Roma 14 - Ma Jou ai Demo-demo o Totobelohoka

Ufa ngone homaketetaere de homaketehohowono de nanga gogianongoru

¹ De naa ka idadi tinihitararono abe ma titi moioli. Abe nako naga nia gogianongoru utu abe ona manga ngongaku hatoli ka iboleohi, ona gea kiani ka niadafongo dika. De abe niadafongo, gea ufa ngini nimaketeribuutu de ona abe ma titi nia hininga ma dodagi ko imakokadaenua.

² De abe totemo tato manga ngongaku hatoli ka iboleohi, ahi demo gea ma titi hokonaa. Abe hoka nanga gogianongoru utu manga hiningaka ato ngaro o inomo o kia dika ma ka idadi mata-mataika ka yaolomo, de gea manga putuhu ihititi manga ngongakuoka. Masara nanga gogianongoru utuoli naga abe to ona manga hininga ka hinootohi abe ma titi o inomo, de ona ato bote o inomo utu Ma Jou ko wahigunoaua yaolomo, ho ona gea ka o gauku dika yaolomo. De ona gea ka idadi hahiromanga hato manga ngongaku ka iboleohi.

³ Masara iti ufa homaketehohowono ma titi nanga inomino. Abe onagona dika manga hiningaka ato ka idadi yaolomo o inomo o kia dika mata-mataika, ufa ona gea yangelo manga gogianongoruika abe ka o gauku dika yaolomo. De ufa ona abe ka o gauku dika yaolomo, ufa ona gea yahohowono manga gogianongoru utuikali abe o inomo mata-mata yaolomo. De gea ngohi tato ufa yahohowono angamoi ona Ma Jou wadafongoka, ho koaho ufa hiadono manga gogianongoru yahohowono de yataere onangika.

⁴ De ngini abe niato niahohowono nia gogianongoru ma titi manga putuhu gea o inomino, abeika nimafikirohi ahi demo naa. Abe nako hoka ona nia gogianongoru yodadi ti ngini nia duduhunu, gea de ahao bote ka idadi niahohowono onangika. Masara ona gea ko ti nginiua nia duduhunu masara to nanga Baluhu idodutu ai duduhunu! Ho ufa hiadono ngini naa niahohowono to Una ai nyawa! Angamoi ka Una ma hirete dika abe ka idadi waputuhu nako ai duduhunu gea yahowono manga inomino ho kiani ai hohowono yadaene ekola waputuhu wato ona ko yahowonua. De gea ka idadi hohioriki abe Ma Jou ka wadafongo ai nyawa ngaro hokokia dika manga inomo yolomo angamoi nako o inomo gea tanu ko kia-kiaua Unangika. Abe Una gea ka idadi waduhunu ai nyawaika la ona yomakiniiki de de Una, de genangino ma titi hiadono wadafongo onangika.

⁵ De naga moioli ma titi abe ka idadi ngone de nanga gogianongoru nanga dadaoko imakohowono. Abe nanga gogianongoru utu manga hiningaka ato naga ma wange muruono naga abe ikurutiye Ma Jou ai himangoka masara nako o wange utuoli gea ka o wange biaha dika. Masara nanga gogianongoru utuoli naga abe yafikiri ato ngaro o wange o kia dika masara mata-mataika ka imakokadaene dika Ma Jou ai himangoka. Ho ngohi tato ngaro ngone homoi-homoi nanga putuhu hokokia dika ma titi ma wange, masara iti ngone homoi-homoi homaputuhu de nanga putuhu gea ko idadiokaua ikelu-kelu.

⁶ Angamoi nanga gogianongoru abe ona yataoko ato naga ma wange utu ikurutiye Ma Jou ai himangoka, gea manga hininga ihititi abe manga horomatioka Unangika. De hokogenangoo de nanga gogianongoru abe manga hiningaka ato ngaro o inomo o kia dika ma ka idadi mata-mata yaolomo. Abe onangoo naga manga horomati Ma Jouika ma oraha yaolomo. De gea ka idadi hamake manga horomati ma dodunguu abe ona ko yolomuahi de yotarimakaseokahi Ma Jouika ma titi manga inomo gea. De ngaro nanga gogianongoru utuoli abe ka o gauku dika yaolomo, ma onangoo ko yolomuahi de yotarimakaseokahi Ma Jouika. De abe to ona manga putuhu la ka o gauku dika yaolomo, enangoo ihititi manga horomatioka Ma Jouika. Ho iti ngone homoi-homoi nanga putuhu ihititi de nanga horomati Ma Jouika de gea ko iwa ma howono ma titi nanga putuhoka.

