Roma 4 - Ma Jou ai Demo-demo o Totobelohoka

Nako o Abarahaama una gea Ma Jou wietongo wototiai ma titi ai ngongakuino dika

¹ De abe ma titi Ma Jou wonahitotiai ngone o nyawa, gea ka idadi hongano-nganonohi to ngomi o Yahudi ma nyawa mia totofora ma domoro o Abarahaama. Abe ngone hohioriki ma dodihiraino de Ma Jou wietongo o Abarahaamika wato wototiai ai himangoka, abe womalega unangika de wato, “Una gea tietongo wototiai de ai howo-howono taofioka.” Ho tonaleha, o Abarahaama una gea hokokia ai wowangoka hiadono Ma Jou wietongo wototiai?

² Sarakia, bote gea ma titi o Abarahaama ai wowango ma datorino de hiadono Ma Jou wietongo wototiaioka? Angamoi nako hoka o Abarahaama ai totiai ihititi ai datoro ma rorahaiino, gea de ahao tanu o Abarahaama ka idadi womagorakiye o nyawa manga hima-himangoka abe ma titi womamake ai totiai gea. Masara tanu hokogenangua idadi hiadono Ma Jou wietongo wototiai, ho duru ko idadiua o Abarahaama womagorakiye, angamoi o Abarahaama ai totiai gea ko ihititiua o Abarahaama ai datoroka de aino.

³ De gea o Abarahaama ko idadiua womagorakiye angamoi ai totiai ihititi ai ngongakuino dika de ko ai datorinoua. De gea duru itararono abe Ma Jou wietongo o Abarahaama wototiai ma titi ai ngongaku angamoi ma dodihiraino de ihitulihukuoka Ma Jou ai Demo-demoino. Abe itemo ato, “De gea o Abarahaama wingaku Ma Jouika ho Una wietongo wato una duru wototiai Ma Jou ai himangoka.” Hokogea itemo ma dodihiraino, de genangino de duru itaana abe o Abarahaama ko idadiua womagorakiye ma titi ai totiai, angamoi duru ko ihititiua o Abarahaama ai datorino masara gea Ma Jouoka de aino wihidoaka unangika.

⁴ De abe ma titi Ma Jou wahidoaka o nyawaika la ona yototiai to Una ai himangoka, abeika homafikirohi ma titi o kia naga hiadono hokogea wodiai. Ho naa o hiketero moi tagoraka nanga wowangoino la genangino de hohikohowono o nyawa manga hewa de o nyawa manga hidoaka. Abe nako o nyawa hahikarajaanga de yokarajaanga ipahaino de hohibalaha onangika de o tiwi, de manga tiwi gea ko hafetongua o hidoaka masara gea hato manga karajaangino ma hewa abe itiai ona gea yamake ma titi imakadaene de manga datorino. Masara nako o nyawa ko hahikarajaangua de hahidoaka dika de o tiwi onangika, gea ma tiwi hafetongo o hidoaka dika onangika abe ihititi nanga hininga ma rorahaioka de aino dika. De hokogea ka idadi hohikohowono o nyawa manga hewa de manga hidoaka.

⁵ Ho naa abe ma titi Ma Jou ai totiai hamake Unangoka de aino, tonaleha, gea imakadaene hoka nanga karajaangino ma hewa ekola hoka o hidoaka dika abe wosanangi wonahidoaka ngoneino? De gea itiai hafetongo o hidoaka Unangoka, angamoi ai totiai gea ko mangaleua ma titi nanga karajaangino eko nanga wowango ma datorino hiadono Ma Jou wonaetongo hototiai, masara gea mangale ma titi nanga ngongaku dika Unangika. Abe ngaro ma dihiraino de ngone o howo-howono ma nyawa nanga hininga ko imakiniikua de to Unangoli ai hininga, masara ma oraha naa de Una gea wakokiofi nanga howono de wonaetongo hototiai to Una ai himangoka, de gea mata-mata wodiai ma titi to ngone nanga ngongaku o Yesusu Kristusika. Ho gea duru itararono abe ko ihititiua nanga wowango ma datorino masara ka ai hininga ma rorahaioka de aino dika hiadono wonahidoaka la hototiai ai himangoka. Ho abe Ma Jou wonaetongo hototiai ai himangoka ma titi nanga ngongakuino, gea duru imakadaene ma titi hoka ma dodihiraino de wietongo o Abarahaama wototiai ma titi to unangoli ai ngongaku Unangika.

