Roma 11 - Ma Jou ai Demo-demo o Totobelohoka

Ka nagahi o Yahudi ma nyawa utu iwingaku Ma Jouika

¹ De naa ngohi tonaleha moi la ma bobaluhu ka idadi hafikirohi. Ho sarakia, nako Ma Jou ai nyawa abe ma titi o Yahudi ma nyawa, bote ona gea mata-mata Ma Jou duru waolukoka eko sarakia? Koua, duru hokogenangua! Angamoi abeika ngohi naa ma hirete o Yahudi ma nyawa, de ko wohiolukua ngohino! Ho itararono abe ngomi ko mata-mataikaua womioluku. Abe ngohi naa o Yahudi ma nyawa ma gou-goungu, angamoi ngohi o Abarahaama ai toforauku. De to ngohi ahi tofora o Benyamini, abe mia tofora o Isiraele ai ngofaka. Ho gea igoungu abe ngaro ngohi o Yahudi ma nyawa, masara Ma Jou ko wohiolukua ngohino.

² De genangino de duru itararono abe Ma Jou ko ngomi mata-mataikaua womioluku, abe ngomi naa ma dodihiraino de Una womiirikoka la wato ngomi midadi to Una ai nyawa. De gea ngini marai ka niohiningahi abe ihitulihukuoka ma dodihiraino ma titi o Elia. Abe ma oraha gea de o Elia una wato bote ko moiokaua ai gogianongoru o Yahudi ma nyawaino abe ka iwingakuohi Ma Jouika. De ma titi duru ai hininga gea ihuha hiadono duru wihigurubungu Ma Jouika ma titi ai gogianongoru. De ma oraha gea o Elia wihigurubungu wato,

³ “Ahi Baluhu idodutu, ona gea yatoma-toma dika to Ngona ani uru ma dodofanga abe nahidingo-dingoto onangika. De o huhuba ma ngi enangoo yatobakilianga la ato ibootohi ngomi mimahuba-huba Ngonaika. Ho ngohi naa duru ka tomatengokahi ma hou abe toningaku Ngonaika, de ngohioo naa ona ihilingiri ngohi la ngohioo ihitoma.” Hokogea o Elia ai gurubungu ma demo Ma Jouika.

⁴ De abeika Ma Jou ai bobaluhu o Eliaika. De gea Ma Jou witemo unangika wato, “Ngona naa tanu ko nomatengoua dika abe nohingaku Ngohino. Angamoi nako onangino mata-mata abe tomadingakoka Ngohino la yodadi ahi nyawa, nagahi o nyawa yasana tumidi abe ona gea ko yomahubauahi o pangao o Baalika.” Hokogea Ma Jou wipaluhu o Eliaika ma dodihiraino.

⁵ De hokogenangoo abe idadi ma oraha naa naga. Abe ko ma titiua ma oraha naa de duru ko iwaka o Yahudi ma nyawa abe iwingaku Unangika, gea hokogenangua. Angamoi ma oraha naa de nagahi mia hou abe ngohi de ahi gogianongoru o Yahudi ma nyawaino abe ngomi ka wiwingakuohi Ma Jouika. Ho gea ngomi abe wiwingaku Unangika womihidadi to Una ai nyawa duru ma hohailoa. De hokogea womihidadi ma titi to Una ai hininga ma owaka dika de aino.

⁶ De mangale ngone hohioriki abe Ma Jou wonahidadi ai nyawa duru ma hohailoa ma titi ai hininga ma owaka dika ngoneino, ho gea ka idadi hohiorikoo abe duru ko ma titiua to ngone nanga datoro ma rorahai hiadono wonahidadi to Una ai nyawa. Angamoi nako gea ihititi nanga datoro ma rorahaioka, gea ko ihititiua abe to Una ai hininga ma owaka. De abe ai hininga ma owa gea ka wonahidoaka dika ngoneino, gea ena ko idadiua hamake abe nako ma titi to ngone nanga datorino. Masara ngaro Ma Jou wato wonahidoaka ai hininga ma owa ma amoko ngoneino ma nagahi o Yahudi ma nyawa ko manga ngoe abe yoluku yodafongo enangika.