^7-8 De gea duru igoungu abe ngaro o kia dika hodiai nanga wowangoka masara koaho homafikirohi ma titi nanga datoro gea la ka idadi itaana de Ma Jou ai mau ngoneino. Angamoi ngone hingaku-ngakuoka ufa hafikiri hato ngone homoi-homoi ka idadi homahibaluhu ka ngone dika ma hirete. Hokogenangua, angamoi to ngone nanga Baluhu idodutu naga, ho koaho hihisanangi Unangika ma titi nanga wowango ma datorino. De ngaro ma oraha itigioka hohonenge masara gea koaho nanga hininga itagi ka Unangika dika. Ho ngaro nanga wowangoka eko ngaro nanga honengoka masara gea mata-mata de ngone hodadi to Una ai nyawa, de Una gea abe wodadi to ngone nanga Baluhu idodutu. Ho ngone koaho homaribuutu la nanga wowangoino mata-mata de hoigo hihisanangi nanga Baluhu idodutuika de ufa ngone ma hirete homahisosanangi.

⁹ De to ngone nanga Baluhu idodutu o Kristusu, Una gea wohonenge de wowangokali la ka idadi genangino de wodadi nanga Baluhu idodutu. Abe ngaro yohone-honengoka eko ngaro ngone ka howangohi, masara Una wodadi to ngone mata-mata nanga Baluhu. Ho koaho ngone howango hototiai la ka idadi hihisanangi ka Unangika dika.

¹⁰ De nako igoungu abe to ngone nanga Baluhu ka womatengo dika o Kristusu, ho done sarakia ma titi hiadono ngone homaketetaere de nanga gogianongoru abe ma titi o inomo eko o wange? Abe nako ngone utu homaputuhu hato kiani nanga Baluhu ai hiaturu haniiki hokonaa de ngone naga utuoli nanga hininga hatoli imakohowono abe hokokia haniiki nanga Baluhu ai hiaturu. De ngaro hokogea nanga hininga ko imakiniikua masara ko idadiua homaketetaere hiadono homaketehohowono de homakengelo ma titi genangino. Angamoi ahao dokengika de ngone mata-mata homaokoino Ma Jou ai himangoka abe ma oraha wonatailako nanga hininga homoi-homoi. De genangoka de ahao Una ma hirete womaputuhu ma titi to ngone homoi-homoi nanga datoro hodiaioka abe nako wasanangi enangika eko koua.

¹¹ De ngone ka idadi hohioriki abe ahao wonatailako ngone mata-mata angamoi ma dodihiraino de ihitulihukuoka Ma Jou ai Demo-demoka abe Una wonahingahu hokokia ma oraha gea. De gea to Una ai demo wato, “Ngohi ti ngini nia Baluhu idodutu, de naa moi duru tagou-goungu tinihingahu nginika. Ahao naga ma oraha abe o nyawa mata-mataika ka yomataitilabukuku to Ngohi ahi himangoka de yomakokutuono yomangaku abe Ngohi dika Ma Jou.” De hokogea Ma Jou ai demo abe ma dodihiraino ihitulihukuoka.

¹² De ai demoino gea de itararono abe ahao ngone homoi-homoi kiani homahitararono Ma Jouika abe ma titi nanga wowango ma datoro la ahao Una dika womaputuhu ma titi ngone.

¹³ De mangale ma titi Ma Jou Una gea ahao wonatailako ngone homoi-homoi, ho ibootohi ngone homaketetaere de homaketehohowono de nanga gogianongoru. Masara koaho ngone duru homaputuhu la ufa nanga datorino de nanga gogianongoru hahirehene o howonika. Abe nako naga moi nanga datoroka de hodiai nanga gogianongoru manga himangoka ho inamake, de nanga datoro gea idadioka o higaro onangika. De bote ahao ona gea yomaaduru abe imaketero hoka ngoneoli hodiaioka. Ho iti ufa nanga datorino de hodiai o bebeleke nanga gogianongoruika de hiadono ona yopeleke o howonuku.

¹⁴ De abeika hogilio abe ma titi kangano, de gea ma titi o inomo o kia ka idadi haolomo. De nako ngohi, duru tohioriki abe moioo de ko iwa o inomo la Ma Jou ko wonahigunoaua ngone haolomo. De gea duru tohioriki ma titi ahi gogere naga nanga Baluhu idodutu o Yesusoka. Masara nako naga ahi gianongoru womatengo abe ai hiningaka de duru wafikiri wato Ma Jou ko wihigunoaua la o inomo moi waolomo, gea de ahao ahi gianongoru gea ko idadiua waolomo, angamoi una wamao ko iwa ma higunoa abe Ma Jouino. De nako hokogea ai hininga ahi gianongoru, gea ufa hiadono ngohi tihigaro unangika la ena gea waolomo. Angamoi nako gea waolomo, gea ahao wahowono Ma Jouika abe ai datorino de watilakuroka to una ma hirete ai hininga ma putuhu.

¹⁵ Ho nako nginioka naga abe niaolomo o inomo moi abe nanga gogianongoru utu yamao manga hiningaka ato gea ko idadiua yaolomo de ona inimake, gea tanu niahigaro onangika la yodiai moi abe ona yamao o howono ho hiadono yohuha manga hiningaka. De nako hokogea niahigaro onangika, gea nia datorino de ko nianiikokaua o dora. Ho iti ufa ma titi nia inomino dika de hiadono niahirehene nia gogianongoru de manga ngongaku ma wowango nihirusaka genangino. Angamoi nanga Baluhu o Kristusu wohonenge ma titi waduhunu nia gogianongoruoo gea abe imaketero hoka wohonenge ma titi ngone utuoli, ho ufa hahiruba onangika masara kiani homakao de o dora dika.

