Roma 13 - Ma Jou ai Demo-demo o Totobelohoka

Abe ma titi nanga hingounu o poparetaika

¹ De naa, ahi gogianongoru, ngohi tohigila-gila ahi hitiari ngini mata-mataika. Ngohi tato o nyawa mata-mataika kiani yahigihene o popareta ma nyawaika, angamoi to ona manga kuaha la yahipareta o nyawaika, gea Ma Jouoka de aino wahidoaka onangika. Abe ko iwa o popareta ma kuaha utuinoli, ho o popareta o kiaka dika abe ma oraha naa naga de manga kuahaka, ona gea Ma Jou dika wahikaaturu de wahigogere abe to ona manga kuaha ma gogeroka.

² Ho onagona dika abe yalawana o poparetaika, ona gea tanu Ma Jou ai hiaturikaoo enangoo yalawana. De nako hiadono enangika yalawana, gea ona yahowonoka ho kiani manga hohowono yamake onangika. De gea ma titi moi hiadono kiani hahigihene o popareta ma nyawaika.

^3-4 De nako o nyawa abe yotobadiai ma rorahai dika, ona gea ngaro ufa dika de yamodongo o popareta ma nyawaika angamoi ahao ko yamakeua o hohowono o poparetaino. Ho nako ngini nioigo la ufa niamodongo o poparetaika, gea kiani ma rorahai dika nitobadiai nia wowangoka. De gea ahao o popareta ona ko initaerua masara inihigiriiri nginika ma titi nia datoro ma rorahaiino. Abe gea ona tanu yodadi Ma Jou ai duduhunu nginika la hiadono ona ka idadi yodiai ma rorahai nginika. Masara nako o dorou ngini nidiai, gea de ahao ka idadi o poparetaika niamodongo. De gea itiai niamodongo o poparetaika angamoi ona igoungu naga de manga kuahaka la inihohowono nginika. Angamoi Ma Jou wahitagongo onangika la ona yahibalaha de o hohowono abe onagonaika yodiai itorou.

⁵ Ho naga ma titi hinooto hiadono ngone kiani hahigihene nanga poparetaika. Abe ma titi moi la ufa nanga hohowono hamake onangino ma titi ko haniikua ma pareta. De ma titi moioli la haniiki ma higaro abe naga to ngone nanga hiningaka. Abe ngone hohioriki nako nanga hininga ka de itemo de inahigaro ma totiaiika, de ena gea duru imakiniiki de ma demo abe hoihene o popareta ma nyawaino, abe to enangoo ma hidumutu ma totiaiika.

⁶ De hokogenangoo ma titi hiadono ngini kiani o pajaka ma tiwi nifangu o poparetaika. Angamoi o popareta ma nyawa ona gea ka ihikaika yaleleani o kokawaahaika, de manga tagongo gea Ma Jouoka de aino iboa. Ho o pajaka ma tiwi kiani itagi onangika la ka idadi ona ka ihikaika ihidagi manga tagongo gea abe Ma Jouoka de aino.

⁷ Ho ngini niahidoaka o poparetaika o kia dika abe itiai onangika niahidoaka. Abe o pajaka o kia dika naga abe kiani nifangu, gea nifangu dika. De ngaro nia hingounu de nia horomati, ma enangoo itiai niahidoaka o popareta ma nyawaika angamoi manga tagongo gea Ma Jouoka de aino wahitagongo onangika. Ho irahai la to ngone nanga hingounu de nanga horomati hahidoaka o popareta ma nyawaika.

Abe ma titi nanga tagongo nanga date-datekika la homakodora

⁸ De naa ma titi muruono naga abe ngohi tinihigaro nginika la nimakao irahai ngini de nia date-datekoka. De ahi huhuloko nginika abe duru ihira gea tato ngini kiani nimakodora. Abe ahao kangano tinihuloko la niahidoaka o nyawaika o kia dika abe itiai onangika niahidoaka. Ho nako hoka naga nia nagimi o nyawaika, gea itiai la ufa itedekana de kiani nifanguoka la nia nagimi gea yaofioka. Masara tanu naga moi dika abe tohiromanga tato nia nagimi o nyawaika abe gea ena kiani igila-gila. De abe tohiromanga nia nagimi, gea ahi demo ma titi nanga tagongo la ngone homakodora. Ho ti ngini nia borinagimi la nimakokodora, gea kiani ka ihikaika itagi de ko ihibobahaua nia dora. Angamoi onagona dika yomakodora ona de manga date-datekoka, ona gea duru yaniiki itiai Ma Jou ai Paretaika.

