Nehemia 1 - Ma Jou ai Demo-demo o Totobelohoka

O Nehemia ai niniata ma demo Ma Jouika

¹ Naa o Nehemia ai ade-ade abe una ma hirete wotulihuku, de to una ai baba o Hakalia. De o Nehemia wotulihi ai ade-ade, wato, “Hokonaa idadi ahi wowangoka o Kisewe ma mede ma goronaka ma oraha o koano o Ata-saasta wohikoano o Peresia ma tonakoka ngade-ngade ai taongo monaoko ma dekanino. Ma oraha gea ngohi o Nehemia naga o Susana ma kotaka abe gea o kota ma amoko o Peresia ma tonakoka. De o kota ma goronaka naga togogere ma hononga iloku-loku abe yakurunga de ma dadaduhu ma gurutiye. De ngohi naga daku o Susana ma kota ma honongaka gea.

² De naga ahi gogianongoru womatengo ai romanga o Hanani de ai dodiawo yamuruono naga abe yomakiniiki yoboa o Yehuda ma tonakoka de yaino. De ngohi tatutumu onangika de taleha abe ma titi nanga gogianongoru o Yahudi ma nyawa abe ma dihira yahihupu manga tonakino masara ma oraha naa de yoliokali genangika. De talehali onangika abe ma titi nanga kota o Yerusaleeme.”

³ De ona ihihingahu ngohino, ato, “De abe nanga gogianongoru ona utu yao o tonaka utuika manga ngoe yolioka nanga tonakika de ona gea ka hiadono ma oraha naa ka yowangohi. Masara ngaro yogogere nanga tonakoka ma, duru manga huha ilamoko abe yodadioka o nyawa utu manga hohedu ma ngi. De nako nanga kota o Yerusaleeme duru aturabahoka de o kota ma ngorana ma dadatoko duru yakokitufukoka ho ko iwaka.”

⁴ Ka de ngohi toihene ibooto manga ade-ade ma titi mia gogianongoru de mia kota o Yerusaleeme de togogeruku de toari. De ahao o wange muruonino naga de ahi gogianongoru manga huha toogari de ko tolomua abe tomaniata dika Ma Jouiye abe wogogere o Horogaka.

⁵ De hokonaa tomaniata, tato, “Ma Jou o Yawe, Ngona Ma Jou abe nogogere o Horogaka, Ngona Ma Jou abe duru nopoputurungu de ngomi o nyawa miheranga enangika abe Ngona nodiai. Ngona Ma Jou abe ani dora ma behehongo duru ko nanoaikaua onangika abe inidora Ngonaika de inihingounu abe ani behehongo yaniiki.

⁶ Ho naa ngohi duru tomagahoko la ahi niniata naa Ngona nohigihene, de duru nomalega ngohiuku ma oraha ngohi ani gilaongo naa tomagahoko Ngonaika. O wange de o futu abe Ngona nohigihene abe ahi gogahoko ma titi ahi gogianongoru o Isiraele ma nyawa. De ahi gogianongoru gea onangoo inileleani Ngonaika abe onangoo hiadono yodadioka to Ngona ani gogilaongo. Ngohi tomangaku abe to ngomi mia howono ma ngoe abe ngohi de ahi gogianongoru miahowonoka Ngonaika.

⁷ Ngomi midiai duru itorouholi Ngonaika! Ngomi ko minihingounua abe ngaro ani huhuloko ngomino, de ngaro ani behehongo ngomino, masara ko minihigihenua. De ani pareta gea abe ani duduhunu o Musaino abe una gea nipake la ka idadi womihidoaka ani pareta gea, masara ngomi o Isiraele ma nyawa enangoo ko mianiikua. Abe ngaro ma oraha mia totofora gea de ngaro ngomi ma oraha naa naga masara ka ihikaika mirehe-rehene dika to Ngona ani mauoka de aino.”

⁸ “Ahi Jou duru tomagahoko Ngonaika la nomahohininga ani demo abe nihidoaka ani duduhunu o Musaika abe Ngona nihingahu unangika nato, ‘Ngini o Isiraele ma nyawa de Ngohi nia Jou homahiketehibehehongoka.’ De Ngona nato, ‘Nako ahao nanga behehongo gea ngini ahao niawohanga hiadono ko nianiikokaua de ngini ahao tinihikatingaka nia tonakino naa de Ngohi Ma Jou tinihikabarihi o tonaka utuikali.

⁹ Masara ngaro hokogea Ngohi tinihikabarihoka masara ngini nako nilio Ngohi nia Jouino de nianiikoli ahi behehongo de ahao ma oraha gea tinidafongoli. Abe ngaro nia nyawa abe tahihupu nia tonakino hiadono manga gogere naga o tonaka abe imakitingaka de to ona manga tonaka duru kohagurutika, masara ka idadi ahao tahigilioli. De angamoi manga tonaka gea ena abe Ngohi tairikoka la idadi ahi gogere ma ngi. De ahi mau la ahi gogere ma ngioka gea o nyawa ahi romanga yagorakiye de manga horomatioka.’”

¹⁰ “Hokogea ani behehongo onangika ahi Baluhu. Ho ngohi o Nehemia naa tato irahai tonihihohininga ma titi ani demo o Musaika gea, abe ma titi o Isiraele ma nyawa abe nahidadi ani gogilaongo. De ani nyawa gea Ngona nahihupu manga kangelaino abe nabangu de ani buturungu de ani kuaha kohaamoko.

¹¹ Ahi Baluhu, ngaro Ngona nototoihene ani gilaongo naa ahi niniata ma demo! De naga ani gogilaongo utu abe de manga garago ani romanga yagorakiye ma oraha yomaniata, ho ngohi tonganono to onangoo manga niniata nohigihene. De ngohi ani gilaongo tomagahoko la o wange naa nohiduhunu ngohi la ma oraha tileleani o koano nenangoka de una duru wohisanangi ngohino.” Hokogea ngohi o Nehemia ahi niniata ma demo Ma Jouiye. De ngohi ma oraha gea tomaniata de naga to ngohi ahi tagongo abe totobaleleani o koano o Ata-saasta ai akere.