¹⁶ De ahi hitiari ma demo gea kiani ngini nianiiki done o nyawa yataoko ihowono nia datoro de iningelo nginika. Abe nia datorino gea de ngini duru nihioriki abe ko iwa nia howono nia inomino. Masara nako ma titi nia datorino gea de nanga gogianongoru utu yoruba o howonuku angamoi ona yamao o howono masara ka yodiai dika ma titi yomaaduru hoka ti nginioli nia datorino, gea de ahao o nyawa ka idadi inangelo ngone abe hingaku-ngakuoka.

¹⁷ De naga ma titi moioli hiadono ngone koaho homahidodiai done homaketetaere de nanga gogianongoru ma titi o inomo dika. Angamoi ngone homoi-homoi homahigunoa la Ma Jou wonahikoano nanga boriwowangoka. De hohioriki abe nako ngone homahigunoa la Ma Jou wonahikoano, gea ko ma titiua abe o inomo ma hiaturu haniiki eko o ngokere ma hiaturu haniiki. Masara tanu gea ihititi nanga wowango ma totiaiino, abe kiani homakao itiai de nanga gogianongoru. De nagali ihititi o garagoino abe hamake Ma Jou o Womahino. De nako gea mata-mata naga nanga hiningaka, gea hodadi o kokawaaha abe duru hiniiki nanga koano Ma Jouika.

¹⁸ De hokogenangoo abe hileleani o Kristusika de hihisanangi Ma Jou. De gea ka Ma Jouua dika abe wonasanangi nako nanga wowango hokogea, masara o nyawa utuoli, onangoo ahao inahoromati ngoneino.

¹⁹ De mangale ma titi ahi hitiari ma demo gea, ho ngone kiani ka ihikaika homaribuutu la homakao itiai de o dame ngone de nanga gogianongoru, ho ufa ngone homaketeribuutu. De kiani nanga hininga ma dumutu naga la ka ihikaika homahikagaro ma totiaiika la hiadono ngone mata-mata utuohi hobaluhu Ma Jouika.

²⁰ Ho ngini ufa nihirusaka Ma Jou ai karajaanga o nyawa manga wowangoka abe ma titi ti ngini nia inomino dika. De igoungu, nako Ma Jou ai himangoka gea o inomo ma rupa o kia dika naga, masara gea mata-mata wonahigunoa wato ka idadi ngone haolomo. Masara nako hoka naga o inomo ma rupa moi abe ngone haolomo de genangino ma titi hiadono hahigaro o nyawa o howonika, de gea ngoneoo hahowonoka.

²¹ Ho koaho ufa ngini niaolomo o roehe de ufa niaokere o angguru ma gohaka ma teongo, abe nako genangino de ahao niahiruba nia gogianongoru o howonuku. De ngaro nia datoro o kia dika utuoli abe genangino ma titi hiadono nia gogianongoru yoruba, masara enangoo ibootohi nianiiki done niahiruba onangika.

²² De marai ngini utu nia hiningaka de duru niangaku ma titi abe Ma Jou wonahigunoa la o inomo mata-mata haolomo eko o datoro utu ka idadi hodiai de genangino ko iwa ma howono. Masara naga nanga gogianongoru utu abe yataoko ato hahowono nako ma datoro gea hodiai eko nako ma inomo gea haolomo. Ho ngini koaho ufa nimahingahu nia hininga gea de ufa niaribuutu nia gogianongoru hiadono onangoo yaniiki ti nginioli nia hininga done ngini niahiruba nia gogianongoru gea. Angamoi Ma Jou wasanangi o nyawaika abe yomafikirohi manga datoro de ahao yomaputuhu la yodiai ka gea dika abe ona ato itiai Ma Jou ai himangoka. De ona gea nako naga moi o datoro abe ona ko ihiorikuahi gea ma datoro itiai Ma Jou ai himangoka eko koua, gea yomaputuhu ufa ma datoro gea yodiai done yahowono Ma Jouika. Ho ona gea manga hininga ka iriidi dika ma titi ngaro ufa yohawana to Una ai hohowono onangika.

²³ Masara onagona dika abe ko ihiorikuahi ma titi o inomo moi nako Ma Jou ai himangoka wonahigunoa la ngone haolomo eko koua de ma inomo gea ka yaolomo dika, ona gea yahowonoka. Masara manga howono gea tanu ko ihititiua o inomino masara abe ma titi yodiaioka o datoro moi abe manga hiningaka ka hinootohi ma titi gea. Abe ma titi ona ko yangakuahi nako Ma Jou ai himangoka gea itiai ngone haolomo, masara ka uku dika yaolomo. De gea ko ma titiua o inomino dika abe ka idadi hahowono mangale ma titi hatilakuru nanga hininga ma putuhoka. Abe nako naga moi o datoro abe gea ko hohiorikuahi de ko hongakuahi ma datoro gea itiai Ma Jou ai himangoka de ka hodiai dika, de gea Ma Jou ai himangoka waetongo ngone hahowonoka.