⁹ De hokonaa nanga dora inaduhunu la haniiki itiai Ma Jou ai Pareta. Angamoi ngaro Ma Jou ai Pareta ma demo naga ma ngoe, masara nako ngone homakodora, gea ai pareta ko hatilakurua. Abe igoungu ai pareta ma demo itemo ato, “Ngini ko idadiua nimakitigi de o nyawa ngaro onagona dika nako ko nia fekatua eko ko nia rokatua,” de “Ngini ko idadiua o nyawa niatoma,” de “Ngini ko idadiua nitohiki,” de “Ngini ko idadiua niohafini o nyawa utu manga kiahonanga,” de naga utuoli to Una ai pareta ma demo. De ngaro naga ma ngoeika ai pareta ma demo, masara gea mata-mata de ka idadi hohidotoomuino ka ma moi de ma pareta ma demo moiinoli naa, abe inahipareta ato, “O nyawa utuika kiani niadora imaketero hoka ti ngini nia badanga ma hirete niodora.”

¹⁰ De nako ngone homakodora de o nyawa utuika, gea ma dorou ngone duru ko hodiaiua onangika. Ho genangino de duru itararono abe nako ngone homakodora gea Ma Jou ai Pareta ko hatilakurua masara duru itiai haniiki enangika.

^11-12 De naa ngohi tinihigaro tato ngini nianiiki ahi behehongo mata-mata abe tinihibehehongoka ahi hurata ma goronaka naa angamoi nanga gahe ka itigi moduku. Abe ma titi hatoli itigioka ma wange abe o Kristusu wonagoraka o duniaka de haiye. De gea hohioriki nako ma dodihiraino abe ahao hingaku Unangika de ma oraha naa, duru ma oraha nenangohi de itigioka ma oraha abe wonagoraka o dunia ma kangelaino. Ho ngohi tato kiani ngini nianiiki ahi behehongo nginika la niwihisanangi Unangika abe ahao wonagoraka dakuiye. De abe ma titi nanga oraha, gea ka idadi tohiketero hokonaa. Ma oraha naa abe Una ko wonagorakuahi de tohiromanga tato ngade-ngade hoka o futu ma goronaka ho o fufutuoka dika ngone homanoa. Ho ngone ma oraha naa homaketero hoka homaiduoka de nanga giooko ma goronaka naga, abe ma titi nanga wowangoino de o fufutu ma datoro hatobaniiki. Masara ka itigi moduku ai boa, de gea imaketero hoka ma wange ipotokaiha la ahao itebinoka. Ho naa adonoka ma oraha la ngone koaho homomikoka nanga giooko ma goronaino la howangoro. De gea homomiki la o fufutu ma datoro gea hanoaka de o dararono ma datoroli hotobadiai nanga wowango ma goronaka. De nako o dararono ma datoro, gea ena ma datoro abe inaduhunu de inadatoko la ufa o dorou inahikala ngoneino. Ho nanga datoro ma totiai gea tohiketero abe hoka o tentara ma nyawa manga dadatoko de manga dae abe ona yomahinoauku la yaparangi manga musuika. De hokogenangoo ngone kiani nanga datoro ma totiai hapake nanga wowangoka la ma dorouika ngone hatobalawana.

¹³ Ho nanga wowango ma dodagioka de kiani hatobaniiki o dararono ma datoro dika abe gea ka ma rorahai dika nanga datoro. De gea kiani hokonaa nanga wowango. Abe ko idadiua haniiki o rame-rame abe naga genangoka o nyawa yadalu-daluku de gea hiadono manga badanga ma hafini ho ona ko yomahiparetakaua. De ufaoo ngone inatobadaluku eko homakitigi de abe ko nanga fekatua eko nanga rokatua. De ngaro naga utu o howono abe nanga badangoka hahowono ma enangoo ko idadiua haniiki. De ufa ngone homaketeribuutu eko homaketetaleana.

¹⁴ Ho ngaro to ngone nanga badanga ma hafini ma dorou o kia dika naga, masara gea ufa homahigunoa la haniiki enangika hiadono ihihofoko o howono ngoneoka. Masara koaho ngone homaaduru abe hoka nanga Baluhu idodutu o Yesusu Kristusoli ai hininga ma datoro, la gea o nyawa inamake to ngone nanga wowango imaketero hoka to Unangoli ai wowango yamake. De ngone kiani hao nanga wowango hokogea angamoi hohioriki abe ka itigi moduku ma oraha abe Una wonagoraka o duniaino naa.