Roma 3 - Ma Jou ai Demo-demo o Totobelohoka

Ma Jou Una duru watobagou-goungu ai demoika ho wototiai ai putuhoka

¹ De marai ngini utu niihene ahi demo abe tinihingahu ngini o Yahudi ma nyawaika tato ka idadiohi Ma Jou winihohowono nginika, ho ngini nimatemo nia hiningaka niato, “Naa done sarakia? Angamoi ngomi miato bote Ma Jou womihiutumu dika ngomi ai nyawaino. Masara nako ngomi o Yahudi ma nyawa ahao Ma Jou womihohowono imaketero hoka onangikali abe ko o Yahudi ma nyawaua wahohowono, gea done hokokia to ngomi mia utumu ma titi ngomi mimaboa o Yahudi ma nyawaino? Marai duru ko iwa! De mia huhuna abe mia badangino marai enangoo ko imihiutumua!”

² Masara duru hokogenangua ahi demo kangano ma titi! Abe ngohi tato ngone o Yahudi ma nyawa nanga utumu naga de duru kohangoe. De abe nanga utumu duru ikurutiye, gea abe Ma Jou wonahidoaka to Una ma hirete ai behehongo ma demo ngoneino. Ho to Una ai behehongo ma demo abe wonahidoaka ngone o Yahudi ma nyawaino, ena gea nanga utumu abe duru ikurutiye. Abe Una wonahidoaka ai demo-demo ngoneino gea de wonahitagongo la wato ngone haniiki enangika.

³ Masara hiokoo, angamoi o Yahudi ma nyawa utu ngaro yomahiketehibehehongoka de Ma Jou abe ona ato yaniiki ai behehongo ma demoika, masara ipahaino de ona ka yawohangika angamoi ko yagou-goungua enangika. Masara ngaro ona gea yoeluku de ko yagou-goungua yaniiki Ma Jou ai behehongo onangika, ma ufa hiadono hafikiri abe Ma Jou Unangoo ko wagou-goungua abe ma titi ai behehongo gea ngoneino.

⁴ Angamoi nako Ma Jou Una duru watobagou-goungu dika ai behehongo ma demoika de duru ko idadiua woeluku. Abe ngaro ngone o nyawa mata-mataika hoeluku masara nako Una hokogenangua. Una ka ihikaika watobagou-goungu dika ai demoka. Ho ngone o Yahudi ma nyawa nanga hiowa duru kohaamoko kiani hamake angamoi hohioriki abe Ma Jou Una ahao wonahingodumu to Una ai behehongo ma demo abe wonahibehehongoka ngoneino wato wonahiowa ngoneino. Masara ufa ngini niataoko ihowono ahi demo. Angamoi igoungu ngone ka idadi hamake nanga hiowa Ma Jouoka de aino angamoi watobagou-goungu ai demoika. Masara ngaro wonahiowa, ma ufa homafikiri abe Una ko idadiokaua wonahohowono. Angamoi ma oraha wahohowono o nyawaika abe yahowono Unangika, enangoo wagou-goungu ai demoika abe ma dihiraino de wohibehehongoka. De abe ma titi Ma Jou watobagou-goungu ai demoika, gea naga ma demo moi abe ihitulihukuoka to Una ai Demo-demoka abe enangoo inahingahu ma titi Una watobagou-goungu. De itemo ato, “Abe ma oraha Ngona Jou notemo-temo de ani demo gea itaana abe duru itiai. De nako naputuhoka ma titi o nyawa manga howono, gea ani putuhu duru itotiai dika, ho ko moiua ka idadi initae Ngonaika de inihitaana abe ona ato ko itiaiua ani putuhu gea.” Hokogea ihitulihukuoka ma dodihiraino, de genangino hamake abe Ma Jou duru watobagou-goungu ai demo mata-mataika. Ho mangale ma titi Una womahibehehongoka wato wahohowono o nyawa abe ko iwihingounua Unangika, hokogea kiani wahohowono dika angamoi Una ka ihikaika watobagou-goungu ai demo mata-mataika. Abe nako ko wahohowonua onangika abe ko iwihingounua, gea imaketero abe wawohangika ai behehongo ma demo de woeluku ai demoino. Masara Una duru hokogenangua angamoi ka ihikaika watobagou-goungu mata-mataika. Ho genangino de hamake abe Una kiani wahohowono o Yahudi ma nyawaikaoo angamoi ona ko iwihingounua Unangika.

