Roma 16 - Ma Jou ai Demo-demo o Totobelohoka

O Paulusu ai tabea ma demo

¹ De naa ngohi toigo la ngini nihioriki ahi hininga ma titi o ngo Febe, abe muna gea nanga gianongoru o ngongakuoka, de abe ngohi ahao ahi hurata naa tabootokahi de ahao tohidingoto munangoka la muna ka idadi mao de ahao minihidoaka nginika. De muna gea modadi o gareja ma duduhunu abe o Kenekerea ma kapongo ma garejaka matobaduhunu.

² De ngohi togahoko nginika la nimidafongo muna gea abe hokokia itiai nanga Baluhu ai nyawa yomakadafongo. De togahokoo la ngini nimiduhunu de ami perelu abe o kia dika naga, angamoi munangoo nengokadauino de maduhunoka o nyawa yowoe-woeika. De ngaro ngohi naa ma hirete masara ngohioo mohiduhunoka. Ho ngohi duru togahoko nginika la nimidafongo irahai nanga gianongoru o ngo Febe.

³ De naa ngohi toigo tohidingoto ahi tabea abe ahi gogianongoru de ahi dodiawoika abe genangoka o Roma ma kotaka yogogere, ho togahoko la ngini niadofanga ahi tabea onangika. De ihira ahi tabea tohidingoto abe o ngo Pirisikila de ami rokata o Akilaika. Abe ona de ngohi nengokadau de mimahikarajaanga moi abe ngomi wiwileleani o Yesusu Kristusika.

⁴ De hongoli ona yahinooto ngade-ngade yobodito mangale ngohi ihiduhunu la ufa o nyawa ihitoma. Ho ngohi ahi hininga ma tarimakase duru itagi onangika. De gea ka ngohiua dika abe totarimakase onangika, masara abe o gareja ma doomu homoi-homoi abe ko o Yahudi ma nyawaua manga dodoomu, onangoo mata-mata duru yotarimakase abe ona yahinootoika.

⁵ De ngohi ahi tabea tohidingotoo abe o nyawa mata-mataika yatoo-toomuino o ngo Pirisikila de o Akila manga tauoka la ona yodiai manga gareja ma doomu genangoka. De ahi tabea tohidingoto ahi olo o Epenetusu abe tidora unangika. Abe nako o nyawa mata-mataika yogogere o Asia ma propinsi ma tona-tonakoka, masara una gea duru wohira wingaku o Kristusika.

⁶ De ahi tabea o ngo Mariaika tohidingoto, abe muna gea tomihioriki duru mokarajaanga nginioka la minihiutumu nginika ma titi ami karajaangino.

⁷ De o Andaronikusu de o ngo Yuniasa, onangikaoo ma ahi tabea tohidingoto. Abe ona gea yahinooto ahi gogianongoru o Yahudi ma nyawaka de o Kristusokaoo. De ma dihiraino ona de ngohi imiboritaokino ho mimahibui moi. De onangoo yahingahu-ngahu o Abari ma Rorahai abe hoka ngohioli, masara nako ngohi de ona, duru ka onangohi yohira iwingaku o Kristusika.

⁸ De o Ampiliatusu, unangikaoo tohidingoto ahi tabea. Abe una gea ahi gianongoru nanga Baluhoka de tidora unangika.

⁹ De nagali o Urubanusu abe unangoo wileleani o Kristusika ho mimahikarajaanga moi. De abe o Sitakisi ahi dodiawo abe tidora. Ho ahi tabea ona yahinootoika tohidingoto.

¹⁰ De o Apelese, abe ngone hihioriki una gea duru wagou-goungu wileleani o Kristusika, angamoi o hitaili wohimangoka de ko worehenua. De o Arisitobulusu ona o tau moi,

¹¹ de o Herodiono ahi gianongoru o Yahudi ma nyawaka, de ona o Narkisusu ai tauoka abe iwingaku-ngakuoka nanga Baluhu idodutuika. De ona mata-mata gea abe ngohi tafetongoka, de ona gea ahi tabea tohidingoto onangika.

¹² De nagali o ngo Tirifena de o ngo Tirifosa, abe o ngofeka yahinooto gea duru yokarajaanga ma titi iwileleani nanga Baluhika. De o ngo Peresisi abe tomidora munangika, munangoo duru mokarajaanga nanga Baluhoka.

¹³ De o Rufusu abe una ai hininga duru itagi nanga Baluhu idodutuika. De to Rufusu ngoi meme, abe muna gea mohiao ngohi abe imaketero hoka todadi to muna ami ngofaka idodutu. De ahi tabea tohidingoto ona mata-mataika.

¹⁴ De o Asikaritusu, de o Felegono, de o Heremese, de o Patrobasa, de o Heremasa, de nanga gogianongoru mata-mata utu abe naga onangoka.

¹⁵ De o Filologusu de o ngo Yulia, de o Nereusu de ngoi firanga, de o Olimpasa, de ona utu mata-mata iwingaku-ngakuoka abe naga onangoka. Ho ona gea mata-mata abe naa tafetongoka, onangika gea ahi tabea tohidingoto.

¹⁶ De ngini o Roma ma kotaka, ma oraha nimatoomuino de ka idadi nimakobounu angamoi hokogea nia biaha nimahikamatoko ti ngini nia tabea o Kristusoka. De ka to ngohiua dika ahi tabea abe tohidingoto, masara ngaro o Kristusu ai gareja ma doomu mata-mataika ma onangoo ihidingoto manga tabea nginika.

