Roma 2 - Ma Jou ai Demo-demo o Totobelohoka

Nako Ma Jou wonatailako nanga wowango, Una duru ko wonairikua

¹ De marai naga nginioka utu abe nitemo niato, “Igoungu, nako o nyawa manga wowango hokogea itorou, gea itiai abe nako Ma Jou wahohowono onangika gea.” De nako hokogea ti ngini nia demo, ka idadi ngohi tinipaluhu nginika hokonaa la nimafikirohi. De gea ngohi tato nako hiadono ngini ma hirete niatailako o nyawa utu manga wowango de nimaputuhu niato koaho ona gea Ma Jou ai hohowono yadaene onanguku, de duru genangoka de duru nimahidumutu de nimahohowono ngini ma hirete, angamoi tanu ti nginioo nia datoro ma dorou utu imakiniiki abe hoka to onangoli. Ho done sarakia ngini nioigo niahohowono o nyawa utuika ma nako ngini ma hirete gea niato nia howono ko iwa? De gea ngini ko idadiua nimahipongono ma titi ti ngini nia howo-howono.

² Angamoi ngone mata-mata hohiorikoka abe nako onagona dika manga wowango ma datoro hokogea itorou, ona gea ahao Ma Jou kiani wahohowono onangika. Abe to Una ai putuhu duru itiai dika de ihititi ma gou-goungoka, ho Una duru ko wairikua o nyawa.

³ Ho abeika, ngini naa ka o nyawa dika masara niataoko itararono abe Ma Jou kiani wahohowono onangika abe yahowono Unangika. Masara genangino de duru itararono abe nginikaoo Ma Jou kiani winihohowono, angamoi nginioo ma hirete nitobadiai o datoro ma dorou abe nimaketero hoka onangoli! Ho ngini ufa niafikiri abe ahao Ma Jou winiiriki ngini la ko winihohowonua. Angamoi nginioo ahao to Una ai hohowono kiani inihidotadaene nginiuku ma titi nia datoro ma dorouino. De ngini tanu nihiorikoka abe Ma Jou ai hohowono nginika itiai de itaana, angamoi nitemoka niato duru itiai nako Ma Jou wahohowono o howo-howono ma nyawaika. Ho ko idadiokaua nimademo angamoi itararono nginioo o howo-howono ma nyawa nidadioka!

⁴ De ngini ufaoo niataoko ihowono abe ma titi Ma Jou ai dongohono nginika abe ko winihohowonuahi. De igoungu abe Ma Jou ai hininga duru irahaiholi ngoneino de duru womatongohono de ai dongohono ma amoko la wato ka wonahidoakohi ma oraha ngoneino. Masara gea womatongohono de ai hininga ma rorahaiino ko mangaleua ma titi abe winihigunoa dika la niahowo-howono, masara womatongohono la wato winihidoaka ma oraha la ngini nitoba nia howonino. Ho done sarakia ngini niaetongo ai dongohono ma amoko gea niato ko kia-kiaua?

⁵ De ngaro hokogea ai dongohono masara ngini ka nioluku nitoba ma titi nia hininga duru itogowinoka. De ngini ka nianiikohi nia datoro ma dorou, ho tanu ti ngini nia hohowono ka itou-touniye abe ahao dokengika de niamake Ma Jouino. Abe ahao ma wange adonoka de Ma Jou ai ngamo itagi o nyawaika abe yatobahowono Unangika. De ma wange gea de ahao mata-mataika ka idadi iwihioriki abe Ma Jou ai putuhu de ai hohowono gea duru itotiai dika onangika.

