Nehemia 4 - Ma Jou ai Demo-demo o Totobelohoka

O Yerusaleeme ma kota ma dadaduhu duru yamagawe yodiai

¹ De igoungu naga o nau-nauru abe duru ko yosanangiua ngomino ma titi o Yerusaleeme ma kota ma dadaduhu mihigokokali. Abe naga womatengo onangoka gea abe duru wongamo ma titi ngomi miboa nenangino, ai romanga o Sabalata, una woihene ngomi mimulaengoka ma kota ma dadaduhu mihigokoli. Ho ka de woihene ma titi gea de ai ngamo duru idogo hiadono de ma dohatoka ho una woboa ngomino de womihohedu ngomi o Yahudi ma nyawa.

² De gea o Sabalata woboa de wao ai gogianongoru de nagaoo o Samaria ma nyawa manga tentara yamuruono naga. Ho o Sabalata gea womahitigi ngomino la ngomi mata-mata ka idadi ai demo mikokiihene, de woboaka wato, “Abeika o Yahudi ma nyawa naa abe duru ko iwa manga buturungu, ho o kia ka idadi yodiai? Ho done sarakia ona yadiaiokali abe duru irusakoka? Duru ko kia-kiaua idadi! Ho ona parahaja dika yomagao manga huhuba naangino! Ona ato yomataiti yodiaioli masara ona duru yobodo. De done sarakia ona yafikiri o kota ma dadaduhu yafafoiyeoli de o hakaru abe idadi o waleokahi dika? Abe o hakaru gea yatufukoka ho done ahao sarakia yapakeoli?” Hokogea o Sabalata de ai ngamo womihohedu abe mia karajaanga ma goronaka.

³ De o Sabalata ai dodiawo o Tobia abe una o Amono ma nyawa, una naga o Sabalata ai datekoka de wohidogo ai hohedu ma demo, wato, “Iya, ona abeika gea duru itorou yodiai abe ngaro ka o fongana ma kaho ma eteteke imapaata genangiye de ka iturabakali ngaro o hakaruino yodiai!” Hokogea ona ihitaili imihimaleke ngomi.

⁴ De manga demo gea toihene de ngohi tomaniata, tato, “Nomihigihene to ngomi mia Jou, angamoi ona imihoheduholi. Ngaro to ona manga hohedu ma demo naa nahikilioro onangika! De ngaro onangoo ahao yodadi o nyawa utu manga huhuloko abe yataokoka de yao o tonaka utuikali abe hoka ma dihira idadi mia gogianongoruika!

⁵ Ngona to ngomi mia Jou ho ufa nanoaika ona abe yomahitaanoka to ona manga howono! De ufa manga howono naofi angamoi imihohedu ngomi to Ngona ani nyawa abe mia karajaanga la ani kota mihidadiokali.” Hokogea ahi niniata ma demo Ma Jouika.

⁶ Ho ngomi migila-gila dika mia karajaanga o dadaduhu gea mihigokoli. De angamoi mia nyawa duru yamagawe manga karajaangika ho hiadono ahao yatogoronaiye o kota ma dadaduhu gea abe yadiai o hakaruino abe yafafoiye. De gea ma kota mihigilolitinoka de ma dadaduhu abe ahao yatogoronaiyeoka. De gea idadi angamoi mia nyawa de manga hininga ma gahumu yokarajaanga.

⁷ Masara ahao o Sabalata de o Tobia, de o Arabino ma nyawa, de o Amono ma nyawa, de o Asodo ma nyawa ona mata-mata yoihene abe ngomi mikarajaanga migila-gila. De ngomi ngaro o dadaduhu naga ma ngi-ngi abe duru ikiliangoka ka hiadono ma tonakuku, masara enangoo mimulaengoka miatamunu de o dadaduhu ma hungi. Ho ka de o abari gea yoihene de ona abe imidohata gea duru yongamo.

⁸ De imihidee ato yoboa la imiparangi ngomino abe naga o Yerusaleeme ma kota ma goronaka. Hokogea manga hidee la imihikapusaka ka hiadono ngomi ko mikarajaangokaua.

⁹ Masara ngomi mimagahoko mia Jouiye de ngomi utu mikarajaanga de utu ona yodadi mia gogoana o wange-wangeiye de ngaro o futu-futuiye la ka ihikaika mimahidiai mimaduhunu.

¹⁰ De ahao o Yehuda ma nyawa yomulaenge yokurubungu ato ona mata-mataika yomulaengoka yamao yabole. De ona ato, “Abeika o kota yodokilianguku ho ma wale itou-touniye kohangoe hiadono ngomi ko miapoaua ma wale miaumo nako ka ngomi dika mikarajaanga.”

¹¹ De ma oraha o Yehuda ma nyawa yotemo hokogea de mia musu onangoo yomakoketemo, ato, “Nako ngone homahidodiai hangika ona marai ahao ko inamaoua ho ka idadi ngone hatoma de manga karajaanga naa duru ahao itogumoka.”