⁷ Ho naa tohidotoomuino abe ahi demo naa de totemo tato ngaro ngomi o Yahudi ma nyawa duru mialingiri la miato Ma Jou womihitotiai ngomino, masara gea ngomi miwoe-woe ko miamakeua. Ho ngomi utu dika abe midadi Ma Jou ai nyawa duru ma hohailoa, ka ngomi gea abe Una womihitotiai. De nako mia gogianongoru utu o Yahudi ma nyawaino, ona gea ko amakeua masara ipahaino de manga pea idadi itogowinoka ma titi ona yoluku iwihigihene Unangika.

⁸ De gea ma dodihiraino de inahingahuokau Ma Jou ai Demo-demoino abe ahao hokogea idadi. De ihitulihukuoka ma dodihiraino itemo ato, “De Ma Jou wodiai o nyawa gea la to ona manga hininga ko kia-kiaua yataoko, abe imaketero hoka o nyawa duru manga giooko ma goronaka. Abe gea ngaro nagahi manga lako de manga ngauku masara ko idadiokaua yamake de yataoko abe ma titi Ma Jouoka de aino. De ona gea ka hokogenangohi manga hininga ka hiadono ma oraha naa naga.”

⁹ De naga utuoli Ma Jou ai Demo-demoka abe ma dodihiraino nanga tofora o Dautu wohitulihuku, de ma demo enangoo imakiniiki abe de ahi demo ma hidumutu nenangoka. Angamoi gea o Dautu womagahoko Ma Jouiye la wato manga musu manga parangi ma hidiai ko iwa. De gea o Dautu wotemo wato, “Ngohi tomagahoko la Ngona nahiruba ahi musu la yorubauku de hiadono manga hohowono yamake ma titi manga howo-howonino. De gea toigo la Ngona napake to ona ma hirete manga hiowa kohangoe abe Ngonaka de aino iboa la hiadono ona yamao mata-mata ka irorahai dika ho manga parangi ma hidiai ko iwa. La manga hiowa gea idadi hoka o modoi eko o batuku onangika angamoi to ona manga hininga itagi ka manga hiowaikahi ilamoko ho ma oraha ngomi manga musu miangohama de ngomi ahao miahitodokana. De genangoka de ona yorubauku de manga hohowono yamake.

¹⁰ De tomagahokoo la Ngona ahi musu manga lako nahihorioka la ko idadiokaua yomahioriki, de manga gorona gea ka ihikaika nohifuguku abe imaketero hoka o gilaongoli manga gorona.” Hokogea o Dautu ai gogahoko ma demo Ma Jouiye ma dodihiraino abe ma titi ai musu, de hokogenangoo ma oraha naa abe Ma Jou wodiai o nyawa manga hiningaika abe ona ka yoluku iwihigihene Unangika. De hokogea wodiai onangika la genangino de manga hininga ko idadiokaua yataoko ma titi abe to Una ai Demo-demoino. De hokogea idadi abe o Yahudi ma nyawa yowoe-woeika ma oraha naa. De idadi hokogea onangika mangale ma titi ona ka yomahinganonohi enangika abe ona ihiromanga ato manga hiowa, de gea o Musa ai Paretaika abe ona ka yomahinganonohi. Ho gea tanu o Musa ai Pareta enangoo idadioka hoka o modoi onangika. Angamoi ona yomatemo ato, “Nako ngone ka ihikaika haniiki o Musa ai Pareta de ahao Ma Jou wonaetongo wato ngone o totiai ma nyawa hodadioka.” Ho mangale ma titi manga hininga hokogea hiadono ona yoluku yodafongo Ma Jou ai hininga ma owa abe ka wonahidoaka dika ngone o nyawaino. Ho gea ma titi hiadono Ma Jou wahirubauku o Yahudi ma nyawa gea.