^6-11 De abe ma titi Ma Jou wonatailako ngone o nyawa nanga wowango, abeika tinihitararono nginika to Una ai hininga sarakia ma oraha wonalega ngoneuku. Abe nako to Una ai hiningaka de duru ko wairikua o nyawa, ho abe ngini o Yahudi ma nyawa, ufa ngini niafikiri abe ko winihohowonua mangale ma titi inihiromanga to Una ai nyawa. Hokogenangua to Una ai hininga, masara nako Una wonatailako de wonahibalaha ngoneino, gea ai hibalaha duru imakiniiki de o nyawa homoi-homoi nanga wowango ma datoro abe hodiaioka. Ho Una duru wototiai dika ai putuhoka, angamoi ngaro onagona dika masara walegaika manga datorika la womaputuhu manga hibalaha hokokia yamake. De hokonaa ma ngekomo Una waniiki la womaputuhu ma titi o nyawa manga hibalaha sarakia. Abe naga o nyawa utu manga hininga ma dumutu ka ihikaika itagi Ma Jouika angamoi ona duru yoigo la Ma Jou wasanangi onangika. De ona gea nagali abe duru yoigo la to Una ai medebini ma dararono ahao wahikodoku onangika de ka idadi yamake manga wowango abe duru ko iwa ma baha. De o nyawa abe manga hininga ma dumutu hokogea, ona ahao manga datoro ma rorahai yotobadiai, de ipahaino de ahao Ma Jou wahibalaha de ai hiowa duru ma rorahai onangika. Abe onangika gea wahiowa de to Una ai medebini ma dararono, de o horomati, de o hininga ma miriidi. De nagali abe Ma Jou wahidoaka o wowango ma ngango onangika! Ho onagona dika abe hokogea manga hininga de manga wowango imakiniiki de to Ma Jouoli ai hininga, ona gea Ma Jou wahibalaha de ma hiowa naa mata-mata. Abe ngaro ona ko o Yahudi ma nyawaua masara nako manga hininga hokogea ahao yamake ma hiowa ma hohailoa gea Ma Jouoka de aino. De hongoli to Una ai Yahudi ma nyawa, nako hiadono onangoo manga hininga imakiniiki de to Unangoli ai hininga, onangoo ahao kiani yamake to Una ai hiowa ma hohailoa Unangoka de aino. De genangino de iwihitaana Unangika abe nako de Ma Jou, Una duru ko wairikua o nyawa. Masara nagali o nyawa utu abe manga hininga ma dumutu duru imakohowono de to Ma Jou ai hininga, de ona mata-mata kiani yamake to Una ai hohowono onanguku. Abe ona gea ka to ona ma hirete dika manga perelu yolegaika, de abe ma gou-goungu ona yoluku yaniiki la ato ma datoro ko itiaiua enangoli yanii-niiki manga wowangoka. Ho onagona dika abe manga hininga hokogea ho hiadono manga datoro ma dorou yotobadiai, onangika gea kiani Ma Jou wahohowono. Abe ahao Ma Jou wahibalaha onangika de to Una ai hohowono ai ngamoino abe duru kohadubuho, ho ona mata-mata yamake o kangela de o huha ma amoko Unangino. De igoungu ona abe ko o Yahudi ma nyawaua de manga hininga hokogea, ona kiani yamake ai hohowono ma dubuho gea onangika. De hongoli to Una ai Yahudi ma nyawa abe manga hininga ko imakiniikua de to Unangoli ai hininga, onangoo duru kiani yamake ai hohowono ma dubuho onanguku. Angamoi nako de Ma Jou, Una duru ko wairikua o nyawa. Ho abe ma oraha wonatailako nanga wowango la womaputuhu nanga hibalaha hokokia ahao hamake Unangino, gea ai hininga ka moi dika wapake ngone mata-mataino. Ngaro ngone o Yahudi ma nyawa eko ko o Yahudi ma nyawaua masara wonalega homaketero dika to Una ai himangoka.

^12-13 De abe Ma Jou wonatailako ngone mata-mata la nanga hibalaha haborimake Unangoka de aino, gea nanga hohowono homoi-homoi duru itaana de nanga datoro, masara nako to Una ai hitailako ma titi, gea imakohowono. Angamoi o nyawa utu ihioriki Ma Jou ai Pareta masara utuoli ko ihiorikua ma Pareta gea. Abe nako o Yahudi ma nyawa, ona yamakeoka de yoihenoka Ma Jou ai Pareta abe ma dihiraino o Musa wahidoaka onangika. Masara abe o Yahudi ma nyawa ka yoihe-ihene dika to Una ai Paretaino, ko genanginoua ma titi hiadono Ma Jou waetongo yototiai ai himangoka angamoi gea ko yawedonuahi. Hokogenangua, masara ona abe manga wowango ma datoro imakiniiki de abe to Una ai Pareta ma goronaka, ona gea dika abe waetongo wato ona yototiai. Ho o Yahudi ma nyawa onagona dika abe ka yoihene dika ma Paretaino masara ko yaniikua enangika, ona gea yatilakuru ai Paretaika. De nako hiadono ona yatilakuru ai Paretaika de gea ahao manga hohowono ihititi genangoka, abe Ma Jou watemo onangika wato, “Ngini niatilakuroka to Ngohi ahi Pareta, ho kiani tinihohowono nginika de o hohonenge.” De abe ona ko o Yahudi ma nyawaua de yahowono Unangika, onangoo kiani wahohowono onangika la yomakitingaka Unangoka de aino ka hiado-adonika, masara manga hohowono gea ko ihititiua o Musa ai Paretaka. Angamoi igoungu ona gea duru ko iwa manga tobahioriki ma titi ma Pareta gea.