⁶ De abe ma titi Ma Jou ka wonahidoaka dika ai totiai ho ngaro ufa dika de ngone hokarajaanga la gea hamake Unangoka de aino, gea hamao o hiowa moi abe duru ihailoa nanga borihiningaka. De ngaro to ngomi mia koano ma dodihiraino o Dautu, masara gea to unangoo ai higiriiri ma demo naga abe hokokia ma titi hiadono Ma Jou waetongo o nyawaika wato yototiai. De gea ai demo ma hidumutu imakadaene de to ngohioli, abe to ngomi mia demoino de ihitararono abe ma titi o nyawa abe Ma Jou waetongoka yototiai, gea ko ma titiua manga datorino hiadono hokogea waetongo.

⁷ De gea ai demo abe ma dodihiraino wohitulihukuoka de una wato, “Nako o nyawa abe yatilakuroka Ma Jou ai Pareta de yahowonoka Unangika, masara nako ipahaino de manga howono gea waofioka ho ko wolegaikakauali, ona gea manga hiningaka de duru yogarago de manga hininga ma miriidi.

⁸ De nako hiadono Ma Jou ko wohiningakauali o nyawa manga howo-howono, ona gea ka idadi duru yogarago de yoriidi manga hiningaka.” Hokogea to Dautu ai demo ma dodihiraino. De genangino ka idadi hamake abe duru Ma Jouoka dika ma titi hiadono waetongo o nyawaika yototiai ho wato manga howono ko wolegaikakauali. Abe gea duru ko ma titiua onangoka hiadono Ma Jou waofi to ona manga howo-howono. De o Dautu ai demo gea duru imakiniiki de to Abarahaamoli ai wowango, angamoi unangoo ko wokarajaangua la womamake ai totiai, masara ka wingaku dika Ma Jouika de ahao Una waofi ai howono de wietongo unangika wato wototiai, de gea mata-mata Ma Jou ka wihidoaka dika unangika.

⁹ De naa moioli tonaleha. Abe naa kangano hoihene ma titi o nyawa abe manga hiningaka duru yogarago de yoriidi mangale ma titi Ma Jou waetongo onangika wato yototiai. Ho sarakia, ma demo gea ihidumutu o Yahudi ma nyawaika dika abe yomahunaka eko ma dumutu onangikaoo abe ko o Yahudi ma nyawaua ho ko yomahunaua? Abeika ma titi gea hafikirohi. Angamoi nako mia tofora o Abarahaama, ngone hato mangale ma titi ai ngongakuino hiadono Ma Jou wietongo unangika wato una wototiai ai himangoka.

¹⁰ Masara gea tonaleha, abe gea ma oraha o kia de idadi abe wietongo wototiai? Abe ma oraha ko womahunauahi ekola abe ma oraha womahunaka de ahao Ma Jou wietongo wototiai? De gea ma oraha abe ko womahunauahi de Ma Jou wietongoka wototiai unangika, ho ngaro o Abarahaama ko iwihiromanguahi o Yahudi ma nyawa masara Ma Jou wietongo wato wototiaioka.