¹¹ De naa moioli tonaleha abe ma titi o Yahudi ma nyawa yowoe-woe abe yorehene Ma Jouoka de aino de yorubauku. Ho sarakia, ona gea yorubaka de duru ko yomomikokaua ka hiado-adonika? Duru hokogenangua! Angamoi ka idadiohi ona yomomikokali! De tanu mangale ma titi ona o Yahudi ma nyawa yahowonoka Ma Jouika de yomahirehene Unangoka de aino ho ma oraha naa de ngini abe ko o Yahudi ma nyawaua ngini naga nia ngekomo Ma Jouika. Abe ma titi ka idadi Ma Jou winihihohe nia howo-howonino de nginioli niamake o wowango ma ngango Unangoka de aino. De duru ti ngini nia wowango ma ngango gea abe Ma Jou wapake la wato o Yahudi ma nyawa ka idadi initaleana nginika de hiadono onangoo yoigo ato o wowango gea ka idadi yomahitoona. De nako hiadono initaleana hokogea de ahao ka idadi ona iwigilio Ma Jouika la onangoo yamake to Una ai hiowa onangika.

¹² Ho abeika ma titi naa ena hongano-nganonohi. Angamoi hohioriki abe ma titi o Yahudi ma nyawa manga howo-howonino hiadono o dunia ma nyawa utu yamake ma ngekomo duru ma rorahai Ma Jouika. De gea ma titi ona o Yahudi ma nyawa yorubauku hiadono ngini abe ko o Yahudi ma nyawaua nginioli Ma Jou winihidadi to Una ai nyawa. Ho gea de ahao ngini niamake Ma Jou ai hiowa kohangoe. Ho nako o Yahudi ma nyawa manga howonino de ka idadiohi inihiutumu nginika, gea ahao ma utumu hokokia ma amoko idadi abe ma oraha o Yahudi ma nyawa yolio de iwidafongoli Ma Jouika? De gea nako ona iwidafongoli, ahao duru ilamokoholi to ngone mata-mata nanga hiowa de nanga garago ma oraha gea.

¹³ De naa naga ahi demo abe tinihidumutu nginika abe ko o Yahudi ma nyawaua. De ngone naa hohiorikoka abe ngohi todadi Ma Jou ai hidingoto ma nyawa abe tinihingahu-ngahu ngini ko o Yahudi ma nyawaikaua, de gea ngohi duru tohikurutiye abe ahi tagongo gea nginioka.

¹⁴ De ngohi tonganono abe ahi tagongo ma goronaka de ka idadi tahitaleana ahi gogianongoru o Yahudi ma nyawaka de o wowango ma hungi, la onangoo yoigo yodadi hoka nginioli, de gea tonganono la ma bahauku de ona utu ka idadi Ma Jou wahihohe manga howo-howonino hiadono onangoo yamake o wowango ma ngango.