⁵ De marai naga utu abe ka yotemohi ato ko itiaiua la Ma Jou wahohowono onangika. Abe ona gea tanu o bodo ma demo dika itagi manga hiningaka, abe ona yomatemo ato, “Bote to ngone nanga howonino de ma bahauku de utuohi itararono o nyawaika ma titi Ma Jou ai totiai. Angamoi nako o nyawa inamake to ngone nanga datoro ma dorou de gea ihidotelega de Ma Jou ai totiai, gea bote yomafikiri ato, ‘Ma Jou duru ka Unangohi wototiai!’ Ho gea marai iwihigiriiri Ma Jouika angamoi ai totiai yamake duru kohagurutiye. De manga higiriiri ma demoino gea de ka idadi Ma Jou wamake ma utumu. Ho gea bote ka idadi hohiromanga hato mangale ma titi nanga howonino gea de hiduhunu Ma Jouika angamoi o nyawa ka idadi iwihigiriiri Unangika.” “Ho nako ma titi ngone nanga howonoka de hiadono Una wamake ma utumu, ho gea done sarakia de Una wonahohowono ngoneino ma titi nanga howono gea, angamoi bote nanga howonino ma titi hiadono o nyawa iwihigiriiri Unangika? De gea marai ko itiaiua Una wonahohowono ngone!” Marai hokogea o nyawa utu manga hininga, masara nako to ngohi hokogenangua.

⁶ De to ona manga hiningaka gea de duru yahowono. Angamoi igoungu Ma Jou Una duru wotobatotiai, ho ai hohowono o nyawaika duru itaana de manga hininga. Abe ngini o Yahudi ma nyawa, ngini ma hirete nihiorikoka abe Una kiani wahohowono o dunia ma nyawaika ma titi manga howo-howono Unangika. Masara barikua nihioriki gea de naa ngini niato bote Una ka idadi winihidogunoa dika de ko winihohowonua nginika abe ngaro nginioo niahowo-howono Unangika abe nimaketero hoka o dunia ma nyawali! Duru ko idadiua! Angamoi nako hoka Ma Jou ko winihohowonua ma titi ti ngini nia howo-howono, gea de ko wagoungokaua ai behehongo ma demoika, de ko wototiaiokaua! Ho tanu ngini nihioriki abe Una kiani wahohowono o nyawa mata-mataika abe yahowono Unangika, abe ngaro o dunia ma nyawa de ngaro nginioo o Yahudi ma nyawa! De genangino de itararono abe to Una ai hohowono nginika duru itaana de itiai.

⁷ De nako ona abe manga hiningaka de yalawana ahi demoika, marai naga utuoli manga demo abe genangino de ona ato iwidaparihi manga howono Ma Jouika. Abe marai yomatemo manga hiningaka ato, “Masara nako ngomi naa ko miagou-goungua ma behehongika, genangino de ahao o nyawa utuohi itararono yamake abe nako ngomi de Ma Jou, ka Unangohi abe duru watobagou-goungu ai behehongo ma demoika. De gea ahao utuohi ikiria iwihigiriiri Unangika. Ho gea ngaro ko miagoungua mia behehongika ho miahowono Unangika, masara genangino de tanu o higiriiri wiwihiboa Ma Jouika. Ho gea ko itiaiua abe Una womihohowono ngomino angamoi ma titi ngomioka de Una wamake o higiriiri o nyawaino.” Hokogea marai o nyawa utu manga hininga.

⁸ Masara nako hoka to ona manga hininga gea ngone hanii-niiki, gea imaketero abe hoka hadotoko o nyawaika hato, “Abeika homahitorou dika la ma bahauku de ihiboa ma rorahai, abe ahao o nyawa duru iwihigiriiri Ma Jouika angamoi duru ka Unangohi duru wototiai nako inahikohowono ngone de Una.” Hokogea to ona manga hininga, de gea manga demo eko manga hininga duru ko itiaiua. De tanu naga utu o nyawa abe ihitae ngohino ato, “O Paulusu una gea ai dodotoko ma goronaka de wahigaro o nyawaika la ona yahowo-howono de wato bari genangino de Ma Jou ai hininga ma owa utuohi ma amoko ona yamake manga wowangoka.” Hokogea ihitae ngohino, masara naa tomahingahu tato duru hokogenangua to ngohi ahi dodotoko ma dumutu. De hongoli ngohi tato onagona dika abe hokogea to ona manga dodotoko, gea duru itiai abe ahao to Ma Jou ai hohowono yadaene onanguku. Ho tohidotoomuino ahi demo ma titi hokonaa. Abe ngaro ngone o Yahudi ma nyawa abe inahiromanga Ma Jou ai nyawa, masara nako hiadono ngone hahowono Unangika, gea kiani Una wonahohowono ngone. De ai hohowono de ai dodotoko ngoneino, gea duru itotiai dika angamoi Una gea watobagou-goungu dika ai demoika.

