaputuhu wato kiani wonaduhunu nanga howonino, ho Una wato ai hidoaka wonahidoaka ngoneino. De ngaro ma howono moiino dika hiadono ihihofoko de o hohowono o nyawaika, masara nako to Kristusoli ai datorino de gea ihihofoko abe Ma Jou ka idadi wonaetongo ngoneino wato hototiai. Ho ona yahinooto gea manga datoro ma hofokino de duru yomakohowonoka.

¹⁷ De igoungu abe mangale ma titi o nyawa womatengo dika o Adama ai howonino hiadono ma dodihirainohi de o hone-honenge inahipareta ngone o nyawa mata-mataika ho hiadono kiani ngone mata-mata hokokihonenge. Masara ma oraha naa iboaka moioli ma titi abe ka enangohi ikurutiye. Abe ngaro ma dodihirainohi de o hone-honenge inahipareta, masara ma oraha naa de ngoneoli ka idadi hohikala o hone-honengika angamoi ngone hamakeoka o wowango ma ngango ma titi womatengoinoli abe o Yesusu Kristusino. Abe onagona dika hodafongo to Una ai hidoaka ma owa kohaamoko ngoneino de hiadono hodafongoo to Una ai totiai abe ka wonahidoaka dika ngoneino, gea ngone abe duru holaku-laku ho o howono ko idadiokaua inahipareta ngoneino naa de ka hiado-adonika. Ho abe ma oraha nanga hiningaka ipuda moi abe inahigaro o howonika, ma oraha naa de ka idadi holuku dika haniiki ma howono gea.

¹⁸ De abe imaketero hoka ma dodihiraka de o Adama wahowonoka de ma titi ai howono ihira-hiraino gea de ngone o nyawa mata-mata nanga hohowono inadaene, hokogenangoo de o Yesusu ai datoro moiino de naga ma hofoko inadaene ngone mata-mataino. Abe nako ma oraha o Yesusu wohonenge o gotaka, gea ai datoro ma totiai moiino dika de hiadono ngone mata-mata ka idadi Ma Jou wonahihohe nanga hohowonino la howango ka hiado-adonika.

¹⁹ Angamoi ma titi womatengo gea o Adama ko wihingounua Ma Jouika de genangino hiadono ngone o nyawa mata-mata hodadi o howo-howono ma nyawa. De hokogenangoo mangale ma titi womatengoli o Yesusu ai hingounu Ma Jouika de genangino ka idadi ngone o nyawa ko nanga ngoe Ma Jou wonahitotiai.

²⁰ De naa marai ngini utu nia hiningaka nimaleha niato nako gea igoungu abe nanga totiai ka o Yesusu ai datorino dika iboa, done sarakia ma titi hiadono ma dodihiraino de Ma Jou wonahidoaka o Musa ai Pareta ngoneino? Mode ko idadiua ma Pareta inahitotiai? De gea ma titi hokonaa. Abe Ma Jou wonahidogo ai Pareta ngoneino la genangino de homahioriki nanga howono. Abe ahao ma oraha hatilakuru ai Paretaika de gea utuohi itararono hataoko abe ngone hatilakuroka ai hininga ma dumutu hiadono hahowonoka Unangika. De barikua o nyawa nanga howono ka idogo-dogo, masara ka Ma Jou ai hininga ma owahi abe duru idogo-dogo ilamoko ngoneino.

²¹ De tanu enangoo imakiniiki de Ma Jou ai hininga ma dumutu ma dodihirainohi, abe Una duru woigo wonahimatoko ai hininga ma owa gea ngoneino. Angamoi ai Pareta inahimatoko ngoneino abe duru hoperelu ai hininga ma owa gea. De igoungu idadi hokogea, abe to Una ai owa idogo-dogo hiadono duru ilaku ngoneoka. Ho ma dodihirainohi de ngone o howono ma kuahaka homanoa hiadono ka hokokihonenge, masara ma oraha naa de ka idadi ngone homanoali Ma Jou ai hininga ma owa ma kuahaka angamoi Una wonahitotiaioka. De genangino de ngone hamake o wowango ka hiado-adonika ma titi nanga Baluhu idodutu o Yesusu Kristusino.