^15-16 De ngohi duru tonganono abe ahao o Yahudi ma nyawa ko manga ngoe yolioli de iwingaku Ma Jouika mangale ma titi to ngomi mia totofora o Abarahaama de ai ngofa-ngofakuku onangoo duru iwingaku Ma Jouika. De abeika honganonohi ahi hiketero naa. Nako o tarigu o pupuka moi de genangino ma hohutulu hale de haharongo la idadi o roti, de ipahaino de ma roti gea homahihuba Ma Jouika, de gea hohioriki abe ngaro ma roti eko ngaro ma pupuka mata-mataika masara ena Ma Jou ai himangoka duru itebini. De hokogenangoo nako de o gota. Abe nako o gota o utu moi la ma ngutuku gea Ma Jou womadingakoka de wohiromanga enangika wato itebini, gea ma gota ma jagaoo enangoo itebini ai himangoka. Ho ahi hiketero ma demo hinootoino gea de ngohi tato nako Ma Jou wihiromanga o Abarahaamika la wato wotebini ai himangoka, gea itararono abe ai totoforauku o Yahudi ma nyawa onangoo yotebini ai himangoka. De gea ma titi hiadono ngohi duru tonganono abe ahao ngomi o Yahudi ma nyawa mata-mata de ka idadi Ma Jou womikokietongo abe mitotiaioka to Una ai himangoka! De ma oraha abe ona o Yahudi ma nyawa yamake o wowango de ngone duru hamao ihohailoa! Angamoi ngaro ma dihiraino abe ma oraha ona iwioluku Ma Jouika, masara barikua de nagahi ma hofoko ma rorahai genangino, abe ma titi manga ngolukino gea hiadono o dunia ma nyawa Ma Jou wahikadameoka ona de Una. Ho nako ahao ma oraha adonoka abe ahi gogianongoru o Yahudi ma nyawa iwidafongoli Ma Jou, de duru genangohi ihohailoa, angamoi gea ahao imaketero abe hoka Ma Jou wahimomikoli ona manga honengoka de aino la onangoo yamake o wowango!

O hiketero abe ma titi o gota ma jaga

¹⁷ De naa ngohi ka idadi tonahiketero moi la ngone honganonohi abe ma titi nanga borigogao Ma Jouika. De nako ngomi o Yahudi ma nyawa, ngomi naa tomihiketero de o gota o utu moi o saitunu abe Ma Jou watobapaliara enangika. Masara ipahaino de to ena ma jaga utu Ma Jou watobiki de waumoika. De nako ngini ko o Yahudi ma nyawaua, nginioli tinihiketero de o saitunu ma gota moioli abe ena ma hirete iwangoiye o fonganoka ho ko iwa abe yatobapaliara enangika. De ipahaino de to ena ma jaga utu atobiki de ihigagao abe o saitunu ma gota ma roehika abe o baliaraino la genangokali ma jaga iwango. Ho ma oraha naa de nginioo abe ko o Yahudi ma nyawaua, nia gogao naga Ma Jouika abe imaketero hoka ngomioli abe ma dodihirainohi de mia gogao naga Unangika. De naa nginioo niamake ma hidoku abe Ma Jou ai saitunu ma gota ma hakino abe ma ngutukoka de aiye itagi ma jaga mata-mataika. De gea ahi demo ma titi abe nginioo niamake Ma Jou ai hiowa abe ma dodihiraino de Una wihibehehongo o Abarahaamika, de naa ai hiowa gea igila-gila de itagi abe o Abarahaama ai totoforauku mata-mataika. Ho mangale ma titi abe ngini ko o Yahudi ma nyawaua gea nagau Ma Jou ai gotaka de de ngomi abe o Yahudi ma nyawaka, ho gea nginioo ka idadi Ma Jou ai hiowa niamake abe imaketero hoka ngomioli.

¹⁸ De gea igoungu nagau ti ngini nia ngi Ma Jou ai gotaka, ma ngaro hokogea masara ko idadiua nimahikurutiye ngini ma hirete de ko idadiua nimietongo ngomi o Yahudi ma nyawa niato ngomi ko kia-kiaua. Angamoi ufa ngini niawohanga abe o gota ma jaga homoi-homoi gea yamake ma inomo ma ngutukoka de aino, de duru ko ma iwa abe ma ngutuku ma inomo yamake ma jagaino. De hokogenangoo ngini naa abe ko o Yahudi ma nyawaua angamoi ngini niamakeoka ma utumu ngomi o Yahudi ma nyawaino. Ho ma titi ena gea ngini ufa niawohanga.

¹⁹ De marai naga utu nginioka nitemo niato, “Masara Ma Jou winiolukoka ngini o Yahudi ma nyawa imaketero abe hoka o gota ma jaga watobiki la wato ngomioli naa abe ko o Yahudi ma nyawaua womihigagao to Una ai gotaka ho ngomioli midadioka to Una ai nyawa.”