¹⁴ Masara tanu naga ma tobahioriki moioli abe Ma Jou wakelenga to ona manga hininga ma goronaka la ka idadi onangoo ihioriki o kia itiai de o kia itorou. De manga tobahioriki gea tohiromanga tato ngade-ngade idadi hoka o pareta moioli onangika.

¹⁵ De gea ka idadi hamake to ona manga wowango ma datorino abe utu ngade-ngade yaniiki o Musa ai Paretaino ngaro ai Pareta gea ko ma moiuahi yoihene. De nagali abe hamake onangoka abe ma oraha naga moi manga hiningaka ipuda manga datoro, ho kiani ona yomaputuhu nako ahao yodiai eko ko yodiaiua. De gea manga hininga ka de itemo de yahigaro ma totiaiika, ho ipahaino gea manga hiningaino de yomahioriki abe nako yodiaioka itorou ekola nako yodiaioka irahai. De genangino de ka idadi hamake abe onangoo gea ngade-ngade yomaketero abe hoka o Yahudi ma nyawali angamoi naga ma tobahioriki to ona manga hininga homoi-homoioka la ihioriki o kia itiai de o kia itorou. Ho nako hiadono to ona manga hininga yahigaro ma totiaiika de gea yatilakuru, gea itararonoka abe onangoo itiai Ma Jou wahohowono onangika. Ho gea ngohi tato ngaro o Yahudi ma nyawa eko abe ko o Yahudi ma nyawaua, masara o nyawa mata-mata Ma Jou wao itiai abe ma oraha watailako. Abe ko ma titiua Una wairiki o nyawa utu la wahohowono de utuoli ko wahohowonua. Hokogenangua, masara Una ai hiningaka de wotemo wato, “Onagona dika yahowono Ngohino de kiani tahohowono onangika, abe ngaro ihioriki o Musa ai Pareta eko abe ko ihiorikua, masara ahi hininga ma putuhu moi dika ona yahowo-howono mata-mataika.” De genangino de itararono abe duru itiai Ma Jou wahohowono ona mata-mataika abe yahowonoka Unangika ngaro onagona dika ma nyawa.

¹⁶ De gea mata-mata ahao Ma Jou wohidifikiri abe nako ma wange adonoka la Una wonatailako nanga wowango homoi-homoiino de waputuhu nanga hibalaha abe hokokia ahao wonahidoaka. De ma oraha gea de wonatailako abe ngaro nanga hininga ma datoro eko ngaro o kia dika naga nanga hininga ma goronaka abe o nyawa ko ihiorikua, ma gea mata-mata watailako ma oraha gea. De gea wihidoaka o Yesusu Kristusika la o Yesusu Una ma hirete wonatailako ngone. De hokogea ahi hingahu nginika ma titi hokokia hiadono Una wonatailako, de naa ahi hingahu ma demo duru imakiniiki de o Abari ma Rorahai abe ka ihikaika ngohi tahingahu-ngahu o nyawaika.

Ngaro o Yahudi ma nyawa ma onangoo itiai yamake manga hohowono

¹⁷ De naa naga ahi demo abe tinihidumutu ngini utu o Yahudi ma nyawaika. De ngini utu marai nia hiningaka de duru nisanangi angamoi inihiromanga nginika ato o Yahudi ma nyawa. De gea nimaimono angamoi naga nginioka Ma Jou ai Pareta o Musaino la nimahinganono genangika, de nagali abe nimahingahu de nimahikurutiye niato bari naga ti ngini nia gogao Ma Jouika, de genangino nimahingahu niato ngini nimahikurutiye.

¹⁸ De ngini igoungu abe inidotokoka Ma Jou ai Paretaino ho niato to Una ai mau nginika nihiorikoka, la o kia dika naga abe ka enangohi ihailoa eko irorahai, gea ka niakunu niairiki de nianiiki enangika.

¹⁹ De hongoli ngini duru nionganono de niamao nia hiningaka abe niato ka nginiohi de nia tobahiorikoka, ho niato ka idadi ngini niatobadotoko o nyawa utuikali abe ona gea manga tobahioriki Ma Jouika ka ikurangohi. Ho gea ngini nimahiromanga hoka o nyawa niatobahihira-hira abe ona yorafi-rafioka la ufa ma ngekomoka de aino yorehene. Eko nimahiromangoli abe niato nidadi o dararono onangika abe ka o fufutuokahi yomanoa.

