Roma 10 - Ma Jou ai Demo-demo o Totobelohoka

¹ Ahi gogianongoru o ngongakuoka abe o Roma ma kotaka, ngohi naa ma moioli tinihingahu nginika ahi hininga ma dola abe ma titi ahi gogianongoru o Yahudi ma nyawaika. Abe ngohi duru toigo la tato ona gea ka idadi Ma Jou waduhunu manga howo-howonino. De ngohi ka ihikaika tagahoko Ma Jouiye ma titi ona.

² De gea ngohi duru tahioriki abe ona manga hiningaka de duru yamagawe la ato iwihisanangi Ma Jouika hiadono manga howono ka idadi waofi. Masara ngaro ona naga de manga magaweoka ma manga hininga gea ko imakiniikua de ma dodotoko ma gou-goungu.

³ Abe ona yataoko ko itiaiua ma ngekomo hokokia ona yaniiki hiadono Ma Jou wadafongo de waetongo wato ona yototiai ai himangoka, angamoi ona ihitaili yomahitotiai ona ma hirete. Abe ona ato ka idadi to Una ai Pareta dika yanii-niiki de genangino ahao waetongo yototiai ai himangoka. Masara abe ona ato yomahitotiai ai Paretaino de gea ona yoluku yomahitipokouku la yaniiki Ma Jou ai ngekomo la Una waetongo onangika yototiai.

⁴ De abeika tinihitararono moi ma titi Ma Jou ai Pareta gea. Abe ma Pareta ma demoino de inahidumutu o Kristusika, de ma bahauku de igoungu abe o Kristusu wohingodumu ma Pareta gea. De o Kristusu Unangoo Ma Jou ai ngekomo la o nyawa yamake ai totiai, abe Una wato ngone onagona dika hingaku o Kristusika de gea Ma Jou wonalega de wonaetongo ngone hototiai ai himangoka. Ho mangale ma titi o Kristusu wohingodumu ma Pareta de abe Ma Jou wonahidoaka ai totiai ma titi nanga ngongakuino dika o Kristusika, ho ibootohi o nyawa yanii-niiki to Una ai Paretaika la ato yomahitotiai genangino! Masara ahi gogianongoru yowoe-yowoe o Yahudi ma nyawa ona yoluku Ma Jou ai ngekomo gea o Kristusino ho Una ko waetonguahi yototiai. De gea ma titi hiadono ngohi duru tagahoko la ona ka idadi iwingaku o Kristusika.

O Yahudi ma nyawa ko idadiua yomahiliba-liba Ma Jou ai himangoka

⁵ De abe ma titi Ma Jou ai ngekomo la waetongo o nyawaika wato ona yototiai ai himangoka, igoungu abe o Yahudi ma nyawa utu ko yaniikua ai ngekomo gea. Ho ona ka yaniikohi manga ngekomo moioli, abe ona ato yomahitotiai ma titi yatobaniiki o Musa ai Paretaino. Masara naga moi o Musa ai demoino abe inahitararono ato ma ngekomo gea duru ko igapangua la genangino de Ma Jou waetongo o nyawa wato yototiai. De o Musa ai demo gea koaho o Yahudi ma nyawa duru yatailako enangika. Abe ma dodihiraino de o Musa una ma hirete wohitulihuku wato, “Abe nako o nyawa duru ka ihikaika yaniiki itiai ma pareta de ko ma iwa abe yatilakuru, gea ahao yamake o wowango ka hiado-adonika ma titi genangino.” Hokogea o Musa ai demo ma titi o Pareta, de ai demoino gea de ka idadi hohioriki abe duru ko igapangua Ma Jou waetongo o nyawa yototiai ma titi o Pareta yanii-niiki.