²⁰ De nako hokogea nia demo, de ngohi ahao tinipaluhu tato gea niagoungu. Masara ufa niawohanga abe naga moi dika ma titi hiadono Ma Jou watobiki ahi gogianongoru de watingakika. De gea ma titi abe ona ko iwa manga ngongaku Unangika. De nako ngini, genangoo ma titi moi dika hiadono ngini naga Unangoka, de gea nia ngongakuino. Gea dika ma titi abe nimakohowono de ahi gogianongoru abe Ma Jou watingakika. Ho koaho ufa nimasade genangino masara tanu irahai ngini nimahitiari de nimahidodiai genangino.

²¹ Angamoi ma dihiraino de Ma Jou duru ko wanoaikaua abe o Yahudi ma nyawa yoluku iwingaku Unangika. Abe ma oraha ona iwioluku Unangika de hiadono watingakika imaketero abe hoka to Una ai gota ma jaga watobiki de watingakika. Ho nako to Una ma hirete ai gota ma jaga de ka idadi Una watingakika, gea hongoli o homoaino ma jaga abe gea ka ihigagaoika dika to Una ai gotaino! Ho enangoo ma ka idadi watingakika, ho ngini abe ko o Yahudi ma nyawaua koaho nimahitiari done nginioli niwiporete de ahao inihikatingaka Unangoka de aino.

²² Ho abeika hohidifikiri abe Ma Jou ai hininga ma mobole, de nagali Ma Jou ai hininga la wadotoko o nyawaika ma titi yoluku iwingaku Unangika. Abe nako ona iwiporete Unangika, ona gea yamake manga dodotoko Unangino. Masara nagali ai hininga ma mobole abe ngini ko o Yahudi ma nyawaikaua angamoi ngini ka nimanoahi ai hininga ma rorahaioka. Ho nako ngini niwiporete ho ko nimanoakauali Unangoka, gea ahao nginioo winitobiki de winitingakika Unangoka de aino imaketero abe hoka ahi gogianongoru o Yahudi ma nyawa abe Una watingakika.

²³ De nako o Yahudi ma nyawa gea ahao iwigilio de iwingakuoli Ma Jouika, de gea ahao Una wahigilio abe manga dingii ma dodihiraino la yodadiokali to Una ai nyawa. De Una duru de ai hiakunoka abe hokogea wahigilio, de gea imaketero abe hoka ai gota ma jaga ihira-hiraika wagorakoli de wohigagaoikali to ena ma dingiika ai gota ma roehika. Ho ahao abe ma oraha to Una ai Yahudi ma nyawa iwingakuoli Unangika de kiani Ma Jou wahigilio la manga gogao Unangika nagali abe hoka ma dodihiraino.

²⁴ De gea ka idadi ngone hohioriki abe Ma Jou wakunu wahigilio ai nyawa angamoi Una nengokadau de winihidadi ngini abe ko o Yahudi ma nyawaua la nidadi to Unangoli ai nyawa. De ai datoro gea duru hoheranga angamoi ma dodihirainohi de duru ko ma iwa idadi hokogea. De gea ka idadi ahi hiketero tagorakoli la utuohi tinihitararono Ma Jou ai datoro gea. Abe kangano de tinihiketero ngini hoka o saitunu ma gota o fonganoka de to ena ma jaga watobiki de wohigagaoika o saitunu ma gotaika abe o baliaraino. De gea ma datoro moi abe ngone duru hoheranga hamake, angamoi ngini ko o baliarainoua ma jaga. Ho nako Ma Jou ka wakunu waleino o fonganino ma jaga de wohigagaoika o gotaika abe o baliaraino, gea hatoli igapanga nako ma saitunu ma jaga ihira-hiraika de wohigagaoikali to ena ma hirete ma dingiioka la genangokali iwango. Abe ahi hiketero ma titi ufa hoheranga abe ahao Ma Jou wagorakoli to Una ma hirete ai nyawa ma dodihiraino de wahigilio manga dingiioka de wahiromangoli to Una ai nyawa! Angamoi Ma Jou duru de ai hiakunoka la wonahiaturu hokogea!