Abe ma titi o nyawa mata-mata yahowonoka

⁹ De abe ma titi Ma Jou wonahohowono ngoneino, marai naga utu o Yahudi ma nyawa abe manga hiningaka de yomatemo ato, “Masara abe ma oraha wonatailako Ma Jou de bote ngone o Yahudi ma nyawa hatoli ikuranga ikiria nanga hohowono Unangino angamoi ngone naa to Una ai nyawa.” De nako ma demoika gea ngohi tapaluhu de tato duru hokogenangua ahao idadi. Angamoi kanganohi ahi hurata naa ma demo ma goronaka de tinihitararonoka abe ngaro o Yahudi ma nyawa eko ngaro ona abe ko o Yahudi ma nyawaua, masara duru o nyawa mata-mataika de ngone o howono ma kuahaka homanoa. Ho gea ngone mata-mata ahao nanga hohowono kiani hamake Ma Jouoka de aino.

¹⁰ De ahi demo gea hohioriki igou-goungu angamoi ihitagaiye de Ma Jou ai Demo-demo muruono naga abe duru imakiniiki ma titi. De gea ma dodihirainohi de ihitulihukuoka de itemo ato, “Nako Ma Jou ai himangoka duru ko moiua abe Una waetongo onangika wato o totiai ma nyawa. Abe ngaro moioo ma ko iwa.”

¹¹ De nagali ihitulihukuoka ato, “Duru ko moiua o nyawa abe yataoko itiai Ma Jou ai hininga.” De naga moioli ato, “De duru ko moiua abe manga hiningaka de ka ihikaika yoigo iwihioriki Unangika.”

¹² De nagali itemo, “De o nyawa mata-mataika iwiporetoka Ma Jou de ko iwihingounokaua. Ho ona mata-mata manga hininga ka parahaja dika Ma Jou ai himangoka. De duru ko moiua o nyawa abe yotobadiai ma rorahai. Ma duru moioo de ko iwa!”

¹³ “De to ona manga uru tohiketero tato hoka o lungunu abe de ma melaka, angamoi manga demo abe manga uruoka de aino ihupu gea hoka o gorofu dika.” De naga moioli itemo, “De manga akiri ijaga hoka o karianga ho ka ihikaika ona yotobaeluku.” De nagali ato, “De abe manga demo abe ipaata manga uruoka de aino, gea duru kohabiha abe imaketero hoka o dodiha ma mibiha.”

¹⁴ De nagali, “Ho to ona gea manga uruino ihupu ka o dohata de o doana dika ma demo ihihupu.”

¹⁵ De utuoli naga, “De nako o doma ipuda manga hiningaka, gea ka yosoboka la ato o nyawa yalingiri la yatoma.”

¹⁶ De moioli, “De ona gea o kiaika dika yoiki masara genangoka idadi o kangela de o huha angamoi ona ka ihikaika yahikangela manga dodiawo mata-mataika.”

¹⁷ De nagali, “De ona duru ko ihiorikua hokokia yomakadame de o nyawa eko yomakao irahai de utuoli.”

¹⁸ De nagahi, “De ona manga hiningaka duru ko iwa manga horomati eko manga hingounu Ma Jouika.” Hokogea mata-mata abe ma dodihiraino ihitulihukuoka Ma Jou ai Demo-demoino.