¹¹ De igoungu ipahaino de ahao Ma Jou wihuloko o Abarahaamika la womahuna, de ai huhulokino gea o Abarahaama waniiki. Masara ai huhuna gea idadi o dodunguu dika abe ma titi Ma Jou widafongoka de wietongoka o Abarahaama wato wototiai abe ma titi ai ngongakuino. Ho gea o Abarahaama ko womahunauahi de wingakuokau Ma Jouika. De genangino ka idadi hamake Ma Jou ai hininga ma dumutu moi, la o Abarahaama wodadi manga domoro abe o nyawa onagona dika ko yomahunaua de iwingakuoka Ma Jouika, la hiadono onangoo mata-mata ka idadi Ma Jou waetongo onangika wato yototiai. Ho gea ngaro ngini abe ko o Yahudi ma nyawaua de ko nimahunaua, masara nako hiadono niwingakuoka Ma Jouika ho winietongo nginika wato nitotiaioka to Una ai himangoka, gea nginioo nidadioka to Abarahaama ai totoforauku angamoi nia hiningaka de nimakiniiki hoka unangoli ai hininga!

¹² De o Abarahaama unangoo wodadioka manga domoro abe onagona dika yomahunaka de iwingakuoo Ma Jouika abe imaketero hoka o Abarahaamoli wingaku Ma Jouika. Masara iti ufa yomahinganono manga huhunaika de manga toforaika dika la yomahiromanga o Abarahaama ai toforauku. Abe hohiorikoka o Abarahaama ko womahunauahi de wingakuokau Ma Jouika, ho ngaro o nyawa yomahunaka masara iti manga ngongaku Ma Jouika imakiniiki de hoka to Abarahaamoli ai ngongaku ma dodihiraino gea. De nako hokogea onangoo ka idadi iwifetongo o Abarahaamika ato to ona manga domoro ma titi manga ngongakuino, de Ma Jou ka idadi waetongo onangika wato, “Ngini naa nitotiaioka to Ngohi ahi himangoka.” Ho genangino de duru itararono abe Ma Jou waetongo o nyawaika wato yototiai ma titi manga ngongakuino dika Unangika, de gea idadi o hiowa moi duru ma amoko ngoneino abe hingaku-ngakuoka!

O Abarahaama wamake Ma Jou ai behehongo ma owa unangika ma titi wingaku Ma Jouika

¹³ De naa tohipuda ma titi moioli o Abarahaama ai wowangoino abe inahimatoko abe Ma Jou wahiowa o nyawaika ma titi manga ngongakuino de ko ma titiua ai Paretaino de wahiowa. Ho abeika ma moioli homahihohininga hokokia idadi o Abarahaama ai wowangoka la hohikohowono o ngongaku de o Pareta gea. Abe ngone hohioriki ma dodihiraino de Ma Jou wahibehehongo o Abarahaama de ai totoforaukuikaoo abe wato o duniaka naa de ona ahao yamake o hiowa duru kohangoe. De gea tonaleha, sarakia, Ma Jou wahingodumu ma hiowa o Abarahaamika mangale ma titi una wanii-niiki ma Paretaika? Duru hokogenangua! Abe ma hiowa ai behehongino, gea Ma Jou wahingodumu o Abarahaama de ai totoforaukuikaoo ma titi abe o Abarahaama wingaku Unangika. De duru ai ngongaku gea ma titi hiadono Ma Jou wietongo wototiai ai himangoka. Ho gea Ma Jou ai hiowa wahingodumu onangika de gea duru ko ihititiua o Paretaino.

¹⁴ Angamoi nako hoka o nyawa abe yanii-niiki de yomahinganono ma Paretaika de ona gea dika ahao yamake ma hiowa Ma Jou ai behehongoka de aino, gea de ahao tanu ngaro ufa dika de o nyawa iwingaku Unangika! Abe nako hoka ona dika yamake ai hiowa ma titi ma Pareta atobaniiki, gea de nanga ngongaku ka parahaja dika angamoi ngone ko hamakeua! De abe to Una ai behehongo ma owa, enangoo idadi o behehongo ma homoa dika nako ma dumutu onangika yatobaniiki ma Paretaika. Angamoi abeika, ngone hohiorikoka o nyawa moioo de ko iwa abe ka yakunu yaniiki itiai to Una ai Paretaika, ho gea o nyawa moioo de ko iwa abe ka idadi yamake ma hiowa abe ma dihirainohi de Ma Jou wahibehehongo onangika. Ho gea koaho ngaro ufa dika de wahibehehongo o nyawaika nako ko moiua yamake!