O Paulusu ai hitiari ma demo moioli

¹⁷ De naa, ahi gogianongoru, ngohi tinihitiari ma moioli nginika. De gea tinihitiari tato ngini kiani nimahidodiai ma titi o nyawa abe yoboaino de ato inihiregu la nimaketeliliara nia doomu ma goronaka. De naga to ona gea manga rerehene ma dodotoko abe gea imakalawana de to Kristusoli ai dodotoko abe ma dihiraino de ngini nimadotokoka. De o nyawa abe manga hininga hokogea, ona gea kiani ngini niadokaowara dika.

¹⁸ Angamoi ona gea ngaro yomahingahu ato iwileleani nanga Baluhu idodutu o Kristusika masara tanu to ona manga hininga la yomaleleani to ona dika ma hirete manga hafini. De to ona manga dodotoko ma demo duru inouhu ho duru yososawaro yabudi o nyawaika abe ma titi manga demoino. Ho nako o nyawa ko yahiorikua abe to ona manga hininga ma dumutu ato yabudi, ona gea ka idadi yabudioka manga demo ma nouhino.

¹⁹ Masara abe nako ngini, ngohi duru tinidogarago ma titi ti ngini nia hingounu o Abari ma Rorahaiika. De gea tinihioriki ma titi nia hingounu angamoi o nyawa mata-mataika yoihenoka ma titi abe ngini niagou-goungu nianiiki to Una ai Abari ma Rorahai gea. De ngaro nia hingounu nagau, masara ngohi duru tinihigaro la ngini duru nisosawaro ma titi o hininga ma rorahai, masara nako ma dorouika gea ufa hiadono naga nia tobahioriki ma titi ena gea.

²⁰ De nanga Jou abe wonahidoaka ngoneino o hininga ma miriidi, Una gea ko itedekanokaua de o Ibilihi ma haeke ma kuaha wawederoka la to ena ma kuaha ko ilakuokaua ti ngini nia wowangoka. De naa ngohi tinigahoko la ahao nanga Baluhu idodutu o Yesusu ai owa winihidoaka nginika.

O Paulusu wohibobaha ai hurata naa

²¹ De naa o Timotiusu ahi dodiawo abe mimahikarajaanga moi, una gea ai tabea wohidingoto nginika. De ngaro ahi gogianongoru o Yahudi ma nyawaka abe o Lukiusu de o Yasono de o Sosipatere, ma onangoo mata-mata manga tabea ihidingoto nginika.

²² De ngohi o Teretiusu, ngohioo ahi tabea tohidingoto nginika abe ma titi to ngone nanga gogao nanga Baluhoka. De ngohi naa abe titobaduhunu nanga gianongoru o Paulusu ma titi ai huratoka naa. Abe una wotemo de ngohi tohitulihuku to una ai demo la idadi o hurata naa.

²³ De o Gayusu, unangoo ai tabea wohidingoto nginika. Abe ngohi o Paulusu tomahidodogumu naa o Gayusu ai tauoka, abe mia biaha mimatoo-toomuino nenangoka ma titi mia gareja ma doomuoka. De o Eratusu abe to una ai tagongo la wohiaturu o kota naangoka ma popareta ma tiwi, de nanga gianongoru o Kawatusu, onangoo yahinooto manga tabea ihidingoto nginika.

²⁴ [De naa tinigahoko la nanga Baluhu idodutu o Yesusu Kristusu winihiowa ngini mata-mataika. Amin.]

²⁵ De naa ngone kiani hihigiriiri Ma Jouika! Angamoi Una gea ka idadi wakunu winihiputurungu nia ngongakuika. De gea winihiputurungu ma titi ai Abari ma Rorahaiino abe ngohi tahingahu-ngahu o nyawaika. De o Abari ma Rorahai gea ma hingahu abe ma titi o Yesusu Kristusu, de ma hingahu gea ma dodihiraka de aino de Ma Jou ka wagogonohi ho o nyawa duru ko ihiorikuahi ma hingahu gea.

²⁶ Masara ma oraha naa de ahao Ma Jou wahingahu ma abari gea to ngomi mia uruino abe ngomi ai Abari ma Rorahai miatobahingahu-ngahu o nyawaika. De gea idadioka duru imaketero abe hoka ma dodihiraino de Ma Jou ai uru ma dodofanga ihitulihukuoka. De hokogenangoo imaketero de abe nanga Jou wohiparetaka de wohiaturoka la nako ma oraha adonoka de o nyawa ka idadi yoihene to Una ai Abari ma Rorahai. De gea igoungu abe nanga Jou wohiaturu mata-mata la ona ko o Yahudi ma nyawaua ngaro o tonaka o kiaka dika yogogere, masara ka idadi yoihene to Una ai Abari ma Rorahai de yaniiki hiadono iwingaku Unangika. Abe nanga Jou Una gea ngaro ka hiado-adonino ma Una nagau, de ngaro ka hiado-adonika masara Una nagahi, de ko iwa ai bobaha.

²⁷ De nanga Jou ka Una dika abe duru wososawaroholi, de naa duru itararono abe to Una ai sosawaroino de gea wohiaturu la o nyawa mata-mata ka idadi yamake ai duduhunu ma titi to Una ai Ngofakino. Ho ngone kiani o Yesusu Kristusino de hihigiriiri Ma Jou ka hiado-adonika. Amin!