Roma 15 - Ma Jou ai Demo-demo o Totobelohoka

Ngone kiani hahisanangi o nyawa utuika

¹ De igoungu ma titi nanga ngongakuino ho hiadono duru hohioriki abe Ma Jou ko wonahohowonua abe ma titi o inomo o kia dika haolomo. De hokogenangoo nako naga nanga datoro moi hodiai de genangino ko hatilakurua to Una ai mau, ho enangoo ma ko wonahohowonua. Masara nanga gogianongoru utu naga abe ona manga ngongaku ko ibaluhuahi, de ona ato koaho ka yaniikohi ma hiaturu abe ka ma dodihirainohi done manga hohowono yadaene. Ho kiani ngone abe nanga ngongaku ibaluhoka homatongohono dika de ufa homaketeribuutu de nanga gogianongoru abe manga ngongaku ka iboleohi. De ufa to ngone dika nanga mau haniiki la homahisosanangi,

² masara koaho ngone homoi-homoi hahisanangi nanga gogianongoruika abe nanga datorino la ona ka idadi hahiutumu de hahigaro la hato utuohi yobaluhu manga ngongakuika.

³ Angamoi ngaro nanga Baluhu o Kristusu masara Unangoo ko waniikua to Una dika ma hirete ai mau, ho koaho ngone homaaduru hoka to Unangoli ai hininga. Abe o Kristusu Una gea wowango hokokia la wihisanangi ai Babaika. De ngone ka idadi hohioriki abe Una waniiki to ai Baba ai mau mangale o nyawa iwingelo Unangika abe duru imaketero hoka iwingelo Ma Jou ai Babaika. De ma titi gea ma dodihiraino de ihitulihukuoka Ma Jou ai Demo-demoka abe nanga Baluhu o Kristusu witemo ai Babaika, wato, “Baba, o nyawa manga ngelo ma demo abe ma dodihirainohi de initobangelo Ngonaika, ma oraha naa de ihihipake Ngohinoo, ho manga ngelo ma demo naa ihidaene Ngohi.” Hokogea nanga Baluhu ai demo ma dodihiraino abe witemo ai Babaika.

⁴ De gea Ma Jou ai Demo-demo mata-mata abe ma dodihiraino de ihitulihukuoka, gea ma dumutu ka moi. Abe gea ihitulihuku la ma titi genangino de ka idadi wonadotoko ngoneino. De gea Ma Jou ai hininga la to Una ai Demo-demoino de duru inahigaro nanga hiningaka de hiadono nanga dongohono ka idogo. De ahao genangino naga ihihofoko nanga nganganono abe duru hohioriki ahao ma oraha adonoka de hamake o kia dika abe Ma Jou wonahibehehongoka wato wonahidoaka.

⁵ De Ma Jouoka dika imanoa o dongohono ma titi de o higaro ma titi. De Unangika gea tinigahoko ma titi moioli, la ngini mata-mata ahao ka nimaketehiningamoi dika angamoi o hininga gea duru itaana de o Yesusu Kristusu ai mau ngoneino.

⁶ De hokogea ahi gogahoko ma demo ma titi ngini la tato ngini mata-mata nia hininga ka moi dika de hiadono nia demo enangoo ka moi, la duru nimakokutuono niwihigiriiri nanga Jouika. Abe Una gea nanga Baluhu o Yesusu Kristusu ai Baba.

⁷ De mangale ma titi ngone kiani homaketehiningamoi, ho gea ngini kiani nimakokadafongo la genangino de nihiboa o higiriiri Ma Jouika. De nako nimakokadafongo gea nimaaduru abe hoka o Kristusoli ai hininga, angamoi Una gea winikokidafongo ngini homoi-homoiika.

⁸ De ufa ngini niawohanga abe naga ma titi hinooto hiadono nanga Baluhu o Kristusu woboa. Abe ma titi moi, gea woboa la ngone mata-mata ka idadi hohioriki abe Ma Jou duru wagou-goungu de abe Una wahingodumu ai behehongo mata-mataika. De gea ka idadi hamake abe wahingodumu ai behehongo abe ma oraha Una womiduhunu ngomi o Yahudi ma nyawa. De abe ma dodihiraino de wahibehehongoka to ngomi o Yahudi ma nyawa mia totoforaika ma titi ahao wihidingoto mia koano, enangoo ma wahingodumu ma oraha o Kristusu wihidingoto ngomiuku. Ho genangino de ngomi o Yahudi ma nyawa wiwihigiriiri Unangika ma titi Una wagou-goungu ai behehongika.