^6-7 Masara abe Ma Jou ai ngekomo la wonaetongo hototiai ai himangoka, gea ma ngekomo abe ko ihuhaua haniiki de abe hatoli igapanga hataoko. Angamoi Ma Jou wonahimatokoka ngoneino abe kiani o nyawa iwingaku o Kristusika la genangino de Una waetongo yototiai. De ai hingahu ma demo gea duru itararono ngoneino, ho ufa hiadono o nyawa yomahiliba-liba ato ko iwingakuahi o Kristusika angamoi Ma Jou ai ngekomo gea ihuha yataoko eko ko itararonuahi. Ho ahi demo naa ka imakadaene dika de o Musa ai demo abe ma dodihiraino de wahitiari o Yahudi ma nyawaika wato koaho yomangiriki la yaniiki Ma Jou ai demo onangika. Abe o Musa wotemo wato, “De ufa ngone homaleha nanga hiningaka hato, ‘Done onagona yodoa daku o Horogaiye?’” Ho ngone ufa homaleha hokogea angamoi tanu ngone hohiorikoka abe o Kristusu wagou-goungu woboaukuoka ngoneuku, ho ngaro ufa o nyawa yodoa daku o Horogaiye la iwiao Una daku de wauku. De naga moioli o Musa ai hitiari ma demo onangika abe ngohi tagoraka. Abe ngohi tato ufaoo ngone homaleha hato, “Done onagona youti dau abe o hone-honenge ma ngiuku?” De ngohi tato ufa hokogea homaleha angamoi hohiorikoka abe o Kristusu wagou-goungu womomikoka ai honengino, ho ngaro ufa de o nyawa youti dau o hone-honenge ma ngiuku la iwiao o Kristusu ai honengoka de waiye! De gea nanga lelehaino de homahiliba-liba dika abe imaketero hoka homahingahu hato ko hohiorikua nako o Kristusu wagou-goungu woboaukuoka naa o duniauku de ipahaino de womomikoli ai honengoka de aino. Ho mangale ma titi gea hohiorikoka de duru itararono ngoneino ho ibootohi o bodo ma leleha gea homaleha-leha, angamoi gea ka homahiliba-liba dika!

⁸ Ho ngaro ufa de homahiliba-liba hato ko hohiorikua Ma Jou ai ngekomo angamoi ai hingahu ma demoino de duru itararonoka ngoneino. De genangoo ka imaketero dika hoka o Musali ai demo, abe ma dodihiraino de o Musa wahigaro o Yahudi ma nyawaika wato ona ihiorikoka Ma Jou ai hingahu ma demo onangika, abe o Musa wotemo wato, “Ma Jou ai hingahu ma demo duru ko ikurutikaua, abe tanu ena gea naga ti ngini nia uruoka de ti ngini nia hiningakaoo.” De o Musa ai demo gea ma dumutu duru imakiniiki de to ngohioli ahi demo ma oraha naa, abe ma titi Ma Jou wonahitararonoka ai ngekomo abe Una woigo ngone haniiki. De ma hingahu ma demo abe nagau ngoneoka, gea ma titi ma hingahu abe ngomi naa minihingahu-ngahu nginika. De gea minihingahuoka ho naa ma hou ngini niangaku dika mia hingahu ma demoika la genangino de Ma Jou ka idadi winietongo nitotiai to Una ai himangoka.

⁹ De naa utuohi tinihitararono Ma Jou ai ngekomo gea abe genangino de Una waetongo o nyawa yototiai. De ai ngekomo abe wonahingahuoka, gea ma demoino de inahigaro ngoneino la o nyawa manga himangoka de nanga hininga ma dola homahingahu nanga uruino abe hato o Yesusu Una gea nanga Baluhu idodutu. De itararono abe nanga uru ma demo gea ihititi nanga hiningaka, ho ma hingahu ma demo gea inahigaro la hongakuoo nanga hiningaka abe ma titi Ma Jou wihimomikoka o Yesusu ai honengoka de aino. Ho nako hokogea homahingahu nanga uruoka de aino de abe hongaku nanga hiningaka, de gea Ma Jou wonaduhunu nanga howo-howonino.

¹⁰ Angamoi nako nanga hiningaka de hongaku ma titi abe Ma Jou wihimomiki nanga Baluhu idodutu o Yesusu ai honengoka de aino, de hiadono nanga uruoka de homahingahu o nyawa manga himangoka ma titi nanga ngongaku gea, de genangino ma titi hiadono Ma Jou wonahitotiai de wonaduhunu ngone nanga howo-howonino. Gea dika ma ngekomo haniiki la Ma Jou wonaetongo ngone hototiai. De duru ma hingahu ma demo ena gea abe ngomi miahingahu-ngahu o nyawaika, de gea ko ihuhaua o nyawa yongaku enangika.