²⁵ Ahi gogianongoru o ngongakuoka, de naa ngohi toigo tinihingahu nginika o dogogono moi abe ma dodihirainohi de o nyawa ko ihiorikuahi. Masara gea ko tinihingahuahi de tinihitiariohi nginika tato done nimagorakiye ngini ma hirete de niwihitipokouku o Yahudi ma nyawaika. Ho ngohi naa tinihingahu dika ma dogogono nginika abe hokokia Ma Jou ai hidee la ahao idadi o Yahudi ma nyawaika. Abe ma oraha naa o Yahudi ma nyawa ko manga ngoe ka yolukohi iwingaku o Kristusika, masara hokogenangua abe ka hiado-adonika hokogea. Angamoi naga Ma Jou ai hidee ma titi ngini ko o Yahudi ma nyawaua abe hokokia ahao nia ngoe abe niwingaku Unangika. De nako hiadono adonoka nia ngoe gea abe wohideeoka, gea ahao o Yahudi ma nyawa manga hininga hatoli ko itogowinokaua.

²⁶ De ma oraha gea ahao o Yahudi ma nyawa ko manga ngoe Ma Jou waduhunu manga howo-howonino. De gea ahao idadi imaketero abe hoka ma dodihiraino de ihitulihukuoka Ma Jou ai Demo-demoka, abe itemo ato, “De Una abe iwihiromanga nanga Duduhunu, ahao Una gea woboa o Yerusaleeme ma kotaka de waino, de gea woboa la to ngone o Yahudi ma nyawa nanga howono wagoraka, la ngoneoka nanga howo-howono ko iwaka.”

²⁷ De naga moioli ai Demo-demoka abe imakiniiki de ma demo gea, abe Ma Jou wotemo wato, “Ahao ma oraha gea de Ngohi tahingodumu ahi behehongo ma demo onangika abe Ngohi taofi to ona manga howo-howono.” Hokogea itemo ai Demo-demoka. De ai Demo-demoino gea de ka idadi hohioriki abe ma oraha adonoka de ahao o Yahudi ma nyawa ko manga ngoe Ma Jou waduhunu manga howo-howonino.

²⁸ De igoungu ma oraha naa de o Yahudi ma nyawa ko manga ngoe yaolukoka o Abari ma Rorahai, de genangino de yomahidadi to Ma Jou ai musu. De abe manga hininga la iwioluku Unangika de tanu gea idadioka ti ngini nia utumu angamoi ma oraha naa de nginioli niamakeoka Ma Jou ai hiowa nginioka. Masara ngaro hokogea iwioluku ma nagahi Ma Jou ai dora onangika, angamoi ma dodihiraino de ona yodadioka to Una ai nyawa duru ma hohailoa. De nagali ma titi moioli hiadono Ma Jou ai dora ka itagiohi o Yahudi ma nyawaika. Angamoi naga ai behehongo abe wahibehehongoka to ngomi o Yahudi ma nyawa mia totofora yohira-hiraika, abe o Abarahaama, de o Isaka, de o Yakubika. Abe gea wahibehehongo wato ona de manga totoforauku ahao yakokimake to Una ai hiowa duru ma amoko onangika. Ho genangino de duru itararono abe Ma Jou ai dora nagahi o Yahudi ma nyawaika.

²⁹ De gea duru ko idadiua Ma Jou wawohanga abe wahibehehongoka de hiadono ko wohingodumua. De hokogenangoo de Ma Jou ai hiowa, abe nako hiadono ai hiowa wahidoakoka o nyawaika, gea duru ko wagorakokauali onangoka de aino. De genangino de ka idadi hohioriki abe Ma Jou Una ahao wahiowa o Yahudi ma nyawaika angamoi ma dodihirainohi de wahibehehongoka onangika.