²⁰ De ngini o Yahudi ma nyawa nimahiromanga o tobadotoko ma nyawa angamoi igoungu naga nginioka Ma Jou ai Pareta o Musaino, de duru genangoka imanoa o tobahioriki de ma gou-goungoo. Ho ngini niato bote ka idadi niatobadotoko onangika abe ko yobaluhuahi manga hiningaka ho ko ihiorikuahi Ma Jou ai dodotokino. De igoungu abe gea ma hiowa duru kohangoe nagau nginioka, ho igoungu ngini ka idadi nia hininga duru isanangi ma titi nidadi o Yahudi ma nyawa!

²¹ Masara naa tinileha moi nginika. De ngini gea abe nisanangi niatobadotoko o nyawa utuika, sarakia, ngini mode ko nimadotokuahi ti ngini ma hirete nia dodotokino? Abe hoka ngini niahuloko o nyawaika niato, “Ngini ko idadiua nitohiki.” Masara abeika ngini ma hirete, sarakia? Bote ngini ma hirete de ka idadi nitohi-tohiki.

²² De ngini abe niadotoko o nyawaika niato, “Ko idadiua nimakitigi de o nyawa ngaro onagona dika nako ko nia fekatua eko ko nia rokatua.” Ho sarakia, nako ma demo gea niadotokoka o nyawaika masara bote ngini ma hirete marai nidiaioka abe nimakitigi ko itiaiua? Eko nako nia dodotoko ma goronaka de marai nimahingahu niato duru niaemono ma titi o popangaoika. Masara abeika ngini ma hirete ka niwiporete Ma Jouika de nia horomati ko itagiua Unangika, ho gea done sarakia?

²³ Ho abeika ngini gea nimahikurutiye nia demoino abe niato ngini duru nihioriki to Una ai Pareta, masara barikua de niwihimaleke Ma Jouika angamoi ai Pareta gea ena ngini niatotilakuru.

²⁴ De ngaro o homoa ma nyawa masara onangoo inihioriki abe ngini ka niatotilakuru Ma Jou ai Pareta abe winihidoakoka nginika. Abeika, ngaro ona ko o Yahudi ma nyawaua abe duru ko ihiorikua to Una ai Pareta, masara ma oraha inilega ti ngini nia wowangoika de iwiwea-weara Ma Jou ai romangika ma titi nia datoro ma dorou. Abe yatotailako nia datoro gea de yomafikiri ato, “Ma dihiraino de inahingahu ngoneino ma titi Ma Jou Una duru wokokurutiye. Masara naa hamakeoka de nanga lako to Una ai nyawa manga datoro, abe ka ma dorou dika yotobadiai. Ho bote to ona manga Jou gea tanu ko kia-kiaua ai kuaha o nyawaika!” De hokogea ona ko o Yahudi ma nyawaua iwiwea-weara Ma Jou ai romangika mangale ma titi ti ngini naa nia datoro abe niatobalawana to Una ai Paretaika. De genangino de ngini ka nimakadaene dika de nia totofora ma dodihiraino, angamoi abeika Ma Jou ai Demo-demoino moi abe ma dodihiraino ihitulihukuoka. Abe itemo ato, “Mangale ma titi ti ngini o Yahudi ma nyawa nia datoro ma dorou ho hiadono ona abe ko o Yahudi ma nyawaua, ona iwiwea-weara Ma Jou ai romangika.” Hokogea ma demo ma dodihiraino abe ma dumutu nia totoforaika, de hokogenangoo idadi ma oraha naa naga ma titi ti nginioli nia datoro! Ho gea ngaro ufa de hoheranga ma oraha Ma Jou winihohowono nginika ma titi ngini nirehenoka ai ngekomoka de aino!

²⁵ De marai ngini utu nimatemo nia hiningaka niato, “Masara ngomi naa mianiikoka Ma Jou ai behehongo ngomi o Yahudi ma nyawaino abe wato kiani mimahuna. Ho mangale ngomi mimahunaka, ho gea imihitaana abe ngomi midadioka Ma Jou ai nyawa ho maraioka Una ko womihohowonua ngomi ai nyawaino.” De gea ka idadi tinipaluhu nia demoika gea, tato ngini niagoungu abe naga nia utumu niamake nia huhunaino. Masara gea kiani naga nia hingounu ai Paretaika la nia hingounu gea imakiniiki de nia huhuna, de gea ahao nia utumu ka idadi niamake nia huhunaino. Masara nako ngini nimahunaka masara gea de ka niatotilakuru ai Paretaika, de gea tanu nia huhuna ka parahaja dika. Angamoi ngaro nimahunaka masara ka winihohowonohi nginika ma titi niahowonoka Unangika.