¹⁵ Masara ngone hohioriki de hongaku abe to Una ai hiowa o nyawa ka idadi yamake ma titi manga ngongakuino de ko ma titiua o Paretaino. Angamoi nako ma Pareta gea inahohowono o nyawaika onagona dika abe ko itiaiua hanii-niiki to ena ma demo mata-mataika. Ho ko hamakeua ma owa ma Paretaino masara ka o hohowono dika hamake. Abe nako hoka duru ko iwa o pareta o duniaka naa, gea ngone o nyawa ko hatilakurua o paretaika de o hohowono ko inadaenua ngoneino. Masara mangale igoungu naga Ma Jou ai Pareta, gea nagaoo o nyawa abe yatilakuru enangika de kiani yamake manga hohowono genangino. Ho genangino de ka idadi hamake abe ma Pareta ihiboa o hohowono ngone o nyawaino de ko ihiboaua to Una ai behehongo ma hiowa.

¹⁶ De igoungu abe Ma Jou woigo wonahiowa ngone, ho Una wohiaturu la ngone o nyawa ka idadi hamake to Una ai hiowa ma titi nanga ngongakuino dika. Abe ma hiowa gea mata-mata wosanangi wonahidoaka ma titi ai hininga ma owaka dika de aino, ho ko wohiaturua la ngone hamake ai hiowa ma titi nanga datorino. De ena gea ma titi hiadono Una wohiaturu la onagona dika iwingaku Unangika de ona gea ka idadi yamake ma hiowa Unangoka de aino abe ma dihiraino de wahibehehongoka. De hokogea Ma Jou wohiaturu la ka idadi to Abarahaama ai totoforauku mata-mata ka idadi yamake to Una ai hiowa Unangino. Abe gea ma titi ngaro o Yahudi ma nyawa abe iwingaku Ma Jouika de ka yanii-niikohi ma Paretaika, de ngaro ona ko o Yahudi ma nyawaua abe manga ngongaku ka imaketero dika hoka to Abarahaamoli ai ngongaku Ma Jouika, masara ona iwingaku-ngaku mata-mata Ma Jou woigo la yakokimake ma hiowa Unangoka de aino. Angamoi ngone hingaku-ngaku mata-mata to ngone nanga tofora ma domoro ka womatengo dika o Abarahaama.

^17-18 De gea duru imakiniiki de Ma Jou ai Demo-demoino moi abe ma dodihiraino de ihitulihukuoka. Abe ma demo gea ma goronaka de Ma Jou wihibehehongo moi o Abarahaamika. De gea Ma Jou wotemo wato, “Ngohi tonihidadioka o kapongo ma ngoe manga baba abe ngaro o nyawa yomakokitingakika o nuuhu homoi-homoioka hiadono manga demo imalolihowono, ma, yobaba ngonaika.” Hokogea Ma Jou wotemo ma dodihiraino, de hokogea o Abarahaama wodadioka to ngone mata-mata nanga tofora ma domoro ngaro to ngone nanga nuuhu imaketemomomoi. De gea Ma Jou Una ma hirete abe wihibehehongo o Abarahaamika wato ahao to una ai totoforauku naga ko manga ngoe. De ngaro tanu ko iwaka o Abarahaama ai nganganono ai badangino abe una ka idadi ai ngofaka womamake, masara o Abarahaama duru ka wingakuohi Ma Jouika ma titi ai behehongo ma demo gea. Angamoi ngaro una ma hirete ai badanga eko ngaro to ngoi fekata ami badanga, masara tanu duru ko iwaka ma buturungu la manga ngofaka yomamake ma titi yaperekiokaholi, ho done sarakia de yofaa-faatuku hiadono manga totoforauku yodadi ko manga ngoe? Masara ngaro hokogea manga badanga masara o Abarahaama ka wingaku Unangika. Abe una womatemo ai hiningaka wato, “Ngohi tohioriki abe Ma Jou Una ka wakunu wahimomikoli o nyawa abe yohone-honengoka. De tongakuoo abe Ma Jou ka wakunu wohidadi o kia dika abe ko idadiuahi.” Ho mangale ma titi ai ngongaku hokogea hiadono o Abarahaama wingaku abe Ma Jou ka idadi wihidoaka moi o ngofaka de ka hiadono ai totoforauku ahao womamake ko manga ngoe. De nagali wingaku abe o nyawa ko manga ngoe abe manga ngi de manga demo imalolihowono, ma gea ona mata-mata yobaba unangika. De hokogea idadioka abe o Abarahaama ai totoforauku yodadi duru ko manga ngoe abe imaketero hoka ma dodihiraino Ma Jou wihibehehongo unangika wato, “Ahao to ngona ani totoforauku ko manga ngoe imaketero hoka o murumoli daku o dihangoka duru kohangoe.”