¹¹ De ngone ka idadi duru hohioriki de hongaku abe Ma Jou wonaduhunu nanga howo-howonino la nanga hohowono ko inadaenokauali angamoi Una ma hirete hokogea wonahibehehongoka. Abe to Una ai Demo-demoka naga moi abe itemo ato, “Onagona dika abe iwingaku Unangika, ona gea manga hiningaka duru ko ietekua ma titi Una.” Hokogea ma dodihiraino de ihitulihukuoka, de genangino ka idadi duru hohioriki abe Una ko wonahohowonua masara wonaduhunu ngone ma titi nanga ngongaku Unangika. De naga ma titi moioli ka idadi hagoraka ai demoino gea, abe gea ma demo ma goronaka de itemo ato “onagona dika” ka idadi iwingaku Unangika.

¹² Ho ma demoino gea de ka idadi hohioriki abe ngaro o Yahudi ma nyawa eko abe ko o Yahudi ma nyawaua, masara ko homakohowonua Ma Jou ai himangoka, angamoi ngaro onagona dika iwingaku Unangika de ona gea Ma Jou wadafongo de waetongo yomaketero dika Unangoka. De Una gea to ngone mata-mata nanga Baluhu idodutu, abe ngaro onagona dika yomagahoko Unangiye la waduhunu, masara gea ona mata-mataika duru waduhunu de wahiowa onangika de o hiowa kohangoe.

¹³ De ahi demoino gea de duru imakiniiki de Ma Jou ai Demo-demoka moi abe ma dodihiraino ihitulihukuoka ato, “Onagona dika abe yomagahoko o duduhunu nanga Baluhu idodutuika, ona gea ahao waduhunu manga hohowonoka de aino.” Hokogea ai demo abe ma dodihiraino ihitulihukuoka.

¹⁴ Masara abe ngini o Yahudi ma nyawa, ngini ko nia ngoeohi abe Ma Jou ko winiduhunuahi nia howo-howonino. De marai nia hiningaka nimatemo niato, “Masara bote naga utu ngone o Yahudi ma nyawaino abe ko yamakeuahi Ma Jou ai duduhunu mangale ko yoihenuahi ma titi nanga Baluhu. Ho done sarakia de o nyawa yomagahoko o duduhunu Ma Jouiye nako hoka ona gea ko yoihenuahi ma titi nanga Baluhu? Gea ko idadiua!” Marai hokogea nimatemo doka nia hiningaka, masara ngohi tato gea o hiliba-liba dika ma demo! De gea nia demo nia hiningaka marai hokonaa igila-gila nimatemo, niato, “De nako hoka o nyawa ko yoihenuahi ma titi Una, gea done sarakia de iwingaku Unangika? De nako o nyawa ko moiuahi yoboa onangika de yahingahu-ngahu ma titi Una, gea done sarakia ka idadi o nyawa yoihene ma titi to Una ai demo?

¹⁵ De nako o nyawa ko yahidingotuahi onangika la yoiki yahingahu-ngahu, gea done sarakia de ma hingahu ma demo gea itagi onangika? Ho gea tanu duru irahai nako hoka Ma Jou wahidingoto o nyawa abe yatobahingahu-ngahu ma titi nanga Baluhu idodutu la genangino ka idadi iwingaku Unangika. La gea ahao o nyawa yosanangi yadafongo abe ona yatobahingahu-ngahu gea.” Marai hokogea nimatemo nia hiningaka. De tanu nia demo gea imakiniiki de Ma Jou ai Demo-demo moi abe ma dodihiraino ihitulihukuoka ato, “Nako hiadono o nyawa yatobahingahu-ngahu o Abari ma Rorahai yomahiadono ngoneino, gea ngone haetongo hato duru ihohailoa to ona manga boa.” Hokogea ma demo abe ihitulihukuoka ma dodihiraino. Masara abe ma titi o Abari ma Rorahai itagi, gea ka idadi hohioriki abe ma dihirainohi de Ma Jou ai Abari ma Rorahai wohidingotoka o nyawaika, masara ko mata-mataua yodafongo ai demo gea la yongaku enangika.