^19-20 Ho naa ahi gogianongoru o Yahudi ma nyawa, abeika homafikirohi ma titi Ma Jou ai Demo-demo gea. Ai demo gea atulihuku o kia ma bukuku? De gea hohioriki abe ma demo atulihuku to ngone o Yahudi ma nyawa nanga Pareta ma bukuku. Ho gea duru itararono abe ai demo wonahidumutu ngone o Yahudi ma nyawaino, angamoi ngone naa abe homanoa to Una ai Pareta ma goronaka. Ho abe ma demo, “duru ko idadiua Ma Jou wonahitotiai to Una ai himangoka ma titi ngone hatobanii-niiki to Una ai Paretaika,” enangoo wonahidumutu ngoneino la ai demo gea inadaene ngone. De genangino de tanu ngone o Yahudi ma nyawa kiani hataoko itararono abe ngoneoo o howo-howono ma nyawa to Una ai himangoka, ho duru itiai Ma Jou wonahohowono ngoneuku! De abe ma titi Una ko wonahitotiaiua ai Paretaino, gea duru igoungu angamoi duru ko iwa o nyawa abe ai Pareta ma demo mata-mataika yatobanii-niiki. De tanu nako ngone homadotoko Ma Jou ai Paretaino, duru genangino abe inahimatoko abe ngone mata-mata duru hahowonoka Unangika. Abe to Una ai Paretaino de wonahimatoko nanga howono la hiadono ngone mata-mata ka idadi homahioriki abe ngone hagoungu hahowonoka Ma Jouika. De genangino to Una ai hininga ma dumutu hiadono wonahidoaka ai Pareta ngoneino, la duru itararono abe ngone mata-mata o duniaka naa, abe ngaro o Yahudi ma nyawa eko abe ko o Yahudi ma nyawaua, masara ngone mata-mata hahowonoka Unangika ho ai hohowono inakokidaene ngoneuku de duru itiai. Ho abe Ma Jou wonahingahu ai demoino wato ngone mata-mata o howo-howono ma nyawa de ka idadi wonahohowono ma titi genangino, gea tanu duru ko idadiokaua homademo, ho koaho ngone ka homou-mou dika to Una ai himangoka! De igoungu duru itararonoka abe ngone mata-mata hahowono Ma Jouika ho duru itiai nanga hohowono inaboridaene Unangoka de aino. De nagali itararono abe duru ko idadiua Ma Jou wonahitotiai ma titi hanii-niiki to Una ai Paretaika.

Abe ma titi Ma Jou ka idadi wonahitotiai ma titi ka o Kristusu dika ai datorino

²¹ De ngaro hokogea nanga kangela, masara naa ma duru de Ma Jou wonahimatoko ngoneino to Una ai ngekomo la ka idadi nanga howo-howono waofi de hiadono wonahitotiai genangino. De ai ngekomo gea duru ko ihititiua ai Paretaino. De ngaro ai ngekomo la wonahitotiai ko ihititiua to Una ai Paretaino, masara tanu gea ma hingahu ma dodihiraino de ihitulihukuoka Ma Jou ai Demo-demo ma goronaka abe o Musa de Ma Jou ai uru ma dodofanga utu ona mata-mata yahitulihuku. Abe manga demoino gea de Una wonahibehehongokau wato ahao wonahidoaka ngoneino ma ngekomo la genangino de wonahitotiai. De mangale ma titi ona ma dodihiraino yahitulihuku ai behehongo gea ho ka idadi duru honganono de hongaku abe ma demo gea igoungu. De naa ma duru ahao Ma Jou wonahitararono abe ma titi ai ngekomo gea.

²² De gea ma ngekomo hokonaa. Abe Ma Jou wonahitotiai ngone onagona dika abe hingaku-ngakuoka o Yesusu Kristusika. De gea ka moi dika ma ngekomo, abe ngaro o Yahudi ma nyawa eko ngaro abe ko o Yahudi ma nyawaua, masara ma ngekomo moi dika haniiki la Una wonahitotiai ngoneino, de gea ma titi nanga ngongaku o Yesusu Kristusika. De gea nanga ngekomo moi dika angamoi ngone o nyawa mata-mata de ko homakohowonua to Una ai himangoka.

²³ Abe ngone o nyawa ka homakokadaene dika to Una ai himangoka mangale ma titi ngone mata-mataika hakokihowonoka Unangika. Ho ngone o nyawa ko moiua naga de nanga debi-debinoka hoka to Unangoli ai medebini, angamoi Ma Jou Una duru de ai medebini ma dararonoka, ho ngone ko moiua hadono genangika.

²⁴ Ho mangale ma titi Ma Jou ai hininga ma owa ngoneuku ho hiadono ngone wonahitotiai. De ai totiai gea ka wonahidoaka dika ngoneino angamoi o Yesusu Kristusu wonabanguoka ngone la wonahihohe nanga howo-howonino.