⁹ De abe ma titi moioli, gea Una woboa la ngini abe ko o Yahudi ma nyawaua, ma nginioo niwihigiriiri Ma Jouika abe ma titi Una wihidingoto o Kristusu o duniauku naa. Angamoi ma titi o Kristusino hiadono Ma Jou ai hininga ma dora duru itagi nginika. De Ma Jou ai datoro o doraino gea de wohingodumu ai demo muruono naga abe ma dodihiraino de ihitulihukuoka. De ai demoino naa de duru itararono abe ma dodihirainohi de naga Ma Jou ai hidee la winiduhunu ngini abe ko o Yahudi ma nyawaua la nginioo ka idadi niwihigiriiri Unangika. Abe moi mia koano ma dodihiraka o Dautu wohitulihuku ai demo abe wato, “De ngohi ahao naga to ona manga hidogoronaka abe ona ko o Yahudi ma nyawaua, de onangoka ahao ngohi tonihigiriiri de tonyanyi de ahi higiriiri ma demo Ngonaika.”

¹⁰ De naga ai Demo-demoka moioli abe wohingodumu ma titi o Kristusino, de gea itemo ato, “Ngini ka nigogaragoka abe ngini ko o Yahudi ma nyawaua, de gea ka idadi ngini ka ma moi de Ma Jou ai Yahudi ma nyawa ngini mata-mata nimakokutuono nigogarago.”

¹¹ De moioli abe Ma Jou ai Demo-demoino de itemo ato, “De abe ngini ko o Yahudi ma nyawaua, ngaro ngini mata-mata niwihigiriiri nanga Baluhu idodutuika. De ngaro ngini o dunia ma nyawa mata-mataika ma nginioo niwihigiriiri Unangika.”

¹² De naga moioli abe ma dodihiraino de Ma Jou ai uru ma dodofanga o Yesaya wohitulihuku ma titi ma koano abe Ma Jou wonahibehehongoka, de gea o Yesaya wotulihi wato, “Ahao naga womatengo womaboa to Isai ai ngofaka o Dautu ai totoforauku ho Unangoo ka idadi wokoano. De Una ahao wahipareta abe ona ko o Yahudi ma nyawaua, de ona gea ahao yomahinganono Unangika.” De hokogea Ma Jou ai Demo-demoino abe ma dodihiraino de inahingahuoka abe ma titi nanga Baluhu ai dora de ai duduhunu abe itagi nginika abe ngini ko o Yahudi ma nyawaikaua. Ho mangale ma titi ma dodihiraino de Ma Jou wonahideeoka la wamake o higiriiri ngone mata-mataino, abe ngaro o Yahudi ma nyawa eko ko o Yahudi ma nyawaua, ho kiani ngone mata-mata homaketehiningamoi la hihisanangi de hihigiriiri Unangika!

¹³ De naa tinigahoko Ma Jouika abe Unangoka dika nanga nganganono ma titi. De tinigahoko Unangika la winihidoaka o garago de o hininga ma miriidi nginika mangale ma titi nia ngongaku nagau Unangika. De hokogea tinigahoko la hiadono Ma Jou o Womaha ai kuahaino de ka idogo-dogo nia nganganono Ma Jouika.

Abe ma titi o Paulusu ai demo wahiree-reeika abe ai hurata naa ma goronaka

¹⁴ Ahi gogianongoru, ngohi naa duru tohioriki de tonganono abe ti ngini nia wowangoka de ma rorahai dika ngini niatobaniiki. De gea nia hininga irorahai ma titi aomangoka de o tobahioriki abe ma titi Ma Jou, de hiadono ngini ka idadi niakunu nimakodotoko de nimahikagaro Unangika.

¹⁵ De ngaro nginioka nagau nia tobahioriki gea, masara ahi huratoka naa de ma titi utu duru ka tinihiree-reeika la tato tinihihohininga nginika abe ma titi muruono naga. De ahi demo gea tadofanga nginika ma titi ahi tagongo ma hohailoa abe Ma Jou wohihidoaka ngohino. De gea wohihitagongo ma titi ai hininga ma owaka de aino ngohino.