¹² Masara naga o Yahudi ma nyawa abe yogogere yomakadateke de mia musu gea, ho ona ihigali-gali yoboa imihingahu manga hidee itorou gea. De gea ka hiadono ma ngi abe o kiaka ka idadi ona ato imingino la imihibinaaha enangoo mia gogianongoru genangoka ka idadi imihingahu.

¹³ Ho ngohi, o Nehemia, mia nyawa tahiaturu manga fam ma dodoomuoka mata-mataino la kiani naga manga dae homoi-homoiika la ka idadi yaparangi mia musuika nako yoboa. Ho ngomi utu migila-gila mikarajaanga masara utu de manga doomuoka naga de manga dia, de manga kuama, de manga toimi yomahidiainoka. De ona yogoana o dadaduhu ma ngi-ngioka abe ka enangohi igapanga mia musu yowohama genangino.

¹⁴ De ahao mata-mataika tatailako ibooto de ahao nanga hihira de ona abe yokokurutiye manga doomuoka tahokino. De yomatoomuino ahi himangoka de ngohi ka tahiree-reeika dika onangika tato, “Ngini ibooto niamodongo nanga musuika gea! Kiani ngini nimahinganono to ngone nanga Baluhu wokokurutiye abe Una naga! De Una wonahiheranga angamoi Una wopoputurungu! Ufa gea niawohanga de kiani niaparangi nanga musuika la niaduhunu nia gogianongoru! De kiani niadatokoo nia ngofa-ngofaka o nauru de o ngofeka, de nia feka-fekata de ona mata-mata nia tau homoi-homoiika!” Hokogea tahigaro ona mata-mataika.

¹⁵ De ngaro hokogea mia musu manga hidee itorou masara Ma Jou wohiaturu la manga hidee gea mihiorikoka ho manga hidee gea ko idadiua ihigila-gila. Ho ngomi miogilio o kota ma dadaduhika abe genangoka to ngomi homoi-homoiika naga mia karajaanga angamoi manga hidee Ma Jou wahikapusaka ho ko idadiuali.

¹⁶ De o wange gea de imahikaika ahi nyawa taregu la ma oraha o regu moi yokarajaanga de o regu moioli yao manga dae o kuama, de manga toimi, de o dadatoko ma baju de o parangi ma dadatoko. Ho o regu gea yomaokoino manga pore-poretoka la yagoana ona abe o dadaduhu yokarajaanga.

¹⁷ De ona abe o dadaduhu ma kiahonanga yadota-dotaka onangika abe o hakaru yofafoiye ona yokarajaanga ihigiama moi dika de manga giama ma hononga yasoino manga dae.

¹⁸ De ona mata-mata homoi-homoiika naga manga dia o humaranga yomahidubuluino abe ngaro ka manga karajaanga ma goronaka. De naga ahi dodiawo womatengo de ai guguli de una ka ihikaika wohiniiki ngohi ahi datekino.

¹⁹ De ahao ngohi ahi hitiari ma hingahu kiani tahingahu ahi dodiawo mata-mataika ho o Yahudi ma nyawa manga hihira de abe ona yokokurutiye manga doomuoka de mia gogianongoru utu ona mata-mata tahokinoli. De ka de yomatoomuino de ngohi tahihingahu onangika tato, “Abeika to ngone nanga karajaanga irupa-rupa de duru iwoatika ma ngi-ngi homoi-homoiika hokarajaanga o dadaduhoka hiadono homakitingaka ma gurutika.

²⁰ Ho ngohi de ahi dodiawo naa abe wao-ao ai guguli minidulu-dulu moduku nia karajaanga ma goronaka de nako naga itodokanino nanga musu inaparangi una ai guguli wawuwu la itemo kohaamokiye. Ho nako ka de niihene ai guguli wawuwu de ngini utu kiani nimataiti niboa ngomino. Hokogea ngone hodiai de abeika Ma Jou ahao waparangi nanga musuika!” Hokogea totemo de ona ihigihene.

²¹ Ho to ngomi mia karajaanga mihigila-gila dika de o nau-nauru utu imigoana de manga dae ma oraha o nau-nauru utuoli yokarajaanga. De o wange-wangeiye ka de imulaenge itebini duru o ngoru-ngorumino de yomulaengoka yokarajaanga de ko yomatogumua ka hiadono o murumu ipooteke.

²² De ngohi tahingahu onangika yotobakarajaanga abe ma titi ona manga tau naga o kota ma poretoka, tato, “Ngini abe nia biaha o futu-futuiye nilio nia tauika ibootohi hokogea. Utuohi irahai ngini homoi-homoiika de nia duduhunu nimaidu nenangoka o Yerusaleeme ma kota ma goronaka dika. Hokogea la nia duduhunu ka idadi yodadi to ngone mata-mata nanga gogoana ngaro o wange de ngaro o futu-futuoka.” Hokogea ahi hingahu onangika de yosanangi dika yaniiki.

²³ De ngaro ngohi eko ahi ria-dodoto eko ona abe ihiduhunu ngohi eko ona yotobakokarajaanga ma ko moiua ngomioka mia pakeanga miaturuuru ka hiadono o kota ma dadaduhu gea miabooto. De ma dekanino gea ngomi homoi-homoiika mimagaoino mia dae ngaro miloiki o akere dika mimahionoko.