¹⁶ Masara nako nginioka naga niafikiri niato bote o Yahudi ma nyawa ko yamakeuahi Ma Jou ai duduhunu manga howonino angamoi ma titi ko yoihenuahi ai Abari ma Rorahai, gea ngohi kiani tinipaluhu hokonaa. De gea ngohi tato igoungu o Yahudi ma nyawa yoihenoka Ma Jou ai Abari ma Rorahai abe ai hidingoto ma nyawaino, masara ona ko mata-mataikaua yodafongo ai abari gea. De gea imaketero dika abe hoka ma dodihiraino idadioka ma oraha Ma Jou ai uru ma dodofanga o Yesaya wahingahu-ngahu Ma Jou ai demo ai gogianongoru o Yahudi ma nyawaika. Abe ma oraha gea de o Yesaya wotemo Ma Jouika wato, “Ahi Baluhu, ngomi naa miahingahu-ngahuoka ani hingahu ma demo, masara bowahu o nyawa ka yamuruono dika naga abe yangaku enangika.” Hokogea o Yesaya ai hininga ma huha ma demo ma dodihiraino, de hokogenangoo abe ngohi tamake ma oraha naa naga o Yahudi ma nyawaka. Ho igoungu abe Ma Jou ai hingahu ma demo gea itagioka o Yahudi ma nyawaika masara ona ka yoluku yodafongo enangika.

¹⁷ De o Yesaya ai demoino gea de utuohi itararono abe kiani o nyawa yoihenokahi o hingahu ma demo la ahao ka idadi yangaku enangika. De gea ngohi tato kiani o nyawa yotoihene Ma Jou ai hingahu ma demoika ma titi o Kristusu la ahao naga manga ngongaku enangika.

¹⁸ De abeika naa tonaleha. Angamoi ngone hohiorikoka abe ma hingahu ma demo itagioka ma titi o Kristusu. De hohiorikoo abe gea ena dika o nyawa yoperelu yotoihene enangika la ahao naga manga ngongaku. Ho done ma titi o kia hiadono o Yahudi ma nyawa ko manga ngoe ko yangakuahi o Kristusu ai demoika? Bote ona ko yoihenuahi ma titi Una eko sarakia? Masara kangano ngone hamake abe ona o Yahudi ma nyawa ona gea yoihenoka. De hongoli ngone ka idadi hohioriki abe ona gea yoihenoka angamoi naga ma hingahu moi Ma Jou ai Demo-demoka abe itemo ato, “Ona abe yotobahingahu-ngahu ma titi Ma Jou, ona gea to ona manga ilingi itagioka o dunia ma amokika, de to ona manga demo-demo abe ihingahu-ngahuoka, gea ko iwaka ma ngi o duniaka naa abe manga demo ko adonikaua genangika.” Hokogea ma dodihiraino itemo to Una ai Demo-demoka. Ho ma demoino gea de itararono abe o Yahudi ma nyawa yoihenoka abe ma hingahu ma demo ma titi o Kristusu. De mangale yoihenoka ho ngone hohioriki abe ona ko idadiokaua yomahiliba-liba ato, “Ou, ko moiua inahingahu ngoneino to Una ai abari, ho done sarakia de hangaku enangika?” Duru ko idadiokaua ona ihititi genangoka!