²⁵ De hokonaa Ma Jou ai hidee ma dodihirainohi la wonahitotiai. Abe ma dihiraino de Ma Jou wihidingoto de wihimatoko o Yesusu Kristusu o duniaika la Una wodadi nanga howo-howono ma bobangu abe ma oraha to Una ai awunu ikopoa o gotaka. De to ngone nanga howono aofioka angamoi ngone hangaku o Kristusu ai datorika gea abe ma titi ngone. De gea Ma Jou wonaduhunu ma titi o Kristusino la ai datorino gea de Ma Jou ka idadi womahitaana abe duru wototiai ai datorino. Angamoi nako o nyawa yahowono Ma Jouika masara Una ka wahidogunoaika dika de ko wahohowonua, gea igoungu ko wototiaiua ai datorino angamoi ko iwa manga bobangu abe ma titi manga howonino gea. De igoungu abe ma dodihiraino gea naga o nyawa manga howo-howono Unangika masara Una ka womatongohonohi ho ko wahohowonuahi onangika.

²⁶ Masara ma oraha naa de itararonoka abe Ma Jou wohidotoomuino ka ma moi o nyawa mata-mata manga howono la gea mata-mata o Yesusu Kristusu womahimoku ka ma moi abe ma oraha wohonenge o gotaka. Ho ngaro o nyawa ma dodihirainohi eko hiadono ngoneoli ma oraha naa, masara to ngone mata-mata nanga howo-howono wohidotoomuinoka la ka ma moi wahohowono enangika abe o Kristusu ai badangino. De genangino Ma Jou womahitaana abe duru wototiai angamoi o howono mata-mata wakokihohowonoka. De gea ma titi hiadono ka idadi hihiromanga Unangika hato Una duru wototiai de Unangoo abe wonahitotiai ngone onagona dika hingaku-ngakuoka o Yesusika.

^27-28 Ho naa tonaleha moi. Ho sarakia, ka idadi ngone homagorakiye ma titi hototiaioka Ma Jou ai himangoka? Duru ko idadiua! Angamoi nako hoka ngone hatobanii-niiki itiai to Una ai Paretaika, gea marai ahao ngone ka idadi homagorakiye. Abe gea ka idadi homahikurutiye hato, “Ma Jou wohihitotiai ngohi ma titi to Una ai Pareta ka ihikaika taniiki enangika!” Masara duru ko idadiua homagorakiye, angamoi ngone moioo de ko hakunua haniiki itiai ai Pareta gea! Ho ngone naa ka idadi duru hohioriki abe naga ma titi moi dika hiadono o nyawa Ma Jou wahitotiai. De gea ko ma titiua manga datorino abe yatobanii-niiki ma Paretaika, masara abe ma titi manga ngongakuino dika hiadono Ma Jou wahitotiai onangika. Ho mangale ma titi nanga totiai gea hamake de ko ihititiua nanga datoroka de aino, ho ngone duru ko idadiua homagorakiye ngone ma hirete angamoi ka Ma Jouoka dika abe wonahitotiai.

^29-30 Ho sarakia, marai o Yahudi ma nyawa ka idadi yomagorakiye de yotemo ato Ma Jou Una gea ka o Yahudi ma nyawa dika manga Jou de Una wahidoaka ma ngekomo ka onangika dika la wahitotiai genangino? Duru ko idadiua yomagorakiye hokogea! Angamoi nako Ma Jou, Una gea o nyawa mata-mataika manga Jou ho ngaro o Yahudi ma nyawa eko abe ko o Yahudi ma nyawaua masara to ngone mata-mata nanga Jou. Ho mangale ma titi igoungu nanga Jou Una ka womatengo dika, ho nagaoo ma ngekomo moi dika abe Una wonahitotiai ngone o nyawa to Una ai himangoka. Ho ngaro ngone o Yahudi ma nyawa eko ko o Yahudi ma nyawaua, masara ngone mata-mata kiani naga de nanga ngongakuoka Unangika. Abe nanga ngongakuino dika ma ngekomo hiadono Una wonahitotiai.

³¹ De marai naga utu abe yataoko ihowono ahi demo ma dumutu ma titi ai Pareta, abe ona gea yafikiri ato, “Mangale ma titi ngone kiani hingaku dika Unangika, ho bote ma Pareta gea ko kia-kiaua ma titi.” Masara to ngohi ahi demo duru hokogenangua. Angamoi tanu ngone abe hingaku o Yesusu Kristusika, to ngone nanga ngongaku ihititi Ma Jou ai Paretaka de ai Demo-demoka ma dodihiraino. Abe ai Pareta de ai Demo-demo gea inahingahu de inahidumutu Unangika, ho ngone abe hingaku o Yesusika de gea imaketero hoka hadomoteke ai Pareta ma dumutika hato gea duru igoungu ma demo.