¹⁶ De ahi tagongo gea la todadi o Yesusu Kristusu ai duduhunu abe tinileleani ngini ko o Yahudi ma nyawaikaua. De ahi tagongoka naa ngade-ngade tomaketero hoka Ma Jou ai hidemo todadioka. Angamoi ngohioo tadofanga nginika Ma Jou ai Abari ma Rorahai abe imaketero hoka ma dihiraino de Ma Jou ai hidemo ma nyawa yahitobangahu-ngahu ai Demo-demo o nyawaika. De nagali abe o hidemo manga karajaangoka de ona ka ihikaika iwihidoaka Ma Jouiye o huhuba abe duru iwihisanangi Unangika. De mangale ma titi ngini ko o Yahudi ma nyawaua niodafongoka o Abari ma Rorahai abe ngohi tinihingahu nginika, ho nginioo ka idadi tinihiketero. Abe ngohi tinihiromanga nginika tato ngini hoka to ngohi ahi huhuba ma ngango moi abe ngini duru niwihisanangi Ma Jouika. De ngini winihitebinoka ma titi Ma Jou o Womahino, ho ka idadi ngohi tinihidoaka ngini Ma Jouika de Una duru wosanangi winidafongo ma titi ngini nitebinoka ai himangoka. Ho ngini nidadioka hoka to ngohi ahi huhuba ma debi-debini abe tohidoaka Ma Jouiye. De mangale ma titi abe ngohi ka idadi o huhuba tohidoaka Unangiye ho hiadono tomahiromanga tato ngohi ngade-ngade hoka Ma Jou ai hidemo todadioka.

¹⁷ Ho ngohi naa ahi hiningaka de duru togarago abe ma titi ahi tagongo de ahi leleani Ma Jouika. De gea tohioriki abe ahi leleani ma datoro mata-mata ngohi ka idadi todiai ma titi o Yesusu Kristusino dika, de gea ko ngohinoua ma titi.

¹⁸ De nako ahi datoro utuoli, gea duru ko tomahiade-adeua de ko tomahigiriiriua. Masara abe ngohi tohiade-ade, gea ka ahi datoro abe o Kristusu dika wohihiakunu la ngohi todiai. De gea wohihiakunu la ma titi ahi demo de ahi datorino hiadono ngini abe ko o Yahudi ma nyawaua ka idadi nihingounu o Abari ma Rorahaiika.

¹⁹ Abe ahi datorino gea naga utu o heheranga de o dodunguu ma ngoe todiaioka la o nyawa yongaku o Abari ma Rorahaiika, masara gea mata-mata Ma Jou o Womaha ai kuahaka de aino hiadono ngohi todiai. Ho o Abari ma Rorahai abe ma titi o Kristusu, gea tahingahu-ngahuoka o nyawa yowoe-woeika abe ngaro o Yerusaleeme ma kotaka de ka hiadono ona abe yogogere o Ilirikumu ma tonakoka abe duru kohagurutika imakitingaka ma tonaka gea. De gea ma titi hiadono ngohi duru togarago abe hokokia Ma Jou wohipakeoka la ka idadi tileleani Unangika.

²⁰ De abe tohingahu-ngahu o Abari ma Rorahai, de gea ka ihikaika ahi hininga ma igo la tohingahu-ngahu o ngi-ngioka abe genangoka o Kristusu ai romanga o nyawa ko ihiorikuahi. Angamoi nako hoka toiki o ngi-ngiika abe genangoka o Abari ma Rorahai yoihenoka, gea done ngohi ka tohidogoli o nyawa utu manga karajaanga Ma Jouika. Abe genangoka o nyawa iwihiorikoka o Kristusika.

²¹ Masara ngohi tato koaho taniiki Ma Jou ai Demo-demo naa moi abe ma dodihiraino de ihitulihukuoka ma titi nanga Baluhu. De gea itemo ato, “O nyawa abe ko yamakeuahi ma hingahu ma titi Una, ona ahao yamake ma gou-goungu Unangoka. De ona abe ko ma moiuahi yoihene ma titi Una, ona gea ahao yoihene de yataoko to Una ai abari.” Hokogea itemo Ma Jou ai Demo-demoka, de hokogea to ngohioo ahi hininga ma dumutu.

²² De mangale ma titi ma dihirainohi de ngohi ka ihikaika tahingahu-ngahu o ngi-ngioka abe genangoka ona ko yoihenuahi o Abari ma Rorahai, ho naa ngohi duru tokapaangoka toboa nginika la tinitutumu o Roma ma kotaika.

O Paulusu womahingahu ma titi ai dodagi ma hidee

²³ De ma oraha naa de ko iwaka ma ngi ma tonakoka naangoka abe o nyawa ko yoihenuahi ma titi o Kristusu, angamoi mata-mataika yokokiihenoka. De mangale ngohi naa o taongo muruono ibooto abe ahi hiningaka tanu duru toigo toboa tinitutumu, ho naa ngohi tohideeoka la tato toboa nginika.