¹⁹ De ngaro ma oraha abe Ma Jou wihibehehongo unangika de ai taongo ngade-ngade o ratuhu moi wadonoka, masara o Abarahaama ai ngongaku duru ko ikurangua, de abe duru wangaku Ma Jou ai behehongika. De tanu una womaetongo ai badanga wato ngade-ngade imaketero hoka o honengoli angamoi iwiperekiokaholi. De to una ngoi fekata o ngo Sara muna gea duru ko ma moiuahi de ami badangoka, ho to muna ami ngofaka ma ngi imaketero hoka ihonengoka.

²⁰ De ngaro hokogea masara to Abarahaama ai ngongaku Ma Jou ai behehongika gea ko idomo-domoua masara ka idogo-dogo iputurungu. De ngaro ma oraha gea ko womamakeuahi ai ngofaka abe ma behehongino, masara ka idadiohi una wohitarimakase de wihigiriiri Ma Jouika abe ma titi ai ngongakuino.

²¹ De hokogea to una ai hininga angamoi duru wohioriki de wonganono abe Ma Jou ka wakunu wohingodumu to Una ai behehongo unangika.

²² De gea mangale ma titi o Abarahaama ai ngongakuino hiadono Ma Jou wietongo unangika wato una wototiai ai himangoka.

²³ De ipahaino de ihitulihuku Ma Jou ai Demo-demoka ma titi o Abarahaama ai ngongaku gea. Abe itemo ato, “De gea o Abarahaama wietongo wato una duru wototiai Ma Jou ai himangoka de hiadono widafongo angamoi una gea wingaku Ma Jouika.” Masara tanu ma demo gea ma dodihiraino de to ena ma hidumutu ka o Abarahaamikaua dika,

²⁴ masara nagaoo to ena ma hidumutu ngoneinoo. Abe ma demo gea duru inahigaro ngoneino la ka idadi hohioriki abe ngoneoo ahao Ma Jou wonaetongo wato ngone duru hototiai to Una ai himangoka, de gea wonadafongo angamoi ngoneoo hingaku Ma Jouika abe imaketero hoka o Abarahaamoli ai ngongaku Unangika. De gea ngone hingaku Unangika abe Una wihimomikoka nanga Baluhu idodutu o Yesusu ai honengino.

²⁵ Abe o Yesusu Una iwihidoaka o nyawaika la iwihohonenge ma titi to ngone nanga howo-howono, de ipahaino de Ma Jou wihimomiki angamoi woigo wonahimatoko ngoneino abe to Yesusu ai bobangu o gotaka gea Ma Jou wodafongoka. De o Yesusu ai datorino gea ma titi hiadono Ma Jou ka idadi wonalega ngoneino de wonaetongo wato, “O nyawa naa manga howo-howono taofioka ho naa yototiaioka to Ngohi ahi himangoka.” Ho ngaro nanga tofora ma dodihiraino o Abarahaama de hiadono ngoneoli ma oraha naa, masara ngone mata-mata Ma Jou wonaetongo hototiai ma titi moi dika, abe nako ngone hangaku Ma Jou ai behehongika abe ma dodihiraino de wonahibehehongoka ngoneino.