¹⁹ De marai o nyawa utu ahao ka yoleha ato, “Sarakia, bote o Yahudi ma nyawa gea ko yataokua ma titi ma hingahu ma demoino, de gea ma titi hiadono ko yangakua enangika?” Masara ngohi topaluhu tato ona gea tanu yataokoka ma titi genangino. De gea duru hohioriki abe o Yahudi ma nyawa yataoko ma hingahu ma titi angamoi ngaro ona abe ko o Yahudi ma nyawaua ho to onangohi manga tobahioriki ma titi Ma Jou ka ikuranga nako de ti ngini, masara ona gea ka idadi yataokoka. Ho genangoo de ko idadiua nimahiliba-liba genangino, abe ko idadiua niato, “Ngone ko hangakua enangika angamoi ma titi ko hataokua genangino.” Duru ko idadiua nihititi genangoka! De abeika, duru ma dodihiraino de o Musa una ma hirete wopaluhu ma leleha gea. Abe una wohingahu abe hokokia o nyawa abe ko o Yahudi ma nyawaua ahao yodafongo o Abari ma Rorahai. Abe ma dodihiraino de o Musa wohitulihukuoka Ma Jou ai demo abe Ma Jou wotemo o Yahudi ma nyawaika wato, “De Ngohi ahao tinihitaleana de o nyawa utuoli, angamoi ahao Ngohi tahiowa o nyawa utu abe ma dodihirainohi de ona duru ko ihihiorikua Ngohino. De ona abe ma dodihirainohi de ko kia-kiaua manga tobahioriki, ona gea abe ahao Ngohi tapake la ngini duru ningamo.” Hokogea o Musa ai demo ma dodihiraino, de genangino ka idadi hohioriki abe o Yahudi ma nyawa duru yataoko Ma Jou ai hingahu ma demo. Angamoi o homoa ma nyawa gea ka idadi iwihioriki Ma Jouika la hiadono Una wahiowa onangika, de genangino ma titi hiadono o Yahudi ma nyawa yataleana onangika de yangamo manga hiningaka. Ho nako ona ko o Yahudi ma nyawaua de ka idadi yataoko Ma Jou ai hingahu ma demo, gea duru itararono abe o Yahudi ma nyawa onangoo ka yakunu yataoko ma hingahu ma demo ma titi. Masara hiokoo abe ona ko yangakua ma demoika gea.

²⁰ De abe ma titi ona ko o Yahudi ma nyawaua abe ma oraha naa de iwihioriki Ma Jouika, gea ka o Musaua dika abe ma dodihiraino de wohitulihuku ma titi gea. Abe Ma Jou ai uru ma dodofanga o Yesaya unangoo ma dodihiraino de wohitulihuku Ma Jou ai demo ma titi o nyawa onagona abe iwihioriki Ma Jouika hiadono Una waetongo ona yototiai, de abe ma titi onagonali iwioluku Ma Jouika. De o Yesaya ai demoka de duru wotomoroini wahiree-reeika ma demo angamoi boteua de ai gogianongoru o Yahudi ma nyawa ko yosanangiua ai demo ma dolaika. Abe o Yesaya ai bukuoka de Ma Jou Una wotemo wato, “Ona abe ma dodihiraino de ko ihilingirua Ngohi, ona gea ipahaino de ihimake. De ona abe tanu ko yoleha-lehaua ma titi Ngohi, ona gea Ngohi tomahimatoko onangika.” De duru hokogea abe idadioka ma oraha naa, angamoi ona ko o Yahudi ma nyawaua iwihioriki Unangika hiadono waetongo yototiai.

²¹ Masara nako Ma Jou ai demo abe ma titi o Yahudi ma nyawa manga hininga, gea duru imakohowono. Angamoi ngaro Ma Jou duru woigo la onangoo waduhunu abe imaketero hoka ona ko o Yahudi ma nyawaua waduhunu, masara to Una ai nyawa gea ka iwioluku Unangika. Abeika Ma Jou ma hirete ai demo ma dodihiraino abe Una wotemo wato, “Ngohi naa ma deka-dekanuku tahoko onangika la tato ona yolio Ngohino la tadafongoli, masara ona gea ka ihikaika ihilawana de manga hingounu Ngohino ko iwa.” Hokogea ma dodihiraino ihitulihukuoka ma titi o Yahudi ma nyawa iwioluku Ma Jouika, de hokogenangoo ma oraha naa naga, angamoi to ona manga hininga ka hokogea dika Unangika. Ho gea ka idadi ngone hohioriki abe o Yahudi ma nyawa barikua ona yoihenoka de ihiorikoka o Kristusu ai hingahu ma demo abe o Abari ma Rorahaiino, masara ona ka yoluku yangaku enangika. Ho gea itararono abe duru manga ngolukino dika ma titi hiadono ona ko manga ngoe ko yamakeua Ma Jou ai duduhunu manga howo-howonino.