^30-31 De igoungu abe ngini ko o Yahudi ma nyawaua ma dodihiraino de ka niolukohi niwingaku Ma Jouika. De ngini ma oraha gea nimaketero dika de o Yahudi ma nyawa abe ma oraha naa angamoi onangoli naa de yoluku iwingaku Unangika. Masara mangale ma titi ona iwioluku Unangika hokogea hiadono naa ma duru de ngini niamake Ma Jou ai hininga ma dora nginika. De abe imaketero hoka ngini niamakeoka Ma Jou ai hininga ma dora nginika, hokogenangoo ahao o Yahudi ma nyawa onangoli ai hininga ma dora itagi onangika.

³² Ho abeika honganonohi Ma Jou ai hininga. Abe Una wonahitaanoka abe ngone o nyawa mata-mataika naga de nanga howonoka. Abe ngaro ngone o Yahudi ma nyawa eko koua, masara gea ngone ka homakadaene dika to Una ai himangoka. Masara hokogea Ma Jou wonahitaana nanga borihowonoka la wato ka idadi womahimatoko ai hininga ma dora ngone o nyawa mata-mataino abe ma oraha wonaduhunu nanga borihowonino! Ho abeika Ma Jou ai hininga ma dora ma amoko ngoneino!

Ma Jou ai hininga kohaamoko ngoneino hiadono ngone o nyawa duru ko haboaikaua genangika

³³ Abeika hokokia ma amoko Ma Jou ai hininga ma dora ngoneuku! Abe gea duru ilamokoholi ngoneino! De ngaro to Una ai sosawaro eko ai tobahioriki masara duru ko iwa ma batingi, abe duru kohalukuku de kohagurutiye. De abe ma titi to Una ai putuhu de abe hokokia ai hininga ma dodagi la wohikaaturu de wohingodumu mata-mata ai hiningaka, gea ngone o nyawa duru ko haboaikaua genangika.

³⁴ De ahi demo gea duru imakiniiki de abe ihitulihukuoka ma dodihiraino ai Demo-demoka abe itemo ato, “Mode onagona de ihioriki to nanga Baluhu idodutu ai hininga? Gea duru ko moiua! Eko mode onagona abe ka idadi iwidotoko Unangika la iwiduhunu ai demoino?”

³⁵ De imaketero hoka Ma Jou ai sosawaro de ai tobahioriki duru kohagurutiye, hokogenangoo to Una ai hininga ma dora la wonahidoaka ngoneino. Abe ai Demo-demoka de itemo ato, “Una gea o hidoaka mata-mata ma titi Unangoka, de ngaro o kia dika naga, masara gea duru ihira iboa Ma Jouoka de aino. Ho mode o nyawa onagona naga abe ka idadi iwihidoaka moi Unangika la manga hidoaka gea ihititi onangoka de aino? Gea duru ko iwa! Ho mangale ma titi ko idadiua hahidoaka moi Unangika, ho duru itararono abe Ma Jou duru ko iwa ai nagimi ngone o nyawaino.”

³⁶ Hokogea itemo ma dodihiraino, de gea ngone ka idadi hohioriki abe ai demo gea ena igoungu angamoi hohiorikoo abe duru mata-mataika idadi Unangoka de aino. De ngaro o kia dika naga, ma gea mata-mata naga to Una dika ai kuahaka. De mata-mataika Una wohidadi la genangino de wamake o higiriiri. Ho gea duru itiai abe ai dulaada mata-mataika iwihigiriiri Unangika naa de ka hiado-adonika! De hokogea duru igoungu. Amin. Ho naa tohidotoomuino ahi demo mata-mata abe kanganoinohi. De gea tinihingahu nginika abe ahao Ma Jou wohingodumu ai behehongo ma demo abe ma dodihiraino de wahibehehongoka o Yahudi ma nyawaika, la ka idadi onangoli yamake ai hiowa ma amoko onangika.