²⁴ Abe nagau ahi hidee la o Spanyolo ma tonakika toiki abe gea ti ngini nia tonaka doka ma honongaka imanoa. Ho ma oraha ahi dodagi ma goronaka abe ahi dumutu o Spanyolo ma tonakika de ihira ka idadi tinidulu nginika. De abe tomahiadono nginika de ahao ka idadi ngone jai-jai homaketeade-ade de homahikagaro nanga ngongakuoka, de ngaro tanu toigo la ngohi hatoli ihitedekana nginioka, masara ko idadiua. Ho ngohi marai ahi futu muruono naga dika nginioka de ahao kiani togila-gila o Spanyolo ma tonakika, de ngohi tonganono abe ngone ko homakitingakuahi de ngini ka idadi nihiduhunu ma titi ahi dodagi ma perelu.

²⁵ Masara nako ma oraha naa naga kiani ngohi toikohi o Yerusaleeme ma kotaika la tototaka o tiwi de tahidoaka abe nanga gogianongoruika genangoka.

²⁶ Abe nanga gogianongoru naga o Makedonia de o Akaya ma propinsi ma tonakoka, ona nengokadauino de yatoomuinoka manga tiwi la idadi o dora ma hidoaka nanga gogianongoruika o Yerusaleemoka, angamoi naga nanga gogianongoru manga ngoe yohu-huha genangoka.

²⁷ De ona abe yatoo-toomuino manga tiwi, ona gea duru yosanangi dika yaduhunu manga gogianongoruika. Masara nagaoo yomamao abe manga hiningaka ngade-ngade hoka naga manga nagimi abe kiani yofangu manga gogianongoruika abe ona o Yahudi ma nyawaika. Angamoi nako ona o Makedonia de o Akaya ma tonakoka, ona gea ko o Yahudi ma nyawaua. De ona ihioriki abe o Yahudi ma nyawa yahikodoku ma utumu duru ilamoko onangika abe o Abari ma Rorahaiino. De gea ma titi hiadono ona yamao irahai nako ma oraha naa de onangoo yahikodoku ma utumu manga gogianongoru o Yahudi ma nyawaika abe ma titi manga tiwi ihidingoto o Yerusaleeme ma kotaika.

^28-29 Ho ngohi ka de tototaka de tahidoaka ma tiwi nanga gogianongoruika o Yerusaleemoka la ahi tagongo gea tabootoka, de gea ahao o Yerusaleemoka tosobo de toboa tinitutumu abe ngini ahi gogianongoru o Roma ma kotaka nigogere. De ngohi tohioriki abe ma oraha ngohi toboa nginika de o Kristusu ahao wonahiowa ngone de ma utumu kohaamoko abe Unangoka de aino. De tinitutumu ibooto de ahao ngohi tohigila-gila ahi dodagi abe toiki o Spanyolo ma tonakika.

³⁰ De naa, ahi gogianongoru, ngone mata-mata o ria-dodoto moi ma titi ngone mata-mata homahibaluhu abe nanga Baluhu idodutu o Yesusu Kristusika. De ngoneoo homakokodora mangale ma titi Ma Jou o Womaha naga ngone homoi-homoioka. Ho mangale ma titi nanga gogao de nanga dora gea, ho naa ngohi duru togahoko la ngini nihiduhunu ngohi abe ma titi nia niniatino. Abe ngohi duru tomagahoko Ma Jouika ma titi ahi dodagi o Yerusaleeme ma kotaika, de toigo la nginioo duru nihiduhunu abe nihigahoko Unangika ma titi ahi dodagi gea.

³¹ Ho nihigahoko la ahi dodagi ma goronaka de Ma Jou wohidatoko o Yahudi ma nyawaino o Yudea ma tonakoka abe ona gea ko iwingaku-ngakua o Kristusika. De nihigahokoo la nanga gogianongoru o Yerusaleeme ma kotaka ahao ka yosanangi dika yodafongo o dora ma hidoaka o tiwi abe ngohi tadotaka onangika.

³² De gea tonganono abe ko kia-kiaua idadi ngohino ahi dodagi ma goronaka, masara gea iti imakiniiki de Ma Jou ai mau. La gea nako wohiduhunoka ahao ma oraha toboa nginika de duru togarago ahi hiningaka. De ahao nginioka ka idadi ngone homahikokagaro Unangika.

³³ De naa ngohi tinigahoko Ma Jouika la Una ka ihikaika naga ngini homoi-homoioka, angamoi ka Unangoka dika nanga hininga ma miriidi ma titi. Amin.