²⁶ De ahi demo gea naga de ma dodiawoka. Ho naa moioli tinihingahu tato, nako hoka o nyawa abe ko yomahunaua de ona yatobanii-niiki Ma Jou ai Pareta abe gea ka itotiai dika, ona gea ahao Ma Jou waetongo onangika wato ona yodadioka to Una ai nyawa. De gea de ona yomaketero dika Ma Jou ai himangoka abe hoka ngone o Yahudi ma nyawa abe homahunaka.

²⁷ De nako tinihikohowono ngini o Yahudi ma nyawa abe nimahunaka masara ka niatotilakuru Ma Jou ai Pareta de onangoli abe ko yomahunaua masara yatobanii-niiki to Una ai Paretaika, gea duru ka onangohi abe yataana de to Una ai mau. Ho ahao to ona manga datoro ma rorahaiino de inihitaana nginika abe Ma Jou ai hohowono itiai ngini niamake. Angamoi abeika, ngaro o nyawa abe ma dodihiraino de ko yamakeua ma Pareta Ma Jouino ma ona ka akunu yaniiki to Una ai Paretaika. Ho hongoli ngini o Yahudi ma nyawa tanu ka idadi nianiiki enangika, angamoi ai Pareta gea ma deka-dekanuku naga nginioka. De ahi demoino gea mata-mata de itararono abe duru itiai Ma Jou winihohowono ngini o Yahudi ma nyawaika.

^28-29 De naa abeika homafikirohi ma titi o Yahudi ma nyawa gea tanu onagona. Abe ona gea manga wowango de manga hininga tanu hokokia hiadono yahiromanga onangika ato o Yahudi ma nyawa? Ka idadi homalega o nyawa manga rupaika de hahioriki o Yahudi ma nyawa eko koua? Ko idadiua! Angamoi nako Ma Jou ai himangoka, gea ko ma titiua o nyawa abe ka wanii-niiki dika o Yahudi ma nyawa nanga biaha masara ai hiningaka de ko winiikua Ma Jouika. Hokogenangua, angamoi nako o nyawa abe Ma Jou waetongo o Yahudi ma nyawa, ona gea manga hininga duru imakiniiki de to Ma Jouoli ai hininga. De gea ko ihititiua nanga badangino masara nanga hiningaino dika ihititi. De hokogenangoo abe ma titi o huhuna. Abe nako o huhuna ma gou-goungu la inahitaana abe ngone hodadioka Ma Jou ai nyawa, gea ko o nyawa nanga badangokaua, masara o huhuna abe nanga hiningaka. De ahi demo gea ma titi hokonaa. Nako hiadono Ma Jou o Womaha wokarajaanga to ngone nanga hiningaka la nanga hininga ma hafini ma dorou ihikitingakoka ngoneino, gea ena abe hohiromanga hato o huhuna ma gou-goungu. De ngone hohioriki abe nako ma Pareta, gea ena gea ko idadiua ihikitingaka nanga hininga ma hafini ma dorou ngoneino. Ho nako o nyawa abe Ma Jou o Womaha wokarajaangoka manga hiningaka la duru imakiniiki de to Unangoli ai hininga, ona gea abe Una waetongo onangika wato o Yahudi ma nyawa, de abe ona yodadioka Ma Jou ai nyawa idodutu. Angamoi igoungu to ngomi mia romanga abe imifetongo “Yahudi,” gea mia romanga ma titi o higiriiri. De onagona dika abe manga hininga imakiniiki de to Unangoli ai hininga, ona gea Ma Jou ka idadi wahigiriiri onangika wato, “Naa ona yodadioka to Ngohi ahi nyawa idodutu.” Ho ngini abe nimaboa o Yahudi ma nyawaino nimahikurutiye de nimahigiriiri ma titi Ma Jou ai Pareta naga nginioka de abe nimahunaka la bari inihitaana ngini nidadioka to Una ai nyawa. Masara koaho ngini nia hiningaka de nimakiniiki hoka to Unangoli ai hininga, la gea ka idadi Ma Jou ma hirete winihigiriiri nginika ma titi niagou-goungu nidadioka to Una ai nyawa. Masara nako nimahinganono ka nia badangika dika de abe nimaboa o Yahudi ma nyawaino, gea ahao ko iniduhunua Ma Jou ai himangoka. De gea ahao nia hohowono inidodamaa Unangoka de aino, de duru itiai ai hohowono inidaene nginiuku ma titi nia hiningaka de ko niagou-goungua niwiniiki Unangika.