Nehemia 2 - Ma Jou ai Demo-demo o Totobelohoka

O koano o Ata-saasta wihidingoto o Nehemia o Yerusaleeme ma kotaika

¹ De duru o koano o Ata-saasta ai taongo monaokoka abe wohikoano, de o wange moiuku abe o mede o Nisana adaene, de o wange gea ngohi naga o koano ai tauoka hoka ahi biaha la ka idadi tileleani ai akere. De naga ai nyawa yoboa ngohino iwigao o koano ai angguru ma teongo ma gohaka ho ai angguru gea tale de toboa unangino de tihidoaka la ka idadi waokere. De o wange gea ahi hininga duru ihuha ngaro ma dihiraino ko ma moiuahi ma oraha o koano tileleani de ngohi ahi hininga de ma huhaka hokogea. Masara naa ahi huha naga ka hiadono ahi himanga itafukuoka.

² Ho o koano wohileha ngohino, wato, “Nehemia, ngohi tonimake hoka ngona ko inigogamua masara ko ma moiuahi tonimake de ani himanga itafukuoka hokonaa. Marai ani hininga duru de ma huhaka e?” Hokogea o koano wohileha de ngohi duru tohawana.

³ Masara topaluhu de ahi horomati ma demo hoka mia biaha mitobatemo o koanoika gea abe miato, “Ngaro o koano wowango ka hiado-adonika!” Ho ngohi hokogea totemo de ahao tomahinghu unangika tato, “De ahi koano, nagoungu, ahi hininga ma huha marai ka idadi namake ahi himangoka. Masara done sarakia de ngohi ko tohuhaua angamoi toihene ahi totofora manga kota duru aturabahoka. O kota genangoka abe ahi totofora yalungunoka gea ma ngoranoo ma dadatoko duru ma dekanoka yakokitufukoka de mata-mataika ato bari duru yakokiturabahoka hiadono igoungu ma kota gea ko iwaka. Ho ngona o koano duru nagoungu, ka de o hingahu gea toihene de duru ahi hininga ihuha.”

⁴ Hokogea ahi hininga tomahingahu o koanoika de una wohileha, wato, “Marai ngona noigo nohihingahu ngohino abe hokokia noigo la ngohi toniduhunu e?” Ka de hokogea o koano wotemo de duru ngohi tomataiti tomagahokohi Ma Jouiye abe Una o Horogaka.

⁵ Ho jai-jai dika tomaniata de ahao topaluhu unangika, tato, “Nako o koano nosanangi nohihigunoa, de nako ahi leleani o koanoika itiai hiadono nohisanangi ngohino, de ngohi togahoko la ngona nohihidingoto o kotaika gea abe naga o Yehuda ma tonakoka. Angamoi ngohi toigo la o kota gea tohigokoli abe genangoka ahi totofora manga lungunu naga.” Hokogea ngohi o Nehemia tomagahoko o koanoika.

⁶ De ma oraha gea o koano ngoi fekata naga mogogeruku ai datekoka de una wopaluhu ngohino, wato, “Ho naa tonileha sarakia ani gahe ani dodagi ma goronaka? De kiani tonilehali ani dodagi naika de hiadono nolioino gea hokokia ani dekana?” Hokogea o koano wotemo ngohino de tohioriki una wosanangi wohiduhunu.

⁷ Ho ngohi tomagahokoli unangika tato, “De nako ngona o koano nohisanangi nohiduhunu ahi dodagi ma goronaka ngohi tomagahoko o dodagi ma hurata notulihi ani gogubernuurika la ona ka idadi ihiduhunu. Hokogea tomagahoko la ma oraha totagi de o tonaka to ona manga kuahaka tatilakuru de ka idadi ani hurata tahidoaka ona homoi-homoiika. Abe ngohi kiani toiki o Efaraata ma akere ma honongaika abe o wange ma dumuniha idateke. Ho o propinsi ma gubernuuru yamuruono naga abe ngohi toboa manga tonakino de ngohi toperelu to ngona ani hurata onangika la ngohi ko kia-kiaua ma kangela tamake ahi dodagi ma goronaka ka hiadono tomahiadono o Yehuda ma tonakika. Sarakia ka idadi ani duduhunu o hurata gea tomagahoko o koanoika?

⁸ De nako ka idadi ngohi o hurata moioli toperelu abe ma dumutu o Asafika, abe una waso ma hiaturu to ngona o koano ani fongana, angamoi ngohi ahao toperelu duru o gota ma ngoe. Ho togahoko la o Asafa wohihidailako o kota ma dadaduhu ma ngorana ma liate ma ago-agomo. O kota ma ngorana ma amoko gea duru itigika de to ngomi mia Jou ai Tau. De o liate utuohi tapake abe ma oraha o kota ma dadaduhu tohigoko. De tomahilooa masara to ngohi ma hirete ahi tau ma gota enangoo toperelu, ho sarakia ahi koano ka idadi nohiduhunu de ma hurata mata-mata gea?” Hokogea tomagahoko o koanoika de tohioriki ahi Jou duru womalega ngohino de ai dora ho Una wohiaturu ka hiadono o koano wohigihene de wosanangi ahi gogahoko wohingodumu.

⁹ Abe o koano ahao wohihidailako ahi hurata gea mata-mata de naga wohiaturu hiadono naga ihiniiki ahi dodagioka ai tentara ma hidimono yamuruono naga de yahihira manga tentara ma doomu moi abe mata-mataika yapake de o kuda. Ho ngomi mia ngoe miloiki de ka de miboa o gubernuuru homoi-homoiika manga tonakino de tahidoaka manga hurata abe o koanoino. De ngohi hokogea tahikokigetongo ka hiadono o tonaka mata-mata abe imaritonakika de o Efaraata ma akere abe ma hononga idateke o wange ma dumuniha. Angamoi ngohi o tonaka ma propinsi mata-mata gea kiani tatilakuru.

¹⁰ Masara naga o nauru yahinooto abe yogogere o Samaria ma tonakoka abe imakitingaka ko ikurutikaua de o Yerusaleeme ma kota de ka de ona yoihene toboa la taduhunu o Yahudi ma nyawa de ko yosanangiua. Womatengo o Bete-Horono ma kota ma nyawa ai romanga o Sabalata de ai dodiawo o Tobia abe una o Amono ma nyawa manga hidimono. Ona yahinooto gea duru ko yosanangiua ahi dodagi ma dumutu abe toigo ahi gogianongoru o Yahudi ma nyawa taduhunu. Ho o Sabalata de o Tobia manga hiningaka duru yohuha hiadono yongamo ngohino abe duru yalawana to ngohi ahi hideeika gea.

O Nehemia wotailako o Yerusaleeme ma kota ma dadaduhu ma rusaka

¹¹ Ho o Yerusaleeme ma kotaika ngohi tomahiadono de genangoka tomahiaini hiadono o wange hangeino.

¹² De ahao ahi futu hange de ma futuku gea abe duru o futu gorona de tairiki ahi dodiawo o nauru yamuruono dika la ihiniiki ma oraha toiki totailako o Yerusaleeme ma dadaduhu ma rusaka. De naga o aewani moi dika ngomioka de gea o keledai abe ngohi tobarenuku ma poretoka. De ngohi ko ma moiuahi o nyawa tahingahu onangika abe hokokia ahi Jou wohihigaro ahi hiningaka la o Yerusaleeme ma kota tohigokoli.

¹³ De o futu gea ngohi o Yerusaleeme ma kotaka tohupu tapake abe ihiromanga o Dola ma Ngorana la o Yerusaleeme ma kota ma dadaduhu tatailako abe naga ma dihiraino yakiliangoka de ma ngorana ma dadatoko mata-mataika yakokitufukoka. Ho ngomi o kotaino mihupuoka de miboa o jobuubu moiino abe ma romanga o Naga ma Aewani ma Jobuubu. De o jobuubu gea itigioka de o kota ma dadaduhu ma ngorana abe ma romanga o Wale ma Ngorana.

¹⁴ Genangoka de migila-gila la ngohi tatotailako ka hiadono toboa o Jobuubu ma Ngoranika abe genangoka o akere o nyawa yobaakino abe ihiromanga o Koano ai Taaga. Masara ko idadiua towohama ma ngoranika gea angamoi iefotoholi hiadono ko idadiua ahi keledai iboa genangino.

¹⁵ Ho o futu gea togila-gila dika o kota ma dadaduhu taniiki abe idateke ma dolaika. Masara o kota ko takilolituahi totailako de ka tolio ahi poretoko de ngohi de ahi dodiawo miwohamoli o Dola ma Ngorana abe kangano mihupu genangino.

¹⁶ De ma oraha gea o kota ma dimo-dimono ko ihiorikuahi abe ma titi ngohi toboa ho o futu gea totagi-tagi de ona ko ihihiorikua abe ngohi o kiaika toiki de ngaro ahi dumutu ma ko ihiorikua. De gea angamoi to ngohi ahi hidee ko tahingahuahi o Yahudi ma nyawaika ngaro ona abe yodadi o hidemo Ma Jouika, eko to ona manga balu-baluhu, eko manga popareta ma nyawa ma ona mata-mataika ko tahingahuahi. Ho ngaro ona mata-mata ahao ihidodiawo la mimakuduhunu mia karajaanga ma goronaka, masara ma oraha gea ko tahingahuahi angamoi o kota ma dadaduhu tato kiani totailakokahi de ahao ahi hidee ka idadi tahingahu onangika.

¹⁷ Ho de ahao ona mata-mata gea ngohi tatoomuino de tahingahu onangika, tato, “Abeika to ngone nanga kangela abe nanga hininga ma huha ihititi genangika. Nanga kota ma ayo naa o Yerusaleeme abe ka ma moi de ma dadaduhu duru irusakoka de ma ngorana yakokitufukoka. Ho naa de ahi higaro nginika tato, abeika o Yerusaleeme ma dadaduhu hohigokoli la ufa ka ihikaika howango de nanga hininga ma huha ikiriakaholi.”

¹⁸ De ahao tahingahuoli onangika abe hokokia Ma Jou de ai dora ma hiokoo wohiduhunu la hiadono duru toigo toboa naangino la ngohi ka idadi ona taduhunu. De tahingahuoo abe o koano ai demo ngohino hiadono wohihidingoto la toboa o Yerusaleemino. Ngohi toade-ade mata-mata gea ibooto de ona ka ma moiiye ihipaluhu, ato, “Ho nako gea, kiani ngone mata-mata homulaenge homakuduhunu nanga kota hohigokoli ma hungi.” Hokogea yotemo de yomulaengoka yokarajaanga o karajaanga